'ಫ್ಯೂಚರ್ ರೀಟೇಲ್' ಭವಿಷ್ಯ ಯಾರ ಕೈಲಿ? ಅಂಬಾನಿಯೋ... ಅದಾನಿಯೋ?

ನವದೆಹಲಿ: ಸಾಲದ ಸುಳಿಯಲ್ಲಿ ಸಿಲುಕಿರುವ ಫ್ಯೂಚರ್ ರೀಟೇಲ್ ನ್ನು ಖರೀದಿಸಲು ಪೈಪೋಟಿ ಪ್ರಾರಂಭವಾಗಿದೆ. 

ಏಷ್ಯಾದ ಇಬ್ಬರು ಶ್ರೀಮಂತ ಬಿಲಿಯನೇರ್ ಗಳಾದ-ಗೌತಮ್ ಅದಾನಿ, ಮುಖೇಶ್ ಅಂಬಾನಿ ನಡುವೆ ಫ್ಯೂಚರ್ ರೀಟೇಲ್ ನ್ನು ಖರೀದಿಸುವುದಕ್ಕಾಗಿ ಪೈಪೋಟಿ ಏರ್ಪಟ್ಟಿದ್ದು ಸಂಸ್ಥೆಯೊಂದನ್ನು ಖರೀದಿಸುವುದಕ್ಕಾಗಿ ಇಬ್ಬರು ಬಿಲಿಯನೇರ್ ಗಳ ನಡುವೆ ಪೈಪೋಟಿ ಏರ್ಪಟ್ಟಿರುವುದು ಬಹುಶಃ ಇದೇ ಮೊದಲು ಎಂದು ವಿಶ್ಲೇಷಿಸಲಾಗುತ್ತಿದೆ. 

ಇದನ್ನೂ ಓದಿ: ಸ್ಥಿರ ದೂರವಾಣಿ ಸೇವೆಯಲ್ಲಿ ಬಿಎಸ್​ಎನ್​ಎಲ್​ ಹಿಂದಿಕ್ಕಿದ ಜಿಯೋಗೆ ಅಗ್ರಸ್ಥಾನ

ರಿಲಾಯನ್ಸ್ ರೀಟೇಲ್ ವೆಂಚರ್ಸ್ ಲಿಮಿಟೆಡ್ (ಆರ್ ಆರ್ ವಿಎಲ್) ಹಾಗೂ ಅದಾನಿ ಸಮೂಹದ ಏಪ್ರಿಲ್ ಮೂಲ್ ರೀಟೆಲ್ ಪ್ರೈವೆಟ್ ಲಿಮಿಟೆಡ್ ಹಾಗೂ ಫ್ಲೆಮಿಂಗೋ ಸಮೂಹ ಸೇರಿದಂತೆ 13 ಸಂಸ್ಥೆಗಳು ಫ್ಯೂಚರ್ ರೀಟೇಲ್ ಖರೀದಿಗೆ (ಇಒಐಎಸ್)ಗಳನ್ನು ಸಲ್ಲಿಸಿವೆ. 

ಈ ಸಂಸ್ಥೆಯನ್ನು ಖರೀದಿಸಲು ಇನ್ನೂ ಎಷ್ಟು ಸಂಸ್ಥೆಗಳು ಉತ್ಸುಕವಾಗಿವೆ ಎಂಬುದು ನಂ.20 ರಂದು ಅಂತಿಮ ಪಟ್ಟಿಯಲ್ಲಿ ತಿಳಿಯಲಿದೆ. ಈ ಬಳಿಕ ಡಿ.15 ರ ವೇಳೆಗೆ ರೆಸೆಲ್ಯೂಷನ್ ಯೋಜನೆಯನ್ನು ಸಲ್ಲಿಸಬೇಕಾಗುತ್ತದೆ. 2023 ರ ವೇಳೆಗೆ ಭಾರತದ ರೀಟೇಲರ್ಸ್ ಗಳ ಪೈಕಿ ಅತಿ ದೊಡ್ಡ ಸಂಸ್ಥೆಯೊಂದಕ್ಕೆ ಹೊಸ ಮಾಲಿಕರು ಲಭ್ಯವಾಗುವ ಸಾಧ್ಯತೆಗಳಿವೆ.