ಕನ್ನಡ ಚಿತ್ರದಲ್ಲಿ ನಾಯಕನಾಗುವುದು ಬಹುದಿನದ ಕನಸು: ಹಾಲುಂಡ ತವರು, ಮನೆ ದೇವ್ರು ನಿರ್ಮಾಪಕರ ಪುತ್ರ ಕಾರ್ತಿಕ್ ರಾಜು

ಹಾಲುಂಡ ತಾವರು, ಅಪ್ಪಾಜಿ, ಮನೆ ದೇವ್ರು, ಮತ್ತು ಕರುಳಿನ ಕೂಗು ಮುಂತಾದ ಚಲನಚಿತ್ರಗಳಲ್ಲಿ ಕೆಲಸ ಮಾಡಿದ್ದ ಖ್ಯಾತ ನಿರ್ಮಾಪಕ ವೈಜಾಗ್ ರಾಜು ಅವರು ಈಗ ತಮ್ಮ ಮಗ ಕಾರ್ತಿಕ್ ರಾಜು ಅವರನ್ನು ಸಿನಿಮಾ ರಂಗಕ್ಕೆ ಪರಿಚಯಿಸುತ್ತಿದ್ದಾರೆ. ಈಗಾಗಲೇ ಕೆಲವು ತೆಲುಗು ಚಿತ್ರಗಳಲ್ಲಿ ಅಭಿನಯಿಸಿರುವ ಈ ಯುವ ಪ್ರತಿಭೆ ಇದೀಗ 'ಅಥರ್ವ' ಎಂಬ ಆಕ್ಷನ್-ಪ್ಯಾಕ್ಡ್ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರೆ.

ಈ ಚಿತ್ರವು ಬಹುಭಾಷಾ ಪ್ರಾಜೆಕ್ಟ್ ಆಗಿದ್ದು, ಮಹೇಶ್ ರೆಡ್ಡಿ ನಿರ್ದೇಶಿಸಿದ್ದಾರೆ ಮತ್ತು ಪೆಗ್ಗೊ ಎಂಟರ್ಟೈನ್ಮೆಂಟ್ಸ್ ಬ್ಯಾನರ್ ಅಡಿಯಲ್ಲಿ ಸುಭಾಷ್ ನೂತಲಪತಿ ನಿರ್ಮಿಸಿದ್ದಾರೆ. ಚಿತ್ರವನ್ನು ಕನ್ನಡ ಮತ್ತು ತೆಲುಗು ಎರಡರಲ್ಲೂ ತಯಾರಿಸಲಾಗಿದ್ದು, ತಮಿಳು ಮತ್ತು ಮಲಯಾಳಂನಲ್ಲೂ ಡಬ್ಬಿಂಗ್ ಮಾಡಿ ಬಿಡುಗಡೆ ಮಾಡಲು ಚಿತ್ರತಂಡ ಯೋಜಿಸಿದೆ. ಚಿತ್ರ ಸದ್ಯ ಪೋಸ್ಟ್-ಪ್ರೊಡಕ್ಷನ್‌ ಹಂತದಲ್ಲಿದ್ದು, ನವೆಂಬರ್‌ನಲ್ಲಿ ಅದ್ಧೂರಿಯಾಗಿ ಬಿಡುಗಡೆ ಮಾಡಲು ಯೋಜಿಸಲಾಗಿದೆ.

ತಮ್ಮ ಚೊಚ್ಚಲ ಚಿತ್ರದ ಬಗ್ಗೆ ಮಾತನಾಡಿದ ಕಾರ್ತಿಕ್ ರಾಜು, 'ನನ್ನ ತಂದೆ ವೈಜಾಗ್ ರಾಜು ಅವರು ಕನ್ನಡದ ಬ್ಲಾಕ್ ಬಸ್ಟರ್ ಚಿತ್ರಗಳನ್ನು ನಿರ್ಮಿಸಿದ್ದಾರೆ. ಕನ್ನಡ ಚಿತ್ರದಲ್ಲಿ ನಾಯಕನಾಗಿ ನಟಿಸುವುದು ನನ್ನ ಬಹುದಿನದ ಕನಸಾಗಿತ್ತು ಮತ್ತು ಈಗ ಆ ಕನಸು ನನಸಾಗಿದೆ. ಈ ಮೊದಲು, ಪುನೀತ್ ರಾಜ್‌ಕುಮಾರ್ ಅವರ ವೀರ ಕನ್ನಡಿಗ ಚಿತ್ರದಲ್ಲಿ ನಾನು ಚಿಕ್ಕದಾದರೂ ಮರೆಯಲಾಗದ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೆ' ಎಂದರು.

ಇದನ್ನೂ ಓದಿ: ಫೈಟರ್‌ ಸಿನಿಮಾದಲ್ಲಿ ಕೇವಲ ಆಕ್ಷನ್‌ ಮಾತ್ರವಲ್ಲ, ಮನರಂಜನೆಯೂ ಇದೆ: ನಿರ್ದೇಶಕ ನೂತನ್ ಉಮೇಶ್

ಚಿತ್ರದ ಕಥೆ ಕುರಿತು ಮಾತನಾಡುತ್ತಾ, ಅಥರ್ವ ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾ ಆಗಿದ್ದು, ಅಪರಾಧ ವಿಭಾಗದ ಅಧಿಕಾರಿಯಾಗಿ ಭಯಾನಕ ಕೊಲೆ ಪ್ರಕರಣವನ್ನು ಭೇದಿಸುತ್ತಾರೆ. 'ಈಗ ಪೋಸ್ಟ್-ಪ್ರೊಡಕ್ಷನ್ ಪೂರ್ಣಗೊಂಡಿದ್ದು, ಮುಂದಿನ ತಿಂಗಳು ಚಿತ್ರದ ಬಿಡುಗಡೆಗೆ ಎದುರು ನೋಡುತ್ತಿದ್ದೇವೆ' ಎಂದು ಅವರು ಹೇಳುತ್ತಾರೆ.

ಈ ಸಿನಿಮಾ ಮೂಲಕ ಮಹೇಶ್ ರೆಡ್ಡಿ ಇದೇ ಮೊದಲ ಬಾರಿಗೆ ನಿರ್ದೇಶಕನ ಕ್ಯಾಪ್ ತೊಟ್ಟಿದ್ದಾರೆ. 'ನಿರ್ದಿಷ್ಟ ಸಾಕ್ಷ್ಯಾಧಾರಗಳ ಅನುಪಸ್ಥಿತಿಯಲ್ಲಿಯೂ ಸಹ ಪೊಲೀಸ್ ಇಲಾಖೆಯು ಅಪರಾಧಗಳನ್ನು ಹೇಗೆ ಭೇದಿಸುತ್ತದೆ ಎಂಬುದರ ಕುರಿತು ಚಲನಚಿತ್ರವು ಬಲವಾದ ಪ್ರಶ್ನೆಗಳನ್ನು ಎತ್ತುತ್ತದೆ' ಎಂದು ಅವರು ಒತ್ತಿಹೇಳುತ್ತಾರೆ.

ಕಾರ್ತಿಕ್ ರಾಜು ಜೊತೆ ನಾಯಕಿಯಾಗಿ ತೆರೆ ಹಂಚಿಕೊಂಡಿರುವ ಸಿಮ್ರಾನ್ ಚೌಧರಿ, ಚಿತ್ರದಲ್ಲಿ ಪತ್ರಕರ್ತೆಯಾಗಿ ನಟಿಸಿದ್ದಾರೆ. ಕರ್ನಾಟಕದಲ್ಲಿ ಅಥರ್ವ ಚಿತ್ರದ ವಿತರಣೆ ಹಕ್ಕನ್ನು ಮಾರ್ಸ್ ಸುರೇಶ್ ಪಡೆದುಕೊಂಡಿದ್ದಾರೆ. ಚಿತ್ರಕ್ಕೆ ಶ್ರೀಚರಣ್ ಪಾಕಳ ಸಂಗೀತವಿದ್ದು, ಚರಣ್ ಮಾಧವನೇನಿ ಅವರ ಛಾಯಾಗ್ರಹಣವಿದೆ