ನ್ಯೂಜಿಲ್ಯಾಂಡ್ ವಿರುದ್ಧ ಸೋತು, ಆಫ್ಘಾನ್ ವಿರುದ್ಧ ಗೆದ್ದ ಶ್ರೀಲಂಕಾ!

ವಿಶ್ವಕಪ್ ಕ್ರಿಕೆಟ್ ಮಹಾಸಮರದಲ್ಲಿ ಮೊದಲ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್ ವಿರುದ್ಧ ಸೋತಿದ್ದ ಶ್ರೀಲಂಕಾ ತಂಡ ಇದೀಗ ಆಫ್ಘಾನ್ ವಿರುದ್ಧದ ಪಂದ್ಯದಲ್ಲಿ ಗೆದ್ದು ಗೆಲುವಿನ ಲಯಕ್ಕೆ ಮರಳಿದೆ.

ಲಂಡನ್ ನಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ತಂಡಕ್ಕೆ ಹಿನ್ನಡೆಯಾಗಿತ್ತು. ಕೇವಲ 201 ರನ್ ಗಳಿಗೆ ಆಲೌಟ್ ಆಗಿತ್ತು. ಇನ್ನು 202 ರನ್ ಗುರಿ ಬೆನ್ನಟ್ಟಿದ ಆಫ್ಘಾನ್ ಆಟಕ್ಕೆ ಮಳೆರಾಯ ಅಡ್ಡಿ ಮಾಡಿದ್ದು ಇದರಿಂದಾಗಿ ಡಕ್ ವರ್ತ್ ಲೂಯಿಸ್ ನಿಯಮ ಪ್ರಕಾರ ಆಫ್ಗಾನ್ ಗೆ 41 ಓವರ್ ಗಳಲ್ಲಿ ಗೆಲ್ಲಲು 187 ರನ್ ಟಾರ್ಗೆಟ್ ನೀಡಲಾಯಿತು.

ಈ ವೇಳೆ ಶ್ರೀಲಂಕಾ ವೇಗಿಗಳು ಆಕ್ರಮಣಕಾರಿ ಬೌಲಿಂಗ್ ಪ್ರದರ್ಶನ ನೀಡಿ 152 ರನ್ ಗಳಿಗೆ ಆಫ್ಘಾನ್ ತಂಡವನ್ನು ಆಲೌಟ್ ಮಾಡಿ 34 ರನ್ ಗಳಿಂದ ಗೆಲುವಿನ ನಗೆ ಬೀರಿತು.

ಶ್ರೀಲಂಕಾ ಪರ ಕರುಣರತ್ನೆ 30, ಪೆರೆರಾ 78, ತಿರಿಮನ್ನೆ 25 ರನ್ ಪೇರಿಸಿದ್ದಾರೆ. ಆಫ್ಘಾನ್ ಪರ ಬೌಲಿಂಗ್ ನಲ್ಲಿ ಮೊಹಮ್ಮದ್ ನಬಿ 4, ಝಾದ್ರನ್ ಮತ್ತು ರಶೀದ್ ಖಾನ್ ತಲಾ 2 ವಿಕೆಟ್ ಪಡೆದಿದ್ದಾರೆ.

ಆಫ್ಗಾನ್ ಪರ ಬ್ಯಾಟಿಂಗ್ ನಲ್ಲಿ ಝಾಝೈ 30, ನಬಿ 23 ಮತ್ತು ಝಾದ್ರನ್ 43 ರನ್ ಪೇರಿಸಿದ್ದಾರೆ.