Kannadaprabha The New Indian Express
ಐಸಿಎಎನ್ ಗೆ 2017ನೇ ಸಾಲಿನ ನೊಬೆಲ್ ಶಾಂತಿ ಪುರಸ್ಕಾರ 
By select 
06 Oct 2017 02:00:00 AM IST

ಒಸ್ಲೊ: ಪರಮಾಣು ವಿರೋಧಿ ಅಭಿಯಾನ ಸಂಘಟನೆಯಾದ ದಿ ಇಂಟರ್ ನ್ಯಾಷನಲ್ ಕ್ಯಾಂಪೇನ್ ಟು ಅಬಾಲಿಶ್ ನ್ಯೂಕ್ಲಿಯರ್ ವೆಪನ್(ಐಸಿಎಎನ್) ಗೆ 2017ನೇ ಸಾಲಿನ ನೊಬೆಲ್ ಶಾಂತಿ ಪುರಸ್ಕಾರ ಲಭಿಸಿದೆ.

ವಿಶ್ವಾದ್ಯಂತ ಸುಮಾರು 100 ವಿವಿಧ ದೇಶಗಳ ಸರ್ಕಾರೇತರ ಸಂಘಟನೆಗಳ ಒಕ್ಕೂಟ ಐಸಿಎಎನ್ ಆಗಿದೆ. ಅಂತಾರಾಷ್ಟ್ರೀಯ ಕಾನೂನಿನಡಿಯಲ್ಲಿ ಪರಮಾಣು ಶಸ್ತ್ರಾಸ್ತ್ರಗಳ ನಿಷೇಧವನ್ನು ಸಾಧಿಸಲು ನಾಗರಿಕ ಸಮಾಜದಲ್ಲಿ ಈ ಸಂಘಟನೆ ಪ್ರಮುಖ ಪಾತ್ರ ವಹಿಸುತ್ತದೆ. 

ಪರಮಾಣು ಶಸ್ತ್ರಾಸ್ತ್ರಗಳ ಬಳಕೆಯಿಂದ ಮಾನವೀಯ ದುರಂತಗಳ ಪರಿಣಾಮ, ಅದರಿಂದಾಗುವ ಅನಾಹುತ ಮತ್ತು ಇಂತಹ ಶಸ್ತ್ರಾಸ್ತ್ರಗಳ ಬಳಕೆಯನ್ನು ನಿಷೇಧಿಸುವಲ್ಲಿ ಸಂಘಟನೆ ಅವಿರತವಾಗಿ ಪ್ರಯತ್ನಿಸುತ್ತಿದೆ. ಇದನ್ನು ಗುರುತಿಸಿ ನಾರ್ವೆ ಮೂಲದ ನೊಬೆಲ್ ಪ್ರಶಸ್ತಿ ಸಮಿತಿ ಸಂಘಟನೆಯನ್ನು ಶಾಂತಿ ಪ್ರಶಸ್ತಿಗೆ ಆಯ್ಕೆ ಮಾಡಿಕೊಂಡಿದೆ.

ಪರಮಾಣು ಮುಕ್ತ ಜಗತ್ತನ್ನು ಸೃಷ್ಟಿ ಮಾಡುವುದು ನಮ್ಮ ಗುರಿಯಾಗಿದೆ ಎಂದು ನೊಬೆಲ್ ಸಮಿತಿ ಪ್ರಶಸ್ತಿ ಪ್ರಕಟಿಸುವ ಸಂದರ್ಭದಲ್ಲಿ ಹೇಳಿದೆ. ಹೊಸ ನಿರ್ದೇಶನ ಮತ್ತು ಹೊಸ ಚಟುವಟಿಕೆಗಳಿಗೆ ಪರಮಾಣುರಹಿತ ಜಗತ್ತು ನಾಂದಿ ಹಾಡಲು ಐಸಿಎಎನ್ ಸಂಘಟನೆ ಹಿಂದಿನಿಂದಲೂ ಪ್ರಯತ್ನಿಸಿಕೊಂಡು ಬಂದಿದೆ ಎಂದು ಹೇಳಿದೆ.


Copyright � 2012 Kannadaprabha.com