ಕನ್ನಡ ನಾಡಿನ ಸಮಾಜಮುಖಿ ಸೆಲಬ್ರಿಟಿಗಳು: ಕರ್ತವ್ಯಕ್ಕೂ ಜೈ ಸೇವೆಗೂ ಸೈ

ಕನ್ನಡ ನಾಡು ಮತ್ತು ನುಡಿಯ ಏಳ್ಗೆಗೆ ಕಾರಣೀಭೂತರಾದ ಸಾಮಾಜಿಕ ನಾಯಕರು ಇಲ್ಲಿದ್ದಾರೆ. ಉನ್ನತ ಸರ್ಕಾರಿ ಹುದ್ದೆಗಳನ್ನು ಅಲಂಕರಿಸಿ ಕರ್ತವ್ಯ ಪಾಲನೆ ಜೊತೆಗೆ ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಂಡ ಇವರ ಬದುಕು ನಮಗೆ ಮಾದರಿ.

Published: 01st January 2022 05:54 PM  |   Last Updated: 01st January 2022 06:14 PM   |  A+A-


ಸಾಂದರ್ಭಿಕ ಚಿತ್ರ

Online Desk

ಲೇಖನ: ಜೀವನ್ಮುಖಿ ಸುರೇಶ್


ಪದ್ಮಶ್ರೀ ಮಾತಾ ಬಿ. ಮಂಜಮ್ಮ ಜೋಗತಿ

ಜನಪದ ಕಲಾವಿದೆ ಹಾಗೂ ಅಧ್ಯಕ್ಷರು, ಕರ್ನಾಟಕ ಜಾನಪದ ಅಕಾಡೆಮಿ

ಮಂಜಮ್ಮ ಜೋಗತಿ ಕರ್ನಾಟಕ ಕಂಡ ಅಪ್ರತಿಮ ರಂಗ ಕಲಾವಿದೆ, ಗಾಯಕಿ ಹಾಗೂ ನೃತ್ಯಗಾರ್ತಿಯಾದ ಮಂಜಮ್ಮ ಜೋಗತಿ ಸಮಾಜದ ಇನ್ನಿಲ್ಲದ ನಿಂದನೆ, ಕೊಂಕು ನೋಟಕ್ಕೆ ನೊಂದು ಇನ್ನೇನು ಜೀವನವೇ ಬೇಡವೆನ್ನುವ ಹತಾಶ ಸ್ಥಿತಿಗೆ ತಲುಪಿದ ಈ ಕಲಾವಿದೆ ಬದುಕಿನಲ್ಲಿ ಪುಟಿದೆದ್ದ ಕಥನವೇ ದೊಡ್ಡ ಮಾದರಿ. 2019ರಲ್ಲಿ ಕರ್ನಾಟಕ ಜಾನಪದ ಅಕಾಡೆಮಿಯ ಅಧ್ಯಕ್ಷರಾಗುವ ಮೂಲಕ  ಮೊದಲ ಟ್ರಾನ್ಸ್ ವುಮನ್ ಆಗಿ ಇತಿಹಾಸ ಸೃಷ್ಟಿಸಿದ್ದಾರೆ.

ಕೆಸರಿನ ಕಮಲವೊಂದು ತನ್ನ ಸಾಧನೆಯೊಂದರಿಂದಲೇ ರಾಷ್ಟçದ ಅತ್ಯಂತ ಗೌರವದ ಪದ್ಮಶ್ರೀ ಪ್ರಶಸ್ತಿಗೆ ಪಾತ್ರವಾದ ಪರಿ ನಿಬ್ಬೆರಗಾಗುವಂತದ್ದು. ಅಪಾರ ಬಡತನದಲ್ಲಿ ಬೆಳೆದ ಇವರು 10ನೇ ತರಗತಿವರೆಗೆ ವಿದ್ಯಾಭ್ಯಾಸ ಪಡೆದು, ಜೋಗತಿ ಕಲಾವಿದೆಯಾಗಿ ನೀಡಿದ ನೃತ್ಯ ಪ್ರದರ್ಶನಗಳು ಜನ ಮೆಚ್ಚುಗೆಗೆ ಪಾತ್ರವಾಗಿವೆ.  ದೂರದರ್ಶನ, ಆಕಾಶವಾಣಿಯಲ್ಲಿ ಇವರು ನೀಡಿದ ಕಾರ್ಯಕ್ರಮಗಳು ಜನಪ್ರಿಯಗೊಂಡಿವೆ.


ನಾಡೋಜ ಡಾ. ಬರಗೂರು ರಾಮಚಂದ್ರಪ್ಪ

ಸಾಹಿತಿ, ಚಿಂತಕ

ಕನ್ನಡದ ಅಪ್ಪಟ ಬಹುಮುಖಿ ಅದ್ವಿತೀಯ ಸಾಧಕ ಸಾಹಿತಿ. ಜನನ 1946 ಅಕ್ಟೋಬರ್ 18 ರಂದು. ತುಮಕೂರು ಜಿಲ್ಲೆಯ ಸಿರಾ ತಾಲ್ಲೂಕಿನ ಬರಗೂರೇ ತವರು ನೆಲ. ತಾಯಿ ಕೆಂಚಮ್ಮ, ತಂದೆ ರಂಗದಾಸಪ್ಪ. ಶಾಲಾ - ಕಾಲೇಜು ದಿನಗಳಿಂದಲೇ ತಮ್ಮ ಪ್ರತಿಭೆಯ ಅಸ್ಮಿತೆಯ ಸಾರಿದ ಬಂಡಾಯ ಮನೋಧರ್ಮದ ಚಿಂತನಾಶೀಲ ವ್ಯಕ್ತಿತ್ವ. ಬೆಂಗಳೂರು ವಿಶ್ವವಿದ್ಯಾಲಯದ ಕನ್ನಡ ವಿಭಾಗದಲ್ಲಿ ಅಧ್ಯಾಪನ ವೃತ್ತಿಯನ್ನು ನಿಷ್ಠೆ ಮತ್ತು ಬದ್ಧತೆಯಿಂದ ನಿರ್ವಹಿಸಿದ ಶಿಷ್ಯಾನುರಾಗಿ 'ಕನ್ನಡದ ಮೇಷ್ಟ್ರು'. ಕನ್ನಡ ಅಧ್ಯಯನ ಕೇಂದ್ರದ ನಿರ್ದೇಶಕರಾಗಿ, ಮುಂದೆ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಮತ್ತು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷರಾಗಿ ಬರಗೂರರು ಮಾಡಿದ ರಚನಾತ್ಮಕ ಕಾರ್ಯಗಳು 'ಕನ್ನಡ ಕಟ್ಟುವಿಕೆ'ಯ ಕಾಯಕದಲ್ಲಿ ಮೈಲುಗಲ್ಲುಗಳು. 

ಕನ್ನಡ ಮಣ್ಣಿನ ದಟ್ಟವಾದ ವಾಸನೆಯಿರುವ ಮರಕುಟಿಗ, ನೆತ್ತರಲ್ಲಿ‌ ನೆಂದ ಹೂವು,  ಗುಲಾಮ ಗೀತೆ, ಸುಂಟರಗಾಳಿ, ಒಂದು ಊರಿನ ಕಥೆ, ಬಯಲಾಟದ ಭೀಮಣ್ಣ, ಕಪ್ಪು ನೆಪದ ಕೆಂಪು ಕಾಲು, ಸೂತ್ರ, ಸೀಳು ನೆಲ, ಬೆಂಕಿ, ಸೂರ್ಯ, ಕನ್ನಡಾಭಿಮಾನ, ಸಂಸ್ಕೃತಿ : ಶ್ರಮ ಮತ್ತು ಸೃಜನಶೀಲತೆ, ಕನ್ನಡ ಪ್ರಜ್ಞೆ, ಪರಂಪರೆಯೊಂದಿಗೆ ಪಿಸುಮಾತು ಇತ್ಯಾದಿ ಕೃತಿಗಳು ಬರಗೂರರ ಸೃಜನಶೀಲ ಪ್ರತಿಭೆಯ ಹೆಗ್ಗುರುತುಗಳು. ಬಂಡಾಯ ಸಾಹಿತ್ಯ ಸಂಘಟನೆ ಮತ್ತು ಚಳವಳಿಯ ನೇತಾರರಾಗಿ ವರ್ತಮಾನದ ತಲ್ಲಣಗಳಿಗೆ ಮತ್ತು ತಳಸಮುದಾಯದ ನೋವುಗಳಿಗೆ ಸದಾಕಾಲವೂ ಸ್ಪಂದಿಸುವ 'ತಾಯ್ತನ'ದ ಗುಣವಿರುವ ನೆಲಮುಖಿ. 


ಬಿ. ಕೃಷ್ಣಪ್ಪ

ಜನಪರ ಚಿಂತನೆ ಮತ್ತು ಸಮಾಜ ಸೇವಾ ಮನೋಭಾವದ ಜೊತೆಗೆ ಸಹಕಾರ ತತ್ತ್ವದ ಸಜ್ಜನಿಕೆಯ ವ್ಯಕ್ತಿತ್ವ ರೂಢಿಸಿಕೊಂಡ ಇವರು ಹುಟ್ಟಿದ್ದು 1963 ರಲ್ಲಿ. ಮಂಡ್ಯ ಜಿಲ್ಲೆಯ ಮದ್ದೂರಿನ ಬೊಮ್ಮನಹಳ್ಳಿ ಹುಟ್ಟೂರು. ಕೃಷಿಕ ಕುಟುಂಬದ ತಾಯಿ ಚನ್ನಮ್ಮ, ತಂದೆ ಕರೀಗೌಡ ಇವರ ಹೆತ್ತವರು. ಬೆಂಗಳೂರು ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ(ಬಿಐಟಿ)ಯಲ್ಲಿ ಬಿ.ಇ. ಸಿವಿಲ್ ಪದವೀಧರರು. ಉದ್ಯಮಶೀಲತೆಯ ಗುಣವಿದ್ದ ಇವರು ಮೊದಲಿಗೆ  ತೊಡಗಿದ್ದು ಲೇಔಟ್ ನಿರ್ಮಾಣ ಕ್ಷೇತ್ರದಲ್ಲಿ. ಆದರೆ, ಇಲ್ಲಿನ ಲಂಚಗುಳಿತನವ ಕಂಡು ಬೇಸತ್ತು ತಾವೇ ಹೊಸ ಉದ್ಯಮ ಆರಂಭಿಸುತ್ತಾರೆ. 

ತಮ್ಮ ತಾಯಿಯಿಂದ ಜನ್ಮಗತವಾಗಿ ಬಂದ ನ್ಯಾಯ, ನೀತಿ, ಸತ್ಯ, ಮಾನವತೆ, ಸಮತೆಯ ಮೌಲ್ಯಗಳು ಇವರ ಬದುಕಿನಲ್ಲಿ ಹಾಸುಹೊಕ್ಕಿದ್ದ ಕಾರಣ ಶ್ರಮದ ಪಥದಲ್ಲಿ ಸಾಗುತ್ತಾರೆ. ಪ್ಯಾರಾಮೌಂಟ್ ನ್ಯೂಟ್ರಿಷನ್ ಇಂಡಿಯಾ ಪ್ರವೈಟ್ ಲಿಮಿಟೆಡ್ ಸ್ಥಾಪಿಸಿ 'ಬಿಸ್ಕತ್ತು' ತಯಾರಿಕೆಯಲ್ಲಿ ತೊಡಗುತ್ತಾರೆ. ಕೃಷ್ಣಪ್ಪ ಅವರಲ್ಲಿನ 'ಸಮಾಜವಾದಿ'ಯನ್ನು ಪರಿಚಯಿಸುತ್ತದೆ. ತಮ್ಮ ಪ್ಯಾರಾಮೌಂಟ್ ಅಸೋಸಿಯೇಟ್ಸ್ ವತಿಯಿಂದ ಬ್ರಿಟಾನಿಯ ಕಂಪನಿಯ  ಉಸ್ತುವಾರಿ ಮತ್ತು ಆಡಳಿತ ಕಾರ್ಯನಿರ್ವಹಣೆಯ ಜವಾಬ್ದಾರಿ ಹೊತ್ತು, ಅಲ್ಲಿ ಸುಮಾರು 2000 ಮಂದಿಗೆ ಉದ್ಯೋಗದಾತರಾಗಿದ್ದಾರೆ 


ಡಾ. ಬಿ.ಆರ್. ರವಿಕಾಂತೇಗೌಡ

ಬೆಂಗಳೂರು ನಗರ ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ

ನಮ್ಮ ನಾಡಿನ ಹಿರಿಯ ದಕ್ಷ ಮತ್ತು ಕ್ರಿಯಾಶೀಲ ಪೊಲೀಸ್ ಅಧಿಕಾರಿ ಡಾ.ಬಿ.ಆರ್. ರವಿಕಾಂತೇಗೌಡ ಅವರು ಪ್ರಸ್ತುತ ಬೆಂಗಳೂರು ನಗರ ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತರಾಗಿ ಕರ್ತವ್ಯ ನಿರ್ವಹಿಸುತ್ತಿರುವ ಗೌಡರ ಹುಟ್ಟೂರು ಮದ್ದೂರು ತಾಲೂಕಿನ ಬೆಸಗರಹಳ್ಳಿ. ಮಂಡ್ಯ ನೆಲದ ಸೊಗಡಿನ ಪ್ರಸಿದ್ಧ ಕತೆಗಾರರಾದ ಡಾ. ಬೆಸಗರಹಳ್ಳಿ ರಾಮಣ್ಣ ಅವರ ಸುಪುತ್ರರು. ಬಿ.ಇ., ಎಂ.ಟೆಕ್. ಪದವೀಧರರು. ಕರ್ನಾಟಕ ಲೋಕಸೇವಾ ಆಯೋಗ ನಡೆಸುವ ಕೆ.ಎ.ಎಸ್. ಪರೀಕ್ಷೆಯನ್ನು 'ಕನ್ನಡ ಮಾಧ್ಯಮ'ದಲ್ಲಿ ಬರೆದು ಆರನೆಯ ರ್ಯಾಂಕ್ ಪಡೆದು, ಡಿವೈ.ಎಸ್.ಪಿ.ಯಾಗಿ ಆಯ್ಕೆಯಾದವರು ಎಂಬುದು ಗಮನಾರ್ಹ. 

ತಮ್ಮ ವೃತ್ತಿ ಬದ್ಧತೆ ಮತ್ತು ಶುದ್ಧತೆಗಾಗಿ ಗಮನಸೆಳೆದು, 2013 ರಲ್ಲಿ ಐ.ಪಿ.ಎಸ್. ಹುದ್ದೆಗೆ ಪದನ್ನೋತಿ ಹೊಂದಿದರು. ಬೆಂಗಳೂರು ನಗರ ಅಪರಾಧ ಕೇಂದ್ರ ವಿಭಾಗ, ಈಶಾನ್ಯ ಮತ್ತು ಕೇಂದ್ರ ವಿಭಾಗ, ಮೈಸೂರು ನಗರ, ಹುಬ್ಬಳ್ಳಿ-ಧಾರವಾಡ ಮಹಾನಗರ ಡಿಸಿಪಿಯಾಗಿ, ರಾಜ್ಯ ಗುಪ್ತವಾರ್ತೆ, ಬೆಳಗಾವಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯ ಎಸ್.ಪಿ.ಯಾಗಿ, ಅಗ್ನಿಶಾಮಕ ವಿಭಾಗದ ಡಿ.ಐ.ಜಿ.ಪಿ.ಯಾಗಿ, ಎಸ್.ಐ.ಟಿ. ಮುಖ್ಯಸ್ಥರಾಗಿ ಅಪಾರ ವೃತ್ತಿ ಅನುಭವ ಹೊಂದಿರುವ 'ಡೈನಮಿಕ್ ಪೊಲೀಸ್ ಅಧಿಕಾರಿ'. 'ಜನಸ್ನೇಹಿ ಆಡಳಿತ' ರವಿಕಾಂತೇಗೌಡ ಅವರ ಕಾರ್ಯ ವೈಖರಿಯ ಪರಿ. ಕರ್ನಾಟಕದ ಇತಿಹಾಸದಲ್ಲಿ ಆಂಗ್ಲಮಯವಾಗಿದ್ದ ಪೊಲೀಸ್ ಪೆರೇಡ್ ಆದೇಶಗಳನ್ನು 'ಕನ್ನಡೀಕರಣ'ಗೊಳಿಸಿದ ಅಗ್ಗಳಿಕೆ ಹೊಂದಿರುವ ಗೌಡರ 'ಕನ್ನಡ ಪ್ರೀತಿ' ಇಂದಿನ ಸರ್ಕಾರಿ ಅಧಿಕಾರಿಗಳು ಮತ್ತು ನೌಕರರಿಗೊಂದು ಮಾದರಿ.


ಡಾ. ನರಹಳ್ಳಿ ಬಾಲಸುಬ್ರಮಣ್ಯ

ಸಾಹಿತಿ

ಕನ್ನಡ ಸರಸ್ವತ ಲೋಕದ ಬಹುಮುಖ ಹಾಗೂ ಸಮತೂಕದ ಅಪ್ಪಟ, ಪ್ರತಿಭಾವಂತ ಬರಹಗಾರರೂ. 5 ಸೆಪ್ಟೆಂಬರ್ 1953ರಲ್ಲಿ ಜನನ. ಪಾಂಡವಪುರ ತಾಲ್ಲೂಕಿನ ನರಹಳ್ಳಿ ಹಟ್ಟೂರು. ತಂದೆ ಶ್ರೀ ಶಿವರಾಮಯ್ಯ, ತಾಯಿ ಶ್ರೀಮತಿ ರಾಜಲಕ್ಷ್ಮಮ್ಮ. ಕನ್ನಡ ಭಾಷಾ ವಿಷಯದಲ್ಲಿ ಬಿ.ಎ. ಹಾಗೂ ಎಂ.ಎ. ಪದವೀದರರು. ರ‍್ಯಾಂಕ್‌ನೊಂದಿಗೆ ಚಿನ್ನದ ಪದಕ ಪಡೆದು ಉತ್ತೀರ್ಣ. 1992ರಲ್ಲಿ ಬೆಂಗಳೂರು ವಿವಿಯಿಂದ ಪಿಎಚ್‌ಡಿ ಪದವಿ. ಬೆಂಗಳೂರಿನ ಶೇಷಾದ್ರಿಪುರಂ ಕಾಲೇಜಿನಲ್ಲಿ ಕನ್ನಡ ಪ್ರಾಧ್ಯಾಪಕ, ವಿಭಾಗದ ಮುಖ್ಯಸ್ಥ ಹಾಗೂ ಪ್ರಾಂಶುಪಾಲರಾಗಿ ಅಧ್ಯಯಪನ ಮತ್ತು ಆಡಳಿತ ಎರಡು ರಂಗಗಳಲ್ಲೂ ಅತ್ಯುತ್ತಮವಾಗಿ ಸೇವೆ ಸಲ್ಲಿಸಿದ ಹೆಗ್ಗಳಿಕೆ. 

ನಾಡಿನ ಅಗ್ರಗಣ್ಯ ಪ್ರಬುದ್ಧ ಚಿಂತನೆಯ ವಿಮರ್ಶಕರಾಗಿ ಅನುಸಂಧಾನ, ನವ್ಯತೆ, ಇಹದ ಪರಿಮಳದ ಹಾದಿ ಸಾಹಿತ್ಯ ಸಂಸ್ಕೃತಿ, ನೆಲಸಂಸ್ಕೃತಿ, ಕುವೆಂಪು ನಾಟಕಗಳ ಅಧ್ಯಯನ, ಸಂಸ್ಕೃತಿ ಪಥ ಸೇರಿದಂತೆ 10 ವಿಮರ್ಶಾ ಕೃತಿಗಳು, ಅಂತರಂಗದ ಮೃದುಂಗ ಪ್ರಬಂಧ ಸಂಕಲನ, `ಕೆ.ಎಸ್.ನ: ನುಡಿಮಲ್ಲಿಗೆ’ ಸಂದರ್ಶನ, `ಶಬ್ದದೊಳಗಣ ನಿಶಬ್ಧ’ ಸೃಜನಶೀಲ ಮಾತುಕತೆ, ೩ ಅನುವಾದ ಹಾಗೂ 8 ಸಂಪಾದಿತ ಕೃತಿಗಳ ಮೂಲಕ ಕನ್ನಡ ಸಾಹಿತ್ಯ ಲೋಕವನ್ನು ಸಮೃದ್ಧಗೊಳಿಸಿದ್ದಾರೆ. ಶ್ರೇಷ್ಠ ಪ್ರಾಧ್ಯಾಪಕ ಹಾಗೂ ಗುಣಪಕ್ಷಪಾತಿ ವಿಮರ್ಶಕರಾಗಿರುವಂತೆ ಕ್ರಿಯಾಶೀಲ ಸಂಘಟಕರಾಗಿ ಸಾಂಸ್ಕೃತಿಕ ವಲಯದಲ್ಲಿ ಗಮನಾರ್ಹ ಕೆಲಸ ಮಾಡಿದ್ದಾರೆ. 


ಡಾ.ಎಸ್ .ಡಿ. ಶರಣಪ್ಪ, ಐ.ಪಿ.ಎಸ್.

ಉಪ ಪೊಲೀಸ್ ಆಯುಕ್ತರು ಪೂರ್ವ ವಿಭಾಗ, ಬೆಂಗಳೂರು

ಪ್ರಾಮಾಣಿಕ ಮತ್ತು ಕ್ರಿಯಾಶೀಲ ಪೊಲೀಸ್ ಅಧಿಕಾರಿಯಾಗಿ ಅತ್ಯುತ್ತಮ ರೀತಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಇವರದ್ದು ಗುಲ್ಬರ್ಗಾ ಜಿಲ್ಲೆಯ ಆಳಂದ ತಾಲ್ಲೂಕಿನ 'ಖಜೂರಿ' ಹುಟ್ಟೂರು. 22 ಜುಲೈ 1982ರಲ್ಲಿ ಜನನ. ತಂದೆ ಶ್ರೀ ಶಿವಾನಂದ ಢಾಗೆ, ತಾಯಿ ಶ್ರೀಮತಿ ಶ್ರೀದೇವಿ. ನವೋದಯ ಶಾಲೆಯಲ್ಲಿ ವ್ಯಾಸಂಗ ಮಾಡುವಾಗಲೇ ಪ್ರತಿಭಾವಂತ ವಿದ್ಯಾರ್ಥಿ. ಕೃಷಿ ವಿಜ್ಞಾನದಲ್ಲಿ ಬಿ.ಎಸ್ಸಿ. ಪದವಿಯನ್ನು ಏಳು ಚಿನ್ನದ ಪದಕ ಹಾಗೂ ಎಂ.ಎಸ್. ಪದವಿಯನ್ನು ಎರಡು ಚಿನ್ನದ ಪದಕಗಳೊಂದಿಗೆ ಪಡೆದ ಪ್ರತಿಭಾವಂತಿಕೆ ಇವರದು. ಬಹುರಾಷ್ಟ್ರೀಯ ಕಂಪನಿಗಳ ಕಡೆಯಿಂದ ಸುಮಾರು 40 ವೈವಿಧ್ಯಮಯ ಉದ್ಯೋಗಗಳ ಅವಕಾಶ ಹುಡುಕಿ ಬಂದಿದ್ದವು. ಆದರೆ, ಡಾ.ಶರಣಪ್ಫ ಈ ಎಲ್ಲಾ ಅವಕಾಶಗಳನ್ನು ವಿನಯ ಪೂರ್ವಕವಾಗಿ ನಿರಾಕರಿಸಿದರು. 

ಕರ್ನಾಟಕ ಕೇಡರಿನ ಐಪಿಎಸ್ ಅಧಿಕಾರಿಯಾಗಿ ನೇಮಕಗೊಂಡು ದಕ್ಷಿಣ ಕನ್ನಡ, ತುಮಕೂರು, ಶಿವಮೊಗ್ಗ, ಗದಗ ಜಿಲ್ಲೆಗಳಲ್ಲಿ ಎಎಸ್ಪಿ ಹಾಗೂ ಎಸ್ಪಿಯಾಗಿ ಸಮರ್ಥವಾಗಿ ಕರ್ತವ್ಯ ನಿರ್ವಹಿಸಿದ್ದಾರೆ. ಪೊಲೀಸ್ ಇಲಾಖೆ ಸೇರಿದ ಕೇವಲ ನಾಲ್ಕು ವರ್ಷಗಳ ಕಡಿಮೆ ಅವಧಿಯಲ್ಲಿಯೇ ತಮ್ಮ ಗುಣಾತ್ಮಕ ಮತ್ತು ಜನಪರ ಆ--ಡಳಿತ ಸೇವೆಗಾಗಿ 2013ರಲ್ಲಿ ಮುಖ್ಯಮಂತ್ರಿಗಳ ಚಿನ್ನದ ಪದಕ ಪುರಸ್ಕೃತರಾಗಿದ್ದಾರೆ. 


ಎಲ್.ಎನ್. ಮುಕುಂದರಾಜ್  

ಸಾಹಿತಿ

ಎಲ್.ಎನ್. ಮುಕುಂದರಾಜ್ ಕನ್ನಡದ ಪ್ರಸಿದ್ಧ ಲೇಖಕರು. ಸಾಹಿತ್ಯ, ಸಂಸ್ಕೃತಿ ಹಾಗೂ ಶೈಕ್ಷಣಿಕ ಕ್ಷೇತ್ರಗಳಲ್ಲಿ ಕ್ರಿಯಾಶೀಲರಾಗಿದ್ದಾರೆ. ತುಮಕೂರು ಜಿಲ್ಲೆ ನಾಗವಲ್ಲಿ ಬಳಿಯ ಲಕ್ಕೇನಹಳ್ಳಿ ಇವರ ಹುಟ್ಟೂರು. ಹೆಬ್ಬೂರು, ಗುಬ್ಬಿ, ತುರುವೇಕೆರೆ ಹಾಗೂ ತುಮಕೂರುಗಳಲ್ಲಿ ವಿದ್ಯಾಭ್ಯಾಸ. 1984ರಲ್ಲಿ ಬೆಂಗಳೂರು ವಿವಿಯಿಂದ ಕನ್ನಡ ತೌಲನಿಕ ಸಾಹಿತ್ಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದು ರಾಜ್ಯದ ಹಲವು ಸರ್ಕಾರಿ ಪದವಿಪೂರ್ವ ಕಾಲೇಜುಗಳಲ್ಲಿ ಕನ್ನಡ ಉಪನ್ಯಾಸಕರಾಗಿ, ಪ್ರಾಂಶುಪಾಲರಾಗಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದಾರೆ.

ಮುಕುಂದರಾಜ್ ದೇಶಕೋಶ ದಾಸವಾಳ, ನಿರಂಕುಶ, ವಿಲೋಮ ಚರಿತೆ, ಉಪ್ಪೇರಿದ ದರ್ಪಣ ಎಂಬ ಕವನ ಸಂಕಲನಗಳನ್ನು; ವೈಶಂಪಾಯನ ತೀರ, ಇಗೋಪಂಜರ ಅಗೋಮುಗಿಲು, ದೇವರ ಆಟ, ಮುಳ್ಳಿನ ಕಿರೀಟ, ಕೆಂಪೇಗೌಡ ಕಥಾನಕ, ನೀಲವೇಣಿ, ಒಕ್ಕಲು ಮುದ್ದಯ್ಯ, ಸಂಗ್ರಾಮ ಭಾರತ ಮತ್ತಿತರ ನಾಟಕಗಳನ್ನು ರಚಿಸಿದ್ದಾರೆ. ನಮ್ಮದಾರಿಯ ನೆರಳು, ಟಿ.ಆರ್.ಶಾಮಣ್ಣ, ಕೆ.ಎಚ್.ರಂಗನಾಥ್, ಪುಟಬಂಗಾರ (ಎಸ್. ಬಂಗಾರಪ್ಪ ಬದುಕಿನ ಪುಟಗಳು), ಕಿ.ರಂ. ನಾಗರಾಜ ಜೀವನ ಚರಿತ್ರೆಗಳು. ವಿಯತ್ತಳ ವಿಹಾರಿ, ಬಸವನೆ ಮಾಮರ ಇವರ ಗದ್ಯಕೃತಿಗಳು. ನಾಥರಿದ್ದೂ ಅನಾಥೆ, ಜೀರೋ ಪಾಯಿಂಟ್ ಅನುವಾದಗಳು. 


ಡಾ. ಅಪ್ಪಗೆರೆ ತಿಮ್ಮರಾಜು

ಪ್ರಸಿದ್ಧ ಜನಪದ ಗಾಯಕರು

ಈ ನಾಡು ಕಂಡ ನೆಲಮೂಲ ಗಾಯಕರ ಅಗ್ರ ಸಾಲಿನಲ್ಲಿ ಗುರುತಿಸಿಕೊಂಡ ಹೆಸರು ಡಾ. ಅಪ್ಪಗೆರೆ ತಿಮ್ಮರಾಜು. ರಾಮನಗರ ಜಿಲ್ಲೆಯ ಅಪ್ಪಗೆರೆ ಗ್ರಾಮದಲ್ಲಿ ಜನಿಸಿದ ಈ ಗ್ರಾಮೀಣ ಪ್ರತಿಭೆ ಸ್ವಪ್ರಯತ್ನದಿಂದ ಬೆಳೆದು, ಓದಿ, ಹಾಡಿ, ಅಂತರಾಷ್ಟ್ರೀಯ ಮಟ್ಟದ ಜನಪದ ಗಾಯಕರಾಗಿ ರೂಪುಗೊಂಡ ಪರಿ ನಿಬ್ಬೆರಗಾಗುವಂತದ್ದು. 1970ರಿಂದ ಜನಪದ ಗೀತೆ ಹಾಡಲು ಆರಂಭಿಸಿದ ಇವರು ಮೊದಮೊದಲು ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಹಾಡಿ ಗಮನ ಸೆಳೆದು ಇವರ ಗ್ರಾಮೀಣ ಸೊಗಡಿನ ಧ್ವನಿ ಮುಂದಿನ ದಿನಗಳಲ್ಲಿ ಇವರನ್ನು ಆಕಾಶವಾಣಿ ಮತ್ತು ದೂರದರ್ಶನಗಳಲ್ಲಿ ಜನಪ್ರಿಯ ಹಾಡುಗಳು ಹಾಡುಗಾರರನ್ನಾಗಿಸಿತು. ರಾಜ್ಯ ರಾಷ್ಟ್ರಮಟ್ಟದ ಕಾರ್ಯಕ್ರಮಗಳಲ್ಲಿ ಹಾಡಿ ಹತ್ತಾರು ಪ್ರಶಸ್ತಿ-ಪುರಸ್ಕಾರಗಳನ್ನು ಪಡೆದಿದ್ದಾರೆ.  

ಪ್ರವೃತ್ತಿಯ ನಡುವೆಯೇ ಓದಿಗೂ ಗಮನ ನೀಡಿದ ಅಪ್ಪಗೆರೆಯವರು ಎಂಎ, ಎಂ.ಇಡಿ, ಪಿ.ಹೆಚ್ಡಿ, ಡಿ.ಲಿಟ್, ಜನಪದ ಡಿಪ್ಲೊಮಾ ಸೇರಿದಂತೆ ನಾನಾ ಪದವಿಗಳನ್ನು ಮುಡಿಗೇರಿಸಿಕೊಂಡರು. ಉತ್ತಮ ಶಿಕ್ಷಕರೂ ಆದ ಇವರು 1998ರಲ್ಲಿ ರಾಜ್ಯ ಉತ್ತಮ ಶಿಕ್ಷಕ ಪ್ರಶಸ್ತಿಯನ್ನು ಪಡೆದರು.ಅವ್ವನ ಹಾಡು, ಚೆಲ್ಲಿದರು ಮಲ್ಲಿಗೆಯ ಸೇರಿದಂತೆ ಹತ್ತಾರು ಕೃತಿಗಳನ್ನು ಬರೆದು ಪ್ರಕಟಿಸಿದರು. ಜನಪದ ಮಲ್ಲಿಗೆ, ಕನಕ ಗೀತೆಗಳು, ತಿಂಗಾಳು ಮುಳುಗಿದವೋ ಸೇರಿದಂತೆ ಹತ್ತಕ್ಕೂ ಹೆಚ್ಚು ಧ್ವನಿ ಸುರಳಿಗಳು ಇವರಿಗೆ ಖ್ಯಾತಿ ತಂದುಕೊಟ್ಟಿವೆ. ಎರಡು ಬಾರಿ ಕರ್ನಾಟಕ ಜನಪದ ಮತ್ತು ಯಕ್ಷಗಾನ ಅಕಾಡೆಮಿ ಸದಸ್ಯರಾಗಿ, ಹಂಪಿ ಕನ್ನಡ ವಿವಿ, ಜಾನಪದ ವಿವಿ ಸಿಂಡಿಕೇಟ್ ಸದಸ್ಯರಾಗಿ ಸೇವೆ ಸಲ್ಲಿಸಿದ್ದಾರೆ.  


ಹೆಚ್. ಆರ್ .ಸುಜಾತಾ

ಸಾಹಿತಿ

ಹಾಸನ ಜಿಲ್ಲೆ ,ಆಲೂರು ತಾಲ್ಲೂಕು,  ಮರಸು ಹೊಸಳ್ಳಿ ಇವರ ಹುಟ್ಟೂರು . ತಂದೆ ರಂಗಪ್ಪ, ತಾಯಿ ರಂಗಮ್ಮ, ಕಾಲೇಜು ದಿನಗಳಲ್ಲಿಯೇ ಇವರ ಸಣ್ಣ ಕತೆಗಳು ಪತ್ರಿಕೆಗಳಲ್ಲಿ ಪ್ರಕಟವಾಗಿ ಸಾಹಿತ್ಯ ಲೋಕಕ್ಕೆ ಪಾದಾರ್ಪಣೆ. ಇಪ್ಪತ್ತು ವರ್ಷಗಳ ದೀರ್ಘ ವಿರಾಮದ ನಂತರ  ಮರಳಿ ಸಾಹಿತ್ಯ ಕ್ಷೇತ್ರಕ್ಕೆ ಪ್ರವೇಶ .ಅಂಕಣ ಬರವಣಿಗೆ . ಇವರ ಗ್ರಾಮೀಣ ಬದುಕಿನ ಅನುಭವ ಲೇಖನಗಳ ಸಂಗ್ರಹದ ಪ್ರಥಮ ಕೃತಿ 'ನೀಲಿ ಮೂಗಿನ ನತ್ತು' ಪುಸ್ತಕಕ್ಕೆ 2017  ರಲ್ಲಿ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಹಾಗೂ 'ಅಮ್ಮ' ಸಾಹಿತ್ಯ ಪ್ರಶಸ್ತಿಗಳು ಸಂದಿವೆ ." ಅಕ್ಕ " ಪ್ರಶಸ್ತಿಯೂ ಲಭಿಸಿದೆ. 

'ನೀಲಿ ಮೂಗಿನ ನತ್ತು' ಕೃತಿಯ ಆಯ್ದ ಭಾಗಗಳು ಮಂಗಳೂರು ಮತ್ತು ಕುವೆಂಪು ವಿಶ್ವವಿದ್ಯಾಲಯಗಳ ಪದವಿ ತರಗತಿಯ ಪಠ್ಯವಾಗಿ ಪ್ರಕಟವಾಗಿವೆ. ಈ ವರ್ಷ ಬೆಂಗಳೂರು ಹಾಗೂ ಮೈಸೂರು ವಿಶ್ವವಿದ್ಯಾಲಯವೂ ಪಠ್ಯವಾಗಿ ತೆಗೆದುಕೊಂಡಿವೆ. ಕುವೆಂಪುರವರ ' ಶ್ರೀ ರಾಮಾಯಣ ದರ್ಶನಮ್ ' ವಾಚಕಾಭಿನಯವನ್ನು 50 ಕ್ಕೂ ಹೆಚ್ಚು ಕಾಲೇಜಿನಲ್ಲಿ ಇವರು ವಿದ್ಯಾರ್ಥಿಗಳಿಗಾಗಿ ಮಾಡಿದ್ದಾರೆ.


ಪ್ರೊ. ಹಿ.ಚಿ. ಬೋರಲಿಂಗಯ್ಯ

ವಿಶ್ರಾಂತ ಕುಲಪತಿ

ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಕುಲಪತಿಯಾಗಿ, ಕುಲಸಚಿವರಾಗಿ, ಲಲಿತಕಲಾ ನಿಕಾಯ ಮತ್ತು ಸಮಾಜ ವಿಜ್ಞಾನ ನಿಕಾಯಗಳ ಡೀನ್ ಆಗಿ, ಪ್ರಸಾರಾಂಗ ಮತ್ತು ಅಧ್ಯಯನಾಂಗಗಳ ನಿರ್ದೇಶಕರಾಗಿ ಅಪಾರವಾದ ಆಡಳಿತಾತ್ಮಕ ಅನುಭವವಿರುವ ಬೋರಲಿಂಗಯ್ಯ ಅವರು ಇಟಲಿ, ಫ್ರಾನ್ಸ್, ಹಾಲೆಂಡ್ ಮತ್ತು ಇರಾನ್‌ನ ರಾಜಧಾನಿ ಟೆಹರಾನ್‌ನಲ್ಲಿ ನಡೆದ ಅಂತರರಾಷ್ಟ್ರೀಯ ಗೊಂಬೆಯಾಟ ಉತ್ಸವದಲ್ಲಿ ಭಾರತದ ಪ್ರತಿನಿಧಿಯಾಗಿ (1991 ಮತ್ತು 1992) ಭಾಗವಹಿಸಿದ್ದಾರೆ. ಜರ್ಮನಿಯ ವೂಜ್‌ಬರ್ಗ್ ವಿಶ್ವವಿದ್ಯಾಲಯದ ಸಂದರ್ಶಕ ಪ್ರಾಧ್ಯಾಪಕರಾಗಿಯೂ ಆಹ್ವಾನಿತರಾಗಿದ್ದ ಇವರ ಶೈಕ್ಷಣಿಕ ಸಾಧನೆ ಉನ್ನತ ಮಟ್ಟದ್ದಾಗಿದೆ. 

ಡಾ. ಹಿ.ಚಿ. ಬೋರಲಿಂಗಯ್ಯ ಇವರು 1955ರಲ್ಲಿ ತುಮಕೂರು ಜಿಲ್ಲೆ ಕುಣಿಗಲ್ ತಾಲ್ಲೂಕಿನ ಹಿತ್ತಲಪುರ ಗ್ರಾಮದಲ್ಲಿ ಜನಿಸಿದರು. ತಂದೆ ಚಿಕ್ಕಣ್ಣ, ತಾಯಿ ಕಾಳಮ್ಮ. ಬೆಂಗಳೂರು ವಿಶ್ವವಿದ್ಯಾಲಯದಿಂದ ಜಿ.ಪಿ. ರಾಜರತ್ನಂ ಚಿನ್ನದ ಪದಕದೊಂದಿಗೆ ಕನ್ನಡ ಎಂ.ಎ. ಪದವಿ, ಕನ್ನಡ ವಿಶ್ವವಿದ್ಯಾಲಯದ ಸಮಾಜ ವಿಜ್ಞಾನಗಳ ನಿಕಾಯದಿಂದ ಡಾ. ಚಂದ್ರಶೇಖರ ಕಂಬಾರ ಅವರ ಮಾರ್ಗದರ್ಶನದಲ್ಲಿ ಪಿಎಚ್.ಡಿ. ಪದವಿಯನ್ನು ಪಡೆದಿದ್ದಾರೆ.


ಪಿ. ಶಿವರಾಜ್ 

ಕೆಎಎಸ್ ಅಧಿಕಾರಿ

ಸರ್ಕಾರಿ ಅಧಿಕಾರಿಗಳು ಜನಪರವಾಗಿ ಕೆಲಸ ಮಾಡುವುದೇ ವಿರಳವಾಗುತ್ತಿರುವ ದಿನಮಾನದಲ್ಲಿ ಸದಾ ಜನಮುಖಿಯಾಗಿ ಕೆಲಸ ಮಾಡಲು ಹಂಬಲಿಸುವವರು ಕೆ.ಎ.ಎಸ್. ಹಿರಿಯ ಶ್ರೇಣಿ ಅಧಿಕಾರಿಯಾಗಿರುವ ಶ್ರೀಯುತ ಪಿ. ಶಿವರಾಜ್ ಅವರು ಎಂಬುದು ವಿಶೇಷ. ಪ್ರಸ್ತುತ ಮೈಸೂರು ಕಂದಾಯ ವಿಭಾಗದ ಹೆಚ್ಚುವರಿ ಆಯುಕ್ತರಾಗಿ ಸಾರ್ವಜನಿಕ ಸ್ನೇಹಿಯಾಗಿ ಕೆಲಸ ಮಾಡುತ್ತಿರುವ ಇವರು ಮಂಡ್ಯ ಜಿಲ್ಲೆಯ ಮಳವಳ್ಳಿ ತಾಲ್ಲೂಕಿನ ಪೂರಿಗಾಲಿಯವರು.

ಶ್ರೀ ಪ್ರಕಾಶ್ ಮತ್ತು ಶ್ರೀಮತಿ ಚಂದ್ರಕಲಾ ದಂಪತಿಗಳ ಸುಪುತ್ರರಾಗಿರುವ ಇವರ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ನಡೆದದ್ದು ಸರ್ಕಾರಿ ಶಾಲೆಯಲ್ಲಿ ಎಂಬುದು ಗಮನಾರ್ಹ. ಕೆ.ಎಂ.ದೊಡ್ಡಿಯ ಭಾರತೀ ಕಾಲೇಜಿನಲ್ಲಿ ಪಿಯುಸಿ, ಮುಕ್ತ ವಿವಿಯಲ್ಲಿ ಬಿ.ಎ. ಮತ್ತು ಎಂ.ಎ. ಪದವಿ ವ್ಯಾಸಂಗ ಪೂರೈಸಿದ್ದಾರೆ. 2010ರಲ್ಲಿ ನಡೆದ ಕೆ.ಎ.ಎಸ್. ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಅಸಿಸ್ಟೆಂಟ್ ಕಮಿಷನರ್ ಆಗಿ ಆಯ್ಕೆಗೊಂಡರು. ಹಾವೇರಿ, ಸಕಲೇಶಪುರಗಳಲ್ಲಿ ಉಪ ವಿಭಾಗಧಿಕಾರಿಯಾಗಿ, ಬೆಂಗಳೂರು ಅಭಿವೃದ್ದಿ ಪ್ರಾಧಿಕಾರದ ಜಿಲ್ಲಾಧಿಕಾರಿಯಾಗಿ ಅತ್ಯಂತ ದಕ್ಷತೆ, ಪ್ರಾಮಾಣಿಕತೆ ಮತ್ತು ಕ್ರಿಯಾಶೀಲತೆಯಿಂದ ಜನಪರವಾಗಿ ಕೆಲಸ ಮಾಡಿದ್ದಾರೆ.


ಕೆ.ಪಿ. ಸತ್ಯನಾರಾಯಣ

ಪೊಲೀಸ್ ಅಧಿಕಾರಿ

ಚಿತ್ರದುರ್ಗ ಜಿಲ್ಲೆಯ ಹರಿಯಬ್ಬೆ ಗ್ರಾಮದ ಕೆ.ಪಿ. ಸತ್ಯನಾರಾಯಣ್ ಅವರು ಎಂ.ಎ. ಪದವಿಧರರು. 2003ರಲ್ಲಿ ಸಬ್‌ಇನ್ಸ್ಪೆಕ್ಟರ್ ಆಗಿ ಕರ್ನಾಟಕ ಪೊಲೀಸ್ ಸೇವೆಗೆ ಸೇರಿದ ಇವರು ಜಯನಗರ, ವೇಮಗಲ್, ಚಿಕ್ಕಬಳ್ಳಾಪುರ, ಬಿಡದಿಯಲ್ಲಿ ಸಾರ್ವಜನಿಕ ಸ್ನೇಹಿಯಾಗಿ ಕರ್ತವ್ಯ ನಿರ್ವಹಿಸಿದರು. 2010ರಲ್ಲಿ ಪೊಲೀಸ್ ಇನ್ಸ್ಪೆಕ್ಟರ್ ಆಗಿ ಬಡ್ತಿ ಪಡೆದು ಸಿಸಿಬಿ ಸೇರಿದಂತೆ ಬೆಂಗಳೂರು ನಗರ ಮತ್ತು ಗ್ರಾಮಾಂತರದಲ್ಲಿ ಪ್ರಾಮಾಣಿಕತೆಯಿಂದ ಕಾರ್ಯ ನಿರ್ವಹಿಸಿ ಜನಮನ್ನಣೆ ಪಡೆದರು.


ಕುಖ್ಯಾತ ಭೂಗತ ಪಾತಕಿಗಳನ್ನು ಮಟ್ಟ ಹಾಕಿದ, ಸೆಮಿ ಉಗ್ರರನ್ನು ಎಡೆ ಮುರಿ ಕಟ್ಟಿದ, ಬೆಂಗಳೂರು ಸರಣಿ ಬಾಂಬ್ ಸ್ಪೋಟದ ತನಿಖಾಧಿಕಾರಿಯಾಗಿ, ಗೌರಿ ಲಂಕೇಶ ಹತ್ಯೆ ಪ್ರಕರಣ ಬೇಧಿಸಲು ಶ್ರಮಿಸಿದ ಕೀರ್ತಿ ಇವರದು. ಕೊಲೆ, ಸುಲಿಗೆ, ಅತ್ಯಾಚಾರ, ಅಪಹರಣ ಸೇರಿದಂತೆ ಎಲ್ಲಾ ರೀತಿಯ ಅಪರಾಧ ಚಟುವಟಿಕೆಗಳನ್ನು ನಿಯಂತ್ರಿಸಿ ನಾಗರೀಕ ಸಮಾಜವು ಶಾಂತಿಯಿಂದ ಬದುಕು ನಡೆಸಲು ಕಾರಣರಾಗಿದ್ದಾರೆ. ಇವರಿಗೆ ಹಾಡುಗಾರಿಕೆ, ಪುಸ್ತಕ ಓದು, ಚಾರಣ, ಕ್ರಿಕೆಟ್ ಆಟದ ಬಗೆಗೆ ಅಪಾರ ಆಸಕ್ತಿ


ಡಾ. ಪಿ. ರಾಮಯ್ಯ

ಹಿರಿಯ ಪತ್ರಕರ್ತ, ರಾಜಕಾರಣಿ

ಅತ್ಯಂತ ಹಿರಿಯ ಹೆಸರಾಂತ ಪತ್ರಕರ್ತರಾದ ಪಿ. ರಾಮಯ್ಯ ಅವರು 1933ರಲ್ಲಿ ನಾಗಮಂಗಲದ ಬ್ಯಾಡರಹಳ್ಳಿಯಲ್ಲಿ ಜನಿಸಿದ್ದರು. ಬಿ.ಎಸ್ಸಿ ಪದವೀಧರರಾಗಿ ದೇಶದ ಪ್ರಗತಿಗೆ, ಪ್ರಜಾಪ್ರಭುತ್ವದ ಭದ್ರಬುನಾದಿಗೆ ಹಾಗೂ ಜನಜಾಗೃತಿಗೆ  ಪತ್ರಿಕಾರಂಗದ ಮೂಲಕ ಸಮಾಜಮುಖಿಯಾಗಿ ದುಡಿಯಬಹುದು ಎಂಬ ಬಲವಾದ ನಂಬಿಕೆಯಿಂದ ದೇಶದಲ್ಲಿಯೇ ಅಪಾರ ಹೆಸರುವಾಸಿಯಾಗಿ `ದಿ ಹಿಂದೂ’ ಆಂಗ್ಲ ಪತ್ರಿಕೆಯಲ್ಲಿ ವೃತ್ತಿ ಬದುಕು ಆರಂಭಿಸಿದರು. ಸುದೀರ್ಘ 45 ವರ್ಷಗಳ ಕಾಲ ವಿವಿಧ ಹುದ್ದೆಗಳನ್ನು ಅನುಭವ ಸಂಪನ್ನತೆಯಿಂದ ನಿರ್ವಹಿಸಿ ಡೆಪ್ಯುಟಿ ಎಡಿಟರ್ ಆಗಿ 1998ರಲ್ಲಿ ನಿವೃತ್ತರಾದರು. 

ಸಮಾಜದ ವಿವಿಧ ರಂಗಗಳ ಕುರಿತು ಖಚಿತವಾದ ವಿಶ್ಲೇಷಣೆ ಮಾಡುತ್ತಿದ್ದ ರೀತಿ ವೃತ್ತಿ ಬದ್ಧತೆಗೆ ಸಾಕ್ಷಿ. ಜೊತೆಗೆ ಅಭಿವೃದ್ಧಿ  ಪತ್ರಿಕೋದ್ಯಮಕ್ಕೆ ತಮ್ಮ ಬರಹಗಳ ಮೂಲಕ ಶಕ್ತಿ ತುಂಬಿದ್ದು ವಿಶೇಷ. ನಾಡಿನ ಸಣ್ಣ ಮತ್ತು ಮಧ್ಯಮ ವರ್ಗದ ಪತ್ರಿಕೆಗಳ ಬೆಳವಣಿಗೆಗೆ ಇವರು ಮಾಡಿದ ಶಿಫಾರಸ್ಸುಗಳಿಂದ ಪತ್ರಿಕಾರಂಭ ಬೇರುಗಳು ಗಟ್ಟಿಯಾಗಿವೆ. ಪತ್ರಿಕಾರಂಗದಲ್ಲಿ ಸಲ್ಲಿಸಿರುವ ಅಪಾರ ಸೇವಾಸಾಧನೆಯನ್ನು ಪರಿಗಣಿಸಿ 1998ರಲ್ಲಿ ಸರ್ಕಾರ ವಿಧಾನಪರಿಷತ್ ಸದಸ್ಯರಾಗಿ ನಾಮಕರಣ ಮಾಡಿದ ಸ್ಥಾನವನ್ನು ಸಕ್ರಿಯವಾಗಿ ನಿರ್ವಹಣೆ ಮಾಡಿದ ಮತ್ತು ದಕ್ಷಿಣ ಆಫ್ರಿಕಾದ ಕೇಪ್ ಟೌನ್‌ನಲ್ಲಿ ಕಾಮನ್‌ವೆಲ್ತ್ ದೇಶಗಳ ಪಾರ್ಲಿಮೆಂಟರಿ ಸಮ್ಮೇಳನದಲ್ಲಿ ಕರ್ನಾಟಕ ಪ್ರತಿನಿಧಿಸಿದ್ದ ಅಗ್ಗಳಿಕೆ ಬೆನ್ನಿಗಿದೆ.


ಡಾ. ಕರೀಗೌಡ ಬೀಚನಹಳ್ಳಿ

ಮಾಜಿ ಪ್ರಸಾರಾಂಗ ನಿರ್ದೇಶಕ

ಡಾ. ಕರೀಗೌಡ ಬೀಚನಹಳ್ಳಿ ಅವರು ತುಮಕೂರು ಜಿಲ್ಲೆ, ಕುಣಿಗಲ್ ತಾಲ್ಲೂಕು, ಬೀಚನಹಳ್ಳಿಯಲ್ಲಿ 1951ರಲ್ಲಿ ರೈತಾಪಿ ಕುಟುಂಬದಲ್ಲಿ ಜನಿಸಿದರು. ಬೆಂಗಳೂರು ವಿಶ್ವವಿದ್ಯಾಲಯದಿಂದ ಕನ್ನಡ ಸಾಹಿತ್ಯದಲ್ಲಿ ಬಿ.ಎ. (ಆರ್ಟ್ಸ್), ಎಂ.ಎ., ಪದವಿಗಳನ್ನು ಪಡೆದರು. ಕನ್ನಡ ನವ್ಯಕಥೆಗಳನ್ನು ಅಧ್ಯಯನ ಮಾಡಿ ಬರೆದ ಇವರ ‘‘ವ್ಯಷ್ಟಿ ಸಮಷ್ಟಿ’’ ಸಂಶೋಧನ ಗ್ರಂಥಕ್ಕೆ ಬೆಂಗಳೂರು ವಿಶ್ವವಿದ್ಯಾಲಯದಿಂದ ಪಿಎಚ್.ಡಿ. ಪದವಿಯನ್ನೂ ‘'ಕನ್ನಡ ಸಾಹಿತ್ಯ ಸಂಸ್ಕೃತಿ ಕಥನ’’ ಎಂಬ ವಿಮರ್ಶಾ ಗ್ರಂಥಕ್ಕೆ ತುಮಕೂರು ವಿಶ್ವವಿದ್ಯಾಲಯದಿಂದ ಡಿ.ಲಿಟ್., ಪದವಿಯನ್ನೂ ಪಡೆದಿದ್ದಾರೆ.

ಪ್ರೊ. ಕರೀಗೌಡ ಬೀಚನಹಳ್ಳಿ ಅವರು ಹಂಪಿ ಕನ್ನಡ ವಿಶ್ವವಿದ್ಯಾಲಯದಲ್ಲಿ ಪ್ರಾಧ್ಯಾಪಕರಾಗಿ, ಅಧ್ಯಯನಾಂಗದ ನಿರ್ದೇಶಕರಾಗಿ, ಪ್ರಸಾರಾಂಗದ ನಿರ್ದೇಶಕರಾಗಿ, ಭಾಷಾ ನಿಕಾಯದ ಡೀನ್ ಆಗಿ, ವಿಶ್ವವಿದ್ಯಾಲಯದ ಆಡಳಿತ ರಿಜಿಸ್ಟ್ರಾರ್ ಆಗಿ, ಸಿಂಡಿಕೇಟ್ ಸದಸ್ಯರಾಗಿ, ಯುಜಿಸಿಯ ಎಮಿರಿಟಸ್ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದಾರೆ. ಇವರ ಮಾರ್ಗದರ್ಶನದಲ್ಲಿ ಹದಿನಾಲ್ಕು ಜನ ಅಧ್ಯಾಪಕರು ಪಿಎಚ್.ಡಿ. ಪದವಿಗಳನ್ನು ಪಡೆದಿದ್ದಾರೆ.


ಡಾ.ಸೋಮಣ್ಣ

ಸೇವಾ ತೆರಿಗೆ ಉಪ ಆಯುಕ್ತ

ಬಳ್ಳಾರಿಯ ಕಂಪ್ಲಿಯಲ್ಲಿ 1976ರಲ್ಲಿ ಜನಿಸಿದರು. ಎಲ್.ಎಲ್.ಬಿ., ಎಂ.ಎ., ಎಂ.ಕಾಂ., ಎಂ.ಬಿ.ಬಿ.ಎಸ್., ಎಂ.ಡಿ., ಪದವಿಗಳ ಸರಮಾಲೆ ಧರಿಸಿರುವ ಪ್ರತಿಭಾವಂತರು. ಕೂಲಿ ಕಾರ್ಮಿಕರ ಕುಟುಂಬದ ಕುಡಿಯಾಗಿ ಬಡತನದ ನಡುವೆ ಪರಿಶ್ರಮದ ವಿದ್ಯಾಭ್ಯಾಸ ಮಾಡಿರುವ ಇವರ ಸಾಧನೆ ಅಚ್ಚರಿ ಹುಟ್ಟಿಸುತ್ತದೆ. 2003ರಿಂದ ಇದಕಲ್ ಸರ್ಕಾರಿ ಪ್ರಾಥಮಿಕ ಕೇಂದ್ರದಲ್ಲಿ ವೈದ್ಯಾಧಿಕಾರಿಯಾಗಿ ವೃತ್ತಿ ಜೀವನ ಆರಂಭಿಸಿದರು 2009ರಲ್ಲಿ ಕೇಂದ್ರ ಲೋಕ ಸೇವಾ ಆಯೋಗ ನಡೆಸಿದ ಪರೀಕ್ಷೆಯಲ್ಲಿ ಕನ್ನಡ ಮಾಧ್ಯಮದಲ್ಲಿಯೇ ಬರೆದು ಐ.ಆರ್.ಎಸ್ ಅಧಿಕಾರಿಯಾಗಿ ನೇಮಕಗೊಂಡರು. ಬೆಂಗಳೂರಿನ ಕೇಂದ್ರ ಅಬಕಾರಿ ಇಲಾಖೆಯ ಸೀಮಾ ಶುಲ್ಕ ಸಹಾಯಕ ಆಯುಕ್ತರಾಗಿ ದಕ್ಷತೆ ಮತ್ತು ಪ್ರಮಾಣಿಕತೆಯಿಂದ ಕರ್ತವ್ಯ ನಿರ್ವಹಿಸಿದರು. 

ಬಳಿಕ ಉಪ ಆಯುಕ್ತರಾಗಿ ಪದನ್ನೋತಿ ಹೊಂದಿ ಅಪಾರವಾದ ವೃತ್ತಿ ಬದ್ಧತೆ ಮತ್ತು ಶುದ್ಧತೆಯಿಂದ ಕೆಲಸ ಮಾಡುವ ಸರ್ಕಾರದ ಆದಾಯ ದ್ವಿಗುಣಗೊಳಿಸುವ ದಿಕ್ಕಿನಲ್ಲಿ ಅವ್ಯವಹಾರಗಳು ನಡೆಯದ ರೀತಿಯಲ್ಲಿ ಸಮರ್ಥವಾಗಿ ದುಡಿಯುತ್ತಿದ್ದಾರೆ. ಪ್ರಸ್ತುತ ಸೇವಾ ತೆರಿಗೆ ಉಪ ಆಯುಕ್ತರಾಗಿ ಕೆಲಸ ನಿರ್ವಹಿಸುತ್ತ ತೆರಿಗೆ ವಂಚನೆಯ ಪ್ರಕರಣಗಳಿಗೆ ಕಡಿವಾಣ ಹಾಕಿ ಕಟ್ಟುನಿಟ್ಟಿನ ತೆರಿಗೆ ವಸುಲಾತಿ ಮೂಲಕ ಸರ್ಕಾರದ ಭೊಕ್ಕಸಕ್ಕೆ ಕೋಟ್ಯಾಂತರ ರೂಪಾಯಿಗಳ ಆದಾಯ ವೃದ್ದಿಸುವಂತೆ ಮಾಡಿರುವುದು ಇವರ ವೃತ್ತಿಯ ದಕ್ಷತೆಗೆ ಸಾಕ್ಷಿಯಾಗಿದೆ. 


ಡಾ. ರಾಮಚಂದ್ರ ಚೌಡಪ್ಪ

ವೈದ್ಯಕೀಯ ತಜ್ಞ

ಚಿನ್ನದ ನಾಡಾದ ಕೋಲಾರ ಜಿಲ್ಲೆ ಕೋಲಾರ ತಾಲ್ಲೂಕಿನ ಮೂರಂಡಹಳ್ಳಿ ಗ್ರಾಮದ ಕೃಷಿಕ ದಂಪತಿಗಳಾದ ಚೌಡಪ್ಪ ಮತ್ತು ಎಳಸಮ್ಮ ದಂಪತಿಗಳ ಸುಪುತ್ರರಾಗಿ 1963ರಂದು ಜನಿಸಿದರು. ವೈದ್ಯಾಧಿಕಾರಿಗಳೇ, ಗುಲ್ಬರ್ಗಾ ವಿಶ್ವವಿದ್ಯಾಲಯದ ಬಳ್ಳಾರಿ ಮೆಡಿಕಲ್ ಕಾಲೇಜಿನಲ್ಲಿ 1987ರಲ್ಲಿ ಎಂ.ಬಿ.ಬಿ.ಎಸ್. ಪದವಿ ಪಡೆದು, ಬೆಂಗಳೂರು ವಿಶ್ವವಿದ್ಯಾಲಯದ ಬೆಂಗಳೂರು ಮೆಡಿಕಲ್ ಕಾಲೇಜಿನಲ್ಲಿ 1994ರಲ್ಲಿ ಜನರಲ್ ಸರ್ಜರಿಯಲ್ಲಿ ಎಂ.ಎಸ್. ಪದವಿ ಪಡೆದಿದ್ದಾರೆ. 

ನಂತರ, ಅದೇ ಬೆಂಗಳೂರು ವಿ.ವಿ.ಗೆ ಸೇರಿದ ಕಿದ್ವಾಯಿ ಮೆಮೋರಿಯಲ್ ಇನ್ಸ್ಟಿಟ್ಯೂಟ್ ಆಫ್ ಆಂಕಾಲಜಿ ಕ್ಯಾನ್ಸರ್ ಸಂಶೋಧನಾ ತರಬೇತಿ ಕೇಂದ್ರದಿಂದ ಸರ್ಜಿಕಲ್ ಆಂಕಾಲಜಿಯಲ್ಲಿ ಎಂ.ಸಿ.ಎಚ್. ಪದವಿ ಪಡೆದಿದ್ದಾರೆ. ವಿದೇಶದಲ್ಲಿ ವಿಶೇಷ ತರಬೇತಿ ಪಡೆದವರೇ, ವೈದ್ಯಕೀಯದಲ್ಲಿ ಮತ್ತು ಹೆಚ್ಚಿನ ಶಿಕ್ಷಣ ಪಡೆಯುವ ಉದ್ದೇಶದಿಂದ ರಾಜ್ಯದಲ್ಲಿ ಮಾತ್ರವಲ್ಲದೆ ಅಂತಾರಾಜ್ಯ ಹಾಗೂ ಅಂತಾರಾಷ್ಟ್ರೀಯ ಮಟ್ಟದ ವಿವಿಧ ಸಂಸ್ಥೆಗಳಲ್ಲಿ ವಿಶೇಷ ತರಬೇತಿಗಳನ್ನು ಪಡೆದ ಶ್ರೇಯ ಅವರದು. 


ಪಿ.ಸಿ. ಶ್ರೀನಿವಾಸ್

ರಾಷ್ಟ್ರಪತಿ ಭವನ ಉದ್ಯೋಗಿ, ಸಮಾಜಸೇವಕ

ಸದ್ಗುಣ ಸಂಪನ್ನರು, ಕಾಯಕಯೋಗಿಗಳು ಆದ ಪಿ.ಸಿ. ಶ್ರೀನಿವಾಸರವರು ಮಂಡ್ಯ ಜಿಲ್ಲೆಯ ಮದ್ದೂರು ತಾಲ್ಲೂಕಿನ ಪೆನ್ನೆದೊಡ್ಡಿ ಗ್ರಾಮದಲ್ಲಿ 1973ರಲ್ಲಿ ಜನಿಸಿದರು. ತಮ್ಮ ಹುಟ್ಟೂರು ಹಾಗೂ ಬೆಸಗರಹಳ್ಳಿ ಸರ್ಕಾರಿ ಶಾಲೆಗಳಲ್ಲಿ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣವನ್ನು ಮುಗಿಸಿ. ಕೆ.ಎಂ. ದೊಡ್ಡಿಯ ಭಾರತಿನಗರ ಕಾಲೇಜಿನಲ್ಲಿ ಪದವಿ ಪಡೆದು, ನಂತರ ಮೈಸೂರಿನ ಮಾನಸಗಂಗೋತ್ರಿಯಲ್ಲಿ ಅರ್ಥಶಾಸ್ತ್ರ ವಿಷಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಪ್ರಸ್ತುತ ದೆಹಲಿಯ ರಾಷ್ಟ್ರಪತಿ ಭವನದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.ಅಪ್ಪಟ ಕನ್ನಡಾಭಿಮಾನಿಯಾಗಿರುವ ಶ್ರೀಯುತರು ಕಾರ್ಯನಿಮಿತ್ತ ರಾಷ್ಟ್ರ ರಾಜಧಾನಿಯಲ್ಲಿದ್ದರೂ, ಅವರ ಒಳ ಮನಸ್ಸು ಮಾತ್ರ ಸದಾ ಕನ್ನಡ ಸೇವೆಗೆ ತುಡಿಯುತ್ತಿರುತ್ತದೆ. ಕನ್ನಡಿಗರು ಅಗಾಧವಾದ ಕನಸು ಕಟ್ಟಿಕೊಂಡು ಯು.ಪಿ.ಎಸ್.ಸಿ. ಪರೀಕ್ಷೆಗಳ ತರಬೇತಿಗೆ ದೂರದ ದೆಹಲಿ, ಹೈದರಬಾದ್ ಮುಂತಾದ ಕಡೆಗೆ ಧಾವಿಸುತ್ತಿದ್ದುದನ್ನು ಮನಗಂಡು ಕರ್ನಾಟಕದಲ್ಲಿಯೇ ಉತ್ತಮ ತರಬೇತಿ ದೊರಕಿಸಲು ಶ್ರಮವಹಿಸಿದ್ದಾರೆ. ಕೃಷಿಕ ಸರ್ವೋದಯ ಪೌಂಡೇಶನ್ ಸಂಸ್ಥೆಯ ಮೂಲಕ ರಾಜ್ಯಾದ್ಯಂತ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ಮತ್ತು ತರಬೇತಿ ನೀಡಲು ಸಹಕಾರಿಯಾಗಿದ್ದಾರೆ. 


ಡಾ.ಎಂ.ಬಿ. ಬೋರಲಿಂಗಯ್ಯ 

ಐ.ಪಿ.ಎಸ್

ರಾಜ್ಯದ ದಕ್ಷ, ಶುದ್ಧ, ಪ್ರಾಮಾಣಿಕ ಪೊಲೀಸ್ ಅಧಿಕಾರಿಯಾಗಿರುವ ಡಾ. ಬೋರಲಿಂಗಯ್ಯ ಅವರು 1978ರಲ್ಲಿ ಮದ್ದೂರಿನ ಮಲ್ಲನಾಯಕನ ಹಳ್ಳಿಯಲ್ಲಿ ಜನಿಸಿದರು. 2008ರಲ್ಲಿ ಐ.ಪಿ.ಎಸ್. ಅಧಿಕಾರಿಯಾಗಿ ನೇಮಕಗೊಂಡರು. ಗುಲ್ಬರ್ಗದಲ್ಲಿ ಪ್ರಾಯೋಗಿಕ ತರಬೇತಿ ಮುಗಿಸಿದ ಬಳಿಕ ತುಮಕೂರಿನಲ್ಲಿ ಎಎಸ್‌ಪಿ, ಉಡುಪಿ, ದಾವಣಗೆರೆಯಲ್ಲಿ ಎಸ್‌ಪಿ, ಪ್ರಸ್ತುತ ಬೆಳಗಾವಿ ಪೊಲೀಸ್ ಕಮಿಷನರ್​ ಆಗಿ ಬೋರಲಿಂಗಯ್ಯ ನಿಯುಕ್ತರಾಗಿದ್ದಾರೆ. 

ಅತ್ಯಂತ ಕ್ರಿಯಾಶೀಲ ಹಾಗೂ ಸಾಮಾಜಿಕ ಕಾಳಜಿಯುಳ್ಳ ಇವರು ಕುಖ್ಯಾತ ರೌಡಿಗಳ ನಿಗ್ರಹ, ಡ್ರಗ್ಸ್ ಮಾಫೀಯಾ ವಿರುದ್ಧ ವಿಶೇಷ ಕಾರ್ಯಚರಣೆ, ಸವಾಲಿನ ಕೊಲೆ ಪ್ರಕರಣಗಳ ನಿರ್ವಹಣೆ, ಅತಿ ಗಣ್ಯ ವ್ಯಕ್ತಿಗಳ ಭದ್ರತೆಯಲ್ಲಿ ತಮ್ಮ ವೃತ್ತಿ ನೈಪುಣ್ಯತೆ ಮೆರೆದು ಸಮಾಜದಲ್ಲಿನ ಹಲವಾರು ಅಪರಾಧ ಕೃತ್ಯಗಳಿಗೆ ಕಡಿವಾಣ ಹಾಕುವಲ್ಲಿ ಯಶಸ್ವಿಯಾಗಿದ್ದಾರೆ. ರಕ್ಷಣೆ ಮತ್ತು ಭದ್ರತೆಯ ಕುರಿತಾಗಿ ವೈವಿಧ್ಯಮಯ ಕಾರ್ಯಕ್ರಮಗಳ ಮೂಲಕ ಶಾಲಾ ಕಾಲೇಜು, ಪಿಜಿ, ಸಾಫ್ಟ್ವೇರ್ ಕಂಪನಿಗಳು ಹಾಗೂ ಸಾರ್ವಜನಿಕರಲ್ಲಿ `ಜನಜಾಗೃತಿ’ ಮೂಡಿಸುವಲ್ಲಿ ಅವಿರತ ಶ್ರಮಿಸುತ್ತಿದ್ದಾರೆ. 


ಬಿ. ಸುರೇಶ್

ಸಾಹಿತಿ, ಫಿಲಂ ಮೇಕರ್, ಚಿಂತಕ

ರಂಗಭೂಮಿ ಕಲಾವಿದ, ನಾಟಕಕಾರ, ನಿರ್ದೇಶಕರಾಗಿಯೂ ಗುರುತಿಸಿಕೊಂಡಿರುವ ಬಿ. ಸುರೇಶ, 1962ರಲ್ಲಿ ದಾವಣಗೆರೆಯಲ್ಲಿ ಜನಿಸಿದರು. ಹಿರಿಯ ಪತ್ರಕರ್ತೆ ಹಾಗೂ ಲೇಖಕಿ ವಿಜಯಾ ಅವರ ಪುತ್ರ. ಬಿ.ಸುರೇಶ ಅವರು 1973ರಿಂದಲೇ ಬಾಲನಟರಾಗಿ ಹವ್ಯಾಸಿ ರಂಗಭೂಮಿಯಲ್ಲಿ ಕಾಣಿಸಿಕೊಂಡು ಈವರೆಗೂ ಸಕ್ರಿಯ ರಂಗಕರ್ಮಿಯಾಗಿದ್ದಾರೆ. ಅಲ್ಲದೇ, 1976 ರಲ್ಲಿ ಗಿರೀಶ್ ಕಾಸರವಳ್ಳಿ ನಿರ್ದೇಶಿಸಿದ ಘಟಶ್ರಾದ್ದ ಚಿತ್ರದಲ್ಲಿ ಬಾಲನಟರಾಗಿ ಕಾಣಿಸಿಕೊಳ್ಳುವ ಮೂಲಕ ಇವರ ಚಿತ್ರರಂಗದ ಬದುಕು ಪ್ರಾರಂಭವಾಯಿತು. 

1988 ರಲ್ಲಿ ಮಿಥಿಲೆಯ ಸೀತೆಯರು ನಿರ್ದೇಶನ ಮಾಡಿದ ಅವರು ಚಿತ್ರಕಥೆ, ಸಂಭಾಷಣೆ ಬರೆಯುತ್ತಾ 15 ಕ್ಕೂ ಹೆಚ್ಚಿನ ಚಿತ್ರಗಳಿಗೆ ಸಂಭಾಷಣೆ ರಚಿಸಿದ್ದಾರೆ.  ’ಅರ್ಥ’ ಚಿತ್ರಕ್ಕಾಗಿ ಬಿ.ಸುರೇಶ ಅವರಿಗೆ 2002-2003 ನೇ ಸಾಲಿನ ಪ್ರಥಮ ಅತ್ಯುತ್ತಮ ಚಿತ್ರ ಪ್ರಶಸ್ತಿ ದೊರೆತಿದೆ. 2010 ರಲ್ಲಿ ಇವರು ನಿರ್ದೇಶಿಸಿದ 'ಪುಟ್ಟಕ್ಕನ ಹೈವೇ' ಚಿತ್ರವೂ ರಾಷ್ಟ್ರ ಪ್ರಶಸ್ತಿಯನ್ನು ಅತ್ಯುತ್ತಮ ಪ್ರಾದೇಶಿಕ ಭಾಷಾ ಚಿತ್ರ ಎಂತಲೂ, ಅತ್ಯುತ್ತಮ ಚಿತ್ರಕತೆ ಎಂಬ ರಾಜ್ಯ ಪ್ರಶಸ್ತಿಯನ್ನೂ ಪಡೆದುಕೊಂಡಿದೆ. ಸುಮಾರು 20 ಕ್ಕೂ ಹೆಚ್ಚು ಕನ್ನಡ ಧಾರಾವಾಹಿಗಳನ್ನು ರಚಿಸಿ, ನಿರ್ದೇಶಿಸಿರುವ ಹೆಗ್ಗಳಿಕೆ ಇವರದು. 


ಟಿ. ತಿಮ್ಮೇಗೌಡ ಐಎಎಸ್ (ನಿ)

ಅಧ್ಯಕ್ಷರು, ಕರ್ನಾಟಕ ಜಾನಪದ ಪರಿಷತ್ತು

ವಿಶ್ರಾಂತ ಐ.ಎ.ಎಸ್. ಅಧಿಕಾರಿ ಟಿ. ತಿಮ್ಮೇಗೌಡರು. ಮಂಡ್ಯ ಜಿಲ್ಲೆಯ ಮಂಗಲ ಗ್ರಾಮದ ಸಾಮಾನ್ಯ ರೈತ  ಕುಟುಂಬದ ಕುಡಿಯಿವರು. 1945 ರಲ್ಲಿ ಜನಿಸಿದ ವಿಶ್ರಾಂತ ಗೌಡರು ಪರಿಶ್ರಮದಿಂದ ವಿದ್ಯಾಭ್ಯಾಸ ಮಾಡಿ, ಅರ್ಥಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿ ಪಡೆದ ಬಳಿಕ, ಕೆಲಕಾಲ ಮಂಡ್ಯದ ಖಾಸಗಿ ಕಾಲೇಜಿನಲ್ಲಿ ಉಪನ್ಯಾಸಕರಾಗಿ ಕಾರ್ಯನಿರ್ವಹಿಸಿದರು. ಬಳಿಕ ಕೆ.ಎ.ಎಸ್. ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ತಹಶೀಲ್ದಾರರಾಗಿ ಮತ್ತು ಉಪವಿಭಾಗಾಧಿಕಾರಿಯಾಗಿ ಅತ್ಯಂತ ದಕ್ಷತೆಯಿಂದ ಕರ್ತವ್ಯ ನಿರ್ವಹಿಸಿದರು. 

ದಕ್ಷತೆ ಮತ್ತು ಪಾರದರ್ಶಕತೆಯ ಆಡಳಿತದ ಅಪಾರ ಸೇವಾನುಭವದ ಗೌಡರು ಐ. ಎ. ಎಸ್. ಹುದ್ದೆಗೆ ಪದನ್ನೋತಿ ಹೊಂದಿ, ವಿವಿಧ ಜಿಲ್ಲೆಗಳ ಜಿಲ್ಲಾಧಿಕಾರಿಯಾಗಿ ಸೇವೆ ಸಲ್ಲಿಸಿ ಸೈ ಅನಿಸಿಕೊಂಡರು. ಬಿಡಿಎ ಕಾರ್ಯದರ್ಶಿ, ಬೆಂಗಳೂರು ವಿಭಾಗದ ಆಯುಕ್ತ, ಸರ್ವೆ ಮತ್ತು ತೋಟಗಾರಿಕೆ ಇಲಾಖೆಯ ನಿರ್ದೇಶಕ, ಸಾರಿಗೆ ಇಲಾಖೆಯ ಆಯುಕ್ತದಂಥ ಬಹುದೊಡ್ಡ ಹುದ್ದೆಗಳನ್ನು ಅತ್ಯಂತ ಸಮರ್ಥವಾಗಿ ನಿರ್ವಹಿಸಿದ ಹೆಗ್ಗಳಿಕೆ ತಿಮ್ಮೇಗೌಡರದ್ದು. ಇವರ ರಚನಾತ್ಮಕ ಆಡಳಿತ ಕಿರಿಯ ಅಧಿಕಾರಿಗಳಿಗೆ ಮಾದರಿ.

 


Stay up to date on all the latest ವಿಶೇಷ news
Poll
MoE to launch bachelor degree programme for Agniveers

ಕೇಂದ್ರ ಸರ್ಕಾರದ ಅಗ್ನಿಪಥ್ ಯೋಜನೆಯನ್ನು ಸರಿಯಾಗಿ ಯೋಜಿಸಲಾಗಿಲ್ಲ ಎಂಬ ಟೀಕೆಗಳನ್ನು ನೀವು ಒಪ್ಪುತ್ತೀರಾ?


Result
ಹೌದು
ಇಲ್ಲ

Comments

Disclaimer : We respect your thoughts and views! But we need to be judicious while moderating your comments. All the comments will be moderated by the kannadaprabha.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

The views expressed in comments published on kannadaprabha.com are those of the comment writers alone. They do not represent the views or opinions of kannadaprabha.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. kannadaprabha.com reserves the right to take any or all comments down at any time.

flipboard facebook twitter whatsapp