ಮಾಸ್ಟರ್ ಲೋಹಿತ್, ಮಂಜುನಾಥ್, ವಿಜಯರಾಘವೇಂದ್ರ, ಆನಂದ್, ಬೇಬಿ ಶಾಮಿಲಿ, ಬೇಬಿ ರೇಖಾ ಮುಂತಾದ ಹಲವು ಬಾಲಕಲಾವಿದರನ್ನು ಕನ್ನಡ ಚಿತ್ರರಂಗ ಕಂಡಿದೆ. ಬಾಲನಟನಟಿಯರನ್ನೇ ಬಳಸಿದ ಅದ್ಭುತ ಕಮರ್ಷಿಯಲ್ ಚಿತ್ರಗಳು ನಮ್ಮಲ್ಲಿ ಬಂದಿವೆ. ಆದರೆ ಆ ತಲೆಮಾರಿನ ಬಾಲನಟರು ಬೆಳೆದು ನಾಯಕ ನಾಯಕಿಯರಾದ ನಂತರ ಅಥವಾ ನೇಪಥ್ಯಕ್ಕೆ ಸರಿದ ನಂತರ ಚಿತ್ರರಂಗದಲ್ಲಿ ಮಕ್ಕಳ ಚಿತ್ರ ಎಂಬುದು ಕೇವಲ ಪ್ರಶಸ್ತಿ ಸಬ್ಸಿಡಿಗೆ ಸೀಮಿತವಾಗಿ ಹೋಯ್ತು. ಬಾಲನಟರಿಗೆ ಕಮರ್ಷಿಯಲ್ ಚಿತ್ರಗಳಲ್ಲಿ ಪಾತ್ರಗಳೇ ಸೃಷ್ಟಿಯಾಗದೇ ಅವಕಾಶಗಳು ಕಮ್ಮಿಯಾಗಿ ಹೋದವು. ಅಪ್ಪಿತಪ್ಪಿ ಪಾತ್ರಗಳಿದ್ದರೂ ಅವುಗಳಲ್ಲಿ ಲವ್ವು ಡವ್ವು ಥರದ ದೊಡ್ಡದೊಡ್ಡ ಮಾತುಗಳೋ, ಡಬಲ್ ಮೀನಿಂಗ್ ಸಂಭಾಷಣೆಗಳೋ ಇದ್ದು , ಮಕ್ಕಳು ತಮ್ಮ ಅಭಿನಯದ ಚಿತ್ರವನ್ನು ತಾವೇ ನೋಡದಂತಾಗಿ ಹೋಯ್ತು. ಅಭಿನಯಕ್ಕೆ ಮಕ್ಕಳನ್ನು ಕಲಿಸಲು ಹಿಂಜರಿಯುವ ಸನ್ನಿವೇಶವೂ ಸೃಷ್ಟಿ ಆಯ್ತು. ಮಕ್ಕಳಿಗೆ ತಮ್ಮ ಪ್ರತಿಭೆ ಪ್ರದರ್ಶಿಸಲು ಸಿನಿಮಾ ಬದಲು ಬೇರೆಬೇರೆ ವೇದಿಕೆ ಸೃಷ್ಟಿಯಾದವು. ಆದರೆ ಈಗ ಚಕ್ರ ಮತ್ತೆ ತಿರುಗಿದೆ. ಇದೀಗ ಮತ್ತೆ ಮಕ್ಕಳ ಪ್ರತಿಭೆಗೆ ಬೇಡಿಕೆ ಶುರುವಾಗಿದೆ. ಹೊಸಹೊಸ ಬಾಲಪ್ರತಿಭೆಗಳು ಸಾಧನೆ ಮೆರೆಯುತ್ತಿವೆ.
'ಮರಿತಾರೆ' ಅಂಕಣದಡಿ ಇಂದು ಕಾಣಿಸಿಕೊಳ್ಳುತ್ತಿರುವ ಪ್ರತಿಭೆಯ ಹೆಸರು ಪ್ರಕೃತಿ ಪ್ರಸಾದ್.
ಇದೀಗ ಏಳನೇ ಕ್ಲಾಸ್ ಪರೀಕ್ಷೆಗೆ ರೆಡಿಯಾಗುತ್ತಿರುವ ಈ ಪುಟಾಣಿ ಎರಡು ಚಲನಚಿತ್ರ ರಾಜ್ಯ ಪ್ರಶಸ್ತಿಯ ಒಡತಿ. ಟಿ.ಎನ್ ಸೀತಾರಾಮ್ ಮತ್ತು ಬಿ.ಸುರೇಶ ಗರಡಿಯಲ್ಲಿ ಕಿರುತೆರೆಯಲ್ಲಿ ಪಳಗಿ ಸೈ ಅನಿಸಿಕೊಂಡ ಈಕೆ ಅಭಯಸಿಂಹ ನಿರ್ದೇಶನದ ರಾಷ್ಟ್ರಪ್ರಶಸ್ತಿ ವಿಜೇತ ಗುಬ್ಬಚ್ಚಿಗಳು ಚಿತ್ರದಲ್ಲಿ ನಟಿಸಿ ಗಮನ ಸೆಳೆದಿದ್ದಾಳೆ.
ಪ್ರಕಾಶ್ ರೈ ನಿರ್ದೇಶನದ ನಾನು ನನ್ನ ಕನಸು, ಬಿ ಸುರೇಶ ನಿರ್ದೇಶನದ ಪುಟ್ಟಕ್ಕನ ಹೈವೆ ಚಿತ್ರದಲ್ಲಿ ನಟಿಸಿ ಗೆದ್ದ ಈ ಕೂಸು, ಹೆಜ್ಜೆಗಳು ಮತ್ತು ಗುಬ್ಬಚ್ಚಿಗಳು ಚಿತ್ರಕ್ಕಾಗಿ ಶ್ರೇಷ್ಠ ಬಾಲನಟಿ ಪ್ರಶಸ್ತಿ ಪಡೆದುಕೊಂಡಿದ್ದಾಳೆ.
ಟಿವಿಯಲ್ಲಿ ವಾರ್ತೆ ಓದಿದ್ದೂ ಆಯ್ತು, ಕಾರ್ಯಕ್ರಮ ನಿರೂಪಣೆ ಮಾಡಿದ್ದೂ ಆಯಿತು, ರಂಗಭೂಮಿಗೆ ಕಾಲಿಟ್ಟು ರಬ್ಡಿ ಎಂಬ ನಾಟಕ ಮಾಡಿ ಶ್ರೇಷ್ಠ ಪೋಷಕ ನಟಿ ಪ್ರಶಸ್ತಿ ಪಡೆದದ್ದೂ ಆಯ್ತು. ಇದೀಗ ಕಾದಂಬರಿ ಕಣಜ ಧಾರಾವಾಹಿಯಲ್ಲಿ ನಟಿಸುತ್ತಿರುವ ಪ್ರಕೃತಿ ಜೊತೆಗೆ ಶೂಟಿಂಗ್ ಸ್ಪಾಟಲ್ಲಿ ಒಂದು ಚಿಟ್‌ಚಾಟ್ ಮಾತುಕತೆ.
ಪ್ರಕೃತಿ.. ಪರೀಕ್ಷೆ ಇಟ್ಕೊಂಡು ಶೂಟಿಂಗ್ ಮಾಡ್ತಾ ಇದ್ದೀಯ?
