ಚುನಾವಣೆಯ ಫಲಿತಾಂಶ ದೇಶದ ಮುಂದಿನ ಐದು ವರ್ಷದ ದಿಕ್ಸೂಚಿಯಾಗಲಿದೆ. 2014ರಲ್ಲಿ ನರೇಂದ್ರ ಮೋದಿಯವರು ದೇಶದ ಚುಕ್ಕಾಣಿ ಕೈಗೆ ತೆಗೆದುಕೊಂಡ ನಂತರ ಕಾಲಿಗೆ ಚಕ್ರ ಸುತ್ತಿಕೊಂಡವರಂತೆ ಜಗತ್ತನ್ನ ಸುತ್ತ ತೊಡಗಿದರು. ಅದರ ಫಲಿತಾಂಶ 2014 ರಲ್ಲಿ 25 ಬಿಲಿಯನ್ ಅಮೆರಿಕನ್ ಡಾಲರ್ ಇದ್ದ ವಿದೇಶಿ ಹೂಡಿಕೆ ಇಂದಿಗೆ 193 ಬಿಲಿಯನ್ ಮುಟ್ಟಿದೆ. ಕಳೆದ ಒಂದು ತಿಂಗಳಿಂದ ವಿದೇಶಿ ಹೂಡಿಕೆಯಲ್ಲಿ ಇಳಿಕೆಯಾಗಿದೆ. ಅದಕ್ಕೆ ಕಾರಣ ಚುನಾವಣೆ. ಹೂಡಿಕೆದಾರರು ಕಾ ನೋಡುವ ತಂತ್ರಕ್ಕೆ ಮೊರೆ ಹೋಗಿದ್ದಾರೆ. ಕಳೆದ ನಾಲ್ಕು ವರ್ಷದಲ್ಲಿ ವಾಲ್ಮಾರ್ಟ್ ಕೋಟ್ಯಂತರ ಹಣವನ್ನ ಭಾರತದಲ್ಲಿ ಹೂಡಿಕೆ ಮಾಡಿದೆ. ತನ್ನ ಭಾರತೀಯ ಎದುರಾಳಿ ಫ್ಲಿಪ್ಕಾರ್ಟ್ ಅನ್ನು 16 ಬಿಲಿಯನ್ ಡಾಲರ್ ತೆತ್ತು ಕೊಂಡದ್ದು ಗೊತ್ತಿರುವ ವಿಷಯ. ಇದರ ಜೊತೆಗೆ ಅಮೆಜಾನ್, ಇಕೆಯ, ಮುಂತಾದ ಕಂಪನಿಗಳು ಭಾರತದಲ್ಲಿ ಹೂಡಿಕೆಯನ್ನ ಮಾಡಿದವು. ನರೇಂದ್ರ ಮೋದಿಯವರ ಮೊದಲ ಎರಡು ವರ್ಷದ ವಿದೇಶಿ ಹೂಡಿಕೆಯ ಪ್ರಮಾಣಕ್ಕೆ ಹೋಲಿಸಿದರೆ ಈ ವರ್ಷ ಅಂದರೆ 2019ರಲ್ಲಿ ಇದು 30 ಪ್ರತಿಶತ ಇಳಿಕೆಯಾಗಿದೆ. ಇದಕ್ಕೆ ಮುಖ್ಯ ಕಾರಣ ಇತ್ತೀಚಿಗೆ ಈ -ಕಾಮರ್ಸ್ ವಲಯಕ್ಕೆ ಕೇಂದ್ರ ಸರಕಾರ ಹಾಕಿರುವ ಒಂದೆರಡು ನಿಬಂಧನೆಗಳು ಮತ್ತು ಚುನಾವಣೆ. ಮೇ 23 ರಂದು ಚುನಾವಣೆಯ ಫಲಿತಾಂಶಕ್ಕೆ ಕೇವಲ ಭಾರತೀಯರು ಮಾತ್ರ ಕಾದು ಕುಳಿತಿಲ್ಲ , ಜಗತ್ತು ಇಂದು ಭಾರತದತ್ತ ನೋಡುತ್ತಿದೆ.