ಗುವಾಹಟಿ: ಅಸ್ಸಾಂ ನಲ್ಲಿ ಹಸುಗಳಿಗೆ ವಿಲಕ್ಷಣ ಚರ್ಮ ರೋಗ ಹರಡುತ್ತಿರುವುದು ಪತ್ತೆಯಾಗಿದೆ.
ಎಲ್ಎಸ್ ಡಿ ಎಂದು ಇದನ್ನು ಗುರುತಿಸಲಾಗಿದ್ದು, ಸರ್ಕಾರದಿಂದ ಎಲ್ಲಾ ಜಿಲ್ಲಾಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದ್ದು, ಪಶುವೈದ್ಯರು, ಪಶುವೈದ್ಯಕೀಯ ಚಿಕಿತ್ಸಾಲಯಗಳಿಗೆ, ರೈತರಿಗೆ ಈ ಬಗ್ಗೆ ಮಾಹಿತಿ ನೀಡಿ, ಅರಿವು ಮೂಡಿಸುವುದಕ್ಕೆ ತಿಳಿಸಲಾಗಿದೆ.
ಜೂನ್ ತಿಂಗಳಲ್ಲಿ ಮೊದಲ ಬಾರಿಗೆ ಎಲ್ಎಸ್ ಡಿ ಸಮಸ್ಯೆ ಕಾಣಿಸಿಕೊಂಡಿದ್ದು, ಚಾಚರ್, ಕರೀಂಗಂಜ್, ಹೈಲಾಕಂಡಿ ಜಿಲ್ಲೆಗಳಲ್ಲಿ ಈವರೆಗೂ ಹಸುಗಳಲ್ಲಿ ಎಲ್ಎಸ್ ಡಿ ಕಾಣಿಸಿಕೊಂಡಿದೆ.
ಸೊಳ್ಳೆ, ರಕ್ತ ಹೀರುವ ಕೀಟಗಳಿಂದಾಗಿ ಈ ರೋಗ ಹರಡಲಿದ್ದು, ಹಸುಗಳಿಂದ ಮನುಷ್ಯರಿಗೆ ಈ ರೋಗ ಹರಡುವುದಿಲ್ಲ ಎಂಬುದು ಸ್ಪಷ್ಟವಾಗಿದೆ.
ಹಸುಗಳಿಗೆ ಈ ರೋಗ ಹರಡಿದರೆ ಜ್ವರ ಕಾಣಿಸಿಕೊಳ್ಳುತ್ತದೆ, ನಂತರ ಚರ್ಮ ಬೊಬ್ಬೆ ಬಂದಂತೆ ಊತ ಕಾಣಿಸಿಕೊಳ್ಳುತ್ತದೆ. ಅಷ್ಟೇ ಅಲ್ಲದೇ ದುಗ್ಧರಸ ಗ್ರಂಥಿಗಳ ಊತವು ಸಹ ಕಾಣಿಸಿಕೊಳ್ಳಲಿದೆ ಎಂದು ಡಾ.ಪ್ರದೀಪ್ ಗೊಗೋಯ್ ಹೇಳಿದ್ದಾರೆ.
ಸಾಮಾನ್ಯವಾಗಿ ಈ ರೋಗ ಬಂದ ಹಸುಗಳು ಎರಡರಿಂದ ಮೂರು ವಾರಗಳಲ್ಲಿ ಚೇತರಿಸಿಕೊಳ್ಳುತ್ತವೆ, ಆದರೆ ಹಾಲಿನ ಇಳುವರಿಯೂ ಕಡಿಮೆಯಾಗಲಿದೆ. ಸಾವಿನ ಪ್ರಮಾಣ 1-5% ಇದೆ ಎಂದು ಡಾ. ಗೊಗೋಯ್ ಹೇಳಿದ್ದಾರೆ.
Advertisement