ಶಿವಮೊಗ್ಗ: ದೋಷಪೂರಿತ ಎಲೆಕ್ಟ್ರಿಕ್ ಕಾರ್ ಬ್ಯಾಟರಿಯನ್ನು ಸ್ವಂತ ವೆಚ್ಚದಲ್ಲಿ ಬದಲಾಯಿಸುವಂತೆ ಮತ್ತು ಸೇವೆಯಲ್ಲಿ ಕೊರತೆ ಕಂಡುಬಂದ ಹಿನ್ನೆಲೆಯಲ್ಲಿ ಗ್ರಾಹಕರಿಗೆ ಪರಿಹಾರ ನೀಡುವಂತೆ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗವು ಹರಿಯಾಣದ ಎಂಜಿ ಮೋಟಾರ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಮತ್ತು ಶಿವಮೊಗ್ಗದ ಕಾವೇರಿ ಮೋಟಾರ್ಸ್ಗೆ ಆದೇಶ ನೀಡಿದೆ.
ಏನಿದು ಕೇಸು?
ಸಾತ್ವಿಕ್ ಬಿನ್ ನಾಗೇಶ್ವರ ರಾವ್ ಎಂಬುವವರು 2023 ರಲ್ಲಿ ಕಾವೇರಿ ಮೋಟಾರ್ಸ್ನಿಂದ 10,35,497 ರೂಪಾಯಿಗೆ ಎಲೆಕ್ಟ್ರಿಕ್ ಕಾರನ್ನು ಖರೀದಿಸಿದ್ದರು. ಇದರ ಜೊತೆಗೆ, ಮೂರು ವರ್ಷಗಳ ಇ-ಶೀಲ್ಡ್ ನಿರ್ವಹಣಾ ಯೋಜನೆಗಾಗಿ ಅವರು 8,700 ರೂಪಾಯಿಗಳನ್ನು ಪಾವತಿಸಿದ್ದರು. ಕಾರು ಖರೀದಿಸಿದ 15 ದಿನಗಳಲ್ಲಿ, ಕಾರಿನ ಬ್ಯಾಟರಿ ವೇಗವಾಗಿ ಖಾಲಿಯಾಗುವುದನ್ನು ಅವರು ಗಮನಿಸಿದರು. ಕಾವೇರಿ ಮೋಟಾರ್ಸ್ಗೆ ಮಾಹಿತಿ ನೀಡಿದ ನಂತರ, ಡೀಲರ್ಶಿಪ್ ಬ್ಯಾಟರಿಯನ್ನು ಬದಲಾಯಿಸಿತು.
ಇದಾಗಿ, ಸುಮಾರು ಆರು ತಿಂಗಳ ನಂತರ ಸಮಸ್ಯೆ ಮರುಕಳಿಸಿತು. ರಾವ್ ಅನೇಕ ಬಾರಿ ದೂರು ಸಲ್ಲಿಸಿದರು. ಆದರೆ ಸಮಸ್ಯೆ ಬಗೆಹರಿಯಲಿಲ್ಲ. ಸೇವೆಯಲ್ಲಿನ ಕೊರತೆ ಮತ್ತು ಪರಿಹಾರವನ್ನು ಕೋರಿ ಗ್ರಾಹಕ ಆಯೋಗದ ಮುಂದೆ ಪ್ರಕರಣ ದಾಖಲಿಸಿದರು.
ಪ್ರಕರಣದ ವಿವರಗಳು ಮತ್ತು ದೂರುದಾರರು ಸಲ್ಲಿಸಿದ ದಾಖಲೆಗಳನ್ನು ಪರಿಶೀಲಿಸಿದ ನಂತರ, ಆಯೋಗವು ಪ್ರತಿವಾದಿಗಳಿಗೆ ನೋಟಿಸ್ ನೀಡಿ, ಆಕ್ಷೇಪಣೆಗಳನ್ನು ಸಲ್ಲಿಸಲು ಅವಕಾಶ ನೀಡಿತು. ಎಂಜಿ ಮೋಟಾರ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಮತ್ತು ಕಾವೇರಿ ಮೋಟಾರ್ಸ್ ಬ್ಯಾಟರಿ ಸಮಸ್ಯೆಯು ಉತ್ಪಾದನಾ ದೋಷವಲ್ಲ, ಬದಲಿಗೆ ದೂರುದಾರರು ಬಳಕೆದಾರರ ಕೈಪಿಡಿಯ ಪ್ರಕಾರ ವಾಹನವನ್ನು ಚಲಾಯಿಸದ ಪರಿಣಾಮ ಎಂದು ಪ್ರತಿವಾದಿಸಿದವು.
ಕಾರನ್ನು 10,000 ಕಿ.ಮೀ.ಗಿಂತ ಹೆಚ್ಚು ದೂರ ಓಡಿಸಲಾಗಿದ್ದು, ಅದು ಬದಲಿಗೆ ಅರ್ಹವಾಗಿಲ್ಲ ಎಂದು ಕಂಪೆನಿಗಳು ವಾದಿಸಿದವು. ತಮ್ಮ ಕಡೆಯಿಂದ ಯಾವುದೇ ಸೇವಾ ಕೊರತೆಯಾಗಿಲ್ಲ, ಹೀಗಾಗಿ ದೂರನ್ನು ವಜಾಗೊಳಿಸಬೇಕೆಂದು ಗ್ರಾಹಕ ನ್ಯಾಯಾಲಯ ಮುಂದೆ ವಾದ ಮಂಡಿಸಿದವು.
ಎರಡೂ ಕಡೆಯಿಂದ ಮಂಡಿಸಿದ ದಾಖಲೆಗಳು ಮತ್ತು ವಾದಗಳು ಸೇರಿದಂತೆ ಪುರಾವೆಗಳನ್ನು ಪರಿಶೀಲಿಸಿದ ನಂತರ, ಬ್ಯಾಟರಿ ನಿಜವಾಗಿಯೂ ದೋಷಪೂರಿತವಾಗಿದ್ದು, ಪ್ರತಿವಾದಿಗಳು ಹಲವಾರು ಅವಕಾಶಗಳಿದ್ದರೂ ರಿಪೇರಿ ಮಾಡಲು ವಿಫಲರಾಗಿದ್ದಾರೆ ಎಂದು ಆಯೋಗವು ನಿರ್ಧರಿಸಿತು. ಆಯೋಗವು ಇದನ್ನು ಸೇವಾ ಕೊರತೆಯ ಪ್ರಕರಣವೆಂದು ಕಂಡುಹಿಡಿದು ದೂರುದಾರರ ಪರವಾಗಿ ಭಾಗಶಃ ತೀರ್ಪು ನೀಡಿತು.
ಆದೇಶದ ದಿನಾಂಕದಿಂದ 45 ದಿನಗಳಲ್ಲಿ ದೋಷಪೂರಿತ ಬ್ಯಾಟರಿಯನ್ನು ದೋಷರಹಿತ ಬ್ಯಾಟರಿಯೊಂದಿಗೆ ಬದಲಾಯಿಸಲು ಎಂಜಿ ಮೋಟಾರ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಮತ್ತು ಕಾವೇರಿ ಮೋಟಾರ್ಸ್ಗೆ ಆದೇಶಿಸಿತು. ಹೆಚ್ಚುವರಿಯಾಗಿ, ದೂರುದಾರರಿಗೆ ಮಾನಸಿಕ ಕಿರುಕುಳ ನೀಡಿದ್ದಕ್ಕೆ 25,000 ರೂಪಾಯಿ ಮತ್ತು ಮೊಕದ್ದಮೆ ವೆಚ್ಚಕ್ಕಾಗಿ 10,000 ರೂಪಾಯಿ ಪರಿಹಾರ ನೀಡುವಂತೆ ಆಯೋಗವು ನಿರ್ದೇಶಿಸಿತು.
Advertisement
