ಬೀದರ್: ಬಸವ ಧರ್ಮವು ಕಾಯಕ, ದಾಸೋಹ ಮತ್ತು ಅನುಭಾವದ ಆಧಾರದ ಮೇಲೆ ನಿಂತಿದೆ. ಅನುಭಾವ ಸಾಹಿತ್ಯವೇ ವಚನ ಸಾಹಿತ್ಯವಾಗಿದೆ. ವಚನ ಸಾಹಿತ್ಯವು ದಲಿತ, ಉನ್ನತ, ಸ್ಪೃಶ್ಯ, ಅಸ್ಪೃಶ್ಯ, ಹೆಣ್ಣು, ಗಂಡು ಎಂಬ ಭೇದವನ್ನು ಅಳಿಸಿ ಹಾಕಿದ ಸಾಹಿತ್ಯವಾಗಿದೆ ಎಂದು ಹಿರಿಯ ಸಾಹಿತಿ ದೇಶಾಂಶ ಹುಡಗಿ ನುಡಿದರು.
ಅವರು ವಚನ ಜ್ಯೋತಿ ಹೊತ್ತ ವಿಶ್ವಮಾನವ ರಥಕ್ಕೆ ಚಾಲನೆ ನೀಡಿ ಮಾತನಾಡಿ, ತಾಲೂಕಿನ ಕೈಲಾಸಪುರದಲ್ಲಿ ಜಿಲ್ಲಾ ಪ್ರಥಮ ವಚನ ಸಾಹಿತ್ಯ ಸಮ್ಮೇಳನ ನಡೆಸುತ್ತಿರುವುದು ಹೆಮ್ಮೆಯ ಸಂಗತಿಯಾಗಿದೆ. ವಚನ ಜ್ಯೋತಿಯು ಬೀದರ ಜಿಲ್ಲೆಯ ತುಂಬೆಲ್ಲ ಒಂದು ತಿಂಗಳ ಕಾಲ ಸಂಚರಿಸಿ ವಚನ ಸಾಹಿತ್ಯ ಸಮ್ಮೇಳನದ ಪ್ರಚಾರ ಮಾಡಲಿದೆಯೆಂದು ಹೇಳಿದರು. ಪೀಠಾಧ್ಯಕ್ಷ ನಾಗಲಿಂಗಕವಿ, ವಿಜಯಕುಮಾರ ಪಾಟೀಲ ಖಾಜಾಪುರ, ವೈಜಿನಾಥ ಕಮಠಾಣೆ ಮಾತಾಡಿದರು. ರಥದ ಮೇಲ್ವಿಚಾರಣೆ ವಹಿಸಿದ ಬಸವಣಪ್ಪ ತಿಪ್ಪೆಟ್ಟಿ ಮತ್ತು ಶರಣಪ್ಪ ಹರಸೂರೆ, ಹಂಶಕವಿ, ಇದ್ದರು.
