ಚಾಮರಾಜನಗರ: ವಿವಾಹ ನಿಶ್ಚಯವಾಗಿದ್ದ ಬಾವಿ ಪತಿ ಅಪಘಾತದಲ್ಲಿ ಮೃತಪಟ್ಟಿದ್ದರಿಂದ ಮನನೊಂದು ಯುವತಿ ನೇಣಿಗೆ ಶರಣಾಗಿರುವ ಘಟನೆ ನಗರದ ಗಾಳಿಪುರ ಬಡಾವಣೆಯಲ್ಲಿ ಮಂಗಳವಾರ ನಡೆದಿದೆ. ಗಾಳೀಪುರ ಬಡಾವಣೆಯ ನಾಗರಾಜು ಎಂಬುವರ ಪುತ್ರಿ ನಾಗಲಕ್ಷ್ಮಿ (22) ಗೆ ಮೈಸೂರು ಮೂಲದ ಯವಕನೊಂದಿಗೆ ತಿಂಗಳ ಹಿಂದಷ್ಟೇ ವಿವಾಹ ನಿಶ್ಚಯವಾಗಿತ್ತು. ಆತ ಕೆಲ ದಿನಗಳ ಹಿಂದೆ ರಸ್ತೆ ಅಪಘಾತದಲ್ಲಿ ಸಾವನಪ್ಪಿದ್ದ ಎನ್ನಲಾಗಿದೆ. ಇದರಿಂದ ಮನನೊಂದಿದ್ದ ಆಕೆ ನೇಣಿಗೆ ಶರಣಾಗಿದ್ದಾಳೆ. ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಆನೆ ದಾಳಿಯಿಂದ ಫಸಲು ಹಾಳು, ಜನರಲ್ಲಿ ಆತಂಕ
ಗುಂಡ್ಲುಪೇಟೆ: ತಾಲೂಕಿನ ಹಂಗಳ ಗ್ರಾಮದಲ್ಲಿ ಕಾಡಾನೆ ದಾಳಿಗೆ ರೈತನ ಸೂರ್ಯಕಾಂತಿ, ಬೀಟ್ರೋಟ್, ಜೋಳದ ಫಸಲು ನಾಶವಾಗಿದೆ. ತಾಲೂಕಿನ ಹಂಗಳ ಗ್ರಾಮದ ಸುತ್ತ ಹುಲಿ- ಚಿರತೆಗಳ ಹಾವಳಿಯಿಂದ ರೈತ ಹಾಗು ಜನರು ಆತಂಕಗೊಂಡಿದ್ದರು. ಸೋಮವಾರ ರಾತ್ರಿ ಹಂಗಳ ಗ್ರಾಮದ ಬಸಪ್ಪ ಎಂಬ ರೈತರ ಜಮೀನಿನಲ್ಲಿ ಬೆಳೆದಿದ್ದ ಫಸಲುನ್ನು ತುಳಿದು ನಾಶಪಡಿಸಿವೆ. ಹಿಮವದ್ ಗೋಪಾಲಸ್ವಾಮಿ ಬೆಟ್ಟದ ತಪ್ಪಲಿನಲ್ಲಿರುವ ಬಸಪ್ಪರವರ ಜಮೀನಿಗೆ ಕಾಡು ಪ್ರಾಣಿಗಳ ದಾಳಿ ಶುರುವಾಗಿರುವುದು ರೈತರಲ್ಲಿ ಆತಂಕ ಮೂಡಿದೆ. ಒಂದೆಡೆ ಮುಂಗಾರು ಮಳೆ ಕೈಕೊಟ್ಟರೆ ಮತ್ತೊಂದೆಡೆ ಕಾಡು ಪ್ರಾಣಿಗಳ ಹಾವಳಿಯಿಂದಈ ಭಾಗದ ರೈತರು ಧೃತಿಗೆಟ್ಟಿದ್ದಾರೆ.
ನಿರುಪಯುಕ್ತ ಕೊಳವೆ ಬಾವಿ ಮುಚ್ಚಿಸಲು ಸೂಚನೆ
ಚಾಮರಾಜನಗರ: ಹನೂರು ಪಟ್ಟಣ ಪಂಚಾಯಿತಿ ವ್ಯಾಪ್ತಿಯ ಸರ್ಕಾರಿ, ಖಾಸಗಿ ಹಾಗೂ ಸಾರ್ವಜನಿಕರುಗಳಿಗೆ ಸೇರಿದ ಜಮೀನು ಹಾಗೂ ಇತರೆ ಪ್ರದೇಶಗಳಲ್ಲಿ ಕುಡಿಯುವ ನೀರು ಅಥವಾ ವ್ಯವಸಾಯದ ಉದ್ದೇಶಗಳಿಗಾಗಿ ಕೊರೆಯಿಸಿರುವ ಬೋರ್ವೆಲ್ಗಳಲ್ಲಿ ನೀರು ಬಾರದೆ ಅಥವಾ ಇನ್ನಿತರ ಕಾರಣಗಳಿಂದ ಕೊಳವೆ ಬಾವಿಗಳು ನಿರುಪಯುಕ್ತಗೊಂಡಿದ್ದಲ್ಲಿ, ಕೂಡಲೇ ಮುಚ್ಚಿಸುವಂತೆ ಪಟ್ಟಣ ಪಂಚಾಯಿತಿ ತಿಳಿಸಿದೆ. ತೆರೆದ ನಿರುಪಯುಕ್ತ ಕೊಳವೆ ಬಾವಿಗಳಿಂದ ಸಾರ್ವಜನಿಕರಿಗೆ ತೊಂದರೆ ಅಥವಾ ಅಪಘಾತವಾದಲ್ಲಿ ಸಂಬಂಧಪಟ್ಟ ಕೊಳವೆ ಬಾವಿಯ ಮಾಲೀಕರನ್ನೇ ನೇರ ಹೊಣೆಗಾರರನ್ನಾಗಿ ಮಾಡಲಾಗುವುದು ಹಾಗೂ ಸೂಕ್ತ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಹನೂರು ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ಟಿ.ಎನ್. ಗಿರೀಶ್ ತಿಳಿಸಿದ್ದಾರೆ.
