ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ 32,000 ವಸ್ತುಗಳ ಮರೆತು ಬಿಟ್ಟು ಹೋದ ಪ್ರಯಾಣಿಕರು!
ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ (ಕೆಐಎ) ‘ಲಾಸ್ಟ್ ಅಂಡ್ ಫೌಂಡ್’ ವಿಭಾಗವು ವಿಮಾನ ಪ್ರಯಾಣಿಕರು ಮರೆತು ಬಿಟ್ಟು ಹೋಗಿರುವ 32 ಸಾವಿರಕ್ಕೂ ಅಧಿಕ ವಸ್ತುಗಳು ಇವೆ ಎಂದು ಖಚಿತಪಡಿಸಿದ್ದಾರೆ.
Published: 01st August 2022 02:35 PM | Last Updated: 01st August 2022 02:35 PM | A+A A-
ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ
ಬೆಂಗಳೂರು: ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ (ಕೆಐಎ) ‘ಲಾಸ್ಟ್ ಅಂಡ್ ಫೌಂಡ್’ ವಿಭಾಗವು ವಿಮಾನ ಪ್ರಯಾಣಿಕರು ಮರೆತು ಬಿಟ್ಟು ಹೋಗಿರುವ 32 ಸಾವಿರಕ್ಕೂ ಅಧಿಕ ವಸ್ತುಗಳು ಇವೆ ಎಂದು ಖಚಿತಪಡಿಸಿದ್ದಾರೆ.
ಈ ವರ್ಷದ ಮೊದಲಾರ್ಧದಲ್ಲಿ 32,169 ವಸ್ತುಗಳನ್ನು ನಿಲ್ದಾಣದಲ್ಲಿ ಇಡಲಾಗಿದೆ. ಈ ಕುರಿತು ಮಾತನಾಡಿರುವ ಬೆಂಗಳೂರು ಇಂಟರ್‌ನ್ಯಾಶನಲ್ ಏರ್‌ಪೋರ್ಟ್ ಲಿಮಿಟೆಡ್ (BIAL) ನ ವಕ್ತಾರರು, 'ವಿಮಾನಗಳನ್ನು ಹತ್ತುವ ಧಾವಂತದಲ್ಲಿ ಪ್ರಯಾಣಿಕರು ಸಾಕಷ್ಟು ವಸ್ತುಗಳನ್ನು ಬಿಟ್ಟು ಹೋಗುತ್ತಾರೆ.
ಇದನ್ನೂ ಓದಿ: ಕೆಂಪೇಗೌಡ ವಿಮಾನ ನಿಲ್ದಾಣದಲ್ಲಿ ಇನ್ನೂ 50 ಕೋವಿಡ್ ಪರೀಕ್ಷಾ ಯಂತ್ರಗಳ ಅಳವಡಿಕೆ!
ಭದ್ರತಾ ಹೋಲ್ಡ್ ಪ್ರದೇಶದಲ್ಲಿ (ಭದ್ರತಾ ತಪಾಸಣೆಯ ನಂತರ ಮತ್ತು ತಮ್ಮ ವಿಮಾನವನ್ನು ಹತ್ತುವ ಮೊದಲು ಪ್ರಯಾಣಿಕರು ಕಾಯುವ ಸ್ಥಳ) ವಸ್ತುಗಳನ್ನು ಬಿಟ್ಟು ಹೋಗಲಾಗುತ್ತದೆ. ಹೀಗೆ ಬಿಟ್ಟು ಹೋದ ವಸ್ತುಗಳ ಸಂಖ್ಯೆ ಸುಮಾರು 32 ಸಾವಿರಕ್ಕೂ ಅಧಿಕ ಇದೆ. ಹೀಗೆ ಬಿಟ್ಟು ಹೋದ ವಸ್ತುಗಳ ಪೈಕಿ ಮೊಬೈಲ್ ಡಾಟಾ ಕೇಬಲ್‌ಗಳು, ಇಯರ್ ಪಾಡ್‌ಗಳು, ಇಯರ್ ಫೋನ್‌ಗಳು, ಪೆನ್ ಡ್ರೈವ್‌ಗಳು, ಮೊಬೈಲ್ ಫೋನ್‌ಗಳು ಮತ್ತು ವಾಚ್‌ಗಳಂತಹ ಎಲೆಕ್ಟ್ರಾನಿಕ್ ವಸ್ತುಗಳನ್ನು 'ಲಾಸ್ಟ್ ಅಂಡ್ ಫೌಂಡ್' ವಿಭಾಗದಲ್ಲಿ ಆಗಾಗ್ಗೆ ಸ್ವೀಕರಿಸಲಾಗುತ್ತದೆ" ಎಂದು ಹೇಳಿದ್ದಾರೆ.
ಅಲ್ಲದೆ ಸಾಕಷ್ಟು ಬಾರಿ ವ್ಯಕ್ತಿಗಳೊಂದಿಗೆ ಭಾವನಾತ್ಮ ಬಂಧ ಇರುವ ವಸ್ತುಗಳನ್ನೂ ಕೂಡ ಕಳೆದುಕೊಂಡ ಪ್ರಯಾಣಿಕರು ಅದನ್ನು ಮರಳಿ ಪಡೆಯಲು ಮನವಿ ಮಾಡಿರುತ್ತಾರೆ. ಇತ್ತೀಚಿನ ಘಟನೆಯಲ್ಲಿ, ತನ್ನ ತಾಯಿಗೆ ಸೇರಿದ ಬಳೆಯನ್ನು ಸುರಕ್ಷಿತವಾಗಿ ಹಿಂದಿರುಗಿಸಿದಾಗ ಪ್ರಯಾಣಿಕರೊಬ್ಬರು ಕಣ್ಣೀರು ಹಾಕಿದ್ದರು ಎಂದು ಅವರು ಹೇಳಿದರು.
ವಿಮಾನ ನಿಲ್ದಾಣದೊಳಗೆ ಮಾಲೀಕ ರಹಿತ ವಸ್ತುವನ್ನು ನೀವು ಗುರುತಿಸಿದರೆ, ಯಾವುದೇ ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆ (CISF) ಸಿಬ್ಬಂದಿ ಅಥವಾ ವಿಮಾನ ನಿಲ್ದಾಣದ ಸಿಬ್ಬಂದಿಗೆ ಗಮನಕ್ಕೆ ತರಬೇಕು. ಇಂತಹ ವಸ್ತುಗಳನ್ನು “‘ಲಾಸ್ಟ್ ಅಂಡ್ ಫೌಂಡ್’ ವಿಭಾಗವು ಸುರಕ್ಷಿತವಾಗಿ ಸಂಗ್ರಹಿಸುವ ಮೀಸಲಾದ ತಂಡವನ್ನು ಹೊಂದಿದೆ. ಸಂಪರ್ಕ ವಿವರಗಳು ಲಭ್ಯವಿದ್ದಲ್ಲಿ ಅವರು ಸಂಬಂಧಪಟ್ಟ ಮಾಲೀಕರಿಗೆ ಮಾಹಿತಿ ನೀಡುತ್ತಾರೆ. ಒಂದು ವೇಳೆ ಮಾಲೀಕರು ಸ್ಪಂದಿಸದಿದ್ದರೆ ಆಗ ಅಂತಹ ವಸ್ತುಗಳನ್ನು ವಿಭಾಗ ತನ್ನ ವಶಕ್ಕೆ ಪಡೆಯುತ್ತದೆ ಎಂದು ಹೇಳಿದ್ದಾರೆ,
https://www.bengaluruairport.com/travellers/passenger-services/lost-found
ನಿಮ್ಮ ವಸ್ತುಗಳನ್ನು ಹೇಗೆ ಸಂಗ್ರಹಿಸುವುದು
ವಸ್ತುಗಳನ್ನು ಕಳೆದುಕೊಂಡ ಪ್ರಯಾಣಿಕರು ಅದನ್ನು ಸಂಗ್ರಹಿಸಬೇಕಿದ್ದರೆ, ಬೋರ್ಡಿಂಗ್ ಪಾಸ್ ಅಥವಾ ಇ-ಟಿಕೆಟ್ ಜೊತೆಗೆ ಫೋಟೋ ID ಯನ್ನು ನೀಡಬೇಕಾಗುತ್ತದೆ. ಆದಾಗ್ಯೂ, ಪ್ರಯಾಣಿಕರ ಪರವಾಗಿ ಬೇರೊಬ್ಬರು ಐಟಂ ಅನ್ನು ಸಂಗ್ರಹಿಸಲು ಅಧಿಕಾರ ಹೊಂದಿದ್ದರೆ, ನಂತರ ಪ್ರಯಾಣಿಕನ ಈ ದಾಖಲೆಗಳು ಅದನ್ನು ಸಂಗ್ರಹಿಸುವ ವ್ಯಕ್ತಿಯ ಫೋಟೋ ID ಜೊತೆಗೆ ಅಧಿಕೃತ ಪತ್ರ/ಇಮೇಲ್ ಜೊತೆಗೆ ಇರಬೇಕು. ಹಸ್ತಾಂತರಿಸಿದ ದಿನಾಂಕದಿಂದ ಒಂದು ತಿಂಗಳ ಅವಧಿಯವರೆಗೆ ವಸ್ತುಗಳನ್ನು ಈ ವಿಭಾಗದಲ್ಲಿ ಉಳಿಸಿಕೊಳ್ಳಲಾಗುತ್ತದೆ. ಭಾರತೀಯ ಪಾಸ್‌ಪೋರ್ಟ್‌ಗಳನ್ನು ಪ್ರಾದೇಶಿಕ ಪಾಸ್‌ಪೋರ್ಟ್ ಕಚೇರಿಗೆ ರವಾನೆ ಮಾಡಲಾಗುತ್ತದೆ ಆದರೆ ವಿದೇಶಿ ಪಾಸ್‌ಪೋರ್ಟ್‌ಗಳನ್ನು 30 ದಿನಗಳ ಧಾರಣ ಅವಧಿಯ ನಂತರ ಆಯಾ ರಾಯಭಾರ ಕಚೇರಿಗಳಿಗೆ ಕಳುಹಿಸಲಾಗುತ್ತದೆ. ಬ್ಯಾಂಕ್ ಕಾರ್ಡ್‌ಗಳು, ಚೆಕ್ ಪುಸ್ತಕಗಳು ಮತ್ತು ಪಾಸ್ ಪುಸ್ತಕಗಳನ್ನು 48 ಗಂಟೆಗಳ ನಂತರ ವಿಲೇವಾರಿ ಮಾಡಲಾಗುತ್ತದೆ ಎಂದು ಹೇಳಿದ್ದಾರೆ.
