ನವದೆಹಲಿ: ಪತ್ನಿಯನ್ನು ಹತ್ಯೆಗೈದ ವ್ಯಕ್ತಿ ಹಾಗೂ ಆತನ ಗೆಳತಿಯನ್ನು ದೆಹಲಿ ಪೊಲೀಸರು ಬಂಧಿಸಿದ್ದಾರೆ.
ರಾಹುಲ್ ಕುಮಾರ್ ಮಿಶ್ರಾ ಹಾಗೂ ಪದ್ಮಾ ತಿವಾರಿ ಬಂಧಿತ ಆರೋಪಿಗಳಾಗಿದ್ದು, ಪೂಜಾ ರೈ ನ್ನು ಹತ್ಯೆ ಮಾಡಿರುವ ಆರೋಪವನ್ನು ತನಿಖೆ ವೇಳೆ ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಹತ್ಯೆಯಾಗಿರುವ ಪೂಜಾ ರೈ, ಬಹುರಾಷ್ಟ್ರೀಯ ಕಂಪನಿಯಲ್ಲಿ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ಕೆಲಸ ಮಾಡುತ್ತಿದ್ದರು. ಪತಿ ಮಿಶ್ರಾ ಹಾಗೂ ತಿವಾರಿ ಸಂಬಂಧದ ಬಗ್ಗೆ ಪತ್ನಿ ಪೂಜಾ ರೈ ಗೆ ಅನುಮಾನವಿತ್ತು.
ಕಿಶನ್ಘರ್ ನಲ್ಲಿರುವ ಪೂಜಾ ರೈ ನಿವಾಸದಲ್ಲಿ ರಾಹುಲ್ ಕುಮಾರ್ ಮಿಶ್ರಾ ಹಾಗೂ ಪದ್ಮಾ ತಿವಾರಿ ಪೂಜಾ ರೈ ಗೆ ತಂಪು ಪಾನಿಯದಲ್ಲಿ ವಿಷ ಬೆರೆಸಿ ಕುಡಿಯಲು ನೀಡಿ ಹತ್ಯೆ ಮಾಡಿದ್ದಾರೆ. ನಂತರ ಇದನ್ನು ಆತ್ಮಹತ್ಯೆ ಎಂದು ಬಿಂಬಿಸಲು ನಕಲಿ ಪತ್ರವೊಂದನ್ನು ಸೃಷ್ಟಿಸಿದ್ದಾರೆ ಎಂದು ತಿಳಿದುಬಂದಿದೆ.
