ಸೌದೆ ಹೊರುತ್ತಿದ್ದ ಕೈಯಿಂದ ವೇಟ್ ಲಿಫ್ಟಿಂಗ್ ವರೆಗೆ: 'ಬೆಳ್ಳಿ ರೇಖೆ' ಸೃಷ್ಟಿಸಿದ ಮೀರಾಬಾಯಿ ರೋಚಕ ಪಯಣ!

ಈಕೆಯ ಜೀವನದಲ್ಲಿ ಜುಲೈ 24, 2021 ಮರೆಯಲಾರದ ದಿನ. ದೇಶದ ಕ್ರೀಡಾ ಇತಿಹಾಸದಲ್ಲಿ ಒಲಿಂಪಿಕ್ ಗೇಮ್ ಇತಿಹಾಸದಲ್ಲಿ ಈಕೆಯ ಹೆಸರು ಅಚ್ಚಳಿಯದೆ ಬರೆದಾಗಿದೆ.

Published: 24th July 2021 05:50 PM  |   Last Updated: 30th July 2021 03:49 PM   |  A+A-


Meerabhai Chanu

ಮೀರಾಬಾಯಿ ಚಾನು

Posted By : Sumana Upadhyaya
Source : Online Desk

ಮಣಿಪುರ/ನವದೆಹಲಿ: ಈಕೆಯ ಜೀವನದಲ್ಲಿ ಜುಲೈ 24, 2021 ಮರೆಯಲಾರದ ದಿನ. ದೇಶದ ಕ್ರೀಡಾ ಇತಿಹಾಸದಲ್ಲಿ ಒಲಿಂಪಿಕ್ ಗೇಮ್ ಇತಿಹಾಸದಲ್ಲಿ ಈಕೆಯ ಹೆಸರು ಅಚ್ಚಳಿಯದೆ ಬರೆದಾಗಿದೆ.

ಒಲಿಂಪಿಕ್ ಇತಿಹಾಸದಲ್ಲಿ ವೇಟ್ ಲಿಫ್ಟಿಂಗ್ ವಿಭಾಗದಲ್ಲಿ ಭಾರತಕ್ಕೆ ಬೆಳ್ಳಿ ಪದಕ ಗೆದ್ದ ಮೊದಲ ವನಿತೆ. 2000ನೇ ಇಸವಿಯಲ್ಲಿ ಸಿಡ್ನಿ ಒಲಿಂಪಿಕ್ಸ್ ನಲ್ಲಿ ಕರ್ಣಂ ಮಲ್ಲೇಶ್ವರಿ ಕಂಚಿನ ಪದಕವನ್ನು ದೇಶಕ್ಕೆ ಗೆದ್ದು ತಂದಿದ್ದರು. ಆ ಬಳಿಕ ಒಲಿಂಪಿಕ್ಸ್ ನಲ್ಲಿ ಪದಕ ತಂದ ಎರಡನೇ ಮಹಿಳಾ ಸ್ಪರ್ಧಿ ಈ ಮೀರಾಬಾಯಿ ಚಾನು.

ಈ ಬಾರಿಯ ಕೊರೋನಾ ಕರಿನೆರಳಿನ ಹಿನ್ನೆಲೆಯಲ್ಲಿ ಸೈಕೊಮ್ ಮೀರಾಬಾಯಿ ಚಾನು ಮುಖದಲ್ಲಿ ಕಂಡ ಸಂತಸದ ನಗು, ಕೊರಳಿಗೆ ವಿಜಯ ಮಾಲೆ ಹಾಕಿಸಿಕೊಂಡು, ಪೋಡಿಯಂನಲ್ಲಿ ನಿಂತು ಬೆಳ್ಳಿ ಪದಕ ಹಾಕಿಸಿಕೊಂಡಾಗ ಮುಖದಲ್ಲಿನ ಹರ್ಷ ಮಾಸ್ಕ್ ಧರಿಸಿದ್ದ ಎದ್ದುಕಾಣಲಿಲ್ಲವಾದರೂ ಸಂತಸ, ಸಂಭ್ರಮಕ್ಕೇನೂ ಕೊರತೆಯಿಲ್ಲ, ಇಂದು ಗುರು ಪೂರ್ಣಿಮೆ ದಿನ ಇಡೀ ಭಾರತ ಆಕೆಯನ್ನು ಕೊಂಡಾಡುತ್ತಿದೆ. 

ಮಣಿಪುರ ಮೂಲದ 26 ವರ್ಷದ ಮೀರಾಬಾಯಿ ಚಾನು ಮೊದಲ ಬಾರಿಗೆ ಒಲಿಂಪಿಕ್ ಸ್ಪರ್ಧೆಯಲ್ಲಿ ಕಾಣಿಸಿಕೊಂಡಿದ್ದು 2016ರಲ್ಲಿ ರಿಯೊ ಡಿ ಜನೈರೊದಲ್ಲಿ. ಆಗ ಆಕೆಗೆ ಕೇವಲ 21 ವರ್ಷ. 5 ವರ್ಷಗಳ ಹಿಂದೆ 48 ಕೆ ಜಿ ವಿಭಾಗದ ವೇಟ್ ಲಿಫ್ಟಿಂಗ್ ನಲ್ಲಿ ಪರಾಜಯಗೊಂಡಿದ್ದರು.

ಕ್ಲೀನ್ ಮತ್ತು ಜರ್ಕ್ ಸುತ್ತಿನಲ್ಲಿ 2016ರಲ್ಲಿ ತನ್ನ ಮೊದಲ ಪ್ರಯತ್ನದಲ್ಲಿ 104 ಕೆಜಿ ಎತ್ತುವಲ್ಲಿ ವಿಫಲವಾದ ನಂತರ, 106 ಕೆಜಿ ತೆಗೆದುಕೊಳ್ಳುವ ಪ್ರಯತ್ನದಲ್ಲಿ ಸಹ ಎರಡನೇ ಬಾರಿ ವಿಫಲರಾಗಿದ್ದರು. ಹೀಗಾಗಿ 12 ಮಂದಿಯಲ್ಲಿ ಕೇವಲ ಎರಡು ಮಂದಿ ಮಾತ್ರ ವೇಟ್ ಲಿಫ್ಟ್ ಮಾಡಿದ್ದರಿಂದ ಮೀರಾಬಾಯಿ ಅಂದು ಮುಗಿಸಲಿಲ್ಲ ಎಂಬ ಹಣೆಪಟ್ಟಿ (Did Not Finish-DNF) ಹೊತ್ತು ದೇಶಕ್ಕೆ ಮರಳಿದ್ದರು.

ಅಂದು ಮೀರಾಬಾಯಿ ಕಣ್ಣಲ್ಲಿ ದುಃಖದ ಕಣ್ಣೀರು ಧಾರಾಕಾರವಾಗಿ ಇಳಿದಿತ್ತು. ಆದರೆ ಹಠ, ಛಲ, ಕನಸನ್ನು ಬೆನ್ನತ್ತಿ ಹೋಗುವ ಮನಸ್ಸು ಮಾತ್ರ ಕಮರಿರಲಿಲ್ಲ. 2017ರಲ್ಲಿ 48 ಕೆಜಿ ವಿಭಾಗದಲ್ಲಿ ಚಿನ್ನದ ಪದಕ ಗಳಿಸಿ ವಿಶ್ವ ಚಾಂಪಿಯನ್ ಆದರು. ಅದು ಯುಎಸ್ ಎಯ ಅನಹೈಮ್ ನಲ್ಲಿ ನಡೆದಿದ್ದ ವಿಶ್ವ ವೇಟ್ ಲಿಫ್ಟಿಂಗ್ ಚಾಂಪಿಯನ್ ಷಿಪ್ ನಲ್ಲಿ.

ಅಲ್ಲಿಂದ ಅವರ ಗೆಲುವಿನ ಓಟ ಮುಂದುವರಿಯಿತು. 2018ರಲ್ಲಿ ಆಸ್ಟ್ರೇಲಿಯಾದ ಗೋಲ್ಡ್ ಕೋಸ್ಟ್ ನಲ್ಲಿ ನಡೆದ ಕಾಮನ್ ವೆಲ್ತ್ ಗೇಮ್ ನಲ್ಲಿ ಚಿನ್ನದ ಪದಕ ಗಳಿಸಿದರು. ಒಟ್ಟು 196 ಕೆಜಿ ತೂಕ ಎತ್ತಿ ಅಂದು ಚಿನ್ನದ ಪದಕ ಗೆದ್ದಿದ್ದರು.

ಬಾಲ್ಯ: ಮೀರಾಬಾಯಿ ಚಾನು ಹುಟ್ಟಿದ್ದು ಮಣಿಪುರದ ರಾಜಧಾನಿ ಇಂಫಾಲ್ ನಿಂದ 200 ಕಿಲೋ ಮೀಟರ್ ದೂರದಲ್ಲಿರುವ ನಾಂಗ್ಪೋಕ್ ಕಾಚಿಂಗ್ ಎಂಬ ಒಂದು ಹಳ್ಳಿಯಲ್ಲಿ 1994ರ ಆಗಸ್ಟ್ 8ರಂದು.

12 ವರ್ಷದವಳಾಗಿದ್ದಾಗಲೇ ಮೀರಾಬಾಯಿಯ ಶಕ್ತಿ, ಸಾಮರ್ಥ್ಯವನ್ನು ಆಕೆಯ ಮನೆಯವರು ಗುರುತಿಸಿದ್ದರಂತೆ. ಮನೆಯ ಹತ್ತಿರ ಗುಡ್ಡ, ಬೆಟ್ಟಕ್ಕೆ ಸೌದೆ ತರಲು ಹೋದರೆ ಉರುವಲಿನ ದೊಡ್ಡ ಕಟ್ಟವನ್ನು ಆಕೆಯ ಹಿರಿಯ ಸೋದರರು ಹೊತ್ತುಕೊಂಡು ಬರಲು ಹೆಣಗಾಡುತ್ತಿದ್ದರೆ ಈ ಬಾಲಕಿ ಸುಲಭವಾಗಿ ತನ್ನ ತಲೆಯಲ್ಲಿ ಹೊತ್ತು ತರುತ್ತಿದ್ದಳಂತೆ.ಅಂದರೆ ಬೆಳೆಯುವ ಸಿರಿ ಮೊಳಕೆಯಲ್ಲಿ ಎಂಬಂತೆ ಆಗಲೇ ಭಾರ ಎತ್ತುವ ಶಕ್ತಿ, ಸಾಮರ್ಥ್ಯ ಆಕೆಗಿತ್ತು.

ಈಕೆಯಲ್ಲಿನ ಪ್ರತಿಭೆ ಗುರುತಿಸಿ ವೇಟ್ ಲಿಫ್ಟಿಂಗ್ ಗೆ ಸೇರಲು ಹೇಳಿದ್ದೇ ಸೋದರನಂತೆ. ಮನೆಯಿಂದ ಆಗಾಗ ಬೆಟ್ಟ ಹತ್ತಿ ಕಟ್ಟಿಗೆ ಕಡಿದು ಸಂಗ್ರಹಿಸಿ ದೊಡ್ಡ ಹೊರೆ ಹೊತ್ತುಕೊಂಡು ಬರುತ್ತಿದ್ದ ತಂಗಿ ಮೀರಾಳ ಪ್ರತಿಭೆಯನ್ನು ಸೋದರ ಗುರುತಿಸಿದ್ದನಂತೆ. ಮೀರಾರ ಮನೆಯಲ್ಲಿ ತಂದೆ, ಅಣ್ಣ ಎಲ್ಲರೂ ಕ್ರೀಡಾಪಟುಗಳು. ಫುಟ್ಬಾಲ್, ಸೆಪೆಕ್ ಟಕ್ರಾಗಳಲ್ಲಿ ಆಡುತ್ತಿದ್ದರು. ಹೀಗಾಗಿ ಮನೆಯವರೆಲ್ಲರ ಪ್ರೋತ್ಸಾಹ ಮೀರಾಗೆ ನೆರವಾಯಿತು. 

2004ರಲ್ಲಿ ಅಥೆನ್ಸ್ ನಲ್ಲಿ ನಡೆದ ಒಲಿಂಪಿಕ್ಸ್ ನಲ್ಲಿ ಕುಂಜರಾಣಿ ದೇವಿಯವರನ್ನು ನೋಡಿ ವೇಟ್ ಲಿಫ್ಟರ್ ಆಗುವ ಕನಸು ಈ ಪುಟ್ಟ ಬಾಲಕಿ ಮೀರಾಬಾಯಿಯಲ್ಲಿ ಮೂಡಿತಂತೆ.

ಕುಂಜರಾಣಿಯವರನ್ನೇ ಆದರ್ಶವಾಗಿಟ್ಟುಕೊಂಡು ತನ್ನ ಕ್ರೀಡಾಪಯಣವನ್ನು ಮುಂದುವರಿಸಿದ ಮೀರಾಬಾಯಿ 2016ರಲ್ಲಿ ಕುಂಜರಾಣಿಯ ರಾಷ್ಟ್ರೀಯ ದಾಖಲೆಯನ್ನು ಮುರಿದರು. ಇದೀಗ ಒಲಿಂಪಿಕ್ಸ್ ನಲ್ಲಿ ಬೆಳ್ಳಿ ಪದಕವನ್ನು ಮುಡಿಗೇರಿಸಿಕೊಂಡಿದ್ದಾರೆ. ದೇಶ ಅವರಿಂದ ಇನ್ನಷ್ಟು ಪದಕ, ಯಶಸ್ಸುಗಳನ್ನು ನಿರೀಕ್ಷಿಸುತ್ತದೆ.


Stay up to date on all the latest ವಿಶೇಷ news
Poll
Omicron

ಮಾಲ್‌ಗಳು/ಥಿಯೇಟರ್‌ಗಳಿಗೆ ಭೇಟಿ ನೀಡಲು ಎರಡು ಡೋಸ್ ಲಸಿಕೆಯನ್ನು ಕಡ್ಡಾಯಗೊಳಿಸಿರುವುದು ಸರಿಯೇ?


Result
ಹೌದು
ಇಲ್ಲ

Comments

Disclaimer : We respect your thoughts and views! But we need to be judicious while moderating your comments. All the comments will be moderated by the kannadaprabha.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

The views expressed in comments published on kannadaprabha.com are those of the comment writers alone. They do not represent the views or opinions of kannadaprabha.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. kannadaprabha.com reserves the right to take any or all comments down at any time.

flipboard facebook twitter whatsapp