ಆಳಂದ: ಮಾರ್ಚ್ 7ರಂದು 23 ವಾರ್ಡ್‌ಗಳಿಗೆ ನಡೆಯಲಿರುವ ಸ್ಥಳೀಯ ಪುರಸಭೆ ಚುನಾವಣೆಗೆ ಸ್ಪರ್ಧೆ ಬಯಸಿ ಶುಕ್ರವಾರ ಒಂದೇ ದಿನಕ್ಕೆ ವಿವಿಧ ಪಕ್ಷಗಳಿಂದ 45 ಮಂದಿ ನಾಮಪತ್ರ ಸಲ್ಲಿಕೆಯಾದವು. ಇದಕ್ಕೂ ಮುನ್ನದಿನ ಗುರುವಾರ ಒಂದು ನಾಮಪತ್ರ ಸಲ್ಲಿಕೆಯಾಗಿದೆ ಎಂದು ತಹಸೀಲ್ದಾರ್ ಪರಮೇಶ್ವರ ಕೆ. ಸ್ವಾಮಿ ತಿಳಿಸಿದ್ದಾರೆ. ಫೆ. 16ರಂದು ಆರಂಭಗೊಂಡ ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಶನಿವಾರ 23ರಂದು ಕೊನೆಯಾಗಲಿದೆ. ಈ ದಿನ ಘಟಾನುಘಟಿಗಳು ನಾಮಪತ್ರ ಸಲ್ಲಿಸಲಿದ್ದಾರೆ.
ಮುಂದಿನ ವಿಧಾನಸಭೆ ಚುನಾವಣೆಗಳಿಗೆ ದಿಕ್ಸೂಚಿಯಾಗಲಿರುವ ಈ ಚುನಾವಣೆಯಲ್ಲಿ ಸ್ಥಳೀಯ ಪುರಸಭೆಯನ್ನು ತಮ್ಮ ಹತೊಟಿಗೆ ತೆಗೆದುಕೊಳ್ಳಲು ಶಾಸಕ ಸುಭಾಷ ಗುತ್ತೇದಾರ ಹಾಗೂ ಮಾಜಿ ಉಪಸಭಾಪತಿ ಬಿ.ಆರ್. ಪಾಟೀಲ ಅಪರೋಕ್ಷವಾಗಿ ತೀವ್ರ ಕಸರತ್ತು ನಡೆಸಿದ್ದಾರೆ. ಮತ್ತೊಂದಡೆ ಈ ಎರಡೂ ಶಕ್ತಿಗಳನ್ನು ಹಿಮ್ಮೆಟ್ಟಿಸಬೇಕೆಂಬ ಸಂಚುಹಾಕಿರುವ ಕಾಂಗ್ರೆಸ್ ಪಕ್ಷವು ತನ್ನದೆಯಾದ ಹೈಕಮಾಂಡ್‌ನ ತಂತ್ರಗಾರಿಕೆಯಿಂದ ಚುನಾವಣೆಯ ಪೈಪೋಟಿ ಒಡ್ಡಲು ಒಳಸಂಚು ರೂಪಿಸುತ್ತಿದೆ. ವಿಧಾನಸಭೆ ಚುನಾವಣೆ ಬಿಸಿ ತಾತ್ಕಾಲಿಕ ತಣ್ಣಗಾದರೂ ಈಗ ಸ್ಥಳೀಯ ಸಂಸ್ಥೆಯ ಚುನಾವಣೆ ಬಿಸಿಯಾಗಿ ನಿಂತುಕೊಂಡು ಎಲ್ಲ ಮುಖಂಡರ ದೃಷ್ಟಿ ಇತ್ತ ಹಾಯಿಸಿದ್ದಾರೆ.
