ಮಡಿಕೇರಿ: ಹೆಣ್ಣು ಮಕ್ಕಳು ಒಬ್ಬಂಟಿಯಾಗಿ ಮಧ್ಯರಾತ್ರಿಯಲ್ಲಿ ತಿರುಗಾಡುವಂತಾಗುವಾಗ ದೇಶಕ್ಕೆ ನಿಜವಾದ ಸ್ವಾತಂತ್ರ್ಯ ಸಿಕ್ಕಿದಂತಾಗುತ್ತದೆ ಎಂಬ ಮಹಾತ್ಮ ಗಾಂಧೀಜಿ ಆಶಯ ಸತ್ಯವಾಗಬೇಕಾದರೆ ಯುವ ಜನಾಂಗ ಜಾಗೃತವಾಗಬೇಕಿದೆ ಎಂದು ಜಿ.ಪಂ. ಶಿಕ್ಷಣ ಮತ್ತು ಆರೋಗ್ಯ ಸ್ಥಾಯಿ ಸಮಿತಿ ಅಧ್ಯಕ್ಷೆ ತೀತೀರ ಮಣಿ ನಂಜಪ್ಪ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಶ್ರೀಮಂಗಲ ಜೈಹಿಂದ್ ಯುವಕ ಮಂಡಳಿಯ ವಾರ್ಷಿಕೋತ್ಸವ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಮಣಿ ನಂಜಪ್ಪ ಇಂದು ಸಮಾಜದಲ್ಲಿ ಮಹಿಳಾ ದೌರ್ಜನ್ಯ ಹೆಚ್ಚಾಗುತ್ತಲೇ ಇದೆ. ಈ ಪಿಡುಗನ್ನು ನಿಯಂತ್ರಿಸಬೇಕಾದರೆ ಯುವ ಜನಾಂಗ ಎಚ್ಚೆತ್ತುಕೊಂಡರೆ ಮಾತ್ರ ಸಾಧ್ಯ ಎಂದರು.
ಜಿ.ಪಂ. ಸದಸ್ಯೆ ಚೋಡುಮಾಡ ಶರೀನ್ ಸುಬ್ಬಯ್ಯ ಮಾತನಾಡಿ, ಹೆಣ್ಣು ಮಕ್ಕಳಿಗೆ ಸಮಾಜದಲ್ಲಿ ರಕ್ಷಣೆ ಇಲ್ಲದಿರಲು ಗಂಡು ಮಕ್ಕಳ ಮನಸ್ಥಿತಿ ಕೆಲಮೊಮ್ಮೆ ಕಾರಣವಾಗುತ್ತದೆ. ಪೋಷಕರು ಗಂಡು ಮಕ್ಕಳಲ್ಲಿ ಹೆಣ್ಣು ಮಕ್ಕಳ ಬಗ್ಗೆ ಗೌರವ ಹಾಗೂ ಸಹೋದರ ಭಾವ ಬರುವಂತೆ ಬೆಳೆಸಬೇಕಾಗಿದೆ ಎಂದರು.
ವಿರಾಜಪೇಟೆ ತಾ.ಪಂ. ಅಧ್ಯಕ್ಷ ಕುಂಞಂಗಡ ಅರುಣ್ ಭೀಮಯ್ಯ ಮಾತನಾಡಿ, ಇಂದು ಕೇವಲ ಓಲೈಕೆ ರಾಜಕಾರಣದಿಂದ ಹಲವಾರು ಸಮಸ್ಯೆಗಳಿಗೆ ಕಾರಣವಾಗಿದೆ. ಭಯೋತ್ಪಾದನೆ ವಿರುದ್ಧ ನಮ್ಮ ವಿದೇಶಾಂಗ ನೀತಿಯಲ್ಲಿ ಮೃದು ಧೋರಣೆ ತೋರುತ್ತಿರುವುದು ಆತಂಕದ ಸಂಗತಿಯಾಗಿದೆ ಎಂದು ಹೇಳಿದರು.
ಮಹಿಳಾ ಸಮಾಜದ ಅಧ್ಯಕ್ಷೆ ಮಚ್ಚಮಾಡ ಟಿ. ಗೌರಮ್ಮ, ಶ್ರೀಮಂಗಲ ಗ್ರಾ.ಪಂ. ಸದಸ್ಯರಾದ ಕಾಳಿಮಾಡ ತಮ್ಮು ಮುತ್ತಣ್ಣ, ವಾಣಿ ಮಾದಪ್ಪ, ಜೈಹಿಂದ್ ಯುವಕ ಸಂಘದ ಅಧ್ಯಕ್ಷ ಬೊಟ್ಟಂಗಡ ಸುಜು ಕುಮಾರ್, ಕಾರ್ಯದರ್ಶಿ ಬೋಡಂಗಡ ಅಯ್ಯಪ್ಪ ಹಾಗೂ ಹಿರಿಯ ಸದಸ್ಯ ಚಂಗುಲಂಡ ಪ್ರಭು ಇದ್ದರು.
ವಾರ್ಷಿಕೋತ್ಸವದ ಪ್ರಯುಕ್ತ ನಡೆಸಿದ ವಾಲಿಬಾಲ್ ಪಂದ್ಯಾವಳಿಯಲ್ಲಿ ಗೋಣಿಕೊಪ್ಪಲು ಕಾವೇರಿ ಕಾಲೇಜು ತಂಡ ಪ್ರಥಮ, ಜೈಹಿಂದ್ ಯುವಕ ಮಂಡಳಿ ದ್ವಿತೀಯ ಸ್ಥಾನ ಪಡೆದುಕೊಂಡಿತು. ಸಾರ್ವಜನಿಕರು, ಶಾಲಾ ಕಾಲೇಜು ಹಾಗೂ ಅಂಗನವಾಡಿಯ ವಿದ್ಯಾರ್ಥಿಗಳಿಗೆ ವಿವಿಧ ಕ್ರೀಡಾ ಸ್ಪರ್ಧೆಗಳು, ಕೊಡವ ಹಾಡು ಹಾಗೂ ಕೊಡವ ವಾಲಗತಾಟ್ ಸ್ಪರ್ಧೆಗಳು ನಡೆದಿದ್ದು, ವಿಜೇತರಿಗೆ ಬಹುಮಾನ ನೀಡಲಾಯಿತು.
ಸಂಜೆ 6 ಗಂಟೆಯಿಂದ ಕೊಡವ ತಕ್ಕ್ ಎಳ್ ತಾರಡ ಕೂಟದ ವತಿಯಿಂದ ಬ್ರಹ್ಮತೀರ್ಥ ನಾಟಕ, ಶ್ರೀಮಂಗಲ ಅನುಪಮ ನರ್ಸಿಂಗ್ ಕಾಲೇಜು ವಿದ್ಯಾರ್ಥಿಗಳಿಂದ ವಿವಿಧ ನೃತ್ಯ, ಶ್ರೀನಿವಾಸ್ ಮಾಸ್ಟರ್ ಅವರಿಂದ ಹಾಡುಗಾರಿಕೆ, ಕೊಡವ ನೈಟ್ಸ್ ತಂಡದಿಂದ ಕೊಡವ ಸಂಗೀತ ಗೋಷ್ಠಿ ಹಾಗೂ ಸ್ಥಳೀಯ ಜೇಸಿ ವಿದ್ಯಾಸಂಸ್ಥೆಯ ವಿದ್ಯಾರ್ಥಿಗಳಿಂದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ಪ್ರೇಕ್ಷಕರನ್ನು ರಂಜಿಸಿತು.
