ನಾಳೆ ಜಿಲ್ಲಾ ಭೋವಿ ಸಮಾವೇಶ

ದಾವಣಗೆರೆ: ಸಿದ್ದರಾಮೇಶ್ವರ ಸ್ವಾಮಿ ಪ್ರಾಣ ಪ್ರತಿಷ್ಠಾಪನೆ, ದೇವಸ್ಥಾನ ಉದ್ಘಾಟನೆ ಹಾಗೂ ಜಿಲ್ಲಾ ಭೋವಿ ಸಮಾಜದ ಸಮಾವೇಶ ಜ.24ರಂದು ನಗರದ ಚಿಕ್ಕಮ್ಮಣ್ಣಿ ದೇವರಾಜ ಅರಸ್ ಬಡಾವಣೆಯ ಸಿದ್ದರಾಮೇಶ್ವರ ದೇವಸ್ಥಾನದ ಆವರಣದಲ್ಲಿ ನಡೆಯಲಿದೆ.
ನಗರದಲ್ಲಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಸಮಾಜದ ಜಿಲ್ಲಾ ಗೌರವಾಧ್ಯಕ್ಷ ಅರಸೀಕೆರೆ ವಿ. ತಿಮ್ಮಪ್ಪ, ಅಂದು ಬೆಳಿಗ್ಗೆ 12ಕ್ಕೆ ಭೋವಿ ಗುರುಪೀಠದ ಇಮ್ಮಡಿ ಸಿದ್ದರಾಮೇಶ್ವರ ಸ್ವಾಮೀಜಿ ಸಾನ್ನಿಧ್ಯದಲ್ಲಿ ಸಮಾಜದ ಜಿಲ್ಲಾ ಅಧ್ಯಕ್ಷರಾದ ಎಚ್. ಹೇಮರಾಜ ಅಧ್ಯಕ್ಷತೆಯಲ್ಲಿ ಸಚಿವ ಎಸ್.ಎ. ರವೀಂದ್ರನಾಥ ಸಮಾರಂಭ ಉದ್ಘಾಟಿಸುವರು ಎಂದರು.
ಸಂಸದ ಜಿ.ಎಂ. ಸಿದ್ದೇಶ್ವರ ದೇವಸ್ಥಾನವನ್ನು, ಶಾಸಕ ಡಾ. ಶಾಮನೂರು ಶಿವಶಂಕರಪ್ಪ ಕಳಸ ಉದ್ಘಾಟಿಸುವರು.
ಕೆಪಿಸಿಸಿ ಸದಸ್ಯ, ಸಮಾಜದ ಮುಖಂಡ ಡಾ. ವೈ. ರಾಮಪ್ಪ, ಸಚಿವ ಎಂ.ಪಿ. ರೇಣುಕಾಚಾರ್ಯ, ಮುಖ್ಯ ಸಚೇತಕ ಡಾ. ಎ.ಎಚ್. ಶಿವಯೋಗಿಸ್ವಾವು, ಶಾಸಕಾರ ಎಸ್.ವಿ. ರಾಮಚಂದ್ರ, ಎಂ. ಬಸವರಾಜನಾಯ್ಕ, ಗೂಳಿಹಟ್ಟಿ ಶೇಖರ, ಎಂ. ಚಂದ್ರಪ್ಪ, ಜಿ. ಕರುಣಾಕರ ರೆಡ್ಡಿ, ಸಂಸದ ಜನಾರ್ದನಸ್ವಾಮಿ, ಕೆಪಿಸಿಸಿ ಸದಸ್ಯ, ಸಮಾಜದ ಮುಖಂಡ ಡಿ. ಬಸವರಾಜ, ಮಾಡಾಳ್ ವಿರೂಪಾಕ್ಷಪ್ಪ ಸೇರಿದಂತೆ ಅನೇಕರು ಪಾಲ್ಗೊಳ್ಳುವರು ಎಂದು ಅವರು ಹೇಳಿದರು.
ಅದೇ ದಿನ ಸಮಾಜದ ಪ್ರತಿಭಟನೆ: ನ್ಯಾಯಮೂರ್ತಿ ಎ.ಜೆ. ಸದಾಶಿವ ಆಯೋಗದ ವರದಿಯನ್ನು ವಿರೋಧಿಸಿ ಭೋವಿ ಪ್ರತಿಭಟನಾ ಮೆರವಣಿಗೆ ನಡೆಸಲಿದ್ದಾರೆ ಎಂದರು.
ನ್ಯಾ. ಸದಾಶಿವ ಆಯೋಗದ ವರದಿ ವಿರುದ್ಧ ಸರ್ಕಾರಕ್ಕೆ ಮನವಿ ಪತ್ರ ಅರ್ಪಿಸಲಿದ್ದೇವೆ. ಸಮಾಜ ಬಾಂಧವರು ಹೆಚ್ಚಿನ ಸಂಖ್ಯೆಯಲ್ಲಿ ಈ ಹೋರಾಟಕ್ಕೆ ಪಾಲ್ಗೊಳ್ಳುವಂತೆ ಅವರು ಕರೆ ನೀಡಿದರು.
ಭೋವಿ ಸಮಾಜದ ಜಿಲ್ಲಾಧ್ಯಕ್ಷ ಎಚ್. ಹೇಮರಾಜ, ಪ್ರಧಾನ ಕಾರ್ಯದರ್ಶಿ, ವಕೀಲ ವಿ. ಗೋಪಾಲ, ಹಿರಿಯ ಉಪಾಧ್ಯಕ್ಷ ಎಚ್. ಜಯಣ್ಣ, ವಿ. ಶ್ರೀನಿವಾಸ, ಮಂಜಣ್ಣ, ನೀರ್ಥಡಿ ಎನ್.ಡಿ. ಗುರುಮೂರ್ತಿ, ಚನ್ನಗಿರಿ ಚೌಡಪ್ಪ, ವಕ್ತಾರ ಎಸ್. ರವಿಕುಮಾರ ಮತ್ತಿತರರು ಇದ್ದರು.