ಬಿಂದು. ಬಿಂದುವಿನ ಹಿಂದೊಂದು ಬಿಂದು. ಅದರ ಹಿಂದೆ ಮತ್ತೊಂದು ಬಿಂದು. ಅದರ ಹಿಂದೆ ಮಗದೊಂದು ಬಿಂದು.... ಹೀಗೆ ಧಾರಾಕಾರವಾಗಿ ಹಿಮವತ್ ಪರ್ವತಕ್ಕೆ ಬೀಳುವ ಹೊತ್ತಿಗೆ ಅದೊಂದು ದೊಡ್ಡ ಮಳೆಯೇ ಅಗಿಬಿಟ್ಟಿತ್ತು. ಮಳೆಯಷ್ಟೇ ಅಲ್ಲ, ಸತತವಾಗಿ ವರ್ಷದ ಮುನ್ನೂರ ಅರುವತ್ತೈದೂ ದಿನಗಳು, ಪ್ರತಿ ದಿನದ ಇಪ್ಪತ್ತನಾಲಕ್ಕೂ ಘಂಟೆಗಳು ಸತತ ಗಂಗಾ ಪ್ರವಾಹ. ವಿರಾಮವೂ ಇಲ್ಲ; ವಿಛ್ಛಿತ್ತಿಯೂ ಇಲ್ಲ. ಸುಗಂಧಪೂರ್ಣ. ಶಿವ ಶಿರ ಸ್ಪರ್ಶದಿಂದ ಪುನೀತ ದ್ರವ. ಸ್ವರ್ಗಮೂಲದಿಂದಾಗಿ ಸುಖಾವಹ. ದೇವತೆಗಳು, ಯಕ್ಷರು, ಕಿನ್ನರರು, ಕಿಂಪುರುಷರು, ನಾಗರು, ಎಲ್ಲರೂ..... ಎಲ್ಲ ವರ್ಗದ ಸುರಗಣಗಳೂ, ಅಸುರ ವೃಂದಗಳೂ, ಎಲ್ಲರೂ, ಎಲ್ಲರೂ ಬಂದಿಳಿದು ಗಂಗೆಯಲ್ಲಿ ಮುಳುಗೆದ್ದರು. ಅವರ ಪಾಪವೆಲ್ಲ ಜಾಲಾಡಿಹೋಯಿತು. ಶಪ್ತ ದೇವತೆಗಳು, ಭೂಮಿಯಲ್ಲಿ ಆವತರಿಸಿದವರು ಈ ಪವಿತ್ರ ಗಂಗೆಯಲ್ಲಿ ಮಿಂದು ಪುನೀತರಾದರು.