ಚಾಮರಾಜನಗರ: ಇಂದು ಮಾನವನ ಆಹಾರ ಔಷಧವಾಗಿದೆ ಎಂದು ಕೃಷ್ಣ ಪ್ರಸಾದ್ ವಿಷಾದಿಸಿದರು.
ಅವರು ತಾಲೂಕಿನ ಹೊಂಡರಬಾಳು ಗ್ರಾಮದ ಅಮೃತಭೂಮಿಯಲ್ಲಿ 4 ದಿನಗಳ ರಾಷ್ಟ್ರ ಮಟ್ಟದ ರೈತ ಕಾರ್ಯಕರ್ತರ ಅಧ್ಯಯನ ಶಿಬಿರದಲ್ಲಿ ಮಾತನಾಡಿ, ಹಿಂದೆ ಸ್ಥಳೀಯವಾಗಿ ಉತ್ಪಾದನೆಯಾಗುತ್ತಿದ್ದ ತಳಿಗಳಿಂದ ಆಹಾರ ಬೆಳೆಗಳನ್ನು ಬೆಳೆಯುತ್ತಿದ್ದರು. ಈಗ ಕುಲಾಂತರಿ ಬೀಜಗಳ ಹಾವಳಿಯಿಂದಾಗಿ ಬೀಜಗಳ ಮೇಲೆ ಔಷಧದ ಪ್ರವೇಶವಾಗಿ ತಿನ್ನುವ ಆಹಾರವೇ ಔಷಧವಾಗಿದೆ. ಅಕ್ಕಡಿ ಪದ್ಧತಿಯಲ್ಲಿ ಬೇಸಾಯ ಮಾಡಿ ರಾಗಿ, ಜೋಳ, ತೊಗರಿ, ಅಲಸಂದೆ, ಅವರೆ, ಎಳ್ಳುಗಳನ್ನು ಒಂದೇ ಭೂಮಿಯಲ್ಲಿ ಏಕಕಾಲದಲ್ಲಿ ಬೆಳೆಯುತ್ತಿದ್ದರು. ಆಗ ಕಾಳುಗಳು ಮನುಷ್ಯನಿಗೆ ಆಹಾರವಾದರೆ ಕಡಿಗಳು ಜಾನುವಾರುಗಳ ಮೇವಾಗುತ್ತಿತ್ತು. ಆದರೆ ಆ ಪದ್ಧತಿ ನಶಿಸಿ ಹೋಗುತ್ತಿದೆ ಎಂದರು.
ಚುಕ್ಕಿ ನಂಜುಂಡಸ್ವಾಮಿ, ಚಾಮರಸ ಪಾಟೀಲ್, ರಾಕೇಶ್ ಟಿಕಾಯತ್, ಸೇರಿದಂತೆ ಹಲವರಿದ್ದರು.
