ರಷ್ಯಾ ದಾಳಿ: ಉಕ್ರೇನ್ ವಾಯುಪ್ರದೇಶ ಬಂದ್; ಕೈವ್‌ಗೆ ತೆರಳುತ್ತಿದ್ದ ಏರ್ ಇಂಡಿಯಾ ವಿಮಾನ ದೆಹಲಿಗೆ ವಾಪಸ್

ನವದೆಹಲಿ: ರಷ್ಯಾ-ಉಕ್ರೇನ್ ಬಿಕ್ಕಟ್ಟು ಹಿನ್ನೆಲೆಯಲ್ಲಿ ಪೂರ್ವ ಯುರೋಪಿಯನ್ ರಾಷ್ಟ್ರದಿಂದ ಭಾರತೀಯರನ್ನು ಮರಳಿ ಕರೆತರಲು ಇಂದು ಗುರುವಾರ ಬೆಳಗ್ಗೆ ಉಕ್ರೇನ್‌ನ ಕೈವ್‌ಗೆ ಹೊರಟಿದ್ದ ಏರ್ ಇಂಡಿಯಾ ವಿಮಾನವು ರಷ್ಯಾದ ಮಿಲಿಟರಿ ದಾಳಿಯ ಮಧ್ಯೆ ಉಕ್ರೇನ್ ನಲ್ಲಿ ವಾಯುಪ್ರದೇಶವನ್ನು ಮುಚ್ಚಿದ್ದರಿಂದ ದೆಹಲಿಗೆ ಹಿಂತಿರುಗುತ್ತಿದೆ.

ಇಂದು ಬೆಳಗ್ಗೆ ದೆಹಲಿಯಿಂದ ಉಕ್ರೇನ್ ಗೆ ಏರ್ ಇಂಡಿಯಾ ವಿಮಾನ ಹೊರಟಿತ್ತು. ಈ ಸಮಯದಲ್ಲಿ ಉಕ್ರೇನ್ ನ ಅಧಿಕಾರಿಗಳು NOTAM(ವಾಯುಯಾನ ಅಧಿಕಾರಿಗಳು, ಸಿಬ್ಬಂದಿಗೆ ನೊಟೀಸ್) ಹೊರಡಿಸಿದ್ದು, ಅದರಲ್ಲಿ ಉಕ್ರೇನ್ ಒಳಗೆ ನಾಗರಿಕ ವಿಮಾನಯಾನಕ್ಕೆ ಸಂಭವನೀಯ ಅಪಾಯದ ಕಾರಣದಿಂದಾಗಿ ನಿರ್ಬಂಧಿಸಲಾಗಿದೆ ಎಂದು ತಿಳಿಸಲಾಗಿದೆ.

ಈ ಹಿನ್ನೆಲೆಯಲ್ಲಿ ಏರ್ ಇಂಡಿಯಾ ಸಂಸ್ಥೆ ಮತ್ತು ಕೇಂದ್ರ ಸರ್ಕಾರ ದೆಹಲಿಯಿಂದ ಹೊರಟಿದ್ದ ವಿಮಾನವನ್ನು ವಾಪಾಸ್ ಕರೆಸಿಕೊಳ್ಳಲು ನಿರ್ಧರಿಸಿತು. ಸೂಚನೆ ಬಂದ ಹಿನ್ನೆಲೆಯಲ್ಲಿ ಇಟಲಿಯಿಂದ ಏರ್ ಇಂಡಿಯಾ ವಿಮಾನ ದೆಹಲಿಗೆ ವಾಪಸ್ಸಾಗಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಏರ್ ಇಂಡಿಯಾ ವಕ್ತಾರ, ಏರ್ ಇಂಡಿಯಾ ವಿಮಾನ ಸಂಖ್ಯೆ 1947 ಕೈವ್ ನಲ್ಲಿ NOTAM ಹೊರಡಿಸಿರುವುದರಿಂದ ದೆಹಲಿಗೆ ವಾಪಸ್ಸಾಗುತ್ತಿದೆ. ಇಂದು ಬೆಳಗ್ಗೆ 7.30ರ ಸುಮಾರಿಗೆ ಇಂದಿರಾ ಗಾಂಧಿ ವಿಮಾನ ನಿಲ್ದಾಣದಿಂದ ವಿಮಾನ ಕೈವ್ ನ ಬೊರಿಸ್ಪಿಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಪ್ರಯಾಣ ಬೆಳೆಸಿತ್ತು, ಆದರೆ ಅಲ್ಲಿನ ಉದ್ವಿಗ್ನ ಪರಿಸ್ಥಿತಿ ಹಿನ್ನೆಲೆಯಲ್ಲಿ ವಾಪಸಾಗಿದೆ ಎಂದಿದ್ದಾರೆ.

ಇದನ್ನೂ ಓದಿ: ರಷ್ಯಾ ದಾಳಿಗೆ ಉಕ್ರೇನ್ ತತ್ತರ: ಕನಿಷ್ಠ 7 ಸಾವು, 9 ಮಂದಿಗೆ ಗಾಯ; ವಾಯುನೆಲೆ, ವಾಯು ರಕ್ಷಣಾ ಕೇಂದ್ರಗಳು ನಾಶ!

ಈ ಮಧ್ಯೆ, ಕೈವ್ ನಿಂದ ಉಕ್ರೇನ್ ಅಂತಾರಾಷ್ಟ್ರೀಯ ವಿಮಾನ ಬೆಳಗ್ಗೆ 7.45ರ ಸುಮಾರಿಗೆ ದೆಹಲಿಗೆ ಬಂದಿಳಿದಿದ್ದು ಸುಮಾರು 182 ಮಂದಿ ಪ್ರಯಾಣಿಕರು ವಾಪಸ್ಸಾಗಿದ್ದಾರೆ. ಇನ್ನೂ ಹಲವು ವಿಮಾನಗಳು ಬರುವ ಸಾಧ್ಯತೆಯಿದೆ ಎಂದು ಎಸ್ ಟಿಐಸಿ ಗ್ರೂಪ್ ನಿರ್ದೇಶಕ ಅಂಜು ವರೈಯ ತಿಳಿಸಿದ್ದಾರೆ.

ಎಸ್ ಟಿಐಸಿ ಗ್ರೂಪ್ ಉಕ್ರೇನ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಜನರಲ್ ಸೇಲ್ಸ್ ಏಜೆಂಟ್(GSA) ಆಗಿದೆ. ಇಂದಿನ ಏರ್ ಇಂಡಿಯಾ ವಿಮಾನದಲ್ಲಿ ಪೂರ್ವ ಯುರೋಪ್ ದೇಶದಿಂದ ಸುಮಾರು 240 ಪ್ರಯಾಣಿಕರು ಬಂದಿಳಿಯಬೇಕಾಗಿತ್ತು. 

ಮೊದಲ ವಿಮಾನ ಫೆಬ್ರವರಿ 22ರಂದು ಪ್ರಯಾಣ ಬೆಳೆಸಿತ್ತು. ಮೊನ್ನೆ ಫೆಬ್ರವರಿ 22, 24 ಮತ್ತು 26ರಂದು ಮೂರು ವಿಮಾನಗಳನ್ನು ಭಾರತ ಮತ್ತು ಉಕ್ರೇನ್ ಮಧ್ಯೆ ಹಾರಾಟ ನಡೆಸುವುದಾಗಿ ಏರ್ ಇಂಡಿಯಾ ತಿಳಿಸಿತ್ತು.