ನಿಶಿನ್‌: ಜಪಾನ್‌ನಲ್ಲಿ ನಡೆದ ಏಷ್ಯನ್ ಗೇಮ್ಸ್‌ನಲ್ಲಿ ಸಾಂಪ್ರಾದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಸೋಲಿಸಿ, ಭಾರತ ಚಿನ್ನದ ಪದಕ ಗೆದ್ದ ನಂತರ ಭಾರತೀಯ ಕ್ರಿಕೆಟ್ ಅಭಿಮಾನಿಗಳು ವಿಶ್ವದಾದ್ಯಂತ ಕ್ರಿಕೆಟ್ ಅಭಿಮಾನಿಗಳ ಹೃದಯ ಗೆಲುವಂತಹ ಕೆಲಸ ಮಾಡಿದ್ದಾರೆ. ಮನೆಗೆ ತೆರಳುವ ಮುನ್ನ ತಾವು ಕುಳಿತಿದ್ದ ಗ್ಯಾಲರಿಯನ್ನು (ಸ್ಟ್ಯಾಂಡ್ಸ್) ಸ್ವಚ್ಛಗೊಳಿಸಿದ್ದಾರೆ. ಈ ಕುರಿತ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದೆ.
ಇದರಲ್ಲಿ ಅಭಿಮಾನಿಗಳು ತಮ್ಮ ಸೀಟಿನ ಸುತ್ತಮುತ್ತಲಿದ್ದ ಕಸವನ್ನು ತೆಗೆಯುತ್ತಿರುವುದು ಕಂಡುಬರುತ್ತದೆ. ಪ್ಲಾಸ್ಟಿಕ್ ಬಾಟಲಿಗಳು, ಆಹಾರದ ಪ್ಯಾಕೆಟ್‌ಗಳು ಮತ್ತಿತರ ತ್ಯಾಜ್ಯ ವಸ್ತುಗಳನ್ನು ಸಂಗ್ರಹಿಸಿದ್ದಾರೆ. ಅನೇಕ ಅಭಿಮಾನಿಗಳು ಚೀಲದೊಳಗೆ ಕಸ ತುಂಬಿದ್ದಾರೆ. ಸಾರ್ವಜನಿಕ ಸ್ಥಳಗಳನ್ನು ಸ್ವಚ್ಛವಾಗಿಡುವ ವಿಷಯದಲ್ಲಿ ಜಪಾನ್‌ಗೆ ಉತ್ತಮ ಹೆಸರು ಇರುವ ಕಾರಣ, ಭಾರತೀಯ ಅಭಿಮಾನಿಗಳ ಈ ನಡೆಯು ಎಲ್ಲರ ಗಮನವನ್ನು ಸೆಳೆದಿದೆ.
ಜಪಾನಿನ ಸ್ವಚ್ಛತಾ ಸಂಪ್ರದಾಯವನ್ನು ಅನುಸರಿಸಿದ ಭಾರತೀಯ ಅಭಿಮಾನಿಗಳು: ಈ ದೃಶ್ಯಗಳು ಜಪಾನಿನ ಫುಟ್‌ಬಾಲ್ ಅಭಿಮಾನಿಗಳ ನಡವಳಿಕೆಯನ್ನು ನೆನಪಿಸುವಂತಿದ್ದವು.
ಇತ್ತೀಚೆಗೆ ನಡೆದ ಫಿಫಾ (FIFA) ವಿಶ್ವಕಪ್‌ನಲ್ಲೂ ಸಹ, ಪ್ರಮುಖ ಪಂದ್ಯಗಳ ನಂತರವೂ ಜಪಾನಿನ ಅಭಿಮಾನಿಗಳು ಕ್ರೀಡಾಂಗಣದ ಭಾಗಗಳನ್ನು ಸ್ವಚ್ಛಗೊಳಿಸುವುದು ಪದೇ ಪದೇ ಕಂಡುಬಂದಿತ್ತು. ಈ ಪದ್ಧತಿಯು ಜಪಾನ್‌ನ ಫುಟ್‌ಬಾಲ್ ಸಂಸ್ಕೃತಿಯ ಅವಿಭಾಜ್ಯ ಅಂಗವಾಗಿದ್ದು, ಪ್ರಪಂಚದಾದ್ಯಂತದ ಅಭಿಮಾನಿಗಳಿಂದ ಮೆಚ್ಚುಗೆಯನ್ನು ಗಳಿಸಿದೆ.
ತೀವ್ರ ಪೈಪೋಟಿಯಿಂದ ಕೂಡಿದ ಫೈನಲ್ ಪಂದ್ಯದ ನಂತರ ಭಾರತೀಯ ಅಭಿಮಾನಿಗಳು ಇದೇ ರೀತಿಯ ವಿಧಾನವನ್ನು ಅಳವಡಿಸಿಕೊಂಡಿರುವುದು ಸಂಭ್ರಮಾಚರಣೆಗೆ ಮತ್ತೊಂದು ವಿಶೇಷ ಆಯಾಮವನ್ನು ನೀಡಿತು. ಭಾರತ ಚಿನ್ನದ ಪದಕ ಗೆದ್ದುದನ್ನು ವೀಕ್ಷಿಸಿದ ತಕ್ಷಣ ಅಲ್ಲಿಂದ ಹೊರಡುವ ಬದಲು, ಅಭಿಮಾನಿಗಳು ತಾವು ಕುಳಿತಿದ್ದ ಜಾಗವನ್ನು ಸ್ವಚ್ಛವಾಗಿರಿಸಲು ಸಮಯ ಮೀಸಲಿಟ್ಟರು.
