ಸದಾಚಾರದಿಂದ ಸಾರ್ಥಕ ಜೀವನ

ಜಯೇಂದ್ರಪುರಿ ಶ್ರೀ ೤ ಹುಲಕೋಟಿಯಲ್ಲಿ ಕೈಲಾಸ ಆಶ್ರಮದ 21ನೇ ವಾರ್ಷಿಕೋತ್ಸವ


ಕನ್ನಡಪ್ರಭ ವಾರ್ತೆ, ಗದಗ, ಜ. 28
ಆಧುನಿಕತೆ ಬೆಳೆದಂತೆ ನ್ಯಾಯ, ನೀತಿ, ಸದಾಚಾರಗಳ ಪ್ರವೃತ್ತಿಯು ಕ್ಷೀಣಿಸುತ್ತಿದ್ದು, ಹಿಂದೆ ಬಾಳಿಹೋದ ಮಹಾನ್ ವ್ಯಕ್ತಿಗಳ ಜೀವನಾದರ್ಶಗಳನ್ನು ಅಳವಡಿಸಿಕೊಳ್ಳುವ ಮೂಲಕ ಜೀವನವನ್ನು ಸಾರ್ಥಕಗೊಳಿಸಿಕೊಳ್ಳುವಂತೆ ಕೈಲಾಸ ಆಶ್ರಮದ ಪೀಠಾಧಿಪತಿ ಜಯೇಂದ್ರಪುರಿ ಶ್ರೀ ನುಡಿದರು.
ಅವರು ಸೋಮವಾರ ತಾಲೂಕಿನ ಹುಲಕೋಟಿ ಗ್ರಾಮದಲ್ಲಿ ಕೈಲಾಸ ಆಶ್ರಮದ 21ನೇ ವಾರ್ಷಿಕೋತ್ಸವ ಕಾರ್ಯಕ್ರಮದ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದರು. ಆಚಾರಗಳು ಭೌಗೋಳಿಕ ಪರಿಸರಕ್ಕೆ ಅನುಗುಣವಾಗಿ ಬದಲಾವಣೆಯಾಗುತ್ತಿರುತ್ತವೆಯಾದರೂ ಸದಾಚಾರ ಎಲ್ಲೆಡೆಯೂ ಒಂದೇ ಆಗಿರುತ್ತದೆ. ಅವರವರ ಭಾವಕ್ಕೆ ತಕ್ಕಂತೆ, ಅವರವರ ಸಂಸ್ಕೃತಿಗೆ ತಕ್ಕಂತೆ ಬಳಸಿಕೊಳ್ಳುತ್ತಿವೆಯಾದರೂ ಎಲ್ಲ ಧರ್ಮ, ಜಾತಿಯಲ್ಲಿ ಗುರುಹಿರಿಯರನ್ನು ಗೌರವದಿಂದ ಕಾಣುವಂತೆ ಸೂಚಿಸುತ್ತವೆ. ತಾಯಿಯ ಪಾದದಲ್ಲಿಯೇ ಸ್ವರ್ಗವಿದ್ದು, ಮಕ್ಕಳು ಪಾಲಕರನ್ನು ಪ್ರೀತಿಯಿಂದ ಕಾಣುವ ಮೂಲಕ ಅವರಲ್ಲಿರುವ ಉತ್ತಮ ಆದರ್ಶಗಳನ್ನು ತಮ್ಮ ಜೀವನದಲ್ಲಿ ಬಳಸಿಕೊಳ್ಳಬೇಕಾಗಿದೆ.
ಆಧುನಿಕತೆಯ ಭರಾಟೆಯಲ್ಲಿ ಯುವಕರು ದುಶ್ಚಟಗಳ ದಾಸರಾಗುತ್ತಿರುವುದು ವಿಷಾಧದ ಸಂಗತಿ. ಇಂದು ಎಲ್ಲೆಡೆ ದುರಾಚಾರ, ಭ್ರಷ್ಟಾಚಾರ, ಅನ್ಯಾಯ, ಮೋಸ ತಾಂಡವವಾಡುತ್ತಿದ್ದು, ಇದೇ ರೀತಿ ಮುಂದುವರೆದಲ್ಲಿ ಭೂಮಿಯ ವಿನಾಶ ಖಂಡಿತ. ಎಲ್ಲರೂ ಸುಖ, ಸಮೃದ್ಧಿಯಿಂದ ಬಾಳಲು ಸದಾಚಾರ ಅತ್ಯವಶ್ಯಕವಾಗಿದೆ. ನಾಡಿನ ಏಳ್ಗೆಗಾಗಿ ಶ್ರಮಿಸುತ್ತಿರುವ ಶರಣರು ನೀಡುವ ಉತ್ತಮ ಸಂದೇಶಗಳನ್ನು ಪಡೆದುಕೊಳ್ಳುವ ಮೂಲಕ ಯುವ ಜನಾಂಗ ಉತ್ತಮ ಸಮಾಜ ನಿರ್ಮಾಣ ಮಾಡುವಲ್ಲಿ ಕೈಜೋಡಿಸುವಂತೆ ಸೂಚಿಸಿದರು.
ಅತಿಥಿಗಳಾಗಿ ಆಗಮಿಸಿದ್ದ ಧಾರವಾಡದ ಮುರುಘಾಮಠದ ಮಲ್ಲಿಕಾರ್ಜುನ ಶ್ರೀಗಳು, ಹಾವೇರಿಯ ಹುಕ್ಕೇರಿ ಮಠದ ಸದಾಶಿವ ಶ್ರೀಗಳು ಮಾತನಾಡಿ, ಜನರು ಸರಿ, ತಪ್ಪಿನ ಅರಿವು ಹೊಂದುವುದು ಅತ್ಯವಶ್ಯಕವಾಗಿದೆ. ತಾನು ತಪ್ಪು ಮಾಡುತ್ತಿರುವುದನ್ನು ಗಮನಿಸಿ ಸರಿದಾರಿಗೆ ಹೋಗುವ ಹಾಗೂ ಸನ್ಮಾರ್ಗದ ಕಡೆಗೆ ಹೋಗುವ ಪ್ರವೃತ್ತಿಯನ್ನು ಬೆಳೆಸಿಕೊಳ್ಳಬೇಕಾಗಿದೆ. ಸದಾಚಾರ ಎಂದರೆ ಉತ್ತಮ ಆಚಾರ ಎಂದರ್ಥ. ಮನುಷ್ಯನಾದವನು ತನ್ನ ಬದುಕಿನ ಅವಧಿಯಲ್ಲಿ ಒಳ್ಳೆಯ ಆಚಾರ, ವಿಚಾರಗಳನ್ನು ಹೊಂದುವ ಮೂಲಕ ಇತರರಿಗೆ ಮಾದರಿಯಾಗಿರಬೇಕು ಎಂದರು.
ಗದಗನ ಶಿವಾನಂದ ಮಠದ ಅಭಿನವ ಅನ್ನದಾನ ಶ್ರೀಗಳು, ರಾಮಕೃಷ್ಣ ವಿವೇಕಾನಂದ ಆಶ್ರಮದ ನಿರ್ಭಯಾನಂದ ಶ್ರೀಗಳು, ಶಿರಹಟ್ಟಿಯ ಫಕ್ಕೀರೇಶ್ವರ ಸಿದ್ಧರಾಮ ಶ್ರೀಗಳು, ಬೂದೀಶ್ವರ ಸಂಸ್ಥಾನಮಠದ ಬೂದೀಶ್ವರ ಶ್ರೀಗಳು, ಅಕ್ಕಿಆಲೂರಿನ ಶಿವಬಸವ ಶ್ರೀಗಳು ಆಶೀರ್ವಚನ ನೀಡಿದರು. ಮಾಜಿ ಸಚಿವ ಎಚ್.ಕೆ. ಪಾಟೀಲ್ ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಈ ಸಂದರ್ಭದಲ್ಲಿ ಮಾಜಿ ಸಚಿವ ಎ.ಎಂ. ಹಿಂಡಸಗೇರಿ, ಮಾಜಿ ಶಾಸಕ ಡಿ.ಆರ್. ಪಾಟೀಲ, ಜಿ.ಎಸ್. ಗಡ್ಡದ್ದೇವರಮಠ, ಅಶೋಕ ಮಂದಾಲಿ, ಉಮರಫಾರೂಕ ಹುಬ್ಬಳ್ಳಿ, ಎಚ್.ಆರ್. ನಾಯಕ, ಎಂ.ಎಂ. ಪಾಟೀಲ ಮುಂತಾದವರು ಉಪಸ್ಥಿತರಿದ್ದರು. ಜೆ.ಕೆ. ಜಮಾದಾರ ಹಾಗೂ ಕೈಲಾಸ ಆಶ್ರಮದ ವಿದ್ಯಾನಂದಪುರಿ ಶ್ರೀ ನಿರೂಪಿಸಿದರು.