ಬೆಂಗಳೂರು: ಲಿಂಗಾಯತ ಸಮುದಾಯದ ಸದಸ್ಯರು, ಅವರ ಆಧ್ಯಾತ್ಮಿಕ ನಾಯಕರ ಬೆಂಬಲದೊಂದಿಗೆ, ವಿವಾದಾತ್ಮಕ ಚಲನಚಿತ್ರ ಶರಣರ ಶಕ್ತಿಯಲ್ಲಿ 15 ಪ್ರಮುಖ ದೋಷಗಳನ್ನು ಪಟ್ಟಿ ಮಾಡಿದ್ದಾರೆ, ಅವು ವಾಸ್ತವಿಕವಾಗಿ ತಪ್ಪಾಗಿರುವುದು ಮಾತ್ರವಲ್ಲ, ಕೆಲವು ಆಕ್ರಮಣಕಾರಿ ಎಂದು ಹೇಳಿದ್ದಾರೆ.
ಅಕ್ಟೋಬರ್ 7ರಂದು ಬೆಂಗಳೂರಿನಲ್ಲಿ ನಡೆದ ವಿಶೇಷ ಪ್ರದರ್ಶನದಲ್ಲಿ ಸಿನಿಮಾ ವೀಕ್ಷಿಸಿದ ಸಮಾಜದ ಮುಖಂಡರು, ತಪ್ಪುಗಳನ್ನು ಸರಿಪಡಿಸಿಕೊಳ್ಳದೆ ಸಿನಿಮಾ ಬಿಡುಗಡೆ ಮಾಡಿದರೆ ಕಾನೂನು ಕ್ರಮ ಜರುಗಿಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ. ಏತನ್ಮಧ್ಯೆ, ಅಕ್ಟೋಬರ್ 18 ರಂದು ಚಿತ್ರದ ಬಿಡುಗಡೆಯಾಗಬೇಕಿದ್ದ ಸಿನಿಮಾದ ರಿಲೀಸ್ ಮುಂದೂಡುವುದಾಗಿ ಚಿತ್ರ ನಿರ್ಮಾಪಕರು ಘೋಷಿಸಿದ್ದಾರೆ.
ಲಿಂಗಾಯತ ತತ್ವ ಮತ್ತು ನಂಬಿಕೆಗಳನ್ನು ತಪ್ಪಾಗಿ ಬಿಂಬಿಸಿದ್ದಾರೆ ಎಂದು ಆರೋಪಿಸಿ ಗ್ಲೋಬಲ್ ಲಿಂಗಾಯತ ಮಹಾಸಭಾದ ಪ್ರಧಾನ ಕಾರ್ಯದರ್ಶಿ, ನಿವೃತ್ತ ಐಎಎಸ್ ಅಧಿಕಾರಿ ಎಸ್‌ಎಂ ಜಮಾದಾರ್ ಅವರು ಚಲನಚಿತ್ರ ನಿರ್ದೇಶಕ ದಿಲೀಪ್ ಶರ್ಮಾ ಮತ್ತು ನಿರ್ಮಾಪಕ ಆರಾಧನಾ ಕುಲಕರ್ಣಿ ಅವರಿಗೆ ನೋಟಿಸ್ ಜಾರಿ ಮಾಡಿದ್ದಾರೆ.
ಚಿತ್ರದಲ್ಲಿ ಬಸವಣ್ಣನವರನ್ನು ಕೇವಲ ಭಕ್ತನನ್ನಾಗಿ ತೋರಿಸಲಾಗಿದೆ, ಅವರಿಂದ ಗುರು ಮತ್ತು ದಾರ್ಶನಿಕ ಸ್ಥಾನಮಾನವನ್ನು ಕಸಿದುಕೊಳ್ಳಲಾಗಿದೆ ಎಂದು ಅವರು ಹೇಳಿದರು. ಶರಣ ಗೊಲ್ಲಾಳೇಶ್ವರರು ತಂದೆಯನ್ನು ಕೊಲ್ಲುವುದು ಶರಣ ಸಂಸ್ಕೃತಿಗೆ ವಿರುದ್ಧವಾದುದು. ಭಕ್ತಿಯ ಈ ಅತಿರೇಕವನ್ನು ಶರಣರು ಒಪ್ಪುವುದಿಲ್ಲ.
ಬಲಗೈಯಲ್ಲಿ ಇಷ್ಟಲಿಂಗವನ್ನು ಪೂಜಿಸುವುದು ತಪ್ಪ. “ಆತ್ಮಲಿಂಗ” ಎನ್ನುವ ಶಬ್ದದ ಬದಲಾಗಿ ಇಷ್ಟಲಿಂಗ ಶಬ್ದ ಬರಬೇಕು. ಅಕ್ಕ ನಾಗಮ್ಮನ ಗರ್ಭದಲ್ಲಿರುವಾಗಲೇ ಚೆನ್ನಬಸವಣ್ಣ ಇತರರೊಂದಿಗೆ ಸಂಭಾಷಿಸುತ್ತಿರುವ ಚಿತ್ರಣವು ಸರಿಯಲ್ಲ.ಆಕಳುಗಳ ಸ್ವಭಾವದ ಚಿತ್ರ ಹಾಗೂ ಒಬ್ಬ ಶರಣರ ಬಟ್ಟೆಯ ಮೇಲಿರುವ ನಂದಿ ಚಿತ್ರ ಸಮಂಜಸ ಎನಿಸುವುದಿಲ್ಲ. ಜಮಾದಾರ್ ಮಾತನಾಡಿ, ಬಲಗೈಯಲ್ಲಿ ಇಷ್ಟಲಿಂಗ ಪೂಜೆ ಮಾಡುವ ದೃಶ್ಯಗಳನ್ನು ಸೇರಿಸಿ ಲಿಂಗಾಯತ ಸಮುದಾಯದ ಆಧ್ಯಾತ್ಮಿಕ ಪರಂಪರೆಯನ್ನು ಭ್ರಷ್ಟಗೊಳಿಸಿದ್ದಾರೆ, ಇದು ನಮ್ಮ ನಂಬಿಕೆಗೆ ಸಂಪೂರ್ಣವಾಗಿ ವಿರುದ್ಧವಾಗಿದೆ. ಮೂರುಸಾವಿರ ಮಠದ ಘಟನೆಯನ್ನು ಕೈಬಿಡಬೇಕು.
ಅಕ್ಟೋಬರ್ 8ರಂದು ಚಿತ್ರವನ್ನು ನೋಡಿದ ಮುಖಂಡರೊಬ್ಬರು ಟ್ರೈಲರ್ ನಲ್ಲಿ ಇದ್ದ ಸಮಸ್ಯೆಗಳನ್ನೆಲ್ಲಾ ಚಿತ್ರದಿಂದ ತೆಗೆದಿದ್ದಾರೆ ಎಂದು ಹೇಳಿದ್ದರು. ಆದರೆ ಚಿತ್ರದಲ್ಲಿ ಇನ್ನೂ ಲಿಂಗಾಯತರ ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯುಂಟು ಮಾಡುವ ಬಹಳ ಸಮಸ್ಯೆಗಳಿವೆ. ಅಧ್ಯಯನದ ಕೊರತೆಯಿದೆ ಮತ್ತು ಉದ್ದೇಶಪೂರ್ವಕವಾಗಿ ಶರಣರ ಇತಿಹಾಸ ಕೈಬಿಟ್ಟು ಪುರಾಣ ತುಂಬುವ ಪ್ರಯತ್ನವಿದೆ ಎಂದು ಜಮಾದಾರ್ ಹೇಳಿದರು. ನಿರ್ದೇಶಕರು ತಪ್ಪುಗಳನ್ನು ಸರಿಪಡಿಸಬೇಕು ಮತ್ತು ಬಿಡುಗಡೆಯ ಮೊದಲು ಅದನ್ನು ಸಮುದಾಯಕ್ಕೆ ಮರುಪ್ರದರ್ಶನ ಮಾಡಬೇಕು ಎಂದು ಒತ್ತಾಯಿಸಿದ್ದಾರೆ.
ಕೆಲವು ದಿನಗಳ ಹಿಂದೆ ರಾಷ್ಟ್ರೀಯ ಬಸವ ಸೈನಿಕ ಸಂಘಟನೆಯ ಸಂಸ್ಥಾಪಕ ಅಧ್ಯಕ್ಷ ಶಂಕರಗೌಡ ಬಿರಾದಾರ್ ಮತ್ತು ವಕೀಲ ರವಿ ರಾಠೋಡ್ ಅವರು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ದೂರು ಸಲ್ಲಿಸಿ ಚಲನಚಿತ್ರವನ್ನು ನಿಷೇಧಿಸಬೇಕು ಎಂದು ಒತ್ತಾಯಿಸಿದರು.
Advertisement
