ಚನ್ನಗಿರಿ: ಇಲ್ಲಿನ ಪಟ್ಟಣ ಪಂಚಾಯಿತಿ ಚುನಾವಣೆಗೆ ನಾಮಪತ್ರ ಸಲ್ಲಿಕೆಯ ಭರಾಟೆ ಮುಗಿದಿದೆ. ಸೋಮವಾರ ನಾಮಪತ್ರಗಳ ಪರಿಶೀಲನೆಯನ್ನು ಅರ್ಜಿಗಳನ್ನು ಸಲ್ಲಿಸಿದ ಉಮೇದುವಾರರ ಸಮಕ್ಷಮದಲ್ಲಿ ನಡೆಸಲಾಯಿತು.
ಎಲ್ಲಾ ರಾಜಕೀಯ ಪಕ್ಷಗಳಿಂದ ಸಲ್ಲಿಕೆಯಾದ 93 ನಾಮಪತ್ರಗಳಲ್ಲಿ 2 ನಾಮಪತ್ರಗಳು ತಿರಸ್ಕೃತವಾಗಿವೆ ಎಂದು ಚುನಾವಣಾಧಿಕಾರಿತಾಳಿಕಟ್ಟೆ ಸೋಮಶೇಖರಪ್ಪ ತಿಳಿಸಿದ್ದಾರೆ. 12ನೇ ವಾರ್ಡ್‌ನಲ್ಲಿ ರುಕ್ಮಿಣಿ ಎಂಬುವರು, ಕಾಂಗ್ರೆಸ್ ಪಕ್ಷದಿಂದ ಸ್ಪರ್ಧೆ ಬಯಸಿ ನಾಮಪತ್ರ ಸಲ್ಲಿಸಿದ್ದರು.
ಈ ಅಭ್ಯರ್ಥಿ ಕಾಂಗ್ರೆಸ್ ಪಕ್ಷದ ಅಧಿಕೃತ ಬಿ- ಫಾರಂ ನೀಡದ ಕಾರಣ ತಿರಸ್ಕರಿಸಲ್ಪಟ್ಟಿದೆ ಎಂದು ತಿಳಿಸಿದ್ದು, ಇದೇ ವಾರ್ಡ್‌ನ ರಜೀಯಾ ಬಾನು ಬಿಎಸ್‌ಆರ್ ಪಕ್ಷದಿಂದ ನಾಮಪತ್ರ ಸಲ್ಲಿಸಿದ್ದು ಪಕ್ಷದ ಅಧಿಕೃತಡಿ- ಫಾರಂ ಇಲ್ಲದ ಕಾರಣದಿಂದ ಈ ಅಭ್ಯರ್ಥಿಯನ್ನು ಪಕ್ಷೇತರರನ್ನಾಗಿ ಪರಿಗಣಿಸಲಾಗಿದೆ.
15ನೇ ವಾರ್ಡ್‌ನಲ್ಲಿ ಕೆಜೆಪಿ ಪಕ್ಷದಿಂದ ಪಾರಮ್ಮ ಮತ್ತು ಪುಷ್ಪಲತಾ ಜಗದೀಶ್ ಇವರಿಬ್ಬರಿಗೂ ಪಕ್ಷದ ಡಿ -ಫಾರಂ ಸಿಕ್ಕಿದೆ. ಇವರಲ್ಲಿ ಪಾರಮ್ಮ ಎಂಬವರ ನಾಮಪತ್ರದಲ್ಲಿ ಅಭ್ಯರ್ಥಿಯನ್ನು ಸೂಚಿಸುವ ಸೂಚಕರ ಮತದಾರರ ಪಟ್ಟಿಯ ಕ್ರಮಸಂಖ್ಯೆ ನಮೂದಿಸದ ಕಾರಣ ಈ ನಾಮಪತ್ರ ತಿರಸ್ಕರಿಸಲಾಗಿದೆ ಎಂದು ಮಾಹಿತಿ ನೀಡಿದರು.
ಇನ್ನುಳಿದಂತೆ 91 ಜನರ ನಾಮಪತ್ರಗಳು ಕ್ರಮಬದ್ಧವಾಗಿದೆ. ತಮ್ಮ ಉಮೇದುವಾರಿಕೆಯನ್ನು ವಾಪಸ್ ಪಡೆಯಲು ಇಚ್ಛಿಸುವವರು ಫೆ.26ರ ಬೆಳಿಗ್ಗೆ 11 ಗಂಟೆಯಿಂದ 27ರ ಮಧ್ಯಾಹ್ನ 3 ಗಂಟೆವರೆಗೆ ಕಾಲಾವಕಾಶವಿದೆ ಎಂದು ಈ ಸಂದರ್ಭದಲ್ಲಿ ಮತ್ತೊಬ್ಬ ಚುನಾವಣಾಧಿಕಾರಿ ಪ್ರಕಾಶ್ ತಿಳಿಸಿದ್ದಾರೆ.
