ಸೈಯದ್ ಮೋದಿ ಬ್ಯಾಡ್ಮಿಂಟನ್ ಚಾಂಪಿಯನ್‍ಶಿಪ್: ಫೈನಲ್ ತಲುಪಿದ ಸೌರಭ್ ವರ್ಮಾ

ಲಖನೌ: ಭಾರತದ ಸೌರಭ್ ವರ್ಮಾ ಅವರು ಇಲ್ಲಿ ನಡೆಯುತ್ತಿರುವ ಸೈಯದ್ ಮೋದಿ ಇಂಟರ್‍ನ್ಯಾಷನಲ್ ಬ್ಯಾಡ್ಮಿಂಟನ್ ಚಾಂಪಿಯನ್‍ಶಿಪ್ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಫೈನಲ್ ತಲುಪಿದ್ದಾರೆ.

ಶನಿವಾರ ನಡೆದ ಪುರುಷರ ಸಿಂಗಲ್ಸ್ ಸೆಮಿಫೈನಲ್ಸ್ ಪಂದ್ಯದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ಸೌರಭ್ ವರ್ಮಾ ಅವರು 21-17, 16-21, 21-18 ಅಂತರದಲ್ಲಿ ಕೊರಿಯಾದ ಹೀ ಕ್ವಾಂಗ್ ಹೀ ವಿರುದ್ಧ ಗೆದ್ದು ಪ್ರಶಸ್ತಿ ಸುತ್ತಿಗೆ ಪ್ರವೇಶ ಮಾಡಿದ್ದಾರೆ.

26ರ ಪ್ರಾಯದ ಭಾರತ ಆಟಗಾರ ಹೈದರಾಬಾದ್ ನಲ್ಲಿ ನಡೆದಿದ್ದ ಬಿಡಬ್ಲ್ಯುಎಫ್ ಸೂಪರ್ 100 ಹಾಗೂ ವಿಯಟ್ನಾಂ ಎರಡು ಪ್ರಶಸ್ತಿಯನ್ನು ಈ ವರ್ಷ ಬಾಚಿಕೊಂಡಿದ್ದಾರೆ. ಇದೀಗ, ಸೈಯದ್ ಮೋದಿ ಬ್ಯಾಡ್ಮಿಂಟನ್ ಚಾಂಪಿಯನ್‍ಶಿಪ್ ಫೈನಲ್ ತಲುಪುವ ಮೂಲಕ ಮತ್ತೊಂದು ಪ್ರಶಸ್ತಿ ಭರವಸೆ ಮೂಡಿಸಿದ್ದಾರೆ. ಪ್ರಶಸ್ತಿ ಸುತ್ತಿನಲ್ಲಿ ತೈವಾನ್ ನ ವಾಂಗ್ ಟಿಜು ವೀ ವಿರುದ್ಧ ಸೌರಭ್ ವರ್ಮಾ ಸೆಣಸಲಿದ್ದಾರೆ.