ಸಿಂಧೂ ಜಲ ಒಪ್ಪಂದ: ಮಾರ್ಚ್ ನಲ್ಲಿ ಪಾಕಿಸ್ತಾನಕ್ಕೆ ಭೇಟಿ ನೀಡಲಿದೆ ಭಾರತೀಯ ನಿಯೋಗ

ನವದೆಹಲಿ: ಶಾಶ್ವತ ಸಿಂಧೂ ಆಯೋಗದ ವಾರ್ಷಿಕ ಸಭೆಗಾಗಿ ಭಾರತದಿಂದ 10 ಸದಸ್ಯರ ನಿಯೋಗ ಮಾರ್ಚ್ 1ರಿಂದ 3ರವರೆಗೆ ಪಾಕಿಸ್ತಾನಕ್ಕೆ ಭೇಟಿ ನೀಡಲಿದೆ. ಜಲಶಕ್ತಿ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. 

ಉಭಯ ದೇಶಗಳು ಸಿಂಧೂ ಜಲ ಒಪ್ಪಂದಕ್ಕೆ (ಐಡಬ್ಲ್ಯುಟಿ) ಸಹಿ ಹಾಕಿದ ನಂತರ ಮೊದಲ ಬಾರಿಗೆ ಮೂವರು ಮಹಿಳಾ ಅಧಿಕಾರಿಗಳು ಸಹ ಭಾರತೀಯ ನಿಯೋಗದಲ್ಲಿ ಭಾಗಿಯಾಗಲಿದ್ದಾರೆ. ವಿವಿಧ ವಿಷಯಗಳ ಬಗ್ಗೆ ಭಾರತೀಯ ಆಯುಕ್ತರಿಗೆ ಸಭೆಯಲ್ಲಿ ನಿಯೋಗವು ಸಲಹೆ ನೀಡಲಿದೆ. ಕಳೆದ ವರ್ಷ ಪಾಕಿಸ್ತಾನದ ಕಮಿಷನರ್ ನೇತೃತ್ವದ ನಿಯೋಗವು ವಾರ್ಷಿಕ ಸಭೆಗಾಗಿ ಭಾರತಕ್ಕೆ ಭೇಟಿ ನೀಡಿತ್ತು.

ಈ ವಾರ್ಷಿಕ ಸಭೆಯು ಮಾರ್ಚ್ 1 ರಿಂದ 3 ರವರೆಗೆ ಪಾಕಿಸ್ತಾನದ ರಾಜಧಾನಿ ಇಸ್ಲಾಮಾಬಾದ್‌ನಲ್ಲಿ ನಡೆಯಲಿದೆ ಎಂದು ಸಿಂಧೂ ಜಲಗಳ ಭಾರತೀಯ ಆಯುಕ್ತ ಪ್ರದೀಪ್ ಕುಮಾರ್ ಸಕ್ಸೇನಾ ತಿಳಿಸಿದ್ದಾರೆ. ಭಾರತೀಯ ನಿಯೋಗವು ಕೇಂದ್ರ ಜಲ ಆಯೋಗ, ಕೇಂದ್ರೀಯ ವಿದ್ಯುತ್ ಪ್ರಾಧಿಕಾರ, ರಾಷ್ಟ್ರೀಯ ಜಲವಿದ್ಯುತ್ ಶಕ್ತಿ ನಿಗಮ ಮತ್ತು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಸಕ್ಸೇನಾ ಅವರ ಸಲಹೆಗಾರರನ್ನು ಒಳಗೊಂಡಿರುತ್ತದೆ. ಮತ್ತೊಂದೆಡೆ, ಪಾಕಿಸ್ತಾನದ ತಂಡವನ್ನು ಅಲ್ಲಿನ ಕಮಿಷನರ್ ಸೈಯದ್ ಮೊಹಮ್ಮದ್ ಮೆಹರ್ ಅಲಿ ಶಾ ಮುನ್ನಡೆಸಲಿದ್ದಾರೆ. ಈ ಮಹತ್ವದ ಸಭೆಗಾಗಿ ಭಾರತೀಯ ನಿಯೋಗ ಫೆ.28ರಂದು ಪಾಕಿಸ್ತಾನಕ್ಕೆ ತೆರಳಲಿದ್ದು, ಮಾರ್ಚ್ 4ರಂದು ವಾಪಸಾಗಲಿದೆ.

ಸಭೆಯ ಕಾರ್ಯಸೂಚಿಯನ್ನು ಅಂತಿಮಗೊಳಿಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಭಾರತದ ಪಾಕಲ್ ದುಲ್ (1000 ಮೆಗಾವ್ಯಾಟ್), ಲೋವರ್ ಕಲ್ನಾಯ್ (48 ಮೆಗಾವ್ಯಾಟ್), ಜಮ್ಮು ಮತ್ತು ಕಾಶ್ಮೀರದ ಚೆನಾಬ್ ಜಲಾನಯನ ಪ್ರದೇಶದಲ್ಲಿ ಕಿರು (624 ಮೆಗಾವ್ಯಾಟ್) ಮತ್ತು ಲಡಾಖ್‌ನಲ್ಲಿನ ಕೆಲವು ಸಣ್ಣ ಜಲವಿದ್ಯುತ್ ಯೋಜನೆಗಳಿಗೆ ಪಾಕಿಸ್ತಾನದ ಆಕ್ಷೇಪಣೆಗಳು ಅಜೆಂಡಾದಲ್ಲಿ ಇರುವ ಸಾಧ್ಯತೆಯಿದೆ. ಸಿಂಧೂ ಜಲ ಒಪ್ಪಂದದ ಪ್ರಕಾರ, ವಿನ್ಯಾಸ ಮತ್ತು ಕಾರ್ಯಾಚರಣೆಗೆ ನಿರ್ದಿಷ್ಟ ಮಾನದಂಡಗಳಿಗೆ ಒಳಪಟ್ಟು ಪಶ್ಚಿಮ ನದಿಗಳ ಮೇಲೆ ನದಿಯ ರನ್-ಆಫ್-ದಿ-ರಿವರ್ ಯೋಜನೆಗಳ ಮೂಲಕ ಜಲವಿದ್ಯುತ್ ಉತ್ಪಾದಿಸುವ ಹಕ್ಕನ್ನು ಭಾರತಕ್ಕೆ ನೀಡಲಾಗಿದೆ.

ಈ ಒಪ್ಪಂದದ ಪ್ರಕಾರ ಪಶ್ಚಿಮ ನದಿಗಳ ಮೇಲಿನ ಭಾರತೀಯ ಜಲವಿದ್ಯುತ್ ಯೋಜನೆಗಳ ವಿನ್ಯಾಸವನ್ನು ವಿರೋಧಿಸುವ ಹಕ್ಕನ್ನು ಪಾಕಿಸ್ತಾನಕ್ಕೆ ನೀಡಲಾಗಿದೆ. ಈ ಯೋಜನೆಗಳ ವಿನ್ಯಾಸಕ್ಕೆ ಪಾಕಿಸ್ತಾನ ಆಕ್ಷೇಪ ವ್ಯಕ್ತಪಡಿಸಿದೆ. ಆದಾಗ್ಯೂ, ಯೋಜನೆಯ ವಿನ್ಯಾಸವು ಸಿಂಧೂ ಜಲ ಒಪ್ಪಂದದ ನಿಬಂಧನೆಗಳಿಗೆ ಸಂಪೂರ್ಣವಾಗಿ ಅನುಗುಣವಾಗಿದೆ ಮತ್ತು ಕೇಂದ್ರ ಜಲ ಆಯೋಗ ಮತ್ತು ಕೇಂದ್ರ ವಿದ್ಯುತ್ ಪ್ರಾಧಿಕಾರದಿಂದ ಪ್ರಮಾಣೀಕರಿಸಲ್ಪಟ್ಟಿದೆ ಎಂದು ಭಾರತ ಹೇಳಿಕೊಂಡಿದೆ. ಇದು ಜಲಸಂಪನ್ಮೂಲ ಮತ್ತು ಶಕ್ತಿ ಎರಡರಲ್ಲೂ ದೇಶದ ಉನ್ನತ ಸಂಸ್ಥೆಯಾಗಿದೆ. ಈ ಸಭೆಯಲ್ಲಿ ಭಾರತವು ಪಾಕಿಸ್ತಾನಕ್ಕೆ ತನ್ನ ನಿಲುವನ್ನು ವಿವರಿಸುತ್ತದೆ ಮತ್ತು ಪಾಕಿಸ್ತಾನದ ಆಕ್ಷೇಪಣೆಗಳನ್ನು ಪರಿಹರಿಸುತ್ತದೆ.