ಬೆಂಗಳೂರು: ಹೆಚ್ಚು ಪ್ರವಾಸಿಗರನ್ನು ಆಕರ್ಷಿಸಲು, ಪ್ರವಾಸೋದ್ಯಮ ಇಲಾಖೆಯು ರಾಜ್ಯದಲ್ಲಿ ಕ್ರೀಡೆ ಮತ್ತು ಸಾಹಸ ಪ್ರವಾಸೋದ್ಯಮ ಕಾರ್ಯಕ್ರಮ ಪ್ರಾರಂಭಿಸಲಿದೆ.
ಇಲಾಖೆಯ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ನಂತರ ಮಾತನಾಡಿದ ಪ್ರವಾಸೋದ್ಯಮ ಸಚಿವ ಕೆ.ಜೆ. ಜಾರ್ಜ್, ಸೆಪ್ಟೆಂಬರ್ 29 ರಂದು ವಿಶ್ವ ಪ್ರವಾಸೋದ್ಯಮ ದಿನದ ಅಂಗವಾಗಿ 'ಆಕ್ಟಿವ್ ಕರ್ನಾಟಕ - ರನ್, ರೈಡ್, ಸರ್ಫ್, ಎಕ್ಸ್ಪ್ಲೋರ್' (Active Karnataka - Run, Ride, Surf, Explore) ಎಂಬ ಯೋಜನೆ ಪ್ರಾರಂಭಿಸಲಾಗುವುದು ಎಂದು ತಿಳಿಸಿದರು.
ರಾಜ್ಯದಲ್ಲಿ ನಡೆಯುವ ಪ್ರಮುಖ ಕ್ರೀಡಾಕೂಟಗಳಿಗೆ ಪ್ರವಾಸೋದ್ಯಮದ ಆಯಾಮವನ್ನು ನೀಡುವುದರ ಮೂಲಕ ಹೆಚ್ಚು ಪ್ರವಾಸಿಗರನ್ನು ಆಕರ್ಷಿಸುವುದು ಮತ್ತು ಸ್ಥಳೀಯ ಆರ್ಥಿಕತೆಯನ್ನು ಸುಧಾರಿಸುವುದು ಈ ಯೋಜನೆಯ ಉದ್ದೇಶವಾಗಿದೆ ಎಂದು ಅವರು ಹೇಳಿದರು.
ಈ ಯೋಜನೆಯನ್ನು ಹಂತ ಹಂತವಾಗಿ ಜಾರಿಗೆ ತರಲಾಗುವುದು. ಇದರ ಭಾಗವಾಗಿ, ಮ್ಯಾರಥಾನ್, ಸೈಕ್ಲೋಥಾನ್ ಮತ್ತು ಟ್ರಯಥ್ಲಾನ್ ಕಾರ್ಯಕ್ರಮಗಳಿಗಾಗಿ ಇಲಾಖೆಯು 'ಎನ್ಇಬಿ ಸ್ಪೋರ್ಟ್ಸ್' (NEB Sports) ಜೊತೆ ಒಪ್ಪಂದ ಮಾಡಿಕೊಳ್ಳಲಿದೆ ಎಂದು ಮಾಹಿತಿ ನೀಡಿದ್ದಾರೆ.
ಮೊದಲ ಹಂತದಲ್ಲಿ, ಇಲಾಖೆಯು ಮ್ಯಾರಥಾನ್, ಸೈಕ್ಲಿಂಗ್, ಟ್ರಯಥ್ಲಾನ್ ಮತ್ತು ಇತರ ಕ್ರೀಡಾಕೂಟಗಳನ್ನುಆಯೋಜಿಸಲಿದೆ. ಇದಕ್ಕಾಗಿ, ಪ್ರವಾಸಿಗರಿಗೆ 2-3 ದಿನಗಳ ಕಾರ್ಯಕ್ರಮಗಳನ್ನು ರೂಪಿಸಲಾಗುವುದು.
ಬೆಂಗಳೂರು, ಮೈಸೂರು, ಕರಾವಳಿ ಪ್ರದೇಶ ಮತ್ತು ಇತರ ಸ್ಥಳಗಳಲ್ಲಿ ನಡೆಯುವ ಕ್ರೀಡಾಕೂಟಗಳ ಜೊತೆಗೆ ವಸತಿ, ಸ್ಥಳೀಯ ಪಾಕಪದ್ಧತಿ, ಪರಂಪರೆ, ಸಂಸ್ಕೃತಿ ಮತ್ತು ಇತರ ಪ್ರವಾಸೋದ್ಯಮ ಇದರಲ್ಲಿ ಒಳಗೊಂಡಿರಲಿದೆ.
ಎರಡನೇ ಹಂತದಲ್ಲಿ, ಸರ್ಫಿಂಗ್, ಕಯಾಕಿಂಗ್, ಟ್ರಯಲ್ ರನ್ನಿಂಗ್, ಸೈಕ್ಲಿಂಗ್ ಮತ್ತು ಇತರ ಸಾಹಸ ಚಟುವಟಿಕೆಗಳನ್ನು ಆಯೋಜಿಸಲಾಗುವುದು.
ಪ್ರತಿಯೊಂದು ಪ್ರಮುಖ ಕ್ರೀಡಾಕೂಟವನ್ನು ಆಯಾ ಸ್ಥಳದ ಪ್ರವಾಸೋದ್ಯಮ ಅನುಭವದೊಂದಿಗೆ ಜೋಡಿಸುವುದು ಇದರ ಉದ್ದೇಶ ಎಂದು ಪ್ರವಾಸೋದ್ಯಮ ಇಲಾಖೆಯ ಕಾರ್ಯದರ್ಶಿ ರಾಮ್ ಪ್ರಸಾದ್ ಮನೋಹರ್ ತಿಳಿಸಿದರು. ಕರ್ನಾಟಕವನ್ನು ಕ್ರೀಡೆ ಮತ್ತು ಸಾಹಸ ಪ್ರವಾಸೋದ್ಯಮದ ಪ್ರಮುಖ ತಾಣವನ್ನಾಗಿ ರೂಪಿಸುವುದು ಇಲಾಖೆಯ ಗುರಿಯಾಗಿದೆ ಎಂದು ಅಧಿಕಾರಿಗಳು ಹೇಳಿದರು.
