ಅನಿಲ್ ಕುಂಬ್ಳೆ ಟೀಂ ಇಂಡಿಯಾ ಶ್ರೇಷ್ಠ ಮ್ಯಾಚ್‌ ವಿನ್ನರ್‌: ಹರ್ಭಜನ್ ಸಿಂಗ್

ಟೀಂ ಇಂಡಿಯಾ ಮಾಜಿ ನಾಯಕ ಹಾಗೂ ಅತ್ಯಂತ ಯಶಸ್ವಿ ಲೆಗ್‌ ಸ್ಪಿನ್ನರ್‌ ಅನಿಲ್‌ ಕುಂಬ್ಳೆ ಭಾರತೀಯ ಕ್ರಿಕೆಟ್‌ ಇತಿಹಾಸದ ಸಾರ್ವಕಾಲಿಕ ಶ್ರೇಷ್ಠ ಮ್ಯಾಚ್‌ ವಿನ್ನರ್‌ ಎಂದು ಆಫ್‌ ಸ್ಪಿನ್ನರ್‌ ಹರ್ಭಜನ್‌ ಸಿಂಗ್‌ ಗುಣಗಾನ ಮಾಡಿದ್ದಾರೆ.
ಅನಿಲ್ ಕುಂಬ್ಳೆ-ಹರ್ಭಜನ್ ಸಿಂಗ್
ಅನಿಲ್ ಕುಂಬ್ಳೆ-ಹರ್ಭಜನ್ ಸಿಂಗ್

ನವದೆಹಲಿ: ಟೀಂ ಇಂಡಿಯಾ ಮಾಜಿ ನಾಯಕ ಹಾಗೂ ಅತ್ಯಂತ ಯಶಸ್ವಿ ಲೆಗ್‌ ಸ್ಪಿನ್ನರ್‌ ಅನಿಲ್‌ ಕುಂಬ್ಳೆ ಭಾರತೀಯ ಕ್ರಿಕೆಟ್‌ ಇತಿಹಾಸದ ಸಾರ್ವಕಾಲಿಕ ಶ್ರೇಷ್ಠ ಮ್ಯಾಚ್‌ ವಿನ್ನರ್‌ ಎಂದು ಆಫ್‌ ಸ್ಪಿನ್ನರ್‌ ಹರ್ಭಜನ್‌ ಸಿಂಗ್‌ ಗುಣಗಾನ ಮಾಡಿದ್ದಾರೆ.

ಟರ್ಬನೇಟರ್‌ ಖ್ಯಾತಿಯ ಟೀಮ್ ಇಂಡಿಯಾ ಅವಕಾಶ ವಂಚಿತ ಅನುಭವಿ ಆಫ್‌ಸ್ಪಿನ್ನರ್‌ ಹರ್ಭಜನ್‌ ಸಿಂಗ್‌, ತಮ್ಮ ವೃತ್ತಿ ಬದುಕಿನ ಬಹುಪಾಲು ದಿನಗಳನ್ನು ಅನಿಲ್‌ ಕುಂಬ್ಳೆ ಜೊತೆಗೆ ಭಾರತದ ತಂಡದ ಪ್ರಮುಖ ಸ್ಪಿನ್‌ ಜೋಡಿ ಆಗಿದ್ದರು. 

ಭಾರತದ ಪರ ಅತಿ ಹೆಚ್ಚು ಟೆಸ್ಟ್‌ ವಿಕೆಟ್‌ (619) ಪಡೆದ ಬೌಲರ್‌ ಆಗಿರುವ ಕುಂಬ್ಳೆ, 2007ರಲ್ಲಿ ಟೀಮ್‌ ಇಂಡಿಯಾ ನಾಯಕತ್ವ ಪಡೆದು ತಮ್ಮ ನಿವೃತ್ತಿಯ ವರೆಗೂ ನಾಯಕತ್ವ ನಿಭಾಯಿಸಿದ್ದರು.

ನನ್ನ ದೃಷ್ಟಿಕೋನದಲ್ಲಿ ಹೇಳುವುದಾದರೆ ಅನಿಲ್‌ ಭಾಯ್‌ ಭಾರತೀಯ ಕ್ರಿಕೆಟ್‌ ತಂಡದ ಪರ ಆಡಿದ ಸಾರ್ವಕಾಲಿಕ ಶ್ರೇಷ್ಠ ಆಟಗಾರ. ಭಾರತೀಯ ಕ್ರಿಕೆಟ್ ಇತಿಹಾಸದ ಶ್ರೇಷ್ಠ ಮ್ಯಾಚ್‌ ವಿನ್ನರ್‌ ಕೂಡ. ಅವರು ಚೆಂಡಿಗೆ ಹೆಚ್ಚು ತಿರುವು ನೀಡುತ್ತಿರಲಿಲ್ಲಎನ್ನುವವರೇ ಹೆಚ್ಚು. ಆದರೆ ವಿಕೆಟ್‌ ಪಡೆಯುವ ಕೆಚ್ಚೆದೆ ನಿಮ್ಮಲ್ಲಿ ಇದ್ದರೆ ಚೆಂಡು ತಿರುಗಲಿ ಬಿಡಲಿ ಯಶಸ್ಸು ಸಾಧ್ಯ ಎಂಬುದನ್ನು ಅವರು ತೋರಿಸಿಕೊಟ್ಟಿದ್ದರು," ಎಂದು ಸ್ಟೋರ್ಟ್ಸ್‌ಸ್ಟಾರ್‌ಗೆ ನೀಡಿರುವ ವಿಶೇಷ ಸಂದರ್ಶನದಲ್ಲಿ ಹರ್ಭಜನ್‌ ಹೇಳಿದ್ದಾರೆ.

ಅನಿಲ್‌ ಭಾಯ್‌ ಅವರಲ್ಲಿದ್ದ ಸ್ಪರ್ಧಾತ್ಮಕತೆಯ ಅರ್ಧದಷ್ಟನ್ನು ಬೇರೆಯಾರಾದರೂ ಪಡೆದರೆ ಅವರು ಚಾಂಪಿಯನ್‌ ಆಟಗಾರರಾಗಬಲ್ಲರು. ಅವರೊಟ್ಟಿಗೆ ಹಲವು ವರ್ಷಗಳ ಕಾಲ ಜೊತೆಯಾಗಿ ಆಡಿದ್ದು ನನ್ನ ಅದೃಷ್ಟವೇ ಸರಿ. ಬದ್ಧತೆ ಹೊಂದಿದ್ದ ಅದ್ಭುತ ಆಟಗಾರ ಅವರು," ಎಂದಿದ್ದಾರೆ.

ಟೆಸ್ಟ್‌ ಕ್ರಿಕೆಟ್‌ ಇತಿಹಾಸದಲ್ಲಿ ಅನಿಲ್ ಅತಿ ಹೆಚ್ಚು ವಿಕೆಟ್‌ ಪಡೆದವರ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿ ಇದ್ದಾರೆ. ಆಸ್ಟ್ರೇಲಿಯಾದ ಲೆಗ್‌ ಸ್ಪಿನ್ನರ್‌ ಶೇನ್‌ ವಾರ್ನ್‌ (708 ವಿಕೆಟ್‌) ಮತ್ತು ಶ್ರೀಲಂಕಾದ ಮುತ್ತಯ್ಯ ಮುರಳೀಧರನ್ (800 ವಿಕೆಟ್) ಮಾತ್ರವೇ ಈ ಪಟ್ಟಿಯಲ್ಲಿ ಕುಂಬ್ಳೆಗಿಂತ ಮುಂದಿದ್ದಾರೆ. ಏಕದಿನ ಕ್ರಿಕೆಟ್‌ ಇತಿಹಾಸದಲ್ಲಿ ಭಾರತದ ಪರ ಆಡಿದ 271 ಪಂದ್ಯಗಳಿಂದ 337 ರನ್‌ಗಳನ್ನು ಗಳಿಸಿದ್ದಾರೆ. ಈ ಮೂಲಕ ಎರಡೂ ಮಾದರಿಯಲ್ಲಿ ಭಾರತದ ಪರ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಆಗಿದ್ದಾರೆ.

ಈ ವಿಭಾಗದ ಇತರ ಸುದ್ದಿ

No stories found.

Advertisement

X
Kannada Prabha
www.kannadaprabha.com