ಸಾಲವೇ ಹಣ, ಸಾಲವೇ ಬದುಕು, ಸಾಲವೇ ಸರ್ವಸ್ವ !  

ಹಣಕ್ಲಾಸು-252

-ರಂಗಸ್ವಾಮಿ ಮೂಕನಹಳ್ಳಿ

Published: 25th March 2021 12:00 AM  |   Last Updated: 25th March 2021 01:28 PM   |  A+A-


Personal Loan

ಸಂಗ್ರಹ ಚಿತ್ರ

Posted By : Srinivasamurthy VN
Source : Online Desk

ಸಾಲ ಎನ್ನುವುದು ಇವತ್ತು ಬಹಳ ಸಹಜವಾಗಿ ಹೋಗಿದೆ . ಸಾಲ ಮಾಡದವರು ವಿರಳರಲ್ಲಿ ವಿರಳ ಎನ್ನುವ ಮಟ್ಟಕ್ಕೆ ಸಮಾಜ ಬಂದು ನಿಂತಿದೆ . ಜಗತ್ತಿನಲ್ಲಿ ಒಟ್ಟು ೧೦೦ ರೂಪಾಯಿ ಆಸ್ತಿಯಿದ್ದರೆ ಅದನ್ನ ಕೊಳ್ಳಲು ಅಥವಾ ಸೃಷ್ಟಿಸಲು ಹತ್ತಿರತ್ತಿರ ೨೫೦ ರೂಪಾಯಿ ಸಾಲವಿದೆ !. ಅಂದರೆ ಗಮನಿಸಿ ನಮ್ಮ ಒಟ್ಟು ಆಸ್ತಿಯನ್ನ ಯಾರಾದರೂ ಅನ್ಯಗ್ರಹ ಜೀವಿಗಳು ಬಂದು ಕೊಂಡರೂ ನಾವು ನಮ್ಮ ಸಾಲ ತೀರಿಸಲು ಸಾಧ್ಯವಿಲ್ಲ. ಜಗತ್ತಿನಲ್ಲಿ ಒಟ್ಟು ೧೯೬ ದೇಶಗಳಿವೆ ಅವುಗಳಲ್ಲಿ ಕೇವಲ ಐದು ದೇಶಗಳು ಮಾತ್ರ ತಮ್ಮ ಖರ್ಚಿಗೆ ಮೀರಿದ ಆದಾಯವನ್ನ ಹೊಂದಿದೆ. ಉಳಿದೆಲ್ಲಾ ದೇಶಗಳು ಖರ್ಚು ಹೆಚ್ಚು ಆದಾಯ ಕಡಿಮೆ ಫಾರ್ಮುಲಾದಲ್ಲಿ ಬಂಡಿ ಸಾಗುಸುತ್ತಿವೆ. ಇದೆಲ್ಲಾ ಶುರುವಾಗಿದ್ದು ಇಲ್ಲದ ಹಣವನ್ನ ಖರ್ಚು ಮಾಡಲು ಶುರು ಮಾಡಿದ್ದು ಕಾರಣ.

ಯುನೈಟೆಡ್ ಕಿಂಗ್ಡಮ್ ೧೯ ನೇ ಶತಮಾನದ ಪ್ರಾರಂಭದಲ್ಲಿ ಇನ್ಸ್ಟಾಲ್ಮೆಂಟ್ ಸಿಸ್ಟಮ್ ಆಫ್ ಪೆರ್ಚಸ್ ಅಥವಾ ಹೈರ್ ಪೆರ್ಚಸ್ ಎನ್ನುವ ಒಂದು ಹೊಸ ಖರೀದಿ ರೀತಿಯನ್ನ ಹುಟ್ಟುಹಾಕುತ್ತದೆ. ಅಂದರೆ ಒಂದು ವಸ್ತುವಿನ ಬೆಲೆ ನೂರು ರೂಪಾಯಿ ಇದ್ದು, ಗ್ರಾಹಕನ ಬಳಿ ಆ ಕ್ಷಣದಲ್ಲಿ ನೂರು ರೂಪಾಯಿ ಇಲ್ಲದಿದ್ದರೆ, ಆತ ವಸ್ತುವಿನ ಮೂಲ ಬೆಲೆಯ ೨೦ ಅಥವಾ ೩೦ ಅಥವಾ ೪೦ ಪ್ರತಿಶತ ಹಣವನ್ನ ಕೊಟ್ಟು ಕೊಳ್ಳಬಹದು. ಉಳಿದ ಹಣವನ್ನ ೧೨/೨೪/೩೬/೪೮ ಕಂತುಗಳಲ್ಲಿ ಮರಳಿ ಕೊಡಬಹದು. ಹೀಗೆ ಕೊಡುವಾಗ ಒಂದಷ್ಟು ಬಡ್ಡಿಯನ್ನ ಸಹ ಸೇರಿಸಲಾಗುತ್ತದೆ. ಇದರಿಂದ ಉತ್ಪಾದಕ ಮತ್ತು ಮಾರಾಟಗಾರನಿಗೆ ತನ್ನ ಸರಕನ್ನ ಬೇಗ ಮಾರಾಟ ಮಾಡಿದ ತೃಪ್ತಿ, ಗ್ರಾಹಕನಿಗೆ ವಸ್ತುವಿಗಾಗಿ ಐದಾರು ವರ್ಷ ಕಾಯುವ ಬದಲು ಅದನ್ನ ತಕ್ಷಣ ಕೊಂಡು ಬಳಸಿದ ಖುಷಿ. ಹೀಗಾಗಿ ಇದೊಂತರ ವಿನ್ -ವಿನ್ ಸನ್ನಿವೇಶ. ಈ ತರಹದ ಖರೀದಿಸುವಿಕೆ ಯುನೈಟೆಡ್ ಕಿಂಗ್ಡಮ್ ನಲ್ಲಿ ಶುರುವಾಯ್ತು ಆದರೇನು ಇದನ್ನ ಜಗತ್ತಿನಾದ್ಯಂತ ಜನ ಸಾಮಾನ್ಯರು  ಬಹಳ ಬೇಗ ತನ್ನದಾಗಿಸಿ ಕೊಂಡರು. ಅಮೆರಿಕಾ ಇದನ್ನ ಇನ್ನೊಂದು ದರ್ಜೆಗೆ ಏರಿಸಿ ಬಿಟ್ಟಿತು. ಇವತ್ತು ಅಮೆರಿಕಾದಲ್ಲಿ ದುಡ್ಡಿದ್ದರು ಕೂಡ ಮುಂದೆ ಉಪಯೋಗಕ್ಕೆ ಬರುತ್ತದೆ ಎನ್ನುವ ದೃಷ್ಟಿಯಲ್ಲಿ ಕ್ರೆಡಿಟ್ ಹಿಸ್ಟ್ರಿ ಸೃಷ್ಟಿಸುವ ಉದ್ದೇಶದಿಂದ ಜನ ಸಾಲದಲ್ಲಿ ವಸ್ತುವನ್ನ ಕೊಳ್ಳುತ್ತಾರೆ. ಜನ ಸಾಲ ಅಥವಾ ಕಂತಿನ ಮೂಲಕ ಖರೀದಿಸುವುದು ಬಿಟ್ಟರೆ ವಾರದೊಳಗೆ ಪೂರ್ಣ ಅಮೆರಿಕಾ ಆರ್ಥಿಕತೆ ಕುಸಿದು ಬಿಡುತ್ತದೆ. ಇದು ಕೇವಲ ಅಮೆರಿಕಾದ ಕಥೆಯಾಗಿ ಉಳಿಯದೆ ವಿಶ್ವದ ಕಥೆಯಾಗಿ ಮಾರ್ಪಾಟಾಗಿರುವುದು ದುರಂತ ಎನ್ನಬಹದು.

ಹಣದ ಬಗ್ಗೆ ಅದನ್ನ ಬಳಸುವ ಬಗ್ಗೆ ನಮ್ಮ ಹಿರಿಯರಿಗೆ ಬಹಳಷ್ಟು ತಿಳಿದಿತ್ತು. ಈಗಿನಂತೆ ಜಿಡಿಪಿ ಬೆನ್ನಹಿಂದೆ ನಮ್ಮ ಸಮಾಜ ಬಿದ್ದಿರಲಿಲ್ಲ. ನಮ್ಮ ತಾತ ಅಥವಾ ಮುತ್ತಾತ ಎಂದಿಗೂ ಯಾರ ಬಳಿ ದುಡಿಯಲಿಲ್ಲ ! ಹೀಗಾಗಿ ಆತನಿಗೆ ಯಾರೂ ಮಾಸಿಕ ವೇತನ ನೀಡಲಿಲ್ಲ !! ಸಂಬಳವಿಲ್ಲದೆ ಮೇಲೆ ಜಿಡಿಪಿಯಲ್ಲಿ ಅದನ್ನ ಲೆಕ್ಕ ಮಾಡುವುದಾದರೂ ಹೇಗೆ?? ವಿಪರ್ಯಾಸ ನೋಡಿ ಹೆಚ್ಚಿನ ಹಣದ ಹರಿವಿರದ, ಜಿಡಿಪಿ ಲೆಕ್ಕವಿರದ ಸಮಾಜದಲ್ಲಿ ಬಹಳಷ್ಟು ಸಾಮರಸ್ಯ, ನೆಮ್ಮದಿ, ಖುಷಿ ಎಲ್ಲವೂ ಇದ್ದವು ! ಇಂದು ಬೇಕಾದ ಹಾಗೆ ಹಣವನ್ನ ಸೃಷ್ಟಿ ಮಾಡುವ, ಸಂಪತ್ತು ಸೃಷ್ಟಿಸುವ ಕಲೆಯನ್ನ ಮನುಷ್ಯ ಕಲಿತ್ತಿದ್ದಾನೆ. ಆದರೆ ಬದುಕುವದನ್ನ ಮರೆತಿದ್ದಾನೆ. ನಮ್ಮ ಹಿರಿಯರಿಗೆ ಸಂಪತ್ತು ಸೃಷ್ಟಿಸುವ ಕಲೆ ಗೊತ್ತಿರಲಿಲ್ಲವೇ? ಅವರಿಗೆ ಅದು ಚನ್ನಾಗಿ ಗೊತ್ತಿತ್ತು. ಹೀಗೆ ಹುಚ್ಚಾಟದ ಸಂಪತ್ತಿನ ಸೃಷ್ಟಿಯಿಂದ ಸಮಾಜ ವಿನಾಶದತ್ತ ಸಾಗುತ್ತದೆ ಎನ್ನುವ ಅರಿವು ಕೂಡ ಇತ್ತು,

ಬೆನ್ ಫ್ರೆಕ್ಲಿನ್ ಎನ್ನುವ ದಾರ್ಶನಿಕ ಉಪವಾಸವಿದ್ದರೂ ಪರವಾಗಿಲ್ಲ ಸಾಲ ಮಾತ್ರ ಮಾಡಬೇಡ ಎಂದಿದ್ದಾರೆ. ನಮ್ಮ ಸರ್ವಜ್ಞ ತನ್ನ ವಚನದಲ್ಲಿ ಸಾಲವನು ಕೊಂಬಾಗ ಹಾಲೋಗರುಂಡಂತೆ, ಸಾಲಿಗರು ಕೊಂಡು ಎಳೆವಾಗ ಕಿಬ್ಬದಿಯ ಕೀಲು ಮುರಿದಂತೆ ಸರ್ವಜ್ಞ. ಎಂದಿದ್ದಾರೆ. ಅಂದರೆ ಸಾಲ ಮಾಡಿಯಾದರೂ ಗಡಿಗೆ ತುಪ್ಪ ಕುಡಿಯಬೇಕು ಎನ್ನುವ ನಿಲುವು ಸಲ್ಲದು ಎನ್ನುವುದು ಈ ಹಿರಿಯರ ಮಾತುಗಳಲ್ಲಿ ಧ್ವನಿತವಾಗಿದೆ. ಇವತ್ತು ಸಮಾಜ ಇಂತಹ ಮಾತುಗಳನ್ನ ಗಣನೆಗೆ ತೆಗೆದುಕೊಳ್ಳದೆ ಇರುವುದರ ಕಾರಣ ಇಂತಹ ತಲ್ಲಣಗಳಿಗೆ ಗುರಿಯಾಗಿದೆ .

ನಮ್ಮ ಸಮಾಜ ಮಾತ್ರವಲ್ಲದೆ ಪಾಶ್ಚಾತ್ಯ ಸಮಾಜ ಕೂಡ ಇಂತಹ ಒಂದು ಅಡಿಪಾಯದ ಮೇಲೆ ತಮ್ಮ ಸಮಾಜವನ್ನ ಕಟ್ಟಿ ಕೊಂಡಿತ್ತು ಎನ್ನುವುದಕ್ಕೆ ಕೂಡ ಬಹಳಷ್ಟು ಉದಾಹರಣೆ ಸಿಗುತ್ತದೆ.  Save for a rainy day. ನಾಳೆಗಾಗಿ ಒಂದಷ್ಟು ಉಳಿಸಿ ಎನ್ನುವುದು, A penny saved is a penny earned. ಗಳಿಕೆಯಷ್ಟೇ ಉಳಿಕೆಯು ಮುಖ್ಯ ಎನ್ನುವುದು, If you buy what you don’t need, you steal from yourself. ಬೇಡದ್ದ ಕೊಳ್ಳುವುದು ಅಪರಾಧ ಎನ್ನುವ ಹೇಳಿಕೆ, Creditors have better memories than debtors , ಸಾಲಗಾರರ ನೆನಪು ಬಹಳ ತೀಕ್ಷ್ಣ ಎನ್ನುವುದು, Never spend money before you have it. ಇಲ್ಲದ ಹಣ ವ್ಯಯಿಸಬೇಡ , Interest on debt grows without rain. ಅಂದರೆ ಸಾಲದ ಮೇಲಿನ ಬಡ್ಡಿ ಬೆಳೆಯುತ್ತಲೇ ಇರುತ್ತದೆ ಎಚ್ಚರ ಎನ್ನುವ ಮಾತು , Lend your money and lose your friend, ನಮ್ಮಲ್ಲಿ ಸಾಲ ಕೇಳಿ ಸ್ನೇಹ ಕಳೆದುಕೊಳ್ಳಬೇಡಿ ಎನ್ನುವ ಮಾತಿಗೆ ಸಮನಾದ ಮಾತು. ಹೀಗೆ ಒಂದಲ್ಲ ಹತ್ತಾರು ಮಾತುಗಳು ನಮ್ಮ ಹಿರಿಯರು ಹಣದ ಬಗ್ಗೆ ಇತ್ತು ಕೊಂಡಿದ್ದ ಭಾವನೆಗಳನ್ನ ಬಿಂಬಿಸುತ್ತವೆ .

ನಮ್ಮ ಪೂರ್ವಿಕರಿಗೆ ಹಣ ಬದುಕಿಗೆ ಬಹಳ ಮುಖ್ಯವೆಂದು ತಿಳಿದಿತ್ತು. ಅದರ ಭರಾಟೆ ಹೆಚ್ಚಾದರೆ ಬದುಕು ಮೂರಾಬಟ್ಟೆಯಾಗುತ್ತದೆ ಎನ್ನುವ ಅರಿವೂ ಇತ್ತು. ಹೀಗಾಗಿಯೇ ಅವರು ಅದಕ್ಕೆ ಎಷ್ಟು ಬೆಲೆ ಕೊಡಬೇಕು ಅಷ್ಟು ಕೊಟ್ಟಿದ್ದರು. ಉಳಿದಂತೆ ಅವರಲ್ಲಿ ಅದರ ಬಗ್ಗೆ ಒಂದು ತರಹದ ನಿರ್ಲಿಪ್ತತೆ ಇತ್ತು. ಇಂದು ಎಲ್ಲವೂ ಬದಲಾಗಿದೆ. ಇಲ್ಲದ ಹಣವನ್ನ ನಾವು ಬಳಸುತ್ತಿದ್ದೇವೆ. ಹೀಗೆ ಸಾಲ ಮಾಡುವಾಗ, ಸಾಲ ಮಾಡುವರಲ್ಲಿ ಅದನ್ನ ಮರಳಿ ಪಾವತಿಸುವ ಬಗ್ಗೆ ಒಂದಷ್ಟು ನಿಖರತೆ ಇರುತ್ತದೆ. ಆದರೆ ಹೊರಗಿನ ಸಮಯ ಮತ್ತು ಸನ್ನಿವೇಶ ನಮ್ಮ ಹಿಡಿತದಲ್ಲಿ ಇರುವುದಿಲ್ಲ, ಹೀಗಾಗಿ ಸನ್ನಿವೇಶ ಬದಲಾದರೆ ಮರುಪಾವತಿ ಕಷ್ಟವಾಗುತ್ತದೆ. ಅಂದರೆ ಸಾಲ ಕೊಡುವಾಗ ಅಥವಾ ಸಾಲ ಮಾಡುವಾಗ ಒಂದಷ್ಟು ಅಂಶಗಳನ್ನ ನಾವು ಊಹಿಸಿಕೊಳ್ಳುತ್ತೇವೆ. ಹೀಗಾಗ ಬಹದು ಎನ್ನುವ ಒಂದು ಪ್ಲಾನ್. ಸನ್ನಿವೇಶಗಳು ಕೂಡ ಇವತ್ತಿನಂತೆಯೇ ಇರುತ್ತವೆ ಎನ್ನುವುದು ಇನ್ನೊಂದು ದೊಡ್ಡ ಊಹೆ ! ಉದಾಹರೆಣೆಗೆ  ಸಾಲ ಮಾಡುವಾಗ, ಸಾಲ ಮಾಡಿದ ವ್ಯಕ್ತಿಗೆ ಕೆಲಸವಿರುತ್ತದೆ, ಸಂಬಳವೂ ಬರುತ್ತಿರುತ್ತದೆ, ಸಾಲದ ಸಮಯ ಐದು ವರ್ಷ ಎಂದುಕೊಳ್ಳಿ, ಎರಡು ವರ್ಷದ ನಂತರ ಕೆಲಸವಿಲ್ಲದಿದ್ದರೆ ? ಎಲ್ಲವೂ ಬದಲಾಗುತ್ತದೆ. ಹೀಗಾಗಿ ಸಮಾಜದಲ್ಲಿ ರೂಪಾಯಿ ಆಸ್ತಿ ಸೃಷ್ಟಿಗೆ ಎರಡೂವರೆ ರೂಪಾಯಿ ಸಾಲ ಸೃಷ್ಟಿಯಾಗಿದೆ.

ಸಾಲ ಕೇಳಿ ಹೋದ ವ್ಯಕ್ತಿ ಅಥವಾ ಸಂಸ್ಥೆ ಸಾಲವ ಮರುಪಾವತಿಸುವ ಶಕ್ತಿ ಹೊಂದಿದ್ದಾರೆಯೇ? ಅವರು ಸಾಲ ಮರು ಪಾವತಿಸದೆ ಹೋಗುವ ಸಂಭಾವ್ಯತೆ ಎಷ್ಟು? ಎನ್ನುವುದನ್ನ ಅಭ್ಯಾಸಿಸಿ ವ್ಯಕ್ತಿಗೆ ಅಥವಾ ಸಂಸ್ಥೆಗೆ ಇಂತಿಷ್ಟು ಎನ್ನುವ ಅಂಕ(ಪಾಯಿಂಟ್) ದೊರೆಯುತ್ತದೆ. ಈ ಅಂಕದ ಆಧಾರದ ಮೇಲೆ ಇವರಿಗೆ ಸಾಲ ಕೊಡಬಹುದು ಇವರಿಗೆ ಕೇಳಿದ ಮೊತ್ತದ ಅರ್ಧ ಕೊಡಬಹುದು, ಇವರಿಗೆ ಬೇಡವೇ ಬೇಡ ಹೀಗೆ ನಿರ್ಧಾರ ಮಾಡುವ ಪ್ರಕ್ರಿಯೆಗೆ ಕ್ರೆಡಿಟ್ ರೇಟಿಂಗ್ ಎನ್ನುತ್ತಾರೆ. ಹೀಗೆ ನಿರ್ಧಾರಕ್ಕೆ ಬರಲು ಕ್ರೆಡಿಟ್ ಹಿಸ್ಟ್ರಿ ಬಹಳ ಮುಖ್ಯ! ಅಂದರೆ ನೀವು ಹಿಂದೆ ಸಾಲ ಪಡೆದು ಅದನ್ನ ಸರಿಯಾಗಿ ಮರುಪಾವತಿಸಿದರೆ ಅದು ನಿಮ್ಮ ಕ್ರೆಡಿಟ್ ಹಿಸ್ಟ್ರಿ ಎನಿಸಿಕೊಳ್ಳುತ್ತದೆ. ಅಮೇರಿಕಾದಂತ ದೇಶದಲ್ಲಿ ಕ್ರೆಡಿಟ್ ಹಿಸ್ಟ್ರಿ ಹೊಂದುವುದು ಬಹಳ ಅವಶ್ಯ. ದೊಡ್ಡ ಸಾಲ ಪಡೆಯುವ ಮುನ್ನ ಸಣ್ಣ ಪುಟ್ಟ ಸಾಲ ಮಾಡಿ ಕ್ರೆಡಿಟ್ ಹಿಸ್ಟ್ರಿ ನಿರ್ಮಿಸಿಕೊಳ್ಳಿ ಎಂದು ಸಲಹೆ ಕೊಡುವ ಮತ್ತು ಹೇಗೆ ಉತ್ತಮ ಕ್ರೆಡಿಟ್ ಹಿಸ್ಟ್ರಿ ನಿರ್ಮಿಸಿಕೊಳ್ಳುವುದು ಎಂದು ಹೇಳುವುದಕ್ಕೆ ಜನ/ಸಂಸ್ಥೆಗಳಿವೆ. ನಿಧಾನಕ್ಕೆ ಇದು ಭಾರತವನ್ನೂ ಕೂಡ ಆಕ್ರಮಿಸಿದೆ.


ಕೊನೆಮಾತು: ಸಣ್ಣ  ಉಳಿತಾಯಾದ ಮೇಲಿನ ಬಡ್ಡಿ ಕುಸಿತ, ವೇಗವಾಗಿ ಬದಲಾಗುತ್ತಿರುವ ಮಾರುಕಟ್ಟೆ, ತಾನು ಮಾಡುತ್ತಿರುವುದು ಸರಿಯೇ? ಅಥವಾ ತಪ್ಪೇ? ಎಂದು ವಿವೇಚಿಸಲು ಕೂಡ ಸಮಯ ನೀಡದ ಕಾರ್ಪೊರೇಟ್ ಜೀವನ ನಮ್ಮ ಜನರ ಜೀವನವನ್ನ ಯಾಂತ್ರಿಕತೆಗೆ ದೂಡಿದೆ. ಇವತ್ತೇನಿದ್ದರೂ ಹಣವನ್ನ ಮುಂಗಡ (ಸಾಲ) ಪಡೆದು ಅನುಭವಿಸಬೇಕು, ವೇತನದಲ್ಲಿ ಮಾಸಿಕ ಕಂತು ಕಟ್ಟಬೇಕು ಎನ್ನುವಂತಾಗಿದೆ.  ಇಂದಿನ ಯುವಜನತೆಯ ಮಟ್ಟಿಗಂತೂ 'ಸಾಲ ಹೊಸ ಹಣ' ಡೆಟ್ ಇಸ್ ನ್ಯೂ ಮನಿ ಎನ್ನುವಂತಾಗಿದೆ. ಸಾಲ ಮಾಡುವುದು ತಪ್ಪಲ್ಲ ,  ಆದರೆ ಏತಕ್ಕೆ ಸಾಲ ಮಾಡಿದಿರಿ ಎನ್ನುವುದು ಮುಖ್ಯ ಎನ್ನುವ ಮಟ್ಟಕ್ಕೆ ಸಮಾಜ ಬಂದು ನಿಂತಿದೆ. ಮುಂದಿನ ಪ್ರಯಾಣದ ಹಾದಿ ಇನ್ನಷ್ಟೇ ತೆರೆದುಕೊಳ್ಳಬೇಕಿದೆ. ಕರೋನೋತ್ತರ ಹಳೆ ಸಾಲವನ್ನ ತೀರಿಸಲು ಹೊಸ ಸಾಲ ಮಾಡಿದರಾಯಿತು ಎನ್ನುವ ಸ್ಥಿತಿಗೆ ನಮ್ಮ ಸಮಾಜ ಬಂದು ನಿಂತಿದೆ . ತುತ್ತು ತಲೆಸುತ್ತಾ ಮೂರು ಸುತ್ತು ಹೊಡೆದರೂ ಅದನ್ನ ಬಾಯಿಗೆ ಇಡಬೇಕು ಬೇರೆ ದಾರಿಯಿಲ್ಲ ಎನ್ನುತ್ತದೆ ಒಂದು ಗಾದೆ ಮಾತು .  ನಾವೆಷ್ಟೇ ಸಂಪತ್ತಿನ ಸೃಷ್ಟಿಯ ಹಿಂದೆ ಓಡಲಿ ಅದು ಜೊತೆ ಜೊತೆಗೆ ನೋವನ್ನ ತಂದೆ ತರುತ್ತದೆ , ಹೀಗಾಗಿ ಸರಳ ಜೀವನವೇ ಇದಕ್ಕೆ ಮದ್ದು ಎನ್ನುವುದು ಇದು ಹೇಳುತ್ತದೆ . ಇದನ್ನ ಗ್ರಹಿಸುವ ವೇಳೆ -ವ್ಯವಧಾನ -ಮನಸ್ಸು ನಮಗಿದೆಯೇ ?

 

-ರಂಗಸ್ವಾಮಿ ಮೂಕನಹಳ್ಳಿ

muraram@yahoo.com
 

Stay up to date on all the latest ಅಂಕಣಗಳು news
Poll
Kumbh-Covid-19

ಚುನಾವಣಾ ಸಮಾವೇಶ, ಕುಂಭಮೇಳ, ಧಾರ್ಮಿಕ ಸಭೆಗಳು ದೇಶದಲ್ಲಿ ಕೋವಿಡ್-19 ಪರಿಸ್ಥಿತಿಯನ್ನು ಹದಗೆಡಿಸುತ್ತಿವೆಯೇ?


Result
ಹೌದು, ಅದು ನಿಜ.
ಇಲ್ಲ, ಖಂಡಿತ ಅಲ್ಲ.
flipboard facebook twitter whatsapp