ಹೆಲ್ಮೆಟ್ ಧರಿಸದೇ ಪ್ರಿಯಾಂಕಾ ಪ್ರಯಾಣ, ಸ್ಕೂಟರ್ ಮಾಲೀಕನಿಗೆ 6 ಸಾವಿರ ರೂ ದಂಡ!

ಲಖನೌ: ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕ ಗಾಂಧಿ ಅವರ ಅಪ್ತನಿಗೆ ಉತ್ತರ ಪ್ರದೇಶ ಟ್ರಾಫಿಕ್ ಪೊಲೀಸರು ಬರೊಬ್ಬರಿ 6, 100 ರೂ ದಂಡ ವಿಧಿಸಿದ್ದಾರೆ.

ಹೌದು.. ನಿನ್ನೆ ಮಾಜಿ ಐಪಿಎಸ್ ಅಧಿಕಾರಿ ಎಸ್​ಆರ್​ ದಾರಾಪುರಿ ಅವರನ್ನ ಭೇಟಿಯಾಗುವ ವೇಳೆ ಪ್ರಿಯಾಂಕಾ ಗಾಂಧಿ ಅವರು ದ್ವಿಚಕ್ರವಾಹನದಲ್ಲಿ ಹೆಲ್ಮೆಟ್ ಧರಿಸದೇ ಪ್ರಯಾಣಿಸಿದ್ದರು. ಹೀಗಾಗಿ ಇಂದು ಉತ್ತರ ಪ್ರದೇಶದ ಟ್ರಾಫಿಕ್ ಪೊಲೀಸರು ಸ್ಕೂಟರ್​​ ಮಾಲೀಕನಿ​​ಗೆ 6,100 ರೂಪಾಯಿ ದಂಡ ವಿಧಿಸಿದ್ದಾರೆ.

ಇನ್ನು ಸ್ಕೂಟರ್ ಸವಾರಿ ವೇಳೆ ಪ್ರಿಯಾಂಕಾರನ್ನು ತಡೆದಿದ್ದ ಪೊಲೀಸರು ಅವರನ್ನು ಹಿಂದಕ್ಕೆ ಹೋಗುವಂತೆ ಸೂಚಿಸಿದ್ದರು. ಆದರೆ ಪೊಲೀಸರಿಗೇ ಚಳ್ಳೇ ಹಣ್ಣು ತಿನ್ನಿಸಿದ್ದ ಪ್ರಿಯಾಂಕಾ ಕೊನೆಗೂ ಮಾಜಿ ಐಪಿಎಸ್ ಅಧಿಕಾರಿ ಎಸ್​ಆರ್​ ದಾರಾಪುರಿ ಅವರನ್ನ ಭೇಟಿಯಾಗಿದ್ದರು. ಅಲ್ಲದೆ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ್ದ ಅವರು,  'ಮಹಿಳಾ  ಪೊಲೀಸರು ತಮ್ಮ ಕುತ್ತಿಗೆ ಹಿಸುಕಿ, ನೂಕಿದ್ದರು ಎಂದು ಆರೋಪಿಸಿದ್ದರು. ಆದರೆ ಈ ಆರೋಪವನ್ನ ಫೊಲೀಸರು ಸುಳ್ಳು ಎಂದು ತಳ್ಳಿಹಾಕಿದ್ದರು.