ಶಿವಮೊಗ್ಗ: ಇಲ್ಲಿನ ಚಿಟ್ ಫಂಡ್ ಕಚೇರಿಗೆ ನುಗ್ಗಿದ ಕಳ್ಳರು ಸುಮಾರು ರು. 11.5 ಲಕ್ಷ ನಗದು ಕಳವು ಮಾಡಿದ ಘಟನೆ ನಗರದ ನೆಹರೂ ರಸ್ತೆಯಲ್ಲಿ ನಡೆದಿದೆ. ಮಾರ್ಗದರ್ಶಿ ಚಿಟ್ ಫಂಡ್ ಕಚೇರಿ ಹಿಂಭಾಗದ ಕಿಟಕಿಯ ಗ್ರಿಲ್‌ಗಳನ್ನು ಗ್ಯಾಸ್ ಕಟರ್ ಬಳಸಿ ಮುರಿದು ಒಳನುಗ್ಗಿರುವ ಕಳ್ಳರು ಹಣ ಕಳವು ಮಾಡಿದ್ದಾರೆ. ಈ ಸಂಬಂಧ ಕೋಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಕಮಲಾ ನೆಹರೂ ಕಾಲೇಜಿನ ಹಿಂಭಾಗದ ಮೂಲಕ ಕಟ್ಟಡದ ಕಿಟಕಿ ಬಾಗಿಲು ತೆರೆದು ಒಳಪ್ರವೇಶಿಸಿರುವ ದುಷ್ಕರ್ಮಿಗಳು ಗ್ಯಾಸ್ ಕಟರ್ ಯಂತ್ರದ ನೆರವಿನಿಂದ ಸ್ಟ್ರಾಂಗ್ ರೂಂ ಬಾಗಿಲು ಮುರಿದು ಹಣ ದೋಚಿದ್ದಾರೆ. ಗ್ಯಾಸ್ ಕಟರ್ ಬಳಸಿದ್ದರಿಂದ ಬೆಂಕಿಯ ಕಿಡಿಗಳು ತಾಗಿ ಚೆಕ್ ಹಾಗೂ ನೋಟುಗಳು ಸಹ ಸುಟ್ಟುಹೋಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಭಾನುವಾರ ಕಚೇರಿಯಲ್ಲಿ ಚೀಟಿ ವ್ಯವಹಾರ ನಡೆದಿದ್ದು, ವಾಡಿಕೆಯಂತೆ ಸೋಮವಾರ ರಜೆ ನೀಡಲಾಗಿತ್ತು. ಸ್ಥಳಕ್ಕೆ ಎಸ್ಪಿ ಕೌಶಲೇಂದ್ರ ಕುಮಾರ್ ಸೇರಿದಂತೆ ಹಲವು ಅಧಿಕಾರಿಗಳು ಭೇಟಿ ನೀಡಿದ್ದರು.
