ಅಕ್ರಮ ಸಂಬಂಧಕ್ಕೆ ಬೇಸತ್ತು ಪ್ರೀತಿಯ ನಾಯಿಯನ್ನೇ ಮನೆಯಿಂದ ಹೊರಹಾಕಿದ ಒಡತಿ!

ತಿರುವನಂತಪುರ: ಲೈಂಗಿಕ ಕ್ರಿಯೆಯು ಪ್ರಾಕೃತಿಕ ಸಹಜ ಕ್ರಿಯೆಯಾಗಿದ್ದು ಅದನ್ನು ನಡೆಸುವುದೇ ತಪ್ಪಾಯ್ತಾ. ಹೌದು ಮಹಿಳೆಯೊಬ್ಬರು ಅಕ್ರಮ ಸಂಬಂಧಕ್ಕೆ ಬೇಸತ್ತು ಪ್ರೀತಿಯ ನಾಯಿಯನ್ನೇ ಮನೆಯಿಂದ ಹೊರಹಾಕಿರುವ ಘಟನೆ ನಡೆದಿದೆ. 

ಕೇರಳದ ತಿರುವನಂತಪುರದಲ್ಲಿ ಈ ವಿಚಿತ್ರ ಘಟನೆ ನಡೆದಿದೆ. ಪೊಮೆರೇನಿಯನ್ ನಾಯಿಯೊಂದು ಮಳೆಯಲ್ಲಿ ನೆನೆಯುತ್ತಾ ನಿಂತಿದ್ದನ್ನು ಕಂಡ ಪ್ರಾಣಿದಯಾ ಸಂಘದ ಕಾರ್ಯದರ್ಶಿ ಲತಾ ಅವರು ನಾಯಿಯನ್ನು ರಕ್ಷಿಸಿದ್ದಾರೆ. ಇನ್ನು ನಾಯಿಯ ಕುತ್ತಿಗೆಯಲ್ಲಿ ಪತ್ರವೊಂದನ್ನು ತೂಗು ಹಾಕಲಾಗಿತ್ತು. 

ಆ ಪತ್ರವನ್ನು ಬಿಡಿಸಿ ನೋಡಿದಾಗ ಅದರಲ್ಲಿ ಈ ನಾಯಿ ಅಕ್ರಮ ಸಂಬಂಧ ಹೊಂದಿತ್ತು. ಹೀಗಾಗಿ ನಾನು ಇದನ್ನು ಮನೆಯಿಂದ ಹೊರ ಹಾಕಿದ್ದೇನೆ. ಈ ಶ್ವಾನ ಬ್ರೆಡ್ ತಿನ್ನುತ್ತದೆ. ಹಾಲು ಕುಡಿಯುತ್ತದೆ. ಇದಕ್ಕೆ ಮೂರು ವರ್ಷವಾಗಿದ್ದು ಯಾವುದೋ ರೋಗವಿಲ್ಲ. ಇದು ಅತಿಯಾಗಿ ಬೊಗಳುತ್ತದೆ ಅದೊಂದೇ ಸಮಸ್ಯೆ ಎಂದು ಬರೆಯಲಾಗಿತ್ತು. 

ಇದಕ್ಕೆ ಲತಾ ಆಶ್ಚರ್ಯ ವ್ಯಕ್ತಪಡಿಸಿದ್ದು ಆರು ತಿಂಗಳಿಗೊಮ್ಮೆ ಗಂಡು-ಹೆಣ್ಣು ಶ್ವಾನಗಳು ಸೇರುತ್ತವೆ. ಈ ವೇಳೆ ಸಹಜವಾಗಿಯೇ ಹೆಣ್ಣು ನಾಯಿಗಳು ಗಂಡು ಶ್ವಾನವನ್ನು ಬಯಸುತ್ತವೆ. ಇದಕ್ಕೆ ಅಪರಾಧ ಎಂದು ಭಾವಿಸಿದ್ದು ನಿಜಕ್ಕೂ ದುರಾದೃಷ್ಟ ಎಂದು ಹೇಳಿದ್ದಾರೆ.