'ಭಾರತ್ ಸ್ಟೇಜ್(ಬಿಎಸ್)-6' ಎಮಿಷನ್ ನಿಯಮಗಳು 2020ರ ಏ.1ರಿಂದ ಜಾರಿಗೆ ಬರಲಿವೆ. ಇದಕ್ಕೆ ಪೂರಕವಾಗಿ ಮಾರುತಿ ಸುಜುಕಿ ಕಂಪನಿಯು ಡೀಸೆಲ್ ಕಾರುಗಳ ಮಾರಾಟವನ್ನು ಸ್ಥಗಿತಗೊಳಿಸಲು ನಿರ್ಧರಿಸಿದೆ. ಕಂಪನಿಯ ಒಟ್ಟು ವಹಿವಾಟಿನಲ್ಲಿ ಶೇ.32ರಷ್ಟು ಡೀಸೆಲ್ ಕಾರುಗಳಿವೆ. ಕಳೆದ ಹಣಕಾಸು ವರ್ಷದಲ್ಲಿ ಕಂಪನಿಯು 4.63 ಲಕ್ಷ ಡೀಸೆಲ್ ವಾಹನಗಳನ್ನು ಮಾರಾಟ ಮಾಡಿತ್ತು. ವಿಟಾರಾ ಬ್ರೇಜಾ ಮತ್ತು ಎಸ್-ಕ್ರಾಸ್ ವಾಹನಗಳು ಕೇವಲ ಡೀಸೆಲ್ ಎಂಜಿನ್ ಆಯ್ಕೆಯನ್ನು ಮಾತ್ರ ಹೊಂದಿವೆ. ಸ್ವಿಫ್ಟ್, ಬಲೆನೋ, ಡಿಜೈರ್, ಸಿಯಾಜ್ ಮತ್ತು ಎರ್ಟಿಕಾ ಮಾಡೆಲ್ ಗಳು ಪೆಟ್ರೋಲ್ ಆವೃತ್ತಿಯನ್ನೂ ಹೊಂದಿವೆ. 2020ರಿಂದ ಕೇವಲ ಪೆಟ್ರೋಲ್/ಸಿಎನ್ಜಿ ಆವೃತ್ತಿಯ ವಾಹನಗಳನ್ನಷ್ಟೇ ಮಾರುತಿ ಸುಜುಕಿ ಮಾರಾಟ ಮಾಡಲಿದೆ. ಇತರೆ ಕಂಪನಿಗಳೂ ಇದೇ ಮಾದರಿಯನ್ನು ಅನುಸರಿಸುವ ಸಾಧ್ಯತೆ ಇದ್ದು, ಬಿಎಸ್-6 ಗುಣಮಟ್ಟಕ್ಕೆ ಹೊಂದುವಂಥ ವಾಹನಗಳು ಮುಂದಿನ ವರ್ಷ ಮಾರುಕಟ್ಟೆ ಪ್ರವೇಶಿಸಲಿವೆ ಎನ್ನಲಾಗಿದೆ.