ಧೂಮಪಾನ ಮಾಡುವ ಯುವತಿಯರಲ್ಲಿ ಸಂತಾನೋತ್ಪತ್ತಿ ಆರೋಗ್ಯ ಸಮಸ್ಯೆಗಳು

ಇತ್ತೀಚಿನ ದಿನಗಳಲ್ಲಿ, ಧೂಮಪಾನ ಮಾಡುವ ಯುವತಿಯರಲ್ಲಿ ಸಂತಾನೋತ್ಪತ್ತಿ ಆರೋಗ್ಯ ಸಮಸ್ಯೆಗಳಲ್ಲಿ ಅತಿಯಾದ ಹೆಚ್ಚಳ ಕಂಡುಬಂದಿದೆ. ಇದರಲ್ಲಿ ಹದಿಹರೆಯದವರು ಮತ್ತು 20 ರಿಂದ 40 ವರ್ಷದೊಳಗಿನ ವೃತ್ತಿಪರ ಮಹಿಳೆಯರು ಸೇರಿದ್ದಾರೆ. ಕೆಳಗೆ ವಿವರಿಸಲಾದಂತೆ ಧೂಮಪಾನವು ಅನೇಕ ಸಂಭಾವ್ಯ ಸಂತಾನೋತ್ಪತ್ತಿ ಆರೋಗ್ಯ ಸಮಸ್ಯೆಗಳೊಂದಿಗೆ ಸಂಬಂಧ ಹೊಂದಿದೆ:

ಋತುಚಕ್ರದ ಅನಿಯತತೆ: ಧೂಮಪಾನವು ವಿಶೇಷವಾಗಿ ಪಾಲಿಸಿಸ್ಟಿಕ್ ಓವರಿ ಸಿಂಡ್ರೋಮ್ (ಪಿಸಿಒಎಸ್) ಹೊಂದಿರುವವರ ಋತುಚಕ್ರದಲ್ಲಿನ ತೊಂದರೆಗಳೊಂದಿಗೆ ಸಂಬಂಧ ಹೊಂದಿದೆ.

ಸಂತಾನಾಭಿವೃದ್ಧಿಯ ಸಾಮರ್ಥ್ಯದಲ್ಲಿನ ಸವಾಲುಗಳು: ಧೂಮಪಾನವು ಗರ್ಭಧಾರಣೆಯಲ್ಲಿನ ತೊಂದರೆಗಳೊಂದಿಗೆ ಸಂಬಂಧ ಹೊಂದಿದೆ. ಸಿಗರೇಟಿನಲ್ಲಿರುವ ನಿಕೋಟಿನ್ ಮತ್ತು ಇತರ ಹಾನಿಕಾರಕ ವಸ್ತುಗಳು ಅಂಡಾಶಯಗಳ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು ಮತ್ತು ಹಾರ್ಮೋನುಗಳ ಸಮತೋಲನಕ್ಕೆ ಅಡ್ಡಿಯಾಗಬಹುದು, ಇದು ಗರ್ಭಧಾರಣೆಯನ್ನು ಹೆಚ್ಚು ಸವಾಲಾಗಿಸುತ್ತದೆ.

ಅಪಾಯದ ಗರ್ಭಧಾರಣೆ ಮತ್ತು ತೊಂದರೆಗಳಲ್ಲಿ ಹೆಚ್ಚಳ: ಧೂಮಪಾನ ಮಾಡುವ ಗರ್ಭಿಣಿಯರು ಅವಧಿಪೂರ್ವ ಜನನ, ಕಡಿಮೆ ಜನನ ತೂಕ ಮತ್ತು ಬೆಳವಣಿಗೆಯ ಸಮಸ್ಯೆಗಳು ಸೇರಿದಂತೆ ಇತರ ತೊಂದರೆಗಳ ಹೆಚ್ಚಿನ ಅಪಾಯವನ್ನು ಎದುರಿಸುತ್ತಾರೆ. ಪರೋಕ್ಷ ಧೂಮಪಾನದ ಹೊಗೆಗೆ ಒಡ್ಡಿಕೊಳ್ಳುವುದು ತಾಯಿ ಮತ್ತು ಬೆಳೆಯುತ್ತಿರುವ ಭ್ರೂಣ ಇಬ್ಬರಿಗೂ ಪ್ರತಿಕೂಲ ಪರಿಣಾಮಗಳನ್ನು ಉಂಟು ಮಾಡುತ್ತದೆ.

ಗರ್ಭಪಾತದ ಅಪಾಯ ಹೆಚ್ಚು: ಧೂಮಪಾನಿಗಳಲ್ಲದವರಿಗೆ ಹೋಲಿಸಿದರೆ ಮಹಿಳಾ ಧೂಮಪಾನಿಗಳು ಗರ್ಭಪಾತವನ್ನು ಅನುಭವಿಸುವ ಹೆಚ್ಚಿನ ಸಾಧ್ಯತೆಯನ್ನು ಹೊಂದಿರುತ್ತಾರೆ. ಸಿಗರೇಟುಗಳ ವಿಷಕಾರಿ ಅಂಶಗಳು ಬೆಳೆಯುತ್ತಿರುವ ಗರ್ಭದ ಕಾರ್ಯಸಾಧ್ಯತೆಗೆ ತೊಡಕುಂಟುಮಾಡಬಹುದು.

ಗರ್ಭಕಂಠದ ಕ್ಯಾನ್ಸರ್‌ನ ಸಂಭಾವ್ಯ ಅಪಾಯ: ವಿಶ್ವಾದ್ಯಂತ ಮಹಿಳೆಯರಲ್ಲಿ ಮೂರನೇ ಅತ್ಯಂತ ಸಾಮಾನ್ಯ ಕ್ಯಾನ್ಸರ್‌ಗಳಲ್ಲಿ ಒಂದಾದ ಗರ್ಭಕಂಠದ ಕ್ಯಾನ್ಸರ್ ತಡೆಗಟ್ಟಬಹುದಾದ ಕಾಯಿಲೆಯಾಗಿದೆ. ಧೂಮಪಾನವು ಗರ್ಭಕಂಠದ ಕ್ಯಾನ್ಸರ್‌ನ ಪ್ರಸಿದ್ಧ ಪೂರ್ವಸೂಚಕವಾದ ಎಚ್‌ಪಿವಿಯ ನಿರಂತರತೆಯನ್ನು ಹದಗೆಡಿಸುವುದಲ್ಲದೆ, ಇದು ಮಹಿಳೆಯರ ಆರೋಗ್ಯದ ಮೇಲೆ ಹೆಚ್ಚುವರಿ ಹೊರೆಯನ್ನು ಹಾಕುತ್ತದೆ.

ಧೂಮಪಾನ ಮಾಡುವ ಯುವತಿಯರು ತಿಳಿಯದೆ ಈ ಅಪಾಯಗಳಿಗೆ ತಮ್ಮನ್ನು ಒಡ್ಡಿಕೊಳ್ಳಬಹುದು, ಇದು ಅವರ ಸಂತಾನೋತ್ಪತ್ತಿ ಆರೋಗ್ಯ ಮತ್ತು ಭವಿಷ್ಯದ ಪೀಳಿಗೆಯ ಆರೋಗ್ಯವನ್ನು ಅಪಾಯಕ್ಕೆ ತಳ್ಳುತ್ತದೆ.

"ಧೂಮಪಾನ ಮಾಡುವ ಯುವತಿಯರಲ್ಲಿ ಸಂತಾನೋತ್ಪತ್ತಿ ಆರೋಗ್ಯ ಸಮಸ್ಯೆಗಳಲ್ಲಿ ಗಮನಾರ್ಹ ಏರಿಕೆಯನ್ನು ನಾವು ಗಮನಿಸುತ್ತಿದ್ದೇವೆ ಮತ್ತು ಈ ಪ್ರವೃತ್ತಿಯನ್ನು ಪರಿಹರಿಸಲು ನಾವು ಪೂರ್ವಭಾವಿ ಕ್ರಮಗಳನ್ನು ತೆಗೆದುಕೊಳ್ಳುವುದು ಬಹಳ ಮುಖ್ಯ. ವಿವಿಧ ಸಂತಾನೋತ್ಪತ್ತಿ ಅಸ್ವಸ್ಥತೆಗಳನ್ನು ಹೊಂದಿರುವ ಸುಮಾರು 10% ಕ್ಕಿಂತ ಹೆಚ್ಚು ಮಹಿಳೆಯರು ನಿರಂತರ ಧೂಮಪಾನಿಗಳಾಗಿದ್ದಾರೆ. ಅನೇಕ ಮಹಿಳೆಯರು ಧೂಮಪಾನ ಮತ್ತು ಮದ್ಯಪಾನವನ್ನು 'ಒತ್ತಡ ನಿವಾರಕಗಳು' ಎಂದು ಅಳವಡಿಸಿಕೊಳ್ಳುತ್ತಾರೆ. ಯುವತಿಯರಲ್ಲಿ ಧೂಮಪಾನವು ಅವರ ಆರೋಗ್ಯಕ್ಕೆ ಅಪಾಯವನ್ನುಂಟುಮಾಡುವುದಲ್ಲದೆ, ಅವರಒಟ್ಟಾರೆ ಯೋಗಕ್ಷೇಮಕ್ಕೆ ನಿರ್ದಿಷ್ಟ ಮತ್ತು ಅಪಾಯಕಾರಿ ತೊಂದರೆಗಳನ್ನು ಉಂಟುಮಾಡುತ್ತದೆ," ಎಂದು ಸ್ಪರ್ಶ್ ಆಸ್ಪತ್ರೆಯ ಪ್ರಸೂತಿ ಮತ್ತು ಸ್ತ್ರೀರೋಗಶಾಸ್ತ್ರದ ನಿರ್ದೇಶಕಿ ಮತ್ತು ಪ್ರಮುಖ ಸಲಹಾ ತಜ್ಞೆ ಡಾ. ಪ್ರತಿಮಾ ರೆಡ್ಡಿ ಹೇಳಿದರು.

“ಈ ಅಪಾಯಗಳನ್ನು ತಗ್ಗಿಸಲು ನಾವು ಶಿಕ್ಷಣ, ಮಧ್ಯಸ್ಥಿಕೆ ಮತ್ತು ಬೆಂಬಲಕ್ಕೆ ಆದ್ಯತೆ ನೀಡುವುದು ಬಹಳ ಮುಖ್ಯ. ಯುವತಿಯರು ಎದುರಿಸುತ್ತಿರುವ ಸಂಭಾವ್ಯ ಅಪಾಯಗಳ ಬಗ್ಗೆ ಜ್ಞಾನದ ಮೂಲಕ ಅವರನ್ನು ಸಬಲೀಕರಣಗೊಳಿಸಬೇಕಾಗಿದೆ ಮತ್ತು ಆರೋಗ್ಯಕರ ಜೀವನಶೈಲಿ ಆಯ್ಕೆಗಳನ್ನು ಮಾಡಲು ಅವರನ್ನು ಪ್ರೋತ್ಸಾಹಿಸಬೇಕಾಗಿದೆ,” ಎಂದು ವೈದ್ಯರು ತಿಳಿಸಿದರು.