ವೂಟ್ ಸೆಲೆಕ್ಟ್ ನಿಂದ ಕನ್ನಡದ ಹೊಸ ವೆಬ್ ಸರಣಿ, `ಹನಿಮೂನ್’ ಪ್ರಸಾರ, ಟ್ರೈಲರ್ ಬಿಡುಗಡೆ!

ಶಿವರಾಜ್‌ಕುಮಾರ್ ಪುತ್ರಿ ನಿವೇದಿತಾ ನಿರ್ಮಾಣ, ನಾಗಭೂಷಣ ಮತ್ತು ಸಂಜನಾ ಆನಂದ್ ನಟನೆ

ಬೆಂಗಳೂರು: ಕನ್ನಡದ ಹೊಸ ವೆಬ್ ಸರಣಿ `ಹನಿಮೂನ್’ ಟೀಸರ್ ಬಿಡುಗಡೆಯಾಗಿದ್ದು, ನಟ ನಾಗಭೂಷಣ, ಸಂಜನಾ ಆನಂದ್, ಪವನ್ ಕುಮಾರ್, ಅಪೂರ್ವ ಭಾರದ್ವಾಜ್, ಆನಂದ್ ನೀನಾಸಂ ಮತ್ತು ಅರ್ಚನಾ ಕೊಟಿಗೆ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಇದು ಲಘುಹಾಸ್ಯದ ಅಸಾಂಪ್ರದಾಯಿಕ ಭಾರತೀಯ ವಿವಾಹದ ಕಥೆಯಾಧಾರಿತವಾಗಿದ್ದು, ಸದ್ಯದಲ್ಲೇ ವೂಟ್ ಸೆಲೆಕ್ಟ್ನಲ್ಲಿ ಪ್ರಸಾರವಾಗಲಿದೆ. ಆರು ಕಂತುಗಳ ಹನಿಮೂನ್ ವೆಬ್ ಸೀರೀಸ್ ಅನ್ನು ಖ್ಯಾತ ನಟ ಶಿವರಾಜ್ ಕುಮಾರ್ ಅರ್ಪಿಸುತ್ತಿದ್ದಾರೆ. ಇದೇ ಮೇ 20ರಂದು ಬಿಡುಗಡೆಯಾಗಲಿರುವ ಈ ಹಾಸ್ಯಪ್ರಧಾನ ಪ್ರೇಮಕತೆಯನ್ನು ನೀವು ವೂಟ್ ಸೆಲೆಕ್ಟ್ನಲ್ಲಿ ನೋಡಿ ಆನಂದಿಸಬಹುದು.

ಈಗಾಗಲೇ ಹಲವು ಸಿನಿಮಾಗಳ ನಟನೆಯಿಂದ ನಿಮ್ಮ ಮನ ಗೆದ್ದಿರುವ ನಾಗಭೂಷಣ್, ಹನಿಮೂನ್ ಸರಣಿಯ ಮುಖ್ಯಪಾತ್ರದಲ್ಲಿದ್ದಾರೆ. ಈ ಸೀರೀಸಿನ ಬರವಣಿಗೆಯೂ ಅವರದ್ದೆ.  ಅವರಿಗೆ ಜೋಡಿಯಾಗಿ ಸಂಜನಾ ಆನಂದ್ ಇದ್ದಾರೆ. ಹೊಸದಾಗಿ ಮದುವೆಯಾದ ಹುಡುಗನಿಗೆ ದಾರಿ ತೋರಿಸುವ ‘ಸೂತ್ರ’ಧಾರಿಯಾಗಿ ಮತ್ತೊಬ್ಬ ಚಿತ್ರ ನಿರ್ದೇಶಕ ಲೂಸಿಯಾ ಪವನ್ ಕೂಡ ಪಾತ್ರ ನಿರ್ವಹಿಸಿದ್ದಾರೆ. ಜೊತೆಗೆ ಅಪೂರ್ವಾ ಭಾರದ್ವಾಜ್, ಆನಂದ್ ನೀನಾಸಂ ಮತ್ತು ಅರ್ಚನಾ ಕೊಟ್ಟಿಗೆ ಕೂಡ ಹನಿಮೂನ್‌ನಲ್ಲಿದ್ದಾರೆ.

ಈ ವೆಬ್ ಸೀರೀಸ್ ತಮ್ಮ ಮನಸ್ಸಿಗೆ ಹತ್ತಿರವಾದದ್ದು  ಎಂದು ಹೇಳಿದ ನಟ ಶಿವರಾಜ್ ಕುಮಾರ್, ‘ನಮ್ಮ ಸುತ್ತ ಸಾಕಷ್ಟು ಹೊಸ ರೀತಿಯ ಕತೆಗಳಿವೆ, ಅಂಥ ಕತೆಗಳನ್ನು ಬೆಂಬಲಿಸುತ್ತಿರುವ ವೂಟ್ ಬಗ್ಗೆ ನನಗೆ ಖುಷಿ ಅನಿಸುತ್ತೆ. ಈ ಪ್ರಾಜೆಕ್ಟಿನಲ್ಲಿ ನನ್ನ ಮಗಳೂ ಕೆಲಸ ಮಾಡಿರೋದ್ರಿಂದ ಹನಿಮೂನ್ ನನ್ನ ಮನಸಿಗೆ ಇನ್ನಷ್ಟು ಹತ್ತಿರವಾಗಿದೆ’ ಎಂದರು.

ಹನಿಮೂನ್ ಸಿರೀಸಿನ ನಾಯಕನಟ ನಾಗಭೂಷಣ್ ಮಾತನಾಡಿ, ‘ಇದು ಎಲ್ಲ ಅರೇಂಜ್ಡ್ ಮ್ಯಾರೇಜುಗಳ ಕತೆ. ಹೊಸದಾಗಿ ಮದುವೆಯಾದ ಗಂಡ ಹೆಂಡತಿಯರAತೂ ಇದರಲ್ಲಿ ತಮ್ಮನ್ನ ತಾವೇ ಕಾಣುತ್ತಾರೆ’ ಎಂದರು.

ಹನಿಮೂನ್ ಅನ್ನುವುದು ಬರೀ ಮಜಾ ಅಲ್ಲ; ಗಂಡು ಹೆಣ್ಣು ತಮ್ಮ ಹೊಸ ಬದುಕನ್ನ ಜೋಡಿಸಿಕೊಳ್ಳುವುದು ಹನಿಮೂನಲ್ಲೇ. ಒಂದಷ್ಟು ಕುತೂಹಲ, ಒಂದಷ್ಟು ಫಜೀತಿ, ಒಂದಷ್ಟು ಗುಟ್ಟುಗಳು, ಒಂದಷ್ಟು ಒದ್ದಾಟಗಳು ಹೊಸ ಜೋಡಿಯೊಂದನ್ನು ಹೇಗೆ ಹತ್ತಿರಕ್ಕೆ ತಂದು ಮುಂದಿನ ಬದುಕಿಗೆ ತಯಾರು ಮಾಡುತ್ತವೆ ಅನ್ನುವುದು ಇಲ್ಲಿನ ಕತೆ.