ಸಿಂಧನೂರು: ನಗರದ ಸುಕಾಲಪೇಟೆಯ ಕನಕದಾಸ ಕಾಲೇಜು ಬಳಿ ಸೋಮವಾರ ಮೂವರ ಗುಡಿಸಲು ಹಾಗೂ ಬಣವೆಗಳಿಗೆ ಆಕಸ್ಮಿಕ ಬೆಂಕಿ ಹತ್ತಿ ಸುಮಾರು 1.55 ಲಕ್ಷ ಮೌಲ್ಯದ ಕಾಳು ಕಡಿ, ಹುಲ್ಲಿನ ಬಣವೆಗಳು ಸುಟ್ಟಿವೆ ಎಂದು ಅಗ್ನಿಶಾಮಕ ದಳದ ಠಾಣಾಧಿಕಾರಿ ರವಿಕುಮಾರ ಚವಾಣ ತಿಳಿಸಿದ್ದಾರೆ.
ಮರಿಯಪ್ಪ ಎಂಬುವವರಿಗೆ ಸೇರಿದ ಗುಡಿಸಲು, ದನದ ಕೊಟ್ಟಿಗೆ ಸೇರಿದಂತೆ 10 ಎಕರೆ ಭತ್ತದ ಹುಲ್ಲು, ನಾಲ್ಕು ಎಕರೆ ಸೊಪ್ಪು, 15 ಚೀಲ ಜೋಳ, 4 ಕ್ವಿಂಟಲ್ ಅಕ್ಕಿ, 7 ಕೋಳಿ ಸುಟ್ಟು ಕರಕಲಾಗಿವೆ. ಹಾಗೆಯೇ ಹನುಮಂತ ಎಂಬುವವರಿಗೆ ಸೇರಿದ 5ಎಕರೆ ಭತ್ತದ ಹುಲ್ಲು, ಕರಿಯಪ್ಪ ಎಂಬುವವರಿಗೆ ಸೇರಿದ 3ಎಕರೆ ಭತ್ತದ ಹುಲ್ಲು ಸುಟ್ಟು ಭಸ್ಮವಾಗಿದೆ. ಸಕಾಲಕ್ಕೆ ಅಗ್ನಿಶಾಮಕ ದಳದ ಸಿಬ್ಬಂದಿ ಘಟನಾ ಸ್ಥಳಕ್ಕೆ ದೌಡಾಯಿಸಿದ್ದರಿಂದ ಹೆಚ್ಚಿನ ಅನಾಹುತ ಸಂಭವಿಸಿಲ್ಲವೆಂದು ಚವ್ಹಾಣ ತಿಳಿಸಿದ್ದಾರೆ.
