ಆಯುಷ್ ಇಲಾಖೆ ಆಸ್ಪತ್ರೆಯಲ್ಲಿ ನಿಮ್ಮ ಹೆಸರು ಮುದ್ರಿಸಬೇಕೆ, ಭೂಮಿ ದಾನ ಮಾಡಿ: ಸರ್ಕಾರ ಆದೇಶ ಏನು ಹೇಳುತ್ತದೆ?

ಬೆಂಗಳೂರು: ನಿಮ್ಮ ಅಥವಾ ನಿಮ್ಮ ಪ್ರೀತಿಪಾತ್ರರ ಹೆಸರನ್ನು ಸರ್ಕಾರಿ ಕಟ್ಟಡಗಳಲ್ಲಿ ಇಡಬೇಕೆ, ನೀವು ಮಾಡಬೇಕಾಗಿರುವುದು ಆಯುಷ್ ಚಿಕಿತ್ಸಾಲಯಗಳು ಮತ್ತು ಆಸ್ಪತ್ರೆಗಳನ್ನು ನಿರ್ಮಿಸಲು ಮತ್ತು ಅವುಗಳನ್ನು ನಡೆಸಿಕೊಂಡು ಹೋಗಲು ಭೂಮಿಯನ್ನು ದಾನ ಮಾಡುವುದು ಎಂದು ಸರ್ಕಾರದ ಆದೇಶ ಹೇಳುತ್ತದೆ.

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು ತನ್ನ ಆದೇಶದಲ್ಲಿ, ಕೋವಿಡ್ ನಂತರ, ಹೆಚ್ಚಿನ ಜನರು ಆಯುರ್ವೇದ ಔಷಧಿಗಳಿಗೆ ಮೊರೆ ಹೋಗುತ್ತಾರೆ. ಆದರೆ ಹಣ ಮತ್ತು ಭೂಮಿ ಲಭ್ಯತೆ ಕೊರತೆಯಿಂದಾಗಿ ಇಲಾಖೆಯು ಮೂಲಸೌಕರ್ಯಗಳನ್ನು ಒದಗಿಸಲು ಸಾಧ್ಯವಾಗುತ್ತಿಲ್ಲ ಎಂದು ಹೇಳಿದೆ.

ಕರ್ನಾಟಕದಲ್ಲಿ 153 ತಾಲ್ಲೂಕು ಮತ್ತು ಜಿಲ್ಲಾ ಆಯುಷ್ ಆಸ್ಪತ್ರೆಗಳು ಮತ್ತು 625 ಔಷಧಾಲಯಗಳನ್ನು ಹೊಂದಿದ್ದು, ಅವುಗಳಲ್ಲಿ 376 ಇತ್ತೀಚೆಗೆ ಆಯುಷ್ ಮಂದಿರಗಳಾಗಿ (ಚಿಕಿತ್ಸಾ ಚಿಕಿತ್ಸಾಲಯಗಳು) ಮೇಲ್ದರ್ಜೆಗೇರಿಸಲಾಗಿದೆ. ಕೋವಿಡ್ ನಂತರ, ಹೆಚ್ಚಿನ ಜಾಗೃತಿಯೊಂದಿಗೆ, ಜನರು ನಮ್ಮ ಕೇಂದ್ರಗಳಿಗೆ ಭೇಟಿ ನೀಡಲು ಪ್ರಾರಂಭಿಸಿದರು. ನಾವು ಮೂಲಸೌಕರ್ಯವನ್ನು ಸುಧಾರಿಸುವತ್ತ ಗಮನಹರಿಸುತ್ತಿದ್ದೇವೆ. ನಮಗೆ ಭೂಮಿಯ ಲಭ್ಯತೆ ಮತ್ತು ಹಣದ ಸಮಸ್ಯೆಗಳಿವೆ. ನಮಗೆ ಭೂಮಿ ಖರೀದಿಸಲು ಆಗುತ್ತಿಲ್ಲ ಎಂದು ಇಲಾಖೆಯ ಮೂಲಗಳು ತಿಳಿಸಿವೆ.

ಇತ್ತೀಚಿನ ದಿನಗಳಲ್ಲಿ ಜೀವನಶೈಲಿ ಕಾಯಿಲೆಗಳು ಮತ್ತು ಇತರ ಅಸ್ವಸ್ಥತೆಗಳಿಗೆ ಚಿಕಿತ್ಸೆ ಪಡೆಯಲು ಜನರು ಆಯುರ್ವೇದ ಯೋಗ ಮತ್ತು ಪ್ರಕೃತಿ ಚಿಕಿತ್ಸೆ, ಯುನಾನಿ, ಸಿದ್ಧ ಮತ್ತು ಹೋಮಿಯೋಪತಿ (ಆಯುಷ್) ಗಳನ್ನು ಹೆಚ್ಚಾಗಿ ಅವಲಂಬಿಸುತ್ತಿದ್ದಾರೆ.

ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಪತ್ರಿಕೆಗೆ(The New Indian Express) ಲಭ್ಯವಾಗಿರುವ ಸರ್ಕಾರಿ ಆದೇಶದಲ್ಲಿ, ಆಯುಷ್ ಚಿಕಿತ್ಸಾಲಯಗಳು ಮತ್ತು ಆಸ್ಪತ್ರೆಗಳಿಗೆ ದಾನಿಗಳು ಅಥವಾ ದಾನ ಸೂಚಿಸಿದ ಹೆಸರುಗಳ ಹೆಸರಿಡಲು ಇಲಾಖೆ ಅಧೀನ ಕಾರ್ಯದರ್ಶಿ ಒತ್ತು ನೀಡಿದ್ದಾರೆ.

ಪಂಚಾಯತ್ ಮಟ್ಟದಲ್ಲಿ ಆಯುಷ್ ಚಿಕಿತ್ಸಾಲಯಕ್ಕೆ 10,000 ಚದರ ಅಡಿ ಜಾಗವನ್ನು ಅಥವಾ ತಾಲ್ಲೂಕು ಮಟ್ಟದಲ್ಲಿ ಆಯುಷ್ ಆಸ್ಪತ್ರೆಗೆ ಎರಡು ಎಕರೆ ಭೂಮಿಯನ್ನು ಅಥವಾ ಜಿಲ್ಲಾ ಮಟ್ಟದಲ್ಲಿ ನಾಲ್ಕು ಎಕರೆ ಭೂಮಿಯನ್ನು ದಾನಿ ನೀಡಿದರೆ, ಸರ್ಕಾರವು ಕಟ್ಟಡಕ್ಕೆ ದಾನಿಗಳ ಹೆಸರಿಡುತ್ತದೆ ಎಂದು ಅದು ಹೇಳುತ್ತದೆ. ಇದು ಒಂದು ಬಾರಿಯ ದಾನವಾಗಿದ್ದು, ಭೂಮಿಯನ್ನು ಹಿಂತಿರುಗಿಸಲಾಗುವುದಿಲ್ಲ ಎಂದು ಸರ್ಕಾರದ ಆದೇಶ ಹೇಳುತ್ತದೆ.

ದಾನಿಗಳು ಗ್ರಾಮೀಣ ಪ್ರದೇಶಗಳಲ್ಲಿ ಕಟ್ಟಡದ ಅರ್ಧದಷ್ಟು ಮೌಲ್ಯವನ್ನು ಅಥವಾ ನಗರ ಪ್ರದೇಶಗಳಲ್ಲಿ ಕಟ್ಟಡದ ಮೌಲ್ಯದ ನಾಲ್ಕನೇ ಒಂದು ಭಾಗವನ್ನು ದಾನ ಮಾಡಬೇಕು. ಇದರಿಂದ ಅವರ ಹೆಸರುಗಳು ಚಿಕಿತ್ಸಾಲಯಗಳಲ್ಲಿ ಕಾಣಿಸಿಕೊಳ್ಳುತ್ತವೆ.

ಇಲಾಖೆಯು ಇತರ ಕೊಡುಗೆಗಳನ್ನು ಸಹ ಹೊಂದಿದೆ. ದಾನಿಯು ಸಂಪೂರ್ಣ ವಾರ್ಡ್ ಅಥವಾ ಕೋಣೆಯ ನಿರ್ಮಾಣ ವೆಚ್ಚವನ್ನು ನೀಡಿದರೆ, ಅದಕ್ಕೆ ಅವರ ಹೆಸರಿಡಲಾಗುತ್ತದೆ. ಒಬ್ಬ ವ್ಯಕ್ತಿಯು ಉಪಕರಣಗಳನ್ನು ದಾನ ಮಾಡಿದರೆ, ದಾನಿಯ ಹೆಸರು ಉಪಕರಣಗಳ ಮೇಲೆ ಇರುತ್ತದೆ.

ಒಂದು ಲಕ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಮೊತ್ತವನ್ನು ದಾನಿ ನೀಡಿದರೆ, ಸೂಚಿಸಲಾದ ಹೆಸರನ್ನು ಆಸ್ಪತ್ರೆ ಮತ್ತು ಚಿಕಿತ್ಸಾಲಯದ ನಾಮಫಲಕದಲ್ಲಿ ಉಲ್ಲೇಖಿಸಲಾಗುತ್ತದೆ ಎಂದು ಅದು ಹೇಳಿದೆ. ಇಲಾಖೆಯು ದಾಖಲೆಗಳನ್ನು ಪರಿಶೀಲಿಸುತ್ತದೆ. ಯಾವುದೇ ಕಾನೂನು ತೊಡಕುಗಳಿಲ್ಲದಿದ್ದರೆ, ಕಟ್ಟಡ ಅಥವಾ ಆಸ್ತಿಯನ್ನು ದಾನಿಯ ಹೆಸರಿಡಲಾಗುತ್ತದೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.