ನೋಯ್ಡಾ ಆಸ್ಪತ್ರೆಯಲ್ಲಿ ವೈದ್ಯರಿಂದ ಲೈಂಗಿಕ ಕಿರುಕುಳ: ಕೋವಿಡ್-19 ಸೋಂಕಿತೆಯ ಆರೋಪ

ನೋಯ್ಡಾ: ಐಸೊಲೇಷನ್ ವಾರ್ಡ್ ನಲ್ಲಿ ತಮ್ಮ ಜೊತೆಗಿದ್ದ ವೈದ್ಯ ತನಗೆ ಲೈಂಗಿಕ ಕಿರುಕುಳ ನೀಡಿದ್ದಾನೆ ಎಂದು ಕೋವಿಡ್-19 ಸೋಂಕಿತ 20 ವರ್ಷದ ಮಹಿಳೆಯೊಬ್ಬರು ಆರೋಪಿಸಿದ್ದಾರೆ. 

ನೋಯ್ಡಾದಲ್ಲಿ ಈ ಘಟನೆ ಸಂಭವಿಸಿದ್ದು, ಸಂತ್ರಸ್ತೆ ಹಾಗೂ ಕಿರುಕುಳ ನೀಡಿದ್ದ ವೈದ್ಯ ಇಬ್ಬರೂ ಖಾಸಗಿ ಆಸ್ಪತ್ರೆಯಲ್ಲಿ ಕೋವಿಡ್-19 ಕ್ಕೆ ಚಿಕಿತ್ಸೆ ಪಡೆಯುತ್ತಿದ್ದರು. ಮಹಿಳೆ ನೀಡಿರುವ ದೂರನ್ನು ಆಧರಿಸಿ ಎಕ್ಸ್ಪ್ರೆಸ್ ವೇ ಪೊಲೀಸ್ ಠಾಣೆಯ ಪೊಲೀಸರು ಎಫ್ಐಆರ್ ದಾಖಲಿಸಿದ್ದಾರೆ.

ಮಹಿಳೆ ಹಾಗೂ ಪುರುಷರಿಬ್ಬರನ್ನೂ ಒಂದೇ ಕೋವಿಡ್-19 ಐಸೊಲೇಷನ್ ವಾರ್ಡ್ ನಲ್ಲಿರಿಸಿ ಮೇಲ್ನೋಟಕ್ಕೆ ಆಸ್ಪತ್ರೆಯವರು ನಿಯಮಗಳನ್ನು ಉಲ್ಲಂಘಿಸಿದ್ದಾರೆಂದು ಕಾಣುತ್ತಿದೆ ಈ ಬಗ್ಗೆ ತನಿಖೆ ನಡೆಸಲಾಗುವುದು ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. 

ದೂರು ನೀಡಿರುವ ಮಹಿಳೆ ಹಾಗೂ ಆರೋಪಿ ಇಬ್ಬರಿಗೂ ಸಹ ಕಳೆದ ವಾರ ಕೋವಿಡ್-19 ಸೋಂಕು ದೃಢಪಟ್ಟಿತ್ತು. ಈ ಮಹಿಳೆ ಇದ್ದ ಐಸೊಲೇಷನ್ ವಾರ್ಡ್ ನಲ್ಲಿಯೇ ಕೋವಿಡ್-19 ಸೋಂಕು ವೈದ್ಯರೂ ದಾಖಲಾಗಿದ್ದರು ಎಂದು ನೋಯ್ಡಾದ ಹೆಚ್ಚುವರಿ ಪೊಲೀಸ್ ಉಪ ಆಯುಕ್ತ ರಣ್ ವಿಜಯ್ ಸಿಂಗ್ ಹೇಳಿದ್ದಾರೆ. 

ಈ ಘಟನೆಗೆ ಸಂಬಂಧಿಸಿದಂತೆ ಇಬ್ಬರನ್ನೂ ಒಂದೇ ವಾರ್ಡ್ ನಲ್ಲಿರಿಸಲಾಗಿತ್ತ ಎಂಬ ಮಾಹಿತಿಯನ್ನು ವೈದ್ಯಾಧಿಕಾರಿಗಳ ಮೂಲಕ ಸಂಗ್ರಹಿಸುತ್ತಿದ್ದೇವೆ, ಆರೋಪಿ ಇನ್ನೂ ಐಸೊಲೇಷನ್ ನಲ್ಲಿದ್ದು ಆತನ ಹೇಳಿಕೆಯನ್ನೂ ಪಡೆಯಲಿದ್ದೇವೆ ಎಂದು ಪೊಲೀಸರು ತಿಳಿಸಿದ್ದಾರೆ.