ಜಪಾನ್ ಹಡಗಿನಲ್ಲಿ ಕೊರೋನಾ ವೈರಸ್ ಸೋಂಕಿತ 16 ಭಾರತೀಯರಿಗೆ ಚಿಕಿತ್ಸೆ, ಭಾರತಕ್ಕೆ ವಾಪಸ್! 

ನವದೆಹಲಿ: ಕೊರೋನಾ ವೈರಸ್ ಸೋಂಕಿಗೆ ತುತ್ತಾಗಿದ್ದ ಜಪಾನ್ ಹಡಗಿನಲ್ಲಿದ್ದ 16 ಭಾರತೀಯರನ್ನು ಚಿಕಿತ್ಸೆ ಕೊಡಿಸಿ ವಾಪಸ್ ಕರೆತರಲಾಗಿದೆ ಎಂದು ವಿದೇಶಾಂಗ ಇಲಾಖೆ ರಾಜ್ಯ ಸಚಿವರು ತಿಳಿಸಿದ್ದಾರೆ.
 
ರಾಜ್ಯಸಭೆಯಲ್ಲಿ ಈ ಬಗ್ಗೆ ಲಿಖಿತ ಉತ್ತರ ನೀಡಿರುವ ವಿದೇಶಾಂಗ ಇಲಾಖೆ ರಾಜ್ಯ ಸಚಿವ ವಿ.ಮುರಳೀಧರನ್, ಡೈಮಂಡ್ ಪ್ರಿನ್ಸಸ್ ಕ್ರೂಸ್ ಶಿಪ್ ನಲ್ಲಿ 138 ಭಾರತೀಯರಿದ್ದರು. ಈ ಪೈಕಿ 119 ಭಾರತೀಯರನ್ನು ಫೆ.27 ರಂದು ಭಾರತಕ್ಕೆ ವಿಶೇಷ ವಿಮಾನದ ಮೂಲಕ ಕರೆತರಲಾಗಿತ್ತು.

ಭಾರತಕ್ಕೆ ಕರೆತರುತ್ತಿದ್ದಂತೆಯೇ ಅವರನ್ನು ಹರ್ಯಾಣದ ಇಂಡಿಯನ್ ಆರ್ಮಿ ಫೆಸಿಲಿಟಿಯಲ್ಲಿ ನಿರ್ಬಂಧ ವಿಧಿಸಿ ಇರಿಸಲಾಗಿತ್ತು. ಈ ಪೈಕಿ 16 ಭಾರತೀಯರಿಗೆ ಕೊರೋನಾ ಸೋಂಕು ತಗುಲಿರುವುದು ಪತ್ತೆಯಾಗಿತ್ತು. ಅವರಿಗೆ ಜಪಾನ್ ನಲ್ಲಿಯೇ ಚಿಕಿತ್ಸೆ ಕೊಡಿಸಿ ಡಿಸ್ಚಾರ್ಜ್ ನಂತರ ಭಾರತಕ್ಕೆ ಕರೆತರಲಾಗಿದೆ ಎಂದು ಸಚಿವರು ಮಾಹಿತಿ ನೀಡಿದ್ದಾರೆ.