ಕಾಫಿ ಡೇ ಸಿದ್ದಾರ್ಥ್ ಸಾವು! ಭಾರತದ ಆರ್ಥಿಕ ಪರಿಸ್ಥಿತಿಯೇ ಸರಿಯಿಲ್ಲವಂತೆ? ತಿಳಿದುಕೊಳ್ಳೋಣ ನಾವು!!

1. ಟ್ಯಾಕ್ಸ್ ಟೆರರಿಸಂ: ಗಮನಿಸಿ ಭಾರತ ಸ್ವಾತಂತ್ರ್ಯ ಪಡೆದ ದಿನದಿಂದ 2014ರಲ್ಲಿ ಮೋದಿಯವರ ಸರಕಾರ ಬರುವವರೆಗೆ ತೆರಿಗೆಯನ್ನ ಉದ್ಯಮಿಗಳಿಂದ ಇಷ್ಟೊಂದು ಕಟ್ಟುನಿಟ್ಟಾಗಿ ವಸೂಲಿ ಮಾಡಿದ ನಿದರ್ಶನಗಳಿಲ್ಲ. ಹಾಗೆಯೇ ಕಳೆದ ಐದು ವರ್ಷಗಳಲ್ಲಿ ತೆರಿಗೆ ಡಿಪಾರ್ಟ್ಮೆಂಟ್ ನಲ್ಲಿ ದಾಖಲಾಗಿರುವ ದೂರುಗಳ ಸಂಖ್ಯೆಯಲ್ಲಿ ಕೂಡ ಅತ್ಯಂತ ಹೆಚ್ಚಳವಾಗಿದೆ. ತೆರಿಗೆಯಲ್ಲಿ ವಂಚನೆ, ತೆರಿಗೆ ಕಟ್ಟುವುದರಲ್ಲಿ ವಿಳಂಬ ಅಥವಾ ತೆರಿಗೆಯನ್ನ ಪೂರ್ಣವಾಗಿ ಕಟ್ಟದೆ ತಪ್ಪಿಸಿಕೊಳ್ಳುವ ಅವಕಾಶವಿದ್ದ ಸಮಯದಲ್ಲಿ ಸಂಸ್ಥೆಗಳಲ್ಲಿ ಸಾಕಷ್ಟು ಹಣದ ಹರಿವು ಇರುತ್ತಿತ್ತು. ಈಗೇನಾಗಿದೆ ಹಣವನ್ನ ರೊಟೇಟ್ ಮಾಡುವ ಸೈಕಲ್ ನಲ್ಲಿ ವ್ಯತ್ಯಾಸವಾಗಿದೆ. ಇದೊಂದು ಚೈನ್ ರಿಯಾಕ್ಷನ್. ಸಹಜವಾಗೇ ಸಂಸ್ಥೆಯಲ್ಲಿ ಲಿಕ್ವಿಡಿಟಿ ಕುಸಿದಿದೆ. ನಿಮ್ಮ ಸಂಸ್ಥೆ ಲಾಭದಲ್ಲಿದೆ ಅಥವಾ ನಷ್ಟದಲ್ಲಿದೆ ಅದ್ಯಾವುದೂ ಗಣನೆಗೆ ಬರುವುದಿಲ್ಲ ತೆರಿಗೆ ಕಟ್ಟಲೇಬೇಕು. ಹಿಂದೆಲ್ಲ ಇದರಲ್ಲಿ ಒಂದಷ್ಟು ವಿನಾಯಿತಿ ಸಿಗುತ್ತಿತ್ತು. ಅಲ್ಲದೆ ಸಮಾಜದಲ್ಲಿ ಹೇರಳವಾಗಿ ಕಪ್ಪು ಹಣವಿತ್ತು. ಹಣವನ್ನ ರೊಟೇಟ್ ಮಾಡಲು ಹೀಗೆ ಒಂದಷ್ಟು ದಿನ ಅಥವಾ ವಾರಕ್ಕೆ ಇಂತಹ ಹಣದ ಬಳಕೆಯಾಗುತ್ತಿತ್ತು. ಇದೀಗ ಸಮಾಜದಲ್ಲಿ ಹಣದ ಹರಿವು ಕುಸಿದಿದೆ. 
2. ಪ್ರೈವೇಟ್ ಈಕ್ವಿಟಿ ಷೇರ್ ಹೊಲ್ಡರ್ ಗಳು ತಮ್ಮ ಷೇರನ್ನ ಮರು ಖರೀದಿಗೆ ಒತ್ತಾಯಿಸಿರುವುದು: ಸಿದ್ಧಾರ್ಥ್ ಅವರು ಸಂಸ್ಥೆಯನ್ನ ಕಟ್ಟಲು ಹಣದ ಅವಶ್ಯಕತೆ ಬಂದಾಗ ಖಾಸಗಿ ವ್ಯಕ್ತಿಗಳಿಂದ ಹಣ ಪಡೆದು ಅವರಿಗೆ ಸಂಸ್ಥೆಯ ಷೇರನ್ನ ನೀಡಿದ್ದಾರೆ. ಪ್ರೈವೇಟ್ ಈಕ್ವಿಟಿ ಅಂದರೆ ಹಣ ಪಡೆದು ಸಂಸ್ಥೆಯಲ್ಲಿ ಪಾಲು ನೀಡುವುದು. ಸಂಸ್ಥೆ ಎಲ್ಲಿಯವರೆಗೆ ಲಾಭದಲ್ಲಿ ನಡೆಯುತ್ತದೆ ಅಲ್ಲಿಯವರೆಗೆ ಈ ಪ್ರೈವೇಟ್ ಈಕ್ವಿಟಿ ಹೋಲ್ಡರ್ಗಳು ಸುಮ್ಮನಿರುತ್ತಾರೆ. ಯಾವಾಗ ಸಂಸ್ಥೆ ಚೆನ್ನಾಗಿ ಕಾರ್ಯ ನಿರ್ವಹಿಸುತ್ತಿಲ್ಲ ಆಗ ಅವರು ತಮ್ಮ ಪಾಲನ್ನ ಮರು ಖರೀದಿ ಮಾಡುವಂತೆ ಪ್ರೊಮೋಟರ್ಸ್ ಹಿಂದೆ ಬೀಳುತ್ತಾರೆ. ಅವರಿಗೆ ಅವರ ಹಣದ ಸುರಕ್ಷತೆ ಮುಖ್ಯ. 

1. ILI&FS ಅಂದರೆ infrastructure Leasing & Financial Services ಇದೊಂದು ಲಿಮಿಟೆಡ್ ಕಂಪನಿ. ಇದು 250 ಸಹ ಶಾಖೆಗಳನ್ನ ಹೊಂದಿದೆ. ಭಾರತದಲ್ಲಿ ಆಗುವ ಯಾವುದೇ ದೊಡ್ಡ ಅಥವಾ ಅತಿ ದೊಡ್ಡ ಕಾಮಗಾರಿ ಕಾರ್ಯಗಳನ್ನ ಗುತ್ತಿಗೆಗೆ ತೆಗೆದುಕೊಂಡು ಕೆಲಸ ಮಾಡಿಸುವುದು ಈ ಸಂಸ್ಥೆ. ಈ ಸಂಸ್ಥೆಯಲ್ಲಿ ನಮ್ಮ ಎಲೈಸಿ ಹಾಗೂ ಅಬುಧಾಬಿ ಇನ್ವೆಸ್ಟ್ಮೆಂಟ್ ಅಥಾರಿಟಿ ಜೊತೆಗೆ ಇನ್ನು ಹಲವು ಸಂಸ್ಥೆಗಳು ಪಾಲುದಾರರು. ಇಲ್ಲಿನ ಕೆಲಸವನ್ನ ಪೂರೈಸಲು ಬ್ಯಾಂಕಿನಿಂದ ಸಾಲವನ್ನ ಪಡೆಯುತ್ತಾರೆ. ಎಲ್ಲವೂ ಅಂದುಕೊಂಡ ಸಮಯದಲ್ಲಿ ಆದರೆ ಯಾವುದೇ ತೊಂದರೆ ಇರುವುದಿಲ್ಲ. ಆದರೆ ನಮ್ಮ ದೇಶದಲ್ಲಿ ನೆಲವನ್ನ ಪಡೆದುಕೊಳ್ಳುವುದು ಸುಲಭದ ಕೆಲಸವಲ್ಲ. ಹೀಗಾಗಿ ಪ್ರಾಜೆಕ್ಟ್ ಕಾಸ್ಟ್ ಜಾಸ್ತಿಯಾಗುತ್ತದೆ. ಹಣದ ಮೇಲಿನ ಬಡ್ಡಿ ಕೊಡುವ ಸಮಯ ಕೂಡ ಹೆಚ್ಚಾಗುತ್ತದೆ. ಇವೆರಡೂ ಅತ್ಯಂತ ಕೆಟ್ಟ ಕಾಂಬಿನೇಷನ್. ಇದು ಲಾಭವನ್ನ ನುಂಗಿ ಬಿಡುತ್ತದೆ. ಸಮಯ ಹೆಚ್ಚಾದರೆ ನಷ್ಟ ಗ್ಯಾರಂಟಿ. ಹೀಗಾಗಿ ಇವರು ಬ್ಯಾಂಕಿಗೆ ಕಟ್ಟುವ ಬಡ್ಡಿ ಮತ್ತು ಮೂಲಧನ ಕಟ್ಟದೆ ಉಳಿಸಿಕೊಂಡಿದ್ದಾರೆ. ಇಂತಹ ಅನೇಕ ಕಂಪನಿಗಳು ನಮ್ಮ ಬ್ಯಾಂಕಿಂಗ್ ವ್ಯವಸ್ಥೆಯನ್ನ ಶಿಥಿಲಗೊಳಿಸಿವೆ. ಹೀಗಾಗಿ ಬ್ಯಾಂಕ್ಗಳು ಹೊಸ ಸಾಲ ಕೊಡಲು ಹಿಂಜರಿಯುತ್ತವೆ. ಜೊತೆಗೆ ನಮ್ಮಲ್ಲಿ ಅನುತ್ಪಾದಕ ಆಸ್ತಿ ಹೆಚ್ಚಾಗಿದೆ. ಲಿಕ್ವಿಡಿಟಿ ಕಡಿಮೆಯಾಗಿದೆ. 
2. NBFC ಅಂದರೆ ನಾನ್ ಬ್ಯಾಂಕಿಂಗ್ ಫೈನಾನ್ಸಿಯಲ್ ಕಾರ್ಪೋರೇಶನ್ ಎಂದರ್ಥ. ಇವುಗಳು ಎಲ್ಲಿ ನಮ್ಮ ಮುಖ್ಯವಾಹಿನಿ ಬ್ಯಾಂಕ್ಗಳು ಸಾಲ ಕೊಡಲು ಹಿಂಜರಿಯುತ್ತವೆ ಅಥವಾ ಎಲ್ಲಿ ನಮ್ಮ ಬ್ಯಾಂಕ್ಗಳು ತಲುಪಿಲ್ಲ ಅಲ್ಲಿ ಕಾರ್ಯ ನಿರ್ವಹಿಸುತ್ತವೆ. ಭಾರತದಲ್ಲಿ ಹಣವನ್ನ ಸಾಲದ ರೂಪದಲ್ಲಿ ಎಲ್ಲರೂ ಬ್ಯಾಂಕಿನ ಮೂಲಕವೇ  ಪಡೆಯುವುದಿಲ್ಲ. ಒಂದು ಅಂದಾಜಿನ ಪ್ರಕಾರ 35 ಪ್ರತಿಶತ ವಹಿವಾಟು NBFC ಗಳ ಕೈಲಿದೆ. ಇಂದಿಗೆ NBFC ಗಳ ಬಳಿ ಹಣವಿಲ್ಲ. ಇವರು ಕೂಡ ಹಣದ ಹರಿವಿನ ಕೊರತೆಯನ್ನ ಎದುರಿಸುತ್ತ ಇದ್ದಾರೆ. ಇದಕ್ಕೆ ಮುಖ್ಯ ಕಾರಣ ಇವರು ಹಣವನ್ನ ಮುಖ್ಯ ವಾಹಿನಿ ಬ್ಯಾಂಕ್ಗಳ ಮೂಲಕ ಪಡೆಯುತ್ತಾರೆ. ಅದು ಅಲ್ಪಾವಧಿಗೆ ಅಂದರೆ ಆರು ತಿಂಗಳು ಅಥವಾ ವರ್ಷದ ಅವಧಿಗೆ. ಆದರೆ ಇವರು ಸಾಲವನ್ನ ಐದು ವರ್ಷದ ವರೆಗೆ ನೀಡುತ್ತಾರೆ. ಆರು ತಿಂಗಳ ನಂತರ ಬ್ಯಾಂಕಿಗೆ ಹಣ ನೀಡುವ ವೇಳೆಗೆ ಅವರು ಇನ್ನೊಂದು ಸಾಲವನ್ನ ಪಡೆಯಲೇ ಬೇಕು. ಇದೊಂದು ಜಗಲಿಂಗ್ ಇದರಲ್ಲಿ ಟೈಮಿಂಗ್ ಬಹಳ ಮುಖ್ಯ. ಒಂದು ಸುತ್ತು ತಪ್ಪಿದರೂ ಕುಸಿತ ಕಟ್ಟಿಟ್ಟ ಬುತ್ತಿ. ಉದಾಹರೆಣೆ ನೋಡಿ. ರಾಮ ಎನ್ನುವ ನಾನ್ ಬ್ಯಾಂಕಿಂಗ್ ಫೈನಾನ್ಸಿಯಲ್ ಕಾರ್ಪೋರೇಶನ್ ನಮ್ಮ ಎಸ್ಬಿಐ ಬಳಿ 1 ಲಕ್ಷ ರೂಪಾಯಿಗಳನ್ನು ಆರು ತಿಂಗಳಿಗೆ ಸಾಲ ಪಡೆಯುತ್ತದೆ. ಅದನ್ನ ಉಮೇಶ ಎನ್ನುವನಿಗೆ 5 ವರ್ಷಕ್ಕೆ ಸಾಲ ನೀಡುತ್ತದೆ. ಆರು ತಿಂಗಳ ಬಳಿಕ ಎಸ್ಬಿಐ ಗೆ ವಾಪಸ್ಸು ಕೊಡಲು ಬೇರೆ ಸಂಸ್ಥೆಯಿಂದ ಹಣವನ್ನ ಸಾಲ ಪಡೆಯಬೇಕು. ಇಂತಹ ವಹಿವಾಟು ಸಾಮಾನ್ಯ ಆರ್ಥಿಕ ಪರಿಸ್ಥಿತಯಲ್ಲಿ ಆತಂಕವಿಲ್ಲದೆ ನೆಡೆದುಕೊಂಡು ಹೋಗುತ್ತದೆ. ಹಣದ ಹರಿವು ಕಡಿಮೆಯಾದ ಸಮಯದಲ್ಲಿ ಇಂತಹ ಜಗಲಿಂಗ್ ವ್ಯವಸ್ಥೆ ಕುಸಿಯುತ್ತದೆ. ನಮ್ಮ ಜನಸಂಖ್ಯೆ 35 ಪ್ರತಿಶತ ಜನ ಹಣದ ಕೊರತೆಯಿಂದ ಬಳಲಿದರೆ ಸಮಾಜ ಹೇಗೆ ಮುಂದುವರಿಯಲು ಸಾಧ್ಯ? ಒಂದು ಕುಸಿತ ಹಲವಾರು ಕುಸಿತಗಳಿಗೆ ಕಾರಣವಾಗುತ್ತದೆ. 
3. FII ಅಂದರೆ ಫಾರಿನ್ ಇನ್ಸ್ಟಿಟ್ಯೂಷನಲ್ ಇನ್ವೆಸ್ಟರ್ಸ್ ಎಂದರ್ಥ: ಸೀತಾರಾಮನ್ ಅವರು ಪೂರ್ಣ ಪ್ರಮಾಣದ ಬಜೆಟ್ ಮಂಡಿಸಿ, ಇವರ ಹೂಡಿಕೆಯ ಮೇಲಿನ ಲಾಭಕ್ಕೆ ತೆರಿಗೆಯ ಮೇಲೆ ಸರ್ಚಾರ್ಜ್ ವಿಧಿಸಿರುವುದು ಇವರಿಗೆ ಇಷ್ಟವಾಗಿಲ್ಲ. ನಮ್ಮ ಮಾರುಕಟ್ಟೆಯಿಂದ ಕಳೆದೆರಡು ತಿಂಗಳಲ್ಲಿ ಇವರು ವಾಪಸ್ಸು ಪಡೆದ ಹಣ ಹತ್ತಿರಹತ್ತಿರ ಮೂರು ಬಿಲಿಯನ್ ಅಮೆರಿಕನ್ ಡಾಲರ್. ಇದು ಅತ್ಯಂತ ದೊಡ್ಡ ಮೊತ್ತ. ಮಾರುಕಟ್ಟೆಯಲ್ಲಿ ಅತಿ ಕಡಿಮೆ ಸಮಯದಲ್ಲಿ ಹೀಗೆ ಚಾಲ್ತಿಯಲ್ಲಿದ್ದ ಹಣವನ್ನ ವಾಪಸ್ಸು ಪಡೆದರೆ ಅಲ್ಲಿ ಗೊಂದವಾಗುವುದು ಸಹಜ.  ನಮ್ಮ ಷೇರು ಮಾರುಕಟ್ಟೆ ಇನ್ನಿಲ್ಲದೆ ಕುಸಿಯುತ್ತಿರುವುದಕ್ಕೆ ಇದೊಂದು ಕಾರಣ. ಅಲ್ಲದೆ ಗಮನಿಸಿ ಇನ್ನಷ್ಟು ಕುಸಿಯಬಹದು ಎನ್ನುವ ಭಯ ಪ್ಯಾನಿಕ್ ಆಗಿ ಪರಿವರ್ತನೆಗೊಂಡಿದೆ. ಈ ಎಲ್ಲ ಕಾರಣದಿಂದ ಮಾರುಕಟ್ಟೆ ಕುಸಿಯುತ್ತಲೆ ಇದೆ. 

muraram@yahoo.com