ಪಿರಿಯಾಪಟ್ಟಣ: ರೈತರು ತಂಬಾಕು ಬೆಳೆಯೊಂದನ್ನೇ ಬೆಳೆಯುವ ಬದಲು ಪರ್ಯಾಯ ಬೆಳೆಗಳತ್ತಲೂ ಗಮನ ಹರಿಸುವುದು ಬಹಳ ಮುಖ್ಯ ಎಂದು ತಂಬಾಕು ಮಂಡಳಿಯ ಹರಾಜು ಅಧೀಕ್ಷಕ ಬಿ.ಮಂಜುರಾಜ್ ತಿಳಿಸಿದರು. ತಾಲೂಕಿನ ಬೋರೆಹೊಸಳ್ಳಿ ಗ್ರಾಮದಲ್ಲಿ ರೈತರಿಗಾಗಿ ಉತ್ತಮ ಕೃಷಿ ಪದ್ಧತಿ ಅಳವಡಿಕೆ ಬಗ್ಗೆ ತಂಬಾಕು ಮಂಡಳಿ ವತಿಯಿಂದ ಏರ್ಪಡಿಸಿದ್ದ ವೀಡಿಯೋ ಅನ್ ವೀಲ್ (ಜಿಎಪಿ) ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಮುಂದಿನ ದಿನಗಳಲ್ಲಿ ತಂಬಾಕಿಗೆ ಭವಿಷ್ಯ ಇರುವುದಿಲ್ಲ. ತಂಬಾಕು ಹದ ಮಾಡಲು ಹೆಚ್ಚಾಗಿ ಉರುವಲಿಗಾಗಿ ಕಾಡು ನಾಶವಾಗುತ್ತಿದೆ. ತಕ್ಷಣದಿಂದಲೇ ರೈತರು ಹಸಿರೀಕರಣ ಎಂಬ ಧ್ಯೇಯದ ಮೂಲಕ ತೋಟಗಾರಿಕಾ ಬೆಳೆಗಳನ್ನು, ಹತ್ತಿ, ರೇಷ್ಮೆ ಮುಂತಾದವುಗಳನ್ನು ಬೆಳೆಯುವಂತೆ ಸೂಚಿಸಿದರು. ವೀಡಿಯೋ ಚಿತ್ರಣದ ಮೂಲಕ ಅಧುನಿಕ ಕೃಷಿ ಪದ್ಧತಿ, ಸಸಿ ಮಡಿ ನಿರ್ವಹಣೆ, ನಾಟಿ ಕಾರ್ಯ, ಗೊಬ್ಬರ ನಿರ್ವಹಣೆ, ಅಂತರ ಬೇಸಾಯ, ಕಟಾವು, ಹದಗೊಳಿಸುವಿಕೆ, ಬೇಲು ಮಾಡಿ ಮಾರುಕಟ್ಟೆಗೆ ತಂದು ಮಾರಾಟ ಮಾಡುವವರೆಗೂ ಪ್ರದರ್ಶಿಸುವುದರ ಜತೆಗೆ ಮಾಹಿತಿ ನೀಡಲಾಯಿತು. ಜಿಪಿಐ ಕಂಪನಿಯ ವಸಂತ್, ತಶಂಭುಲಿಂಗೇಗೌಡ, ಪ್ರಭಾಕರನ್, ಕ್ಷೇತ್ರ ಸಹಾಯಕ ಬೊಮ್ಮೇಗೌಡ, ರೈತರಾದ ಕರೀಗೌಡ, ಡಿ.ಸ್ವಾಮಿ, ಜಗದೀಶ್, ಕೃಷ್ಣ ಇದ್ದರು.
