ಚನ್ನಗಿರಿ: ತಾಲೂಕಿನ ಸಂತೇಬೆನ್ನೂರು ಗ್ರಾಮದಲ್ಲಿ ಮಾವು ಬೆಳೆಗಾರರ ಕಾರ್ಯಗಾರವು ಫೆಬ್ರವರಿ 24ರಂದು ಗ್ರಾಮದ ನಂಜುಡೇಶ್ವರ ಸಮುದಾಯ ಭವನದಲ್ಲಿ ನಡೆಯಲಿದೆ ಎಂದು ರಾಜ್ಯ ಕಬ್ಬು ಬೆಳೆಗಾರರ ಸಂಘದ ಪ್ರಧಾನ ಕಾರ್ಯದರ್ಶಿ ತೇಜಸ್ವಿ ವಿ. ಪಟೇಲ್ ಹೇಳಿದರು.
ಅವರು ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಕೈಗಾರಿಕೋದ್ಯಮಿಗಳು ಇವರು ಉತ್ಪಾದನೆ ಮಾಡಿದ ವಸ್ತುಗಳಿಗೆ ಯೋಗ್ಯ ಬೆಲೆ ಪಡೆಯುತ್ತಾರೆ. ಒಬ್ಬ ರೈತ ಉತ್ಪಾದನೆ ಮಾಡಿದ ಬೆಳೆಗೆ ಸೂಕ್ತ ಬೆಲೆ ಸಿಗದೆ ಸಾಲಗಾರನಾಗುತ್ತಿದ್ದಾನೆ. ಚನ್ನಗಿರಿ ತಾಲೂಕಿನಲ್ಲಿ ಸಾವಿರಾರು ಹೆಕ್ಟೇರ್‌ಗಳಲ್ಲಿ ಮಾವಿನ ಫಸಲನ್ನು ರೈತರೂ ಬೆಳೆಯುತ್ತಿದ್ದಾರೆ. ಅದರಲ್ಲಿ ಸಂತೇಬೆನ್ನೂರು ಹೋಬಳಿಯಲ್ಲಿ ಎರಡು ಸಾವಿರ ಹೆಕ್ಟೇರ್ ಪ್ರದೇಶಗಳಲ್ಲಿ ಮಾವಿನ ಬೆಳೆಯನ್ನು ಬೆಳೆಯುತ್ತಿದ್ದು, ಗ್ರಾಮದಲ್ಲಿ ಬೆಳೆದ ಮಾವು ವಿದೇಶಕ್ಕೆ ರಫ್ತಾಗುತ್ತದೆ. ಆದರೆ ರೈತರಿಗೆ ಸಿಗುವಂತ ಬೆಲೆ ಮಾತ್ರ ಕಡಿಮೆಯಾಗಿರುತ್ತದೆ ಎಂದು ತಿಳಿಸಿದರು.
ಮಾರುಕಟ್ಟೆ ಹಿಡಿತವಿಲ್ಲ: ಬೆಳೆಯುವ ವಸ್ತುಗಳಿಗೆ ಬೆಲೆ ಮತ್ತು ಮಹತ್ವವಿದ್ದು ರೈತರುಗಳಿಗೆ ಮಾರುಕಟ್ಟೆಯ ಅರಿವಿನ ಕೊರತೆಯಿಂದ ಮಾರುಕಟ್ಟೆಯ ಮೇಲೆ ಹಿಡಿತ ಸಾಧಿಸಲು ಸಾಧ್ಯವಾಗುತ್ತಿಲ್ಲ. ಮಾರುಕಟ್ಟೆಗಳ ಮಹತ್ವ ತಿಳಿಸುವ ಸಲುವಾಗಿ ಒಂದು ದಿನದ ಕಾರ್ಯಾಗಾರವನ್ನು ಏರ್ಪಡಿಸಲಾಗಿದೆ. ಈ ಕಾರ್ಯಗಾರಕ್ಕೆ ಬೆಂಗಳೂರಿನ ಕೃಷಿ ವಿ.ವಿ ಉಪನ್ಯಾಸಕ ಡಾ.ಪಿ.ಕೆ. ಮಂದಣ್ಣ, ಟಿ.ಎನ್. ವೆಂಕಟರೆಡ್ಡಿ, ನಾರಾಯಣ ಸ್ವಾಮಿ, ಜಹೀರ್‌ಪಾಷ, ಉಮೇಶ್ ಶಂಕರ್ ಮಿರ್ಜಿ ಭಾಗವಹಿಸಲಿದ್ದಾರೆ.
ಕಾರ್ಯಗಾರದ ಸದುಪಯೋಗವನ್ನು ದಾವಣಗೆರೆ ಜಿಲ್ಲೆಯ ಮಾವು ಬೆಳೆಗಾರರು ಪಡೆದುಕೊಳ್ಳುವಂತೆ ತಿಳಿಸಿದರು. ಪತ್ರಿಕಾಗೋಷ್ಠಿಯಲ್ಲಿ ರೈತರಾದ ಉಮೇಶ್ ಕೆ. ಕೋಡಿ, ಟಿ.ಎಸ್. ಸತೀಶ್ ಉಪಸ್ಥಿತರಿದ್ದರು.
