ಹಿನ್ನೋಟ 2019: ಬ್ಯಾಂಕ್ ವಿಲೀನದಿಂದ ಈರುಳ್ಳಿ ಕಣ್ಣೀರವರೆಗೆ- ಅರ್ಥವ್ಯವಸ್ಥೆ ದುಸ್ಥರ ಗ್ರಾಹಕ ತತ್ತರ!

ಇನ್ನೊಂದು ವರ್ಷಾಂತ್ಯ ಬಂದಿದೆ. ಈ ಸಮಯ ಭಾರತ ಸೇರಿ ಜಾಗತಿಕ ಅರ್ಥ ಜಗತ್ತಿನಲ್ಲಿ ಏನೇನೆಲ್ಲಾ ಮಹತ್ವದ ವಿದ್ಯಮಾನ ನಡೆದವು ಎಂದು ಮೆಲುಕು ಹಾಕುವ ಚಿಕ್ಕ ಪ್ರಯತ್ನ ಇದು.

Published: 25th December 2019 01:45 PM  |   Last Updated: 27th December 2019 02:40 PM   |  A+A-


ಹಿನ್ನೋಟ 2019: ಬ್ಯಾಂಕ್ ವಿಲೀನದಿಂದ ಈರುಳ್ಳಿ ಕಣ್ಣೀರವರೆಗೆ- ಅರ್ಥವ್ಯವಸ್ಥೆ ದುಸ್ಥರ ಗ್ರಾಹಕ ತತ್ತರ!

Posted By : Raghavendra Adiga
Source : Online Desk

ಇನ್ನೊಂದು ವರ್ಷಾಂತ್ಯ ಬಂದಿದೆ. ಈ ಸಮಯ ಭಾರತ ಸೇರಿ ಜಾಗತಿಕ ಅರ್ಥ ಜಗತ್ತಿನಲ್ಲಿ ಏನೇನೆಲ್ಲಾ ಮಹತ್ವದ ವಿದ್ಯಮಾನ ನಡೆದವು ಎಂದು ಮೆಲುಕು ಹಾಕುವ ಚಿಕ್ಕ ಪ್ರಯತ್ನ ಇದು. ಜಗತ್ತಿನೆಲ್ಲೆಡೆ ಆರ್ಥಿಕ ಕುಸಿತ ಕಂಡುಬಂದಿದ್ದು ಈ ವರ್ಷ ಪೂರ್ತಿ ಅದರ ಪ್ರಭಾವವಿತ್ತು.ಸೌದಿ ಅರೇಬಿಯಾ, ಬ್ರಿಟನ್ ಸೇರಿ ಘಟಾನುಘಟಿ ರಾಷ್ಟ್ರಗಳು ಸಹ ಆರ್ಥಿಕ ಹಿಂಜರಿತದಿಂದ ತೊಂದರೆ ಪಟ್ಟಿದೆ. ಇದಕ್ಕೆ ಭಾರತ ಸಹ ಹೊರತಲ್ಲ.ಜಾಗತಿಕ ಅರ್ಥವ್ಯವಸ್ಥೆಯ ಕುಸಿತದ ಪರಿಣಾಮ ಭಾರತದ ಜಿಡಿಪಿ ಬೆಳವಣಿಗೆ ಮೇಲೂ ಆಗಿದೆ. ಕೈಗಾರಿಕಾ ಬೆಳವಣಿಗೆ ದರ ಕುಸಿದಿದ್ದು ವಸತಿ,. ವಾಹನೋದ್ಯಮಗಳು, ಸೇರಿ ಹಲವು ಮೂಲಭೂತ ಸೌಕರ್ಯ ಉತ್ಪನ್ನಗಳ ಮಾರುಕಟ್ಟೆ ಕಳಾಹೀನವಾಗಿದೆ. ಬ್ಯಾಂಕ್ ವಿಲೀನ, ಹಣಕಾಸು ನೀತಿಗಳಲ್ಲಿನ ಮಹತ್ವದ ಬದಲಾವಣೆಯಂತಹಾ ಪ್ರಮುಖ ತೀರ್ಮಾನಗಳನ್ನು ಕೇಂದ್ರ ಸರ್ಕಾರ ಕೈಗೊಂಡಿದ್ದರೂ ಸಹ ಸಾರ್ವಜನಿಕರ ಸಮಸ್ಯೆಗಳು ಪೂರ್ಣ ನಿವಾರಣೆಯಾಗಿಲ್ಲ. ಪೆಟೋಲ್, ಅಡುಗೆ ಅನಿಲ, ಈರುಳ್ಳಿಯಂತಹಾ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದಾಗಿ ಗ್ರಾಹಕ ಕಂಗಾಲಾಗಿದ್ದ. ಇನ್ನು ಮಹತ್ವದ ಕಂಪನಿಗಳ ಮುಖ್ಯಸ್ಥರು ತಮ್ಮ ಸ್ಥಾನದಿಂದ ಕೆಳಗಿಳಿಯುವ ಮುನ್ಸೂಚನೆಯನ್ನೂಈ ವರ್ಷದಲ್ಲಿ ಕೊಟ್ಟಿದ್ದು ವಿಶೇಷವಾಗಿತ್ತು. ಹೀಗೆ ಒಟ್ಟೂ ಅರ್ಥಜಗತ್ತಿನ ಸಮಗ್ರ ನೋಟ ಇಲ್ಲಿದೆ.

ಬ್ಯಾಂಕ್ ವಿಲೀನಕ್ಕೆ ಸಂಪುಟ ಅಸ್ತು


ಬ್ಯಾಂಕ್ ಆಫ್ ಬರೋಡಾ, ವಿಜಯ ಬ್ಯಾಂಕ್ ಮತ್ತು ದೇನಾ ಬ್ಯಾಂಕ್ ವಿಲೀನಕ್ಕೆ 02-01-2019ರಂದು ಕೇಂದ್ರ ಕ್ಯಾಬಿನೆಟ್ ಅನುಮೋದನೆ ನೀಡಿತು. ಇದರಲ್ಲಿ ವಿಜಯಾ ಬ್ಯಾಂಕ್ ಕರ್ನಾಟಕದ ಮಂಗಳೂರು ಮೂಲದ ಬ್ಯಾಂಕ್ ಆಗಿದ್ದು ಅಕ್ಟೋಬರ್ 23,1931ರಂದು ಸ್ಥಾಪಿಸಲ್ಪಟ್ಟಿತ್ತು. ಅತ್ತಾವರ ಬಾಲಕೃಷ್ಣ ಶೆಟ್ಟಿಯವರು ಈ ಬ್ಯಾಂಕ್ ಸ್ಥಾಪಕರಾಗಿದ್ದರು, ಇನ್ನು ಈ ಬ್ಯಾಂಕ್ ವಿಲೀನ ಪ್ರಕ್ರಿಯೆಯುಪೂರ್ಣ ಪ್ರಮಾಣದಲ್ಲಿ ಏಪ್ರಿಲ್ 1ರಿಂದ ಜಾರಿಗೆ ಬಂದಿದೆ. 

10ಸಾವಿರ ಕೋಟಿ ತ್ರೈಮಾಸಿಕ ಲಾಭದ ಗಡಿ ಮುಟ್ಟಿದ ರಿಲಯನ್ಸ್
ಭಾರತದ ಪ್ರಮುಖ ಉದ್ಯಮಗಳಲ್ಲಿ ಒಂದಾದ ರಿಲಯನ್ಸ್ ಇಂಡಸ್ಟ್ರೀಸ್ (ಆರ್ಐಎಲ್) 2019 ರ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ 9% ಲಾಭವನ್ನುಗಳಿಸಿಕೊಂಡಿದೆ. ಇದರೊಡನೆ ಲಾಭವನ್ನು 10,251 ಕೋಟಿ ರೂ.ಗೆ ಏರಿಕೆ ಮಾಡಿಕೊಂಡ ಸಂಸ್ಥೆ 10,000 ಕೋಟಿ ರೂ.ಗಳ ತ್ರೈಮಾಸಿಕ ಲಾಭದ ಮೈಲಿಗಲ್ಲನ್ನು ದಾಟಿದ ಮೊದಲ ಖಾಸಗಿ ವಲಯದ ಕಂಪನಿ ಎಂದು ಗುರುತಿಸಿಕೊಂಡಿದೆ.

ವರ್ಷದ ಮೊದಲ ರೆಪೋ ದರ ಕಡಿತ
07-02-2019ರಂದು ನಡೆಸಲಾದ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಸಭೆಯಲ್ಲಿ ದ ರೆಪೊ ಮತ್ತು ರಿವರ್ಸ್ ರೆಪೊ ದರಗಳನ್ನು ಕ್ರಮವಾಗಿ 25 ಬೇಸಿಸ್ ಪಾಯಿಂಟ್ ಗಳಷ್ಟು ಕಡಿತಗೊಳಿಸಿತು. ಈ ಮುನ್ನ ಇದ್ದ 6.25ಕ್ಕೆ ಬದಲು 6 ಕ್ಕೆ ಇಳಿಸಿ ಆರ್.ಬಿ.ಐ. ತನ್ನ ತಟಸ್ಥ ನಿಲುವನ್ನು ತ್ಯಜಿಸಿದೆ.   ಗವರ್ನರ್ ಶಕ್ತಿಕಾಂತ ದಾಸ್ ಅವರ ಮೊದಲ ನೀತಿ ಸಭೆಯಲ್ಲಿ ತೆಗೆದುಕೊಳ್ಳಲಾದ 18 ತಿಂಗಳಲ್ಲಿ ಮೊದಲ ರೆಪೋ ದರ ಕಡಿತ ನಿರ್ಧಾರ ಇದಾಗಿತ್ತು.

ಏಂಜಲ್ ಟ್ಯಾಕ್ಸ್ ಗೆ ವಿನಾಯಿತಿ
ಗ್ರಾಹಕರಿಗೆ ಹೆಚ್ಚಿನ ತೆರಿಗೆ ವಿನಾಯಿತಿ ಪಡೆಯಲು ಅನುಕೂಲವಾಗುವಂತೆ ಕೇಂದ್ರ ಸರ್ಕಾರವು 19-02-2019ರಂದು ತಮ್ಮ  ‘ಏಂಜಲ್ ಟ್ಯಾಕ್ಸ್’ ಮಾನದಂಡಗಳನ್ನು ಸಡಿಲಗೊಳಿಸಿತು. ಯಾವುದೇ ಉದ್ಯಮದ ಘ್ಟಕವು ಅದರ ವಹಿವಾಟು 100 ಕೋಟಿ ರೂ.ಗಿಂತ ಕಡಿಮೆಯಿದ್ದರೆ 10 ವರ್ಷಗಳವರೆಗೆ (ಸಂಯೋಜನೆಯ ದಿನಾಂಕದಿಂದ) ಈ ಸೌಲಭ್ಯ ಹೊಂದಬಹುದಾಗಿದೆ. ಈ ಮೊದಲು ಇಂತಹಾ ವಿನಾಯಿತಿ ಮಿತಿಯು  ಕ್ರಮವಾಗಿ ಏಳು ವರ್ಷ ಮತ್ತು 25 ಕೋಟಿ ರೂ. ಎಂದಿತ್ತು. ಇದೀಗ ಬದಲಾದ ಮಿತಿ ಹಾಗೂ ವಿನಾಯಿತಿಯು ಹೊಸ ಸಂಸ್ಥೆಗಳಿಗೆ ತೆರಿಗೆ ವಿನಾಯಿತಿ ಹಾಗೂ ಪ್ರೋತ್ಸಾಹಕವಾಗಿರಲಿದೆ. 

ಏರ್ ಏಷ್ಯಾದಿಂದ ಹೊರನಡೆದ ಟಾಟಾ ಟ್ರಸ್ಟಿಗಳು
ಟಾಟಾ ಟ್ರಸ್ಟ್ಸ್‌ನ ವ್ಯವಸ್ಥಾಪಕ ಟ್ರಸ್ಟಿ ಆರ್.ವೆಂಕಟರಮಣನ್ ಮತ್ತು ಟಿಸಿಎಸ್‌ನ ಮಾಜಿ ಸಿಇಒ ಎಸ್ ರಾಮದೊರೈ 22-02-2019ರಂದು ಅವರು ತಮ್ಮ ಷೇರುಗಳನ್ನು ಟಾಟಾ ಸನ್ಸ್‌ಗೆ ಮಾರಾಟ ಮಾಡುವ ಮೂಲಕ  ಏರ್‌ಏಷ್ಯಾ ಇಂಡಿಯಾದಿಂದ ಹೊರನಡೆದರು. ಈ ಮೂಲಕ ವಿವಾದಕ್ಕೀಡಾದ  ವಿಮಾನಯಾನ ಸಂಸ್ಥೆಯೊಂದಿಗಿನ ತಮ್ಮ ಎರಡು ವರ್ಷಗಳ ಒಡನಾಟವನ್ನು ಕೊನೆಗೊಳಿಸಿದ ಇವರಿಬ್ಬರೂ ಮಂಡಳಿಯಿಂದ ಹೊರ ಹೋಗಿದ್ದರು. 

ವಿಮಾನ ನಿಲ್ದಾಣ ಗುತ್ತಿಗೆ ಪಡೆದ ಅದಾನಿ
ಗೌತಮ್ ಅದಾನಿ ನೇತೃತ್ವದ ಅದಾನಿ ಎಂಟರ್‌ಪ್ರೈಸಸ್ ಮುಂದಿನ 50 ವರ್ಷಗಳವರೆಗೆ ಸಾರ್ವಜನಿಕ ಖಾಸಗಿ ಸಹಭಾಗಿತ್ವದ ಆಧಾರದ ಮೇಲೆ ರಾಜ್ಯದ ಮಂಗಲೂರು ವಿಮಾನ ನಿಲ್ದಾಣ ಸೇರಿದಂತೆ ದೇಶದ ದು ಸರ್ಕಾರಿ-ವಿಮಾನ ನಿಲ್ದಾಣಗಳನ್ನು ಸಾರ್ವಜನಿಕ ಖಾಸಗಿ ಸಹಭಾಗಿತ್ವದಲ್ಲಿ ನಿರ್ವಹಿಸಲು ಬಿಡ್‌ಗಳನ್ನು ಗೆದ್ದಿತು. 25-02-2019ರಂದು ಈ ಹರಾಜು ಗೆದ್ದಿರುವ ಕಂಪನಿ ವಿಮಾನಯಾನ ಕ್ಷೇತ್ರಕ್ಕೆ ಪ್ರವೇಶಿಸಿದೆ. ಅದಾನಿ ಗುಂಪು ಅಹಮದಾಬಾದ್, ಜೈಪುರ, ಮಂಗಳೂರು, ತಿರುವನಂತಪುರಂ ಮತ್ತು ಲಖನೌ  ವಿಮಾನ ನಿಲ್ದಾಣಗಳ ನಿರ್ವಹಣೆಯನ್ನು ಪಡೆದುಕೊಂಡಿದೆ ಎಂದು ವಿಮಾನ ನಿಲ್ದಾಣ ಪ್ರಾಧಿಕಾರ (ಎಎಐ) ಪ್ರಕಟಿಸಿದೆ.

ಬ್ಯಾಂಕ್ ಠೇವಣಿ ರೆಪೋ ದರಕ್ಕೆ ಲಿಂಕ್ ಮಾಡಿದ ಎಸ್.ಬಿ.ಐ.
ವೇಗದ ವಿತ್ತೀಯ ಪ್ರಸರಣದ ಗುರಿಯನ್ನು ಹೊಂದುವ ಕ್ರಮದಲ್ಲಿ  ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಮೇ 1 ರಿಂದ ಜಾರಿಗೆ ಬರುವಂತೆ ಉಳಿತಾಯ ಬ್ಯಾಂಕ್ ಠೇವಣಿ ಮತ್ತು 1 ಲಕ್ಷಕ್ಕಿಂತ ಹೆಚ್ಚಿನ ಅಲ್ಪಾವಧಿಯ ಸಾಲಗಳನ್ನು ಆರ್‌ಬಿಐನ ರೆಪೊ ದರಕ್ಕೆ ಜೋಡಿಸುವುದಾಗಿ ಘೋಷಿಸಿತು.

ಎರಿಕ್ಸನ್‌ಗೆ 550 ಕೋಟಿ ರೂ. ಪಾವತಿಸಿದ ಅನಿಲ್ ಅಂಬಾನಿ


ರಿಲಯನ್ಸ್ ಕಮ್ಯುನಿಕೇಷನ್ಸ್ ಅಧ್ಯಕ್ಷ ಅನಿಲ್ ಅಂಬಾನಿ ಹಿರಿಯ ಸಹೋದರ ಮುಖೇಶ್ ಮತ್ತು ಅವರ ಪತ್ನಿ ನೀತಾ ಅಂಬಾನಿ ಸಹಕಾರದೊಡನೆ 550 ಕೋಟಿ ರೂ.ಗಳನ್ನು ಎರಿಕ್ಸನ್‌ ಸಂಸ್ಥೆಗೆ ಪಾವತಿಸುವ ಮೂಲಕ ಜೈಲು ಶಿಕ್ಷೆಯನ್ನು ತಪ್ಪಿಸಿಕೊಂಡರು. ಸುಪ್ರೀಂ ಕೋರ್ಟ್ ಆದೇಶದನ್ವಯ ಅನಿಲ್ ಅಂಬಾನಿ ಎರಿಕ್ಸನ್‌ಗೆಹಣ ಪಾವತಿಸುವುದಕ್ಕೆ ಕಡೇ ದಿನಾಂಕಕ್ಕೆ ಕೇವಲ ಒಂದು ದಿನವಷ್ಟೇ ಬಾಕಿ ಇದ್ದಿರುವ ಸಮಯದಲ್ಲಿ ಈ ಹಣ ಸಂದಾಯ ನಡೆದಿದೆ. ಇದೇ ವೇಳೆ ತನ್ನೆಲ್ಲಾ ಸ್ಪೆಕ್ಟ್ರಮ್, ಫೈಬರ್ ಮತ್ತು ಟವರ್ ಅನ್ನು ಜಿಯೋಗೆ ಮಾರಾಟ ಮಾಡಲು 17,000 ಕೋಟಿ ರೂ.ಗಳ ಒಪ್ಪಂದವನ್ನು ಆರ್‌ಕಾಮ್ ಕೊನೆಗೊಳಿಸಿತು

ಜೆಟ್ ಏರ್ವೇಸ್ ಮಂಡಳಿ ತೊರೆದ ಗೋಯಲ್ ದಂಪತಿ
ಜೆಟ್ ಏರ್‌ವೇಸ್ ಸಂಸ್ಥಾಪಕರಾಗಿದ್ದ  ನರೇಶ್ ಗೋಯಲ್ ಮತ್ತು ಪತ್ನಿ ಅನಿತಾ ಗೋಯಲ್ ಅವರು ಹಣದ ಮುಗ್ಗಟ್ಟು ಎದುರಿಸುತ್ತಿದ್ದ ಸಂಸ್ಥೆಯ ಆಡಳಿತ ಮಂಡಳಿಯಿಂದ ಹೊರನಡೆದವರು ಗೋಯಲ್ ದಂಪತಿಗಳಲ್ಲದೆ  ಪಿಜೆಎಸ್ ಟಿನ  ನಾಮಿನಿ ಗೋಯಲ್ ಅವರಲ್ಲದೆ, ಕೆವಿನ್ ನೈಟ್ ಕೂಡ ಮಂಡಳಿಯಿಂದ ಹೊರನಡೆದಿದ್ದರು.

ಐಎಲ್ ಅಂಡ್ ಎಫ್ಎಸ್ ಮಾಜಿ ನಿರ್ದೇಶಕ  ಹರಿ ಶಂಕರನ್ ಬಂಧನ
ಐಎಲ್ ಅಂಡ್ ಎಫ್ಎಸ್ ಮತ್ತು ಅದರ ಅಂಗಸಂಸ್ಥೆಗಳಲ್ಲಿ ನಡೆದ ವಂಚನೆಗಳ ಬಗೆಗೆ ನಡೆಯುತ್ತಿರುವ ತನಿಖೆಗೆ ಸಂಬಂಧಿಸಿದಂತೆ ಗಂಭೀರ ವಂಚನೆ ತನಿಖಾ ಕಚೇರಿ (ಎಸ್‌ಎಫ್‌ಐಒ)  ಸಂಸ್ಥೆಯ ಮಾಜಿ  ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮೂಲಸೌಕರ್ಯ ಗುತ್ತಿಗೆ ಮತ್ತು ಹಣಕಾಸು ಸೇವೆಗಳ ಉಪಾಧ್ಯಕ್ಷ ಹರಿ ಶಂಕರನ್ ಅವರನ್ನು 01-04-2019ರಂದು  ಬಂಧಿಸಿತು. ಮುಂಬೈನ ವಿಶೇಷ ನ್ಯಾಯಾಲಯದಲ್ಲಿ ಶಂಕರನ್ ಅವರನ್ನು ಹಾಜರುಪಡಿಸಲಾಯಿತು.

ಜಿಡಿಪಿ ಅಂದಾಜನ್ನು ಇಳಿಸಿದ ಆರ್‌ಬಿಐ 
ಬ್ರೆಕ್ಸಿಟ್ ಅವ್ಯವಸ್ಥೆ ಮತ್ತು ವ್ಯಾಪಾರ ಯುದ್ಧದ ಭೀತಿಯಿಂದ ಹೆಚ್ಚುತ್ತಿರುವ ಜಾಗತಿಕ ಅಪಾಯಗಳ ಕಾರಣ ಭಾರತದ ಆರ್ಥಿಕ ಬೆಳವಣಿಗೆ ಕುಂಠಿತಗೊಳ್ಳಬಹುದು  ಎಂದು ಆರ್‌ಬಿಐ ಹೇಳಿತ್ತು. ಅಲ್ಲದೆ ದ್ವಿತೀಯ ತ್ರೈಮಾಸಿಕ  ಜಿಡಿಪಿ ಬೆಳವಣಿಗೆಯ ಪ್ರಕ್ಷೇಪಣವನ್ನು ಫೆಬ್ರವರಿಯಲ್ಲಿ ಅಂದಾಜು ಮಾಡಿದ ಶೇಕಡಾ 7.4 ರಿಂದ ಶೇ 7.2 ಕ್ಕೆ ಇಳಿಸಿತ್ತು.

ಅಂತರಾಷ್ಟ್ರೀಯ ಸೇವೆ ಬಂದ್ ಮಾಡಿದ ಜೆಟ್ ಏರ್ವೇಸ್


ಹಣಕಾಸು ಮುಗ್ಗಟ್ಟು ಎದುರಿಸುತ್ತಿದ್ದ ಜೆಟ್ ಏರ್ವೇಸ್ 11-04-2019ರಿಂದ  ತನ್ನ ಎಲ್ಲಾ ಅಂತರರಾಷ್ಟ್ರೀಯ ವಿಮಾನಯಾನಗಳನ್ನು ಸ್ಥಗಿತಗೊಳಿಸಿತು. ಅಷ್ಟು ಮಾತ್ರವಲ್ಲದೆ ದೇಶೀ ಕಾರ್ಯಾಚರಣೆಗಳನ್ನು ಸಹ ತಕ್ಕ ಮಟ್ಟಿಗೆ ಕಡಿತ ಮಾಡಿತ್ತು. ಇದು ಆ ವಿಮಾನ ಯಾನ ಸಮ್ಸ್ಥೆಯ ಉಳಿವಿನ ಬಗೆಗೆ ಸಂದೇಹ ಹುಟ್ಟು ಹಾಕಿತ್ತು.  ಕಳೆದ ಕೆಲವು ತಿಂಗಳುಗಳಿಂದ ವಿಮಾನಯಾನವು ಕೊಲ್ಲಿ, ಆಗ್ನೇಯ ಏಷ್ಯಾ ಮತ್ತು ಸಾರ್ಕ್ ದೇಶಗಳಲ್ಲಿನ 15 ಕ್ಕೂ ಹೆಚ್ಚು ಕಿರು ಪ್ರಯಾಣದ ಅಂತರರಾಷ್ಟ್ರೀಯ ತಾಣಗಳಿಗೆ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಿದ್ದ ಸಂಸ್ಥೆ  ತಾತ್ಕಾಲಿಕವಾಗಿ ಆಮ್ಸ್ಟರ್‌ಡ್ಯಾಮ್, ಪ್ಯಾರಿಸ್ ಮತ್ತು ಲಂಡನ್‌ಗೆ ಸಾಗರೋತ್ತರ ವಿಮಾನಗಳನ್ನು ರದ್ದುಗೊಳಿಸಿತು. ಸಾಲದಾತರಿಂದ ಮಧ್ಯಂತರ ಧನಸಹಾಯವನ್ನು ಪಡೆಯಲು ಸಾಧ್ಯವಾಗದ ಕಾರಣ ಜೆಟ್ ಏರ್ವೇಸ್ ಏಪ್ರಿಲ್ 17 ಮಧ್ಯರಾತ್ರಿಯಿಂದ ತಾತ್ಕಾಲಿಕ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸುವುದಾಗಿ ಘೋಷಿಸಿತು. ಸಾಲದಾತರಿಂದ ಅಥವಾ ಇನ್ನಾವುದೇ ಮೂಲದಿಂದ ಯಾವುದೇ ತುರ್ತು ಧನಸಹಾಯವು ದೊರಕದ  ಕಾರಣ, ಕಾರ್ಯಾಚರಣೆಯನ್ನು ಮುಂದುವರಿಸಲು ವಿಮಾನಯಾನ ಸಂಸ್ಥೆಗೆ ಸಾಧ್ಯವಾಗದೆ ಹೋಗಿದೆ.

ಆರ್‌ಟಿಐ ಕಾಯ್ದೆಯಡಿ ಬ್ಯಾಂಕ್ ಲೆಕ್ಕದ ವರದಿ ನೀಡಿ-ಆರ್‌ಬಿಐಗೆ ಸುಪ್ರೀಂ ತಾಕೀತು
 ಬ್ಯಾಂಕುಗಳು ಮತ್ತು ಇತರ ಹಣಕಾಸು ಸಂಸ್ಥೆಗಳ ಲೆಕ್ಕಪರಿಶೋಧನೆ ಮತ್ತು ತಪಾಸಣೆ ವರದಿಗಳ ಬಗ್ಗೆ ಮಾಹಿತಿ ಹಕ್ಕು (ಆರ್‌ಟಿಐ) ಕಾಯ್ದೆಯಡಿ ಸಾರ್ವಜನಿಕರಿಗೆ ಮಾಹಿತಿ ನೀಡಲು “ಕೊನೆಯ ಅವಕಾಶ” ನೀಡುತ್ತಿರುವುದಾಗಿ ಸುಪ್ರೀಂ ಕೋರ್ಟ್ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್‌ಬಿಐ) ಗೆ ತಿಳಿಸಿದೆ. ಇದು ಆಯಾ ಸಂಸ್ಥೆಗಳು ನೀಡಿದ ಶೋಕಾಸ್ ನೋಟೀಸ್,  ಪ್ರಕಟಣೆಗಳು, ದಂಡಗಳು ಮತ್ತು ಕ್ರಮ-ತೆಗೆದುಕೊಂಡ ವರದಿಗಳು ಸೇರಿದಂತೆ  ಸಾರ್ವಜನಿಕ ಕರ್ತವ್ಯಗಳ ಭಾಗವಾಗಿ ಆರ್‌ಬಿಐ ಸಂಗ್ರಹಿಸುವ ಯಾವುದೇ ಮಾಹಿತಿಯನ್ನು ಒಳಗೊಂಡಿರತಕ್ಕದ್ದೆಂದು ಸುಪ್ರೀಂ ಏಪ್ರಿಲ್ 26ರ ತನ್ನ ತೀರ್ಪಿನಲ್ಲಿ ಹೇಳಿದೆ.

ಆತಂಕದಲ್ಲಿ ಆಟೊ ಉದ್ಯಮ
ನೂತನ ಹಣಕಾಸು ವರ್ಷಾರಂಬ ಭಾರತೀಯ ವಾಹನೋದ್ಯಮಕ್ಕೆ ಕತ್ತಲನ್ನು ತಂದಿತ್ತು ಎಲ್ಲಾ ವಿಭಾಗದ ವಾಹನ ಮಾರಾಟದಲ್ಲಿ ಗಣನೀಯ ಇಳಿಕೆ ದಾಖಲಾಗಿತ್ತು. ರಾಜಕೀಯ ಅನಿಶ್ಚಿತತೆ, ಹೆಚ್ಚಿನ ವಿಮಾ ವೆಚ್ಚಗಳು, ದ್ರವ್ಯತೆ ಬಿಕ್ಕಟ್ಟು ಮತ್ತು ಸರಕುಗಳ ಬೆಲೆ ಏರಿಕೆ ಮುಂತಾದ ಕಾರಣಗಳಿಂದ ಗ್ರಾಹಕರ ದುರ್ಬಲ ಮನೋಭಾವ ವಾಹನಗಳ ಬೇಡಿಕೆ ಕುಸಿಯುವಂತೆ ಮಾಡಿತ್ತು. ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ತಯಾರಕರು (ಸಿಯಾಮ್) ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, ಎಲ್ಲಾ ವಿಭಾಗಗಳಲ್ಲಿನ ಒಟ್ಟು ಮಾರಾಟವು 2018 ರ ಏಪ್ರಿಲ್‌ನಲ್ಲಿ 23.80 ಲಕ್ಷ ಯುನಿಟ್‌ಗಳಿಂದ ಸುಮಾರು 16% ರಷ್ಟು ಇಳಿದು 20.01 ಲಕ್ಷ ಯೂನಿಟ್‌ಗಳಿಗೆ ತಲುಪಿದೆ.


ಆರ್ಥಿಕತೆ ಕುಸಿತ ಮತ್ತು ಉದ್ಯೋಗ ನಷ್ಟ  ಸೇರಿದಂತೆ ಅನೇಕ ಕಾರಣಗಳಿಂದಾಗಿ ಗ್ರಾಹಕರು ಕಾರುಗಳ ಖರೀದಿಯಿಂದ ಹಿಂದೆ ಸರಿದ ಕಾರಣ  ಕಾರುಗಳು ಮತ್ತು ಎಸ್ಯುವಿಗಳ ಮಾರಾಟವು 18 ವರ್ಷಗಳಲ್ಲಿ  ಕನಿಷ್ಟ ಮಟ್ಟಕ್ಕೆ ಇಳಿದಿತ್ತು. ಪ್ರಯಾಣಿಕರ ವಾಹನಗಳ ಕುಸಿತದ ಸತತ ಏಳನೇ ತಿಂಗಳು ಇದಾಗಿತ್ತು.  ಇಂಡಸ್ಟ್ರಿ ಬಾಡಿ ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ತಯಾರಕರು (ಸಿಯಾಮ್) ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, 2019 ರ ಮೇ ತಿಂಗಳಲ್ಲಿ ಒಟ್ಟು 2.39 ಲಕ್ಷ ಪ್ರಯಾಣಿಕ ವಾಹನಗಳು (ಕಾರುಗಳು, ಯುವಿಗಳು / ಎಸ್‌ಯುವಿಗಳು ಮತ್ತು ವ್ಯಾನ್‌ಗಳು) ಮಾರಾಟವಾದವು, ಇದೇ ಕಳೆದ ವರ್ಷ 3 ಲಕ್ಷ ಯುನಿಟ್ ಮಾರಾಟ ಕಂಡಿತ್ತು. ಇಷ್ಟಲ್ಲದೆ ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಪ್ರಯಾಣಿಕರ ವಾಹನ ಮಾರಾಟ ತೀವ್ರ ಕುಸಿತ ಕಂಡಿದೆ. , ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ತಯಾರಕರ (ಸಿಯಾಮ್) ಬಿಡುಗಡೆ ಮಾಡಿದ ಮಾಹಿತಿಯು ಮೂರು ತಿಂಗಳಲ್ಲಿ  ಈ ವಿಭಾಗವು ಕೇವಲ 712,620 ಯುನಿಟ್‌ಗಳನ್ನು ಮಾರಾಟ ಮಾಡಿದೆ ಎಂದು ಬಹಿರಂಗಪಡಿಸಿದೆ. ಇದು 2018-19ರ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಮಾರಾಟವಾದ 873,490 ಯುನಿಟ್‌ಗಳಿಂದ ಶೇ 18.42 ರಷ್ಟುಕಡಿಮೆ ಇದೆ.
ಇಷ್ಟೇ ಅಲ್ಲದೆ  ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ಪ್ರೊಡ್ಯುಸರ್ಸ್  (ಸಿಯಾಮ್) ದತ್ತಾಂಶವು 2019 ರ ಜುಲೈನಲ್ಲಿ ಕೇವಲ 18,25,148 ಯುನಿಟ್ ವಾಹನಗಳು  ಮಾರಟವಾಗಿದೆ ಎಂದಿದ್ದು ಇದೇ ತಿಂಗಳಲ್ಲಿ ಕಳೆದ ವರ್ಷ 22,45,223 ಯುನಿಟ್ ಮಾರಾಟ ಕಂಡಿತ್ತು ಎಂದಿದೆ.  ಕಾರು ತಯಾರಕರು ಸಾವಿರಾರು ಜನರನ್ನು ಉದ್ಯೋಗದಿಂದ ತೆಗೆದು ಹಾಕುತ್ತಿದ್ದಾರೆ ಎಂದು ಸಿಯಾಮ್ ತಿಳಿಸಿದೆ. "ಕಳೆದ ಎರಡು-ಮೂರು ತಿಂಗಳುಗಳಲ್ಲಿ ಸುಮಾರು 15,000 ಉದ್ಯೋಗಿಗಳನ್ನು ತೆಗೆದು ಹಾಕಲಾಗಿದೆ ಎಂದೂ ಸಿಯಾಮ್ ವರದಿ ಹೇಳಿದೆ.

ವಿಪ್ರೋ ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿದ ಅಜೀಂ ಪ್ರೇಂಜಿ
ಐಟಿ ದೈತ್ಯ ವಿಪ್ರೋದ ಅಜೀಮ್ ಪ್ರೇಂಜಿ ಜುಲೈ 30 ರಿಂದ ಜಾರಿಗೆ ಬರುವಂತೆ ವಿಪ್ರೋದ ಕಾರ್ಯನಿರ್ವಾಹಕ ಅಧ್ಯಕ್ಷ ಸ್ಥಾನದಿಂದ ನಿವೃತ್ತರಾದರು. ಆದರೆ ಕಾರ್ಯನಿರ್ವಾಹಕ ನಿರ್ದೇಶಕ ಹಾಗೂ ಸಂಸ್ಥಾಪಕ ಅಧ್ಯಕ್ಷರಾಗಿ ಮಂಡಳಿಯಲ್ಲಿ ಸೇವೆ ಸಲ್ಲಿಸಲಿದ್ದಾರೆ. ಇನ್ನು ಪ್ರೇಂಜಿ ಪುತ್ರ ರಿಷಬ್ ಪ್ರೇಂಜಿ  ಮುಖ್ಯ ಕಾರ್ಯತಂತ್ರ ಅಧಿಕಾರಿ ಮತ್ತು ಮಂಡಳಿಯ ಸದಸ್ಯರಾಗಿ ಅಧಿಕಾರ ವಹಿಸಿಕೊಂಡರು.

ಮಾರುತಿ ಕಾರು ಮಾರಾಟ ಇಳಿಕೆ
ಆಟೋಮೊಬೈಲ್ ಮಾರುಕಟ್ಟೆಯಲ್ಲಿನ ಬಿಕ್ಕಟ್ಟು ಭಾರತದ ಅತಿದೊಡ್ಡ ಕಾರು ತಯಾರಕ ಮಾರುತಿ ಸುಜುಕಿ ಇಂಡಿಯಾ (ಎಂಎಸ್ಐಎಲ್) ಮೇಲೆ ಪರಿಣಾಮ ಬೀರಿತ್ತು. ಮಾರುತಿ ಸುಜುಕಿ ಇಂಡಿಯಾ (ಎಂಎಸ್ಐಎಲ್)ದೇಶೀಯ ಮಾರಾಟದಲ್ಲಿ ಶೇಕಡಾ 36.3 ರಷ್ಟು ಕುಸಿತವನ್ನು  ದಾಖಲಿಸಿತ್ತು. ಇದು ಎರಡು ದಶಕಗಳಲ್ಲಿ ತೀವ್ರ ಕುಸಿತವಾಗಿದೆ. ಮಾರುತಿ ಜುಲೈನಲ್ಲಿ 98,210 ವಾಹನಗಳನ್ನು ಮಾರಾಟ ಮಾಡಿದೆ, ಕಳೆದ ವರ್ಷ ಇದೇ ತಿಂಗಳಲ್ಲಿ154,150 ಯುನಿಟ್ ಮಾರಾಟವಾಗಿದೆ. ಮಾರುತಿಯ ಒಟ್ಟು ಕಾರು ಮಾರಾಟ, ಇತರ ಕಾರು ತಯಾರಕರಿಗೆ ಸೇರಿ  ಶೇಕಡಾ 35.1 ರಷ್ಟು ಕುಸಿದಿದೆ

5 ಬಾರಿ ರೆಪೋ ದರ ಕಡಿತ ಮಾಡಿದ ಕೇಂದ್ರ ಬ್ಯಾಂಕ್


ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ (ಆರ್‌ಬಿಐ) ಹಣಕಾಸು ನೀತಿ ಸಮಿತಿ (ಎಂಪಿಸಿ) ತನ್ನ ರೆಪೊ ದರವನ್ನು ಮತ್ತಷ್ಟು ಕಡಿತಗೊಳಿಸಿತ್ತು. 7 ಆಗಸ್ಟ್ ನಂದು ಕೇಂದ್ರ ಬ್ಯಾಂಕ್  35 ಬೇಸಿಸ್ ಪಾಯಿಂಟ್‌ ಗಳಷ್ಟು ಕಡಿತ ಮಾಡಿ ಶೇ.  5.4 ಕ್ಕೆ ಇಳಿಸಿತು. ಕಳೆದ ವರ್ಷ ಡಿಸೆಂಬರ್‌ನಲ್ಲಿ ಶಕ್ತಿಕಾಂತ ದಾಸ್ ಸೆಂಟ್ರಲ್ ಬ್ಯಾಂಕಿನ ಗವರ್ನರ್ ಆಗಿ ಅಧಿಕಾರ ವಹಿಸಿಕೊಂಡ ನಂತರ ಇದು ತನ್ನ ಪ್ರಮುಖ ಬೆಳವಣಿಗೆಯಾಗಿದ್ದು ಸತತ ನಾಲ್ಕನೇ ಕಡಿತವಾಗಿದೆ. ಪಾಲಿಸಿ ರೆಪೊ ದರವನ್ನು ಕಡಿಮೆ ಮಾಡಲು ಮತ್ತು ವಿತ್ತೀಯ ನೀತಿಯ ಅನುಕೂಲಕರ ನಿಲುವನ್ನು ಕಾಪಾಡಿಕೊಳ್ಳಲು ಎಂಪಿಸಿಯ ಎಲ್ಲ ಸದಸ್ಯರು ಸರ್ವಾನುಮತದಿಂದ ಈ ನಿರ್ಧಾರದ ಪರ ಮತ ಹಾಕಿದ್ದರು.
ಇದಲ್ಲದೆ ಐದನೇ ವಧಿಗೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ ಹಣಕಾಸು ನೀತಿ ಸಮಿತಿ (ಎಂಪಿಸಿ)ರೆಪೊ ದರವನ್ನು ಕಡಿತಗೊಳಿಸಿದ್ದು 04-10-2019ರಂದು ಬ್ಯಾಂಕ್ ಮತ್ತೊಮ್ಮೆ 25 ಬೇಸಿಸ್ ಪಾಯಿಂಟ್ ಕಡಿಮೆ ಮಾಡಿದೆ. ಆರ್ಥಿಕತೆಯನ್ನು ಉತ್ತೇಜಿಸಲು ಆರ್‌ಬಿಐ ಸರ್ಕಾರಕ್ಕೆ ಸಹಾಯ ಮಾಡುತ್ತಿರುವುದರಿಂದ ಇದು ಐದನೇ ನೇರ ದರ ಕಡಿತವಾಗಿತ್ತು

ಸೌದಿ ಅರಾಮ್ಕೊ -ಆರ್ಐಎಲ್ ಒಪ್ಪಂದ 
ವಿಶ್ವದ ಅತಿದೊಡ್ಡ ತೈಲ ಉತ್ಪಾದಕ ಸೌದಿ ಅರಾಮ್ಕೊ ಭಾರತೀಯ ತೈಲ ಸಂಸ್ಥೆ ರಿಲಯನ್ಸ್ ಇಂಡಸ್ಟ್ರೀಸ್ (ಆರ್ಐಎಲ್) ನಿಂ<ದ  20% ಪಾಲನ್ನು ಪಡೆಯಲು ಸಮ್ಮತಿಸಿದೆ. ತೈಲದಿಂದ ರಾಸಾಯನಿಕಗಳಿಗೆ (ಒ 2 ಸಿ) ವ್ಯವಹಾರಕ್ಕೆ ಸಂಬಂಧಿಸಿ 75 ಬಿಲಿಯನ್  ಮೊತ್ತದ ವ್ಯವಹಾರ ಇದಾಗಿದ್ದು ಆರ್ಐಎಲ್ ಇತಿಹಾಸದಲ್ಲಿ ಅತಿದೊಡ್ಡ ವಿದೇಶಿ ಹೂಡಿಕೆ ಮಾತ್ರವಲ್ಲದೆ ಭಾರತದಲ್ಲಿ ದೊಡ್ಡ ಮೊತ್ತದ ವಿದೇಶೀ ಹೂಡಿಕೆ ಎನಿಸಿದೆ.

ಹೈದರಾಬಾದಿನಲ್ಲಿ ಅಮೇಜಾನ್ ಕ್ಯಾಂಪಸ್ ಆರಂಭ
ಜಾಗತಿಕ ಇ-ಕಾಮರ್ಸ್ ದೈತ್ಯ ಅಮೆಜಾನ್ ತನ್ನ ಹೊಸ ಕ್ಯಾಂಪಸ್ ಅನ್ನು ಹೈದರಾಬಾದ್‌ನ ನಾನನ್‌ಕ್ರಮ್‌ಗುಡಾದಲ್ಲಿ ತೆರೆಯಿತು 21 ಆಗಸ್ಟ್ ನಲ್ಲಿ ಪ್ರಾರಂಭವಾದ ಈ ಕ್ಯಾಂಪಸ್ ಜಾಗತಿಕವಾಗಿ ಅಮೆಜಾನ್‌ನ ಅತಿದೊಡ್ಡ  ಫೆಸಿಲಿಟಿ ಎನಿಸಿದೆ. ಅಲ್ಲದೆ ಅಮೆರಿಕಾ ಹೊರತು ಬೇರೆಡೆಗಳಲ್ಲಿ ಅಮೆಜಾನ್ ಒಡೆತನದ ಏಕೈಕ ಕ್ಯಾಂಪಸ್ ಆಗಿದೆ. ತೆಲಂಗಾಣ ಗೃಹ ಸಚಿವ ಮೊಹಮ್ಮದ್ ಮಹಮೂದ್ ಅಲಿ ಅವರು ಉದ್ಘಾಟಿಸಿದ ಈ ಕ್ಯಾಂಪಸ್ 3 ದಶಲಕ್ಷ ಚದರ ಅಡಿ ವಿಸ್ತೀರ್ಣದಲ್ಲಿದೆ, ಅದರಲ್ಲಿ 1.8 ದಶಲಕ್ಷ ಚದರ ಅಡಿ ಕಚೇರಿ ಪ್ರದೇಶವಾಗಿದೆ; ಉಳಿದವುಗಳನ್ನು ಮನರಂಜನೆ ಮತ್ತು ಪಾರ್ಕಿಂಗ್ ಸೌಲಭ್ಯಗಳಿಗಾಗಿ ಮೀಸಲಿಡಲಾಗಿದೆ.

ಸಾಲಗಾರರ ನೆರವಿಗೆ ನಿಂತ ಆರ್‌ಬಿಐ 
ವಸತಿ, ಆಟೋ ಮತ್ತು ಎಂಎಸ್‌ಎಂಇಗಳಿಗಾಗಿನ ಎಲ್ಲಾ ಹೊಸ ಸಾಲಗಳ ದರಗಳನ್ನು ಅಕ್ಟೋಬರ್ 1 ರಿಂದ ರೆಪೊದಂತಹ ಬಾಹ್ಯ ಮಾನದಂಡಕ್ಕೆ ಲಿಂಕ್ ಮಾಡುವುದನ್ನು ಆರ್‌ಬಿಐ ಕಡ್ಡಾಯಗೊಳಿಸಿತ್ತು , ಇದು ರೆಪೋ ದರ ಕಡಿತದ ಲಾಭವನ್ನು  ಸಾಲಗಾರರಿಗೆ ವೇಗವಾಗಿ ರವಾನಿಸುವ ಗುರಿಯನ್ನು ಹೊಂದಿತ್ತು.  

ಫೈಬರ್ನೆಟ್ ಸೇವೆ ಪ್ರಾರಂಭಿಸಿದ ಜಿಯೋ
ಈ ವರ್ಷ ಸೆಪ್ಟೆಂಬರ್ ಐದರಂದು ರಿಲಯನ್ಸ್ ಜಿಯೋ ಇನ್ಫೋಕಾಮ್ ತನ್ನ ವೈರ್ಡ್ ಬ್ರಾಡ್ಬ್ಯಾಂಡ್ ಸೇವೆಯನ್ನು ಅಧಿಕೃತವಾಗಿ ಪ್ರಾರಂಭಿಸಿದೆ.ಜಿಯೋಫೈಬರ್ ವಾಣಿಜ್ಯಿಕವಾಗಿ ಪ್ರಾರಂಭಿಸಿದ ಜಿಯೋ ಹೆಚ್ಚಿನ ವೇಗದ ಇಂಟರ್ನೆಟ್, ಲ್ಯಾಂಡ್ಲೈನ್ ಫೋನ್ ಮತ್ತು ಎಚ್ ಡಿ  ಟೆಲಿವಿಷನ್ ಸೇರಿದಂತೆ ಹಲವಾರು ಸೇವೆಗಳನ್ನು ಒದಗಿಸಲು ಮುಂದಾಗಿದೆ. ಬ್ರಾಡ್ಬ್ಯಾಂಡ್ ಸೇವೆಗಳು 100 ಜಿಬಿಗೆ ತಿಂಗಳಿಗೆ 699 ರಿಂದ ಪ್ರಾರಂಭವಾಗುವ ಯೋಜನೆಯಾಗಿದ್ದು ಕನಿಷ್ಠ 100 ಎಮ್‌ಬಿಪಿಎಸ್ ವೇಗವನ್ನು ನೀಡುತ್ತವೆ, ಆದರೆ ಹೆಚ್ಚಿನ ಯೋಜನೆಗಳು ಹೈ ಡೆಫಿನಿಷನ್ ಟಿವಿ ಸೆಟ್‌ಗಳು ಮತ್ತು ಸೆಟ್‌ಗಳು ಮತ್ತು ಸೆಟ್ ಟಾಪ್ ಬಾಕ್ಸ್‌ಗಳೊಡನೆ ಬರಲಿದೆ.

ಪಿಎಂಸಿ ವಂಚನೆ ಪ್ರಕರಣ ಬಯಲು
ಸಹಕಾರ ತತ್ವದಡಿ ಕಾರ್ಯಾಚರಿಸುತ್ತಿದ್ದ ಪಂಜಾಬ್ ಮಹಾರಾಷ್ಟ್ರ ಸಹಕಾರ ಬ್ಯಾಂಕ್ ಅವ್ಯವಹಾರಗಳು ಹಾಗೂ ಅನುತ್ಪಾದಕ ಆಸ್ತಿಯ ಬಗ್ಗೆ ಬ್ಯಾಂಕ್‌ ಸರಿಯಾಗಿ ಆರ್‌ಬಿಐಗೆ ಮಾಹಿತಿ ನೀಡದ ಹಿನ್ನೆಲೆಯಲ್ಲಿ ಆರ್‌ಬಿಐ ಆ ಬ್ಯ್ತಾಂಕ್ ವ್ಯವಹಾರವನ್ನು ಆರು ತಿಂಗಳ ಕಾಲ ನಿಒಲ್ಲಿಸುವಂತೆ ಸೂಚಿಸಿತ್ತು.ಬ್ಯಾಂಕ್  ವಸತಿ ಅಭಿವೃದ್ಧಿ ಮತ್ತು ಮೂಲಸೌಕರ್ಯ ಲಿಮಿಟೆಡ್‌ಗೆ (ಎಚ್‌ಡಿಐಎಲ್) ಗೆ 6,500 ಕೋಟಿ ರೂ. ಅಥವಾ ಅದರ ಒಟ್ಟು ಆಸ್ತಿಯ ಶೇಕಡಾ 8,880 ಕೋಟಿ ರೂ ನಷ್ಟು ಅನುತ್ಪಾದಕ ಸಾಲ ನೀಡಿ ವಂಚಿಸಿದ್ದಕ್ಕಾಗಿ ಅಮಾನತುಗೊಂಡ ವ್ಯವಸ್ಥಾಪಕ ನಿರ್ದೇಶಕ ಜಾಯ್ ಥಾಮಸ್ ರಿಸರ್ವ್ ಬ್ಯಾಂಕಿಗೆ ವಿವರಣೆ ನೀಡಿದ್ದರು. ಮಂಡಳಿಯ ಸದಸ್ಯರೊಬ್ಬರು ಬ್ಯಾಂಕಿನ ನಿಜವಾದ ಬ್ಯಾಲೆನ್ಸ್ ಶೀಟ್ ವಿವರಗಳನ್ನು ಆರ್‌ಬಿಐಗೆ ಬಹಿರಂಗಪಡಿಸಿದ ನಂತರ ಈ ಪ್ರಕರಣ ಬಯಲಾಗಿತ್ತು. ಈ ಬ್ಯಾಂಕ್ ವಂಚನೆ ಹಾಗೂ ದಿವಾಳಿಯಾದ ಪರಿಣಾಮ ಸುಮಾರು ಮೂರರಿಂದ ನಾಲ್ಕು ಠೇವಣಿದಾರರು ಆತ್ಮಹತ್ಯೆಗೆ ಶರಣಾದ ಘಟನೆಯೂ ನಡೆದಿತ್ತು. 

ಮಹೀಂದ್ರಾ, ಫೋರ್ಡ್ ನಿಂದ ಜಂಟಿ ಉದ್ಯಮ ಸ್ಥಾಪನೆ ಒಪ್ಪಂದ 
ಆಟೋಮೊಬೈಲ್ ಕ್ಷೇತ್ರದ ದಿಗ್ಗಜ ಸಂಸ್ಥೆಗಳಾದ ಮಹೀಂದ್ರಾ ಆಂಡ್ ಮಹೀಂದ್ರಾ ಹಾಗೂ  ಫೋರ್ಡ್ ಮೋಟಾರ್ ಕಂಪನಿ ಜಂಟಿಯಾಗಿ 5 275 ಮಿಲಿಯನ್ ಮೌಲ್ಯದ ಹೊಸ ಸಂಸ್ಥೆಯನ್ನು ರಚಿಸಲು ಒಪ್ಪಂದಮಾಡಿಕೊಂಡಿದೆ. ಈ ಪ್ರಕಾರ ಫೋರ್ಡ್ ತನ್ನ ಭಾರತದ ಹೆಚ್ಚಿನ ಆಸ್ತಿಯನ್ನು ಜೆವಿಗೆ ವರ್ಗಾಯಿಸಲಿದ್ದು, 1,925 ಕೋಟಿ ರೂ.ಗಳ ಮೌಲ್ಯದ ಹೊಸ ಕಂಪನಿಯಲ್ಲಿ 49% ನಷ್ಟು ಪಾಲನ್ನು ಹೊಂದಿದ್ದರೆ, ಉಳಿದ 51% ಅನ್ನು ಮಹೀಂದ್ರಾ ಹೊಂದಲಿದೆ. ಚೆನ್ನೈ ಮತ್ತು ಸನಂದ್‌ನಲ್ಲಿರುವ ಫೋರ್ಡ್‌ನ ಎರಡು ಘಟಕಗಳು ಹಾಗೂ ನೌಕರರನ್ನು  ಹೊಂದಿರುವ ಜೆ.ವಿ.ಯನ್ನು ಮಹೀಂದ್ರಾ ನಿರ್ವಹಿಸಲಿದ್ದು, ಆಡಳಿತ ಮಂಡಳಿಗೆ ಎರಡು ಪಕ್ಷಗಳು ಸಮಾನ ಪ್ರಾತಿನಿಧ್ಯವನ್ನು ನೀಡುತ್ತವೆ. ಜಂಟಿ ಉದ್ಯಮವು ನಿಯಮಾವಳಿಗಳಿಗೆ ಒಲಪಟ್ಟು  2020 ರ ಮಧ್ಯಭಾಗದಲ್ಲಿ ಕಾರ್ಯಾರಂಭ ಮಾಡುವ ನಿರೀಕ್ಷೆ ಇದೆ.

ಭಾರತ ಆರ್ಥಿಕ ಬೆಳವಣಿಗೆ ದರ ಇಳಿಸಿದ ಮೂಡೀಸ್
ಮೂಡಿಸ್ ಇನ್ವೆಸ್ಟರ್ಸ್ ಸರ್ವೀಸಸ್ ಭಾರತಕ್ಕೆ 2019-20ರ ಭಾರತದ ಆರ್ಥಿಕ ಬೆಳವಣಿಗೆಯ ದರವನ್ನು ಈ ಹಿಂದಿನ ದ 6.2% ರಿಂದ 5.8% ಕ್ಕೆ ಇಳಿಸಿತು, ದುರ್ಬಲ ಹೂಡಿಕೆಗಳು ಮತ್ತು ನಿಧಾನಗತಿಯ ಬೆಳವಣಿಗೆಗಳ ಉಲ್ಲೇಖಿಸಿ. ಭಾರತೀಯ ರಿಸರ್ವ್ ಬ್ಯಾಂಕ್ ಜಿಡಿಪಿ ಅಂದಾಜುಗಳನ್ನು 6.9% ರಿಂದ 6.1% ಕ್ಕೆ ಇಳಿಸಿದ ಒಂದು ವಾರದ ನಂತರಮೂಡೀಸ್ ಈ ಹೇಳಿಕೆ ಬಿಡುಗಡೆ ಮಾಡಿದೆ..  
ಇದಾಗಿ ನವೆಂಬರ್ 14ರಂದು  ಭಾರತದ ಭವಿಷ್ಯದ ಜಿಡಿಪಿ ಬೆಳವಣಿಗೆ ದರವನ್ನು ಮತ್ತೊಮ್ಮೆ ಕಡಿತಗೊಳಿಸಿದ ಮೂಡೀಸ್  ಆರ್ಥಿಕ ಬೆಳವಣಿಗೆಯನ್ನು ಶೇಕಡಾ 5.6 ಕ್ಕೆ ನಿಗದಿಪಡಿಸಿದೆ. ಸರ್ಕಾರದ ಕ್ರಮಗಳು ಆರ್ಥಿಕತೆ ಉತ್ತೇಜನಕ್ಕೆ ವ್ಯಾಪಕ ಸೌಲಭ್ಯ ನೀಡುವುದಿಲ್ಲ ಎಂದು  ರೇಟಿಂಗ್ ಏಜೆನ್ಸಿ ಅಭಿಪ್ರಾಯಪಟ್ಟಿತು.

ಹೊಸ ಅವತಾರದಲ್ಲಿ ಚೇತಕ್ ಸ್ಕೂಟ-ಬಜಾಜ್ ಘೋಷಣೆ
ದ್ವಿಚಕ್ರ ವಾಹನ ಪ್ರಮುಖ ಬಜಾಜ್ ತನ್ನ ಐಕಾನಿಕ್ ಸ್ಕೂಟರ್ ಬ್ರಾಂಡ್ ಚೇತಕ್ ಅನ್ನು ವಿನೂತನ ಎಲೆಕ್ಟ್ರಾನಿಕ್ ಮಾದರಿ ವಾಹನ ಸ್ವರೂಪದಲ್ಲಿ ಮತ್ತೆ ಮಾರುಕಟ್ಟೆಗೆ ತರುವುದಾಗಿ ಘೋಷಿಸಿತು. ಚೇತಕ್ ಬ್ರಾಂಡ್ ಅಡಿಯಲ್ಲಿ ಜನವರಿಯಿಂದ ಪುಣೆ ಘಟಕದಲ್ಲಿ ಇ-ಸ್ಕೂಟರ್ ಮಾರಾಟವನ್ನು ಪ್ರಾರಂಭಿಸಲು ಕಂಪನಿಯು ಯೋಜಿಸಿದೆ ಮತ್ತು ಬೆಂಗಳೂರಿನಲ್ಲಿ ಸಹ ಇದಕ್ಕೆ ದೊರಕುವ ಪ್ರತಿಕ್ರಿಯೆಗಳನ್ನು ಅಳತೆ ಮಾಡುವುದಾಗಿ ಹೇಳಿದೆ.

ಇನ್ಫೋಸಿಶೇವ್‌ನಲ್ಲಿ ಅವ್ಯವಹಾರದ ಆರೋಪ
ಜಾಗತಿಕ ಸಾಫ್ಟ್ ವೇರ್ ದಿಗ್ಗಜ  ಇನ್ಫೋಸಿಶೇವ್‌ನ ಕೆಲವು ಅನಾಮಧೇಯ ಉದ್ಯೋಗಿಗಳು ಅದರ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (ಸಿಇಒ) ಸಲೀಲ್ ಪರೇಖ್ ಮತ್ತು ಮುಖ್ಯ ಹಣಕಾಸು ಅಧಿಕಾರಿ (ಸಿಎಫ್‌ಒ) ನೀಲಂಜನ್ ರಾಯ್ ಅವರು ಕೆಲ ಅನೈತಿಕ ಹೂಡಿಕೆ, ವ್ಯವಹಾರಗಳಲ್ಲಿ ತೊಡಗಿದ್ದಾರೆ ಎಂದು ಆರೋಪಿಸಿದ್ದರು  "ಪರೇಖ್ ಮತ್ತು ರಾಯ್ ಅವರು ಅನೇಕ ಭಾಗಗಳಿಂದ ಅನೈತಿಕ ಅಭ್ಯಾಸಗಳನ್ನು ಆಶ್ರಯಿಸುತ್ತಿದ್ದಾರೆ, ಅವರ ಇ-ಮೇಲ್ ಗಳು  ಅವರ ಸಂಭಾಷಣೆಯ ಧ್ವನಿ ಧ್ವನಿಮುದ್ರಣಗಳಿಂದ ಇದು ಸ್ಪಷ್ಟವಾಗಿದೆ" ಎಂದು ಹೇಳಿರುವ ದೂರುದಾರರು ತಮ್ಮನ್ನು ತಾವು 'ನೈತಿಕ ಉದ್ಯೋಗಿಗಳು' ಎಂದು ಹೇಳಿಕೊಂಡಿದ್ದಾರೆ.ಅವರು ಈ ಕುರಿತಾದ ದೂರನ್ನು  ಐಟಿ ಬೆಹೆಮೊಥ್ ಮಂಡಳಿಗೆ 2 ಪುಟಗಳ ಪತ್ರದಲ್ಲಿ ಸಲ್ಲಿಸಿದ್ದರು. 

 ಗೌಪ್ಯತೆ ಪ್ರಕರಣದಲ್ಲಿ 500,000-ಪೌಂಡ್ ದಂಡ ಪಾವತಿಗೆ ಫೇಸ್‌ಬುಕ್ ಸಮ್ಮತಿ
ಕೇಂಬ್ರಿಡ್ಜ್ ಅನಾಲಿಟಿಕಾ ಹಗರಣದಿಂದ ಉದ್ಭವಿಸಿದ ಗೌಪ್ಯತೆ ಪ್ರಕರಣದಲ್ಲಿ 500,000-ಪೌಂಡ್ (3 643,000) ದಂಡವನ್ನು ಪಾವತಿಸಲು ಫೇಸ್‌ಬುಕ್ ಒಪ್ಪಿಕೊಂಡಿತು.ಫೇಸ್‌ಬುಕ್ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಅನ್ಯಾಯವಾಗಿ ಪ್ರಕ್ರಿಯೆಗೊಳಿಸಿದ ನಂತರ ಬ್ರಿಟನ್‌ನ ಮಾಹಿತಿ ಆಯುಕ್ತರ ಕಚೇರಿ ದಂಡವನ್ನು ವಿಧಿಸಿತ್ತು.

ಒಳಬರುವ ಕರೆಗಳ ಕಾಲಮಿತಿ ನಿಗದಿ ಮಾಡಿದ ಟ್ರಾಯ್
ಭಾರ್ತಿಏರ್‌ಟೆಲ್, ವೊಡಾಫೋನ್ ಐಡಿಯಾ ಮತ್ತು ಹೊಸದಾಗಿ ಪ್ರವೇಶಿಸಿದ ರಿಲಯನ್ಸ್ ಜಿಯೋ ನಡುವೆ ಇಂಟರ್ಕನೆಟ್ ಬಳಕೆ ಶುಲ್ಕಗಳ ಕುರಿತು ಬಹುಮುಖಿ ವಿವಾದದ ಒಂದು ಅಂಶವನ್ನು ಟೆಲಿಕಾಂ ರೆಗ್ಯುಲೇಟರಿ ಅಥಾರಿಟಿ ಆಫ್ ಇಂಡಿಯಾ (ಟ್ರಾಯ್) ಇತ್ಯರ್ಥಪಡಿಸಿತು. ಮೊಬೈಲ್ ಫೋನ್‌ಗೆ ಒಳಬರುವ ಧ್ವನಿ ಕರೆ ಕನಿಷ್ಠ 30 ಸೆಕೆಂಡುಗಳವರೆಗೆ ಮತ್ತು ಲ್ಯಾಂಡ್‌ಲೈನ್‌ಗೆ 60 ಸೆಕೆಂಡುಗಳವರೆಗೆ ರಿಂಗಣಿಸಬೇಕು ಎಂದು ಟೆಲಿಕಾಂ ನಿಯಂತ್ರಕ ಸಂಸ್ಥೆ ನಿರ್ದೇಶನ ನೀಡಿತು.. 

10,000 ಉದ್ಯೋಗಿಗಳ ವಜಾಗೊಳಿಸಿದ ಇನ್ಫೋಸಿಸ್ 
ದೇಶದಲ್ಲಿನ ಆರ್ಥಿಕ ಕುಸಿತದ ಮಧ್ಯೆ ಭಾರತೀಯ ಐಟಿ ಸೇವೆಗಳ ದೈತ್ಯ ಇನ್ಫೋಸಿಸ್ ಮಧ್ಯಮ-ಉನ್ನತ ಮಟ್ಟದ ಹುದ್ದೆಗಳಲ್ಲಿ 10,000 ಉದ್ಯೋಗಿಗಳನ್ನು ವಜಾ ಮಾಡುವುದಾಗಿ ಘೋಷಿಸ್ತು. ನಿಧಾನಗತಿಯ ಬೆಳವಣಿಗೆ, ಐಟಿ ಮತ್ತು ಸಂಸ್ಥೆಪುನರ್ರಚನೆ, ವೆಚ್ಚ ಕಡಿತದ ಕ್ರಮವಾಗಿ ಇನ್ಫೋಸಿಸ್ ಈ ಉಪಕ್ರಮ ತೆಗೆದುಕೊಂಡಿತು.ಇದು ಪ್ರೋಗ್ರಾಮಿಂಗ್ ಮತ್ತು ಎಂಜಿನಿಯರಿಂಗ್ ವಿಭಾಗಗಳಲ್ಲಿನ ಎಲ್ಲಾ ಹಂತಗಳಲ್ಲಿ ದುಡಿಯುವ ಉದ್ಯೋಗಿಗಳ ಮೇಲೆ ಪರಿಣಾಮ ಬೀರಲಿದೆ.

ಆರ್ಕಾಂ ನಿರ್ದೇಶಕ ಸ್ಥಾನಕ್ಕೆ ರಾಜೀನಾಮೆ ನೀಡಲು ಮುಂದಾದ ಅನಿಲ ಅಂಬಾನಿ
ಆರ್ಕಾಂ ನಿರ್ದೇಶಕ  ಅನಿಲ್ ಅಂಬಾನಿ ತರ ನಾಲ್ವರು ನಿರ್ದೇಶಕರೊಂದಿಗೆ  ತನ್ನ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆಂದು ಕಂಪನಿ ಪ್ರಕಟಣೆ ಹೇಳಿತ್ತು. ವೊಡಾಫೋನ್ ಐಡಿಯಾ ನಂತರ ಕಾರ್ಪೊರೇಟ್ ಇಂಡಿಯಾದಲ್ಲಿ ಅತಿ ಹೆಚ್ಚು ನಿರ್ದೇಶಕರು ರಾಜೀನಾಮೆ ಸಲ್ಲಿಸಿದ ಕಂಪನಿ ರಿಲಯನ್ಸ್ ಆಗಿದೆ. ಆದರೆ ಆರ್ಕಾಂ ಶೇರುದಾರರ ಸಭೆಯಲ್ಲಿ ಅನಿಲ್ ಅಂಬಾನಿ ಅವರ ರಾಜೀನಾಮೆಯನ್ನು ಒಪ್ಪಿಕೊಳ್ಲಲಾಗಿಲ್ಲ. ಅವರು ನಿರ್ದೇಶಕರಾಗಿ ಮುಂದುವರಿಯಬೇಕು ಹಾಗೂ ಕಂಪನಿಯ ದಿವಾಳಿತನ ಪ್ರಕ್ರಿಯೆಗೆ ಸಹಕರಿಸಬೇಕೆಂದು ಹೇಳಲಾಗಿದೆ.

ಮೊಬೈಲ್ ಕರೆ, ಡೇಟಾ ಶುಲ್ಕ ಹೆಚ್ಚಳ
ಭಾರತದ ಪ್ರಮುಖ ಟೆಲಿಕಾಂ ಸಂಸ್ಥೆಗಳಾದ ವೊಡಾಫೋನ್ ಐಡಿಯಾ (ವಿಐಎಲ್) ಮತ್ತು ಭಾರ್ತಿ ಏರ್‌ಟೆಲ್ ಡಿಸೆಂಬರ್ 1 ರಿಂದ ಮೊಬೈಲ್ ಕರೆ ಹಾಗೂ ಡೇಟಾ ಶುಲ್ಕ ಹೆಚ್ಚಳವನ್ನು ಂಆಡಿದ್ದವು. ಇನ್ನು ರಿಲಯನ್ಸ್ ಜಿಯೋ ಸಹ ಡಿಸೆಂಬರ್ ಆರರಿಂದ ತನ್ನ ಕರೆ ದರಗಳಲ್ಲಿ ಹಾಗೂ ಡೇಟಾ ಬಳಕೆ ದರಗಳಲ್ಲಿ ಹೆಚ್ಚಳವನ್ನು ಘೋಷಿಸಿದೆ.  2012 ರಿಂದ ಭಾರತದ ಟೆಲಿಕಾಂ ಮಾರುಕಟ್ಟೆಯಲ್ಲಿ ಇಂತಹ ಮೊದಲ ದರ ಹೆಚ್ಚಳ ಇದಾಗಿತ್ತು.

ಡಿಎಚ್‌ಎಫ್‌ಎಲ್ ಅನ್ನು ಅಮಾನತುಗೊಳಿಸಿದ ಆರ್ ಬಿಐ
ಹೌಸಿಂಗ್ ಫೈನಾನ್ಸ್ ಕಾರ್ಪೊರೇಶನ್ ಲಿಮಿಟೆಡ್ (ಡಿಎಚ್‌ಎಫ್‌ಎಲ್) ಮಂಡಳಿಯನ್ನು ಅಮಾನತು ಮಾಡಿ ಭಾರತೀಯ ರಿಸರ್ವ್ ಬ್ಯಾಂಕ್ ಆದೇಶಿಸಿದೆ. ಆ ಸ್ಥಾನದಲ್ಲಿ ಹೊಸ ನಿರ್ವಾಹಕರನ್ನು ನೇಮಿಸಿದ್ದು ಕಂಪನಿ ನಿರ್ವಹಣೆ  ರಾಷ್ಟ್ರೀಯ ಕಂಪನಿ ಕಾನೂನು  ಟ್ರಿಬ್ಯೂನಲ್ (ಎನ್‌ಸಿಎಲ್‌ಟಿ) ಗೆ ವರ್ಗಾಯಿಸಿದೆ.

ಗೂಗಲ್ ಮೂಲಸಂಸ್ಥೆ ಅಲ್ಫಾಬೆಟ್ ನ ಸಿಇಒ ಆದ ಸುಂದರ್ ಪಿಚೈ 
ಗೂಗಲ್ ಸಿಇಒ ಸುಂದರ್ ಪಿಚೈ ಗೂಗಲ್ ಮೂಲ ಸಂಸ್ಥೆ ಆಲ್ಫಾಬೆಟ್ ನ ಹೆಚ್ಚುವರಿ ಜವಾಬ್ದಾರಿಯನ್ನು ಹೊತ್ತುಕೊಂಡರು. ಗೂಗಲ್ ಸಹ ಸಂಸ್ಥಾಪಕರಾದ  ಲ್ಯಾರಿ ಪೇಜ್ ಮತ್ತು ಸೆರ್ಗೆ ಬ್ರಿನ್  ಅವರುಗಳ ಪದತ್ಯಾಗದ ಬಳಿಕ ಪಿಚೈ ಈ ಹುದ್ದೆಗೇರಿದ್ದಾರೆ.  

ಇನ್ಫೊಸಿಸ್‌ಗೆ 5.68 ಕೋಟಿ ದಂಡ ವಿಧಿಸಿದ ಕ್ಯಾಲಿಫೋರ್ನಿಯಾ 
ವೀಸಾ ನಿಯಮ ಉಲ್ಲಂಘನೆ ಮತ್ತು ತೆರಿಗೆ ವಂಚನೆ ನಡೆಸಿದ ಆರೋಪದ ಹಿನ್ನೆಲೆಯಲ್ಲಿ ಪ್ರತಿಷ್ಠಿತ ಸಾಫ್ಟ್‌ವೇರ್ ಕಂಪೆನಿ ಇನ್ಫೋಸಿಸ್‌ ಗೆ ಕ್ಯಾಲಿಫೋರ್ನಿಯಾ ಸರ್ಕಾರ 5.68 ಕೋಟಿರು. ದಂಡ ವಿಧಿಸಿತು.ಕಂಪನಿಯು ಸುಳ್ಳು ವೀಸಾದಡಿ ತನ್ನ ಕೆಲಸಗಾರರನ್ನು ಕ್ಯಾಲಿಫೋರ್ನಿಯಾಗೆ ಕರೆದುಕೊಂಡು ಬರುವುದರ ಜೊತೆಗೆ ಕ್ಯಾಲಿಫೋರ್ನಿಯಾದ ತೆರಿಗೆ ಪಾವತಿಸುವುದರಿಂದ ತಪ್ಪಿಸಿಕೊಂಡಿದೆ ಎಂದು ಅಟರ್ನಿ ಜನರಲ್‌ ಕಚೇರಿ ಆರೋಪಿತ್ತು.

ಸೈರಸ್ ಮಿಸ್ತ್ರಿಗೆ ಮತ್ತೆ ಟಾಟಾ ಸನ್ಸ್ ಅಧ್ಯಕ್ಷ ಪಟ್ಟ
ರಾಷ್ಟ್ರೀಯ  ಕಂಪನಿ ಕಾನೂನು ಮೇಲ್ಮನವಿ ನ್ಯಾಯಮಂಡಳಿ (ಎನ್‌ಸಿಎಲ್‌ಎಟಿ ) ಸೈರಸ್ ಮಿಸ್ತ್ರಿ ಅವರನ್ನು ಟಾಟಾ ಸನ್ಸ್ ನ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ ಪುನಃಸ್ಥಾಪಿಸಲು ಆದೇಶಿಸಿತು.  ಎನ್ ಚಂದ್ರ ಅವರನ್ನು ಕಾರ್ಯನಿರ್ವಾಹಕ ಅಧ್ಯಕ್ಷರನ್ನಾಗಿನೇಮಕ ಮಾಡಿರುವುದು ಕಾನೂನುಬಾಹಿರ ಎಂದ ಎನ್‌ಸಿಎಲ್‌ಎಟಿ ಮಿಸ್ತ್ರಿ ಅವರನ್ನು ಮರಳಿ ಆ ಸ್ಥಾನಕ್ಕೇರಿಸಲು ಹೇಳಿತು.

ಈರುಳ್ಳಿ ಬೆಲೆ ಏರಿಕೆ


ಬಾರತೀಯರ ಅಡುಗೆಗೆ ಅತ್ಯಂತ ಅಗತ್ಯವಾಗಿರುವ ಈರುಳ್ಳಿಯ ಬೆಲೆ ದಿಢೀರನೆ ಗಗನಮುಖಿಯಾಗಿ ಆತಂಕ ಸೃಷ್ಟಿಸಿತ್ತು. ನವೆಂಬರ್ ಮೊದಲ ವಾರದಲ್ಲಿ ಹೀಗೆ ಬೆಲೆ ಏರಿಕೆಯಾಗಿದ್ದ ಈರುಳ್ಳಿ ಬೆಲೆ ಒಂದು ಹಂತದಲ್ಲಿ ಕೆಜಿಗೆ ೨೦೦ ರು ವರೆಗೆ ತಲುಪಿ ದಾಖಲೆ ಬರೆದಿತ್ತು. ಗ್ರಾಹಕರ ಕಣ್ಣಿರಿಗೆ ಕಾರಣವಾದ ಈರುಳ್ಳಿ ಬೆಲೆ ಇಳಿಕೆಗೆ ಕೇಂದ್ರ ಸರ್ಕಾರ ಸಾಕಷ್ಟು ಉಪಕ್ರಮ ತೆಗೆದುಕೊಂಡರು ಸಹ ವರ್ಷಾಂತದವರೆಗೆ ಈರುಳ್ಳಿ ಬೆಲೆಯಲ್ಲಿ ಗಣನೀಯ ಇಳಿಕೆ ಏನೂ ಕಂಡುಬಂದಿಲ್ಲ. ಆದರೆ ಡಿಸೆಂಬರ್ ಅಂತ್ಯದ ವೇಳೆಗೆ ಈಜಿಪ್ಟ್, ಟರ್ಕಿ ಸೇರಿ ವಿದೇಶಗಳಿಂದ ಬಾರತದ ಮಾರುಕಟ್ಟೆಗೆ 790 ಟನ್ ಈರುಳ್ಳಿ ಆಗಮನವಾಗಿದೆ.

ಮಹಿಂದ್ರಾ ಗ್ರೂಪ್ಸ್ ಅಧ್ಯಕ್ಷಸ್ಥಾನದಿಂದ ಕೆಳಗಿಳಿಯಲಿರುವ ಆನಂದ್ ಮಹೀಂದ್ರ
ದೇಶದ ಮಹತ್ವದ ಕೈಗಾರಿಕಾ ಸಾಂಸ್ಥೆ ಮಹೀಂದ್ರಾ ಸಮೂಾಹದ ಅಧ್ಯಕ್ಷ ಸ್ಥಾನದಿಂದ ಆನಂದ್ ಮಹೀಂದ್ರಾ ಕೆಳಗಿಳಿಯಲಿದ್ದಾರೆ.2020 ರ ಏಪ್ರಿಲ್ 1 ರಿಂದ ಸಮೂಹದ ಕಾರ್ಯನಿರ್ವಾಹಕ ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಯುವ ನಿರ್ಧಾರವನ್ನು ಕೈಗಾರಿಕೋದ್ಯಮಿ ಆನಂದ್ ಮಹೀಂದ್ರಾ ಡಿಸೆಂಬರ್ 20ರಂದು ಪ್ರಕಟಿಸಿದ್ದಾರೆ. ಅಂದಿನಿಂದ ಅವರು  ಮಂಡಳಿಯ ನಾನ್‌ ಎಕ್ಸಿಕ್ಯುಟಿವ್‌ ಚೇರ್‌ಮನ್‌ ಆಗಿ ನೇಮಕವಾಗಲಿದ್ದಾರೆ.

Stay up to date on all the latest ವಾಣಿಜ್ಯ news with The Kannadaprabha App. Download now
facebook twitter whatsapp