ಚಿಂತಾಮಣಿ: ಕೆಎಸ್‌ಆರ್‌ಟಿಸಿ ಘಟಕದ ವ್ಯವಸ್ಥಾಪಕರು ಹಲವಾರು ನಿರ್ವಾಹಕರಿಗೆ ಹಾಗೂ ಚಾಲಕರಿಗೆ ಸರಿಯಾದ ಬಸ್ ಮಾರ್ಗ ಕಲ್ಪಿಸದೆ ಕಿರಿಕಿರಿ ಉಂಟು ಮಾಡುತ್ತಿರುವ ಧೋರಣೆ ಖಂಡಿಸಿ ವಂದೇ ಮಾತರಂ ಸಂಘಟನೆಯು ಪ್ರಯಾಣಿಕರ ಹಿತದೃಷ್ಟಿಯಿಂದ ವಿವಿಧ ಸಮಸ್ಯೆಗಳನ್ನು ಸರಿಪಡಿಸಬೇಕೆಂದು ಒತ್ತಾಯಿಸಿ ವಿಭಾಗ ನಿಯಂತ್ರಣಾಧಿಕಾರಿಗಳಿಗೆ ವ್ಯವಸ್ಥಾಪಕರ ಮುಖಾಂತರ ಮನವಿ ಸಲ್ಲಿಸಿದರು.
ತಾಲೂಕಿನ ವಿವಿಧ ಗ್ರಾಮೀಣ ಪ್ರದೇಶಗಳಲ್ಲಿ ಹಲವಾರು ವರ್ಷಗಳಿಂದ ಡ್ರೈವರ್ ಮತ್ತು ನಿರ್ವಾಹಕರು ಕರ್ತವ್ಯ ಮಾಡಿ ಗ್ರಾಮೀಣ ಜನಸಾಮಾನ್ಯರಿಂದ ಹಾಗೂ ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದಿರುತ್ತಾರೆ. ಆದರೆ ವ್ಯವಸ್ಥಾಪಕರ ಕೆಟ್ಟ ಧೋರಣೆ ಹಾಗೂ ಘಟಕದ ಆಂತರಿಕ ಕಚ್ಚಾಟದಿಂದ ಸಾರಿಗೆ ಸಂಸ್ಥೆ ವಾಹನಗಳು ನಿಗಿದಿತ ಸಮಯಕ್ಕೆ ಸಂಚರಿಸುತ್ತಿಲ್ಲ.
ಈ ಕಾರಣ ವಿದ್ಯಾರ್ಥಿ, ಸಾರ್ವಜನಿಕರಿಗೆ ತೊಂದರೆಯಾಗಿದೆ. ರಾತ್ರಿ ವೇಳೆ ಬೆಂಗಳೂರಿನಿಂದ ಬರುವ ಬಹುತೇಕ ವಾಹನಗಳು ವಾಹನ ನಿಲ್ದಾಣಕ್ಕೆ ಬಾರದೆ ಮಾರ್ಗ ಮಧ್ಯದಿಂದಲೇ ಡಿಪೋ ಸೇರಿಕೊಳ್ಳುತ್ತಿವೆ ಎಂದು ವಂದೇ ಮಾತರಂ ಜಿಲ್ಲಾ ಅಧ್ಯಕ್ಷ ರವಿ, ತಾಲೂಕು ಅಧ್ಯಕ್ಷ ಪ್ರಕಾಶ್,ನಗರ ಘಟಕದ ಅಧ್ಯಕ್ಷ ನಾರಾಯಣಸ್ವಾಮಿ, ಜಿಲ್ಲಾ ಸಂಘಟನಾ ಕಾರ್ಯದರ್ಶಿ ಜಯಪ್ರಕಾಶ್ ಸೇರಿದಂತೆ ಇನ್ನೂ ಹಲವರು ಪ್ರಯಾಣಿಕರ ಸಮಸ್ಯೆಗೆ ಸ್ಪಂದಿಸಬೇಕೆಂದು ಆಗ್ರಹಿಸಿ ಮನವಿ ಸಲ್ಲಿಸಿದರು.
