ಶಿವಮೊಗ್ಗ: ವೇದ ಕಾಲದಿಂದಲೂ ಸ್ತ್ರೀ ಸಾಹಿತ್ಯ ಬೆಳೆದು ಬಂದಿದೆ. ಆನಂತರದ ಕಾಲಘಟ್ಟದಲ್ಲಿ ಹಿನ್ನಡೆಯಾಗಿತ್ತು. ಆದರೆ ಈಗ ಮಹಿಳೆ ತನ್ನೆಲ್ಲಾ ಸ್ಥಿತಿಗಳಿಂದ ಹೊರಬಂದು ಸಾಹಿತ್ಯ ಬೆಳಗಿಸುತ್ತಿದ್ದಾಳೆ. ಆದರೂ ಪ್ರಸ್ತುತ ಕತ್ತಲ ಸ್ಥಿತಿಯಲ್ಲಿದ್ದಾಳೆ. ಅದರಿಂದ ಹೊರಬರಬೇಕು ಎಂದು ಅಮೂಲ್ಯ ಶೋಧ ವಸ್ತು ಸಂಗ್ರಹಾಲಯದ ಸಂಸ್ಥಾಪಕ ಎಚ್.ಕೆ. ಖಂಡೋಬರಾವ್ ಹೇಳಿದರು.
ತಾಲೂಕಿನ ಲಕ್ಕಿನಕೊಪ್ಪ ಬಳಿಯ ಅಮೂಲ್ಯ ಶೋಧದ ನೆನಪು ಸಭಾಂಗಣದಲ್ಲಿ ಕರ್ನಾಟಕ ಲೇಖಕಿಯರ ಜಿಲ್ಲಾ ಸಂಘದ ವಾರ್ಷಿಕೋತ್ಸವ ಅಂಗವಾಗಿ ಭಾನುವಾರ ಆಯೋಜಿಸಿದ್ದ ಚರ್ಚೆ ಹಾಗೂ ಕವಿಗೋಷ್ಠಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ವಿಶಾಲ ಮನೋಭಾವನೆ ಬೆಳೆಸಿಕೊಂಡು ಕುಟುಂಬ ಬೆಳಗುವುದರ ಜತೆಗೆ ಸಂಸ್ಕೃತಿ, ಭಾರತೀಯತೆ ಬೆಳೆಸಿಕೊಳ್ಳಬೇಕು ಎಂದು ತಿಳಿಸಿದರು.
ಕರ್ನಾಟಕ ಸಂಘದ ಅಧ್ಯಕ್ಷೆ ವಿಜಯ ಶ್ರೀಧರ್ ಅಧ್ಯಕ್ಷತೆ ವಹಿಸಿದ್ದ ಕರ್ನಾಟಕ ಲೇಖಕಿಯರ ಸಂಘದ ಜಿಲ್ಲಾ ಶಾಖೆ ಅಧ್ಯಕ್ಷೆ ಎಸ್.ವಿ. ಚಂದ್ರಕಲಾ ಮಾತನಾಡಿದರು.
ಚರ್ಚಾಕೂಟದಲ್ಲಿ ಅತ್ಯುತ್ತಮವಾಗಿ ಮಾತನಾಡಿದ ತಾರಾಪ್ರಸಾದ್, ಆಶಾ, ಚಂದ್ರಿಕಾರವರಿಗೆ ಬಹುಮಾನ ನೀಡಲಾಯಿತು. ಕವಿಗೋಷ್ಠಿಯಲ್ಲಿ ಸುನೀತಾ, ಜಯಲಕ್ಷ್ಮಿ, ಮಾನಸ, ವೀಣಾ, ಎನ್. ಸುಮ, ನಾಗರತ್ನ, ಶಾರದ, ಶಾರದ ಉಳವಿ, ಗೀತಾ ಸೇರಿದಂತೆ ಹಲವರು ಭಾಗವಹಿಸಿದ್ದರು. ಲೇಖಕಿ ಊರ್ಮಿಳಾ ರಾವ್, ಜಿಲ್ಲಾ ಕೈಗಾರಿಕಾ ಕೇಂದ್ರದ ವ್ಯವಸ್ಥಾಪಕಿ ಸು. ವಿಜಯಲಕ್ಷ್ಮಿ ಮತ್ತಿತರರು ಇದ್ದರು. ವಿಜಯಾ ಪ್ರಾರ್ಥಿಸಿದರು. ಶಾಲಿನಿ ನಿರೂಪಿಸಿದರು. ಪ್ರೊ. ಕಿರಣ್ ಸ್ವಾಗತಿಸಿದರು.
