ನಾವು ಬದುಕಿದ್ದೇವೆ. ಸುತ್ತಲೂ ಕಾಣುತ್ತಿದ್ದೇವೆ. ನಮ್ಮ ಅತ್ತಿತ್ತಲೆಲ್ಲ ಅಯೋಮಯವಾದ, ಅನೇಕವಾದ, ಹಲವರ್ಣಗಳ ತರಹೇವಾರಿ ಜೀವರಾಶಿಗಳು. ಏಕಾಣುವಿನಿಂದ ಹಿಡಿದು ತಿಮಿಂಗಿಲಗಳ ತನಕ; ಜಲಚರಗಳಿಂದ ಹಿಡಿದು ಗಗನ ಗಾಮಿಗಳವರೆವಿಗೆ; ನಾಲ್ಕು, ನೂರು, ಸಾವಿರ ಕಾಲುಗಳ ಜೀವಿಗಳು ವಿಕಸಿಸಿ, ಈ ಎರಡು ಕಾಲಿನ ಮಾನವನವರೆವಿಗೆ. ತೆವಳುವ ಉರಗಗಳು, ಮಲಗಿಯೇ ಕುಬ್ಜಕಾಲುಗಳಲ್ಲಿ ಚಲಿಸುವ ಹಲ್ಲಿ, ಆಮೆ, ಮೊಸಳೆಗಳು; ನಡೆದಾಡುವ ನರಿ, ಹುಲಿ, ಆನೆ , ಸಿಂಹಗಳು; ನೀರೊಳಗೆ ಮುಳುಗಿದರೆ ಸಾಯುವ ಪ್ರಾಣಿಗಳು, ನೀರಿಂದ ಹೊರಬಂದರೆ ಮರಣಿಸುವ ಮತ್ಸ್ಯಕೋಟಿಗಳು. ಸಾಧು ಪ್ರಾಣಿಗಳನ್ನು ಬದುಕಿದ್ದಂತೆಯೇ ಭಕ್ಷಿಸುವ ಕ್ರೂರ ಮೃಗಗಳು, ಮಾಂಸವೇ ಮುಟ್ಟದ ಬೃಹತ್ ಗಜಪಡೆಗಳು. ಗರ್ಭದಿಂದ ಜಾರುವ ಜೀವಿಗಳು, ಮೊಟ್ಟೆಯೊಡುದು ಬರುವ ಹಕ್ಕಿ - ಹಾವುಗಳು... ಓಹ್ ... ಇದೇ ಒಂದು ವಿಸ್ಮಯವಾದರೆ, ನಿಂತಲ್ಲೇ ಊಟ ತಯಾರಿಸಿಕೊಳ್ಳುವ ಸಸ್ಯ ವಿಸ್ತಾರ; ಬಳಿಬಂದರೆ ತನ್ನ ರೆಂಬೆ - ಕೊಂಬೆಗಳಿಂದ ಬಂಧಿಸಿ ನುಂಗಿ ನೀರು ಕುಡಿಯುವ ವೃಕ್ಷ ರಾಕ್ಷಸರು !! ಇಂತಹ ವೈವಿಧ್ಯ ಪ್ರಾಣಿ ಸಂಕುಲ, ಸಸ್ಯ ಸಂಪತ್ತುಗಳಲ್ಲಿ ಹುಟ್ಟಿ, ಬದುಕಿ, ಸತ್ತು, ಹುಟ್ಟಿ, ಬದುಕಿ.... ಈ ಹುಟ್ಟೂ ಸಾವಿನ ಚಕ್ರ ಇಷ್ಟು ವ್ಯವಸ್ಥಿತವಾಗಿ ನಡೆಯುತ್ತಿರಬೇಕಿದ್ದರೆ ಖಂಡಿತ ಈ ಸೃಷ್ಟಿಗೊಬ್ಬ ನಿಯಂತ್ರಕನಿರಲೇಬೇಕು.