ಈಗಿರುವ EWS ಮತ್ತು OBC ಮೀಸಲಾತಿ ಮಾದರಿಯಲ್ಲಿಯೇ ನೀಟ್-ಪಿಜಿ ಕೌನ್ಸೆಲಿಂಗ್ ನಡೆಸಿ: ಕೇಂದ್ರ ಸರ್ಕಾರಕ್ಕೆ 'ಸುಪ್ರೀಂ' ಅನುಮತಿ 

ನವದೆಹಲಿ: ರಾಜ್ಯ ಸರ್ಕಾರಿ ವೈದ್ಯಕೀಯ ಸಂಸ್ಥೆಗಳಲ್ಲಿ ಅಖಿಲ ಭಾರತ ಕೋಟಾ (AIQ) ಸೀಟುಗಳಲ್ಲಿ ಕೇಂದ್ರ ಸರ್ಕಾರವು ತಂದಿರುವ ಆರ್ಥಿಕವಾಗಿ ದುರ್ಬಲ ವರ್ಗದವರು (EWS) ಮತ್ತು ಇತರ ಹಿಂದುಳಿದ ವರ್ಗ ( OBC) ಮೀಸಲಾತಿಯನ್ನು ಆಧರಿಸಿ 2021-2022 ನೇ ಸಾಲಿಗೆ NEET-PG ಕೌನ್ಸೆಲಿಂಗ್‌ಗೆ ಸುಪ್ರೀಂ ಕೋರ್ಟ್ ಶುಕ್ರವಾರ ಅನುಮತಿ ನೀಡಿದೆ.

ನ್ಯಾಯಮೂರ್ತಿಗಳಾದ ಡಿವೈ ಚಂದ್ರಚೂಡ್ ಮತ್ತು ಎಎಸ್ ಬೋಪಣ್ಣ ಅವರನ್ನೊಳಗೊಂಡ ನ್ಯಾಯಪೀಠವು ಒಬಿಸಿಗೆ(OBC) ಶೇಕಡಾ 27 ಮತ್ತು ನೀಟ್-ಯುಜಿ(NEET-UG) ಮತ್ತು ನೀಟ್-ಪಿಜಿಯಲ್ಲಿ(NEET-PG) ಆರ್ಥಿಕವಾಗಿ ಹಿಂದುಳಿದ ವರ್ಗಕ್ಕೆ ಶೇಕಡಾ 10ರಷ್ಟು ಮೀಸಲಾತಿ ನೀಡುವ ಸಾಂವಿಧಾನಿಕ ಸಿಂಧುತ್ವವನ್ನು ಎತ್ತಿಹಿಡಿದಿದೆ. ಆದರೆ ಇಡಬ್ಲ್ಯೂಎಸ್(EWS) ವರ್ಗಕ್ಕೆ ವರ್ಷಕ್ಕೆ 8 ಲಕ್ಷ ರೂಪಾಯಿ ಆದಾಯದ ಮಾನದಂಡದ ತಾರ್ಕಿಕತೆಯನ್ನು ಮಾರ್ಚ್ ತಿಂಗಳಲ್ಲಿ ನಿರ್ಣಯಿಸುವುದಾಗಿ ಹೇಳಿದೆ.

ಇಂದು ನ್ಯಾಯಪೀಠ ಹೇಳಿದ್ದೇನು?: 2021-22ನೇ ಶೈಕ್ಷಣಿಕ ಸಾಲಿನ ನೀಟ್-ಪಿಜಿ (NEET-PG) ಪ್ರವೇಶಕ್ಕೆ 2019ರಲ್ಲಿ EWS ಅರ್ಹತೆಯ ಅಧಿಸೂಚನೆಯನ್ನು ಅಂಗೀಕರಿಸಬೇಕೆಂದು ಅಜಯ್ ಭೂಷಣ್ ಪಾಂಡೆ ಸಮಿತಿಯು ಮಾಡಿರುವ ಶಿಫಾರಸುಗಳನ್ನು ನಾವು ಸ್ವೀಕರಿಸಿದ್ದೇವೆ. ಕೇಂದ್ರ ಸರ್ಕಾರ ಕಳೆದ ವರ್ಷ ಜುಲೈ 29ರಂದು ಹೊರಡಿಸಿರುವ ಅಧಿಸೂಚನೆ ಪ್ರಕಾರ ನೀಟ್ ಪಿಜಿ (NEET-PG) ಮತ್ತು ನೀಟ್ ಯುಜಿ (NEET-UG) ಪ್ರವೇಶಕ್ಕೆ ಕೌನ್ಸಿಲಿಂಗ್ ನಡೆಸಬಹುದು. ಅಖಿಲ ಭಾರತ ಮಟ್ಟದಲ್ಲಿ ಶೇಕಡಾ 27ರಷ್ಟು ಮೀಸಲಾತಿ ಒಬಿಸಿಗೆ ಮತ್ತು ಶೇಕಡಾ 10ರಷ್ಟು ಮೀಸಲಾತಿ ಇಡಬ್ಲ್ಯುಎಸ್ ಗೆ ಪ್ರಸಕ್ತ ಸಾಲಿನಲ್ಲಿ ನೀಡಬಹುದು ಎಂದು ನ್ಯಾಯಪೀಠ ಇಂದು ಸರ್ಕಾರಕ್ಕೆ ಅನುಮತಿ ಕೊಟ್ಟಿತು. 

ಇದನ್ನೂ ಓದಿ: ನೀಟ್-ಪಿಜಿ ಕೌನ್ಸಿಲಿಂಗ್: ಇಡಬ್ಲ್ಯೂಎಸ್ ಎಂದು ನಿರ್ಧರಿಸಲು 8 ಲಕ್ಷ ರೂ. ಆದಾಯದ ಮಾನದಂಡ- ಕೇಂದ್ರ

ಇಂದು ಸುಪ್ರೀಂ ಕೋರ್ಟ್ ನಲ್ಲಿ ವಿಚಾರಣೆ ಸಂದರ್ಭದಲ್ಲಿ ಕೇಂದ್ರ ಸರ್ಕಾರವು, ಪರಿಷ್ಕೃತ ಮಾನದಂಡಗಳನ್ನು ಅನ್ವಯಿಸುವಂತೆ ಮಾಡಬೇಕು, ಕೌನ್ಸೆಲಿಂಗ್ ಮತ್ತು ಪ್ರವೇಶವನ್ನು ಅಸ್ತಿತ್ವದಲ್ಲಿರುವ ಮಾನದಂಡಗಳ ಪ್ರಕಾರ ನಡೆಸಬೇಕು ಎಂದು ಕೇಳಿಕೊಂಡಿತು. OBC ಮೀಸಲಾತಿ ಅಧಿಸೂಚನೆ ಹಾಗೂ EWS ಅನ್ನು ನಿರ್ಧರಿಸಲು 8 ಲಕ್ಷ ಆದಾಯದ ಮಾನದಂಡವನ್ನು ಸರ್ಕಾರ ಸಮರ್ಥಿಸಿಕೊಂಡಿತು.