ಬೆಂಗಳೂರು: ಕೆನಡಾ ದೇಶದಿಂದ ಭಾರತಕ್ಕೆ ಮಾದಕ ದ್ರವ್ಯ ಸಾಗಾಟ ಮಾಡುತ್ತಿದ್ದ ವ್ಯಕ್ತಿಯೋರ್ವನನ್ನು ಸಿಸಿಬಿ ಪೊಲೀಸರು ಬಂಧಿಸಿ, 1 ಕೋಟಿ ರೂ ಮೌಲ್ಯದ ಡ್ರಗ್ಸ್ ವಶಪಡಿಸಿಕೊಂಡಿದ್ದಾರೆ.
ಕೋಲ್ಕತ್ತಾ ಮೂಲದ ಆತೀಫ್ ಸಲೀಂ ಎಂಬಾತ ಡಾರ್ಕ್ ವೆಬ್ ಸೈಟ್ ಮೂಲಕ ಕೆನಡಾ ಮೂಲದ ಹೈಡ್ರೋ ಗಾಂಜಾ ಮಾರಾಟ ಮಾಡುತ್ತಿದ್ದ ವ್ಯಕ್ತಿಯೋರ್ವನನ್ನು ಸಂಪರ್ಕಿಸಿ ಗಾಂಜಾ ಚಾಕೊಲೇಟ್ ಮತ್ತು ಆಶಿಷ್ ಆಯಿಲ್ ಎಂಬ ಮಾದಕ ವಸ್ತುವಿರುವ ಇ-ಸಿಗ್ರೇಟ್ ಟ್ಯೂಬ್ ಗಳನ್ನು ತರಿಸಿಕೊಳ್ಳುತ್ತಿದ್ದ. ಅವುಗಳನ್ನು ಕೆನಡಾದ ವ್ಯಕ್ತಿ ಸೂಚಿಸುವ ವಿಳಾಸಕ್ಕೆ ಅಮೆಜಾನ್ ಕವರ್ ಗಳಿಂದ ಪ್ಯಾಕ್ ಮಾಡಿ ಕೊರಿಯರ್ ಮೂಲಕ ಬೆಂಗಳೂರು ಹಾಗೂ ದೇಶದ ನಗರಗಳಿಗೆ ಸಾಗಾಟ ಮಾಡುತ್ತಿದ್ದ. ಅಲ್ಲದೇ ಒಟ್ಟಾರೆ ಕಳುಹಿಸಿದ ಮಾದಕ ವಸ್ತುಗಳಲ್ಲಿ ಕಾಲು ಭಾಗದಷ್ಟು ತಾನೇ ಇಟ್ಟುಕೊಳ್ಳುತ್ತಿದ್ದ ಎಂದು ಆರೋಪಿ ತನಿಖೆ ವೇಳೆ ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕಸ್ಟಮ್ ಅಧಿಕಾರಿಗಳಿಗೆ ಅನುಮಾನ ಬಾರದಂತೆ ಮಕ್ಕಳ ಹಾಲಿನ ಪೌಡರ್ ಡಬ್ಬಿಗಳಲ್ಲಿ ಹೈಡ್ರೋ ಗಾಂಜಾ ಬಚ್ಚಿಟ್ಟು ಕೆನಡಾದಿಂದ ಕೊರಿಯರ್ ಮೂಲಕ ಭಾರತಕ್ಕೆ ರವಾನಿಸಲಾಗುತ್ತಿತ್ತು ಎಂದು ತಿಳಿದು ಬಂದಿದೆ.
ಇನ್ನು ಆರೋಪಿಗಳು ಈ ಡ್ರಗ್ಸ್ ಅನ್ನು ಚಾಕೊಲೇಟ್ ಹಾಗೂ ಪೆಪ್ಪರ್ಮೆಂಟ್ ಬಾಕ್ಸ್ಗಳಲ್ಲಿ ಸಾಗಿಸುತ್ತಿದ್ದು ಇದನ್ನು ತಿಂದವರಿಗೆ ಬುದ್ದಿಮತ್ತೆ ಹೆಚ್ಚಲಿದೆ ಎಂದು ಪ್ರಚಾರ ನಡೆಸಿದ್ದರು.
ಬಂಧಿಸಲ್ಪಟ್ಟ ಆರೋಪಿಯಿಂದ ಒಂದು ಕಾರು, ಬೈಕ್, ವೇಯಿಂಗ್ ಮಷಿನ್ ಹಾಗೂ 1 ಲಕ್ಷ ರೂ.ನಗದನ್ನು ವಶಕ್ಕೆ ಪಡೆಯಲಾಗಿದೆ.
Advertisement