ಪ್ಯಾನ್ ಕಾರ್ಡ್

ಪ್ಯಾನ್(ಪರ್ಮನೆಂಟ್ ಅಕೌಂಟ್ ನಂಬರ್) ಕಾರ್ಡ್ ಕಳೆದುಹೋದರೆ ಆಗುವ ಕಿರಿಕಿರಿ ಅಷ್ಟಿಷ್ಟಲ್ಲ. ಹೊಸ ಪ್ಯಾನ್‌ಗೆ ಅಪ್ಲೈ ಮಾಡುವ ಅವಕಾಶವಿದ್ದರೂ ಅನೇಕರು ಚಿಂತೆ ಮಾಡಿಕೊಂಡೇ ಕಾಲಕಳೆಯುತ್ತಾರೆ. ಅಂಥವರಿಗೆ ಆನ್‌ಲೈನ್‌ನಲ್ಲೇ ಸುಲಭವಾಗಿ ಪ್ಯಾನ್‌ಗೆ ಅರ್ಜಿ ಹಾಕುವುದು ಹೇಗೆ ಎಂಬ ಮಾಹಿತಿ.

-ಆದಾಯ ತೆರಿಗೆ ಪ್ಯಾನ್ ಸೇವಾ ಘಟಕದ ವೆಬ್‌ಸೈಟ್ https://tin.nsdl.com/pan/ ಗೆ ಭೇಟಿನೀಡಿ.
-ಈಗ ಹೋಂ ಪೇಜ್ ಕಾಣುತ್ತದೆ. ಇಲ್ಲಿ ವಿವಿಧ ಆಯ್ಕೆಗಳಿರುತ್ತವೆ. ಉದಾ: ಹೊಸ ಪ್ಯಾನ್‌ಗೆ ಅರ್ಜಿ, ತನಿಖೆ ಮತ್ತು ಟ್ರ್ಯಾಕಿಂಗ್ ಸ್ಟೇಟಸ್, ಪ್ಯಾನ್ ಕಾರ್ಡ್ ಮರುಮುದ್ರಣ, ಪ್ಯಾನ್ ವಿವರಗಳಲ್ಲಿ ಬದಲಾವಣೆ ಮತ್ತು ತಿದ್ದುಪಡಿ ಇತ್ಯಾದಿ. ನಿಮಗೆ ಬೇಕಾದದ್ದನ್ನು ನೀವು ಆಯ್ಕೆ ಮಾಡಿಕೊಳ್ಳಿ.
-ಹೊಸ ಪ್ಯಾನ್‌ಗೆ ಅರ್ಜಿ ಹಾಕಬೇಕೆಂದರೆ, ಫಾರ್ಮ್ 49ಎ ಅಗತ್ಯವಿದೆ. https://tin.nsdl.com/pan2/servlet/NewPanApp ಗೆ ಭೇಟಿ ನೀಡಿ ಫಾರ್ಮ್ 49ಎ ಯನ್ನು ಆನ್‌ಲೈನ್‌ನಲ್ಲೇ ಭರ್ತಿ ಮಾಡಿ. ವಿವರಗಳನ್ನು ತುಂಬಿ ಆನ್‌ಲೈನ್‌ನಲ್ಲೇ ಸಬ್ಮಿಟ್ ಮಾಡಿ.
-ಯಶಸ್ವಿಯಾಗಿ ಅರ್ಜಿ ಸಲ್ಲಿಸಿದ ಬಳಿಕ ಅಲ್ಲಿ ಸ್ವೀಕೃತಿ (ಅಕ್ನಾಲೆಜ್‌ಮೆಂಟ್) ಪತ್ರ ಕಾಣಸಿಗುತ್ತದೆ. ಇದರಲ್ಲಿ ವಿಶಿಷ್ಟವಾದ 15 ಅಂಕಿಗಳ ಸ್ವೀಕೃತಿ ಸಂಖ್ಯೆ ಇರುತ್ತದೆ. ಅದನ್ನು ಸೇವ್ ಮಾಡಿಕೊಂಡು, ಪ್ರಿಂಟ್ ಔಟ್ ತೆಗೆದಿಟ್ಟುಕೊಳ್ಳಿ.
-ಸ್ವೀಕೃತಿ ಫಾರ್ಮ್ ಅನ್ನು ಆದಾಯ ತೆರಿಗೆ ಇಲಾಖೆಗೆ ಕಳುಹಿಸಬೇಕು. ಅದರ ಜತೆಗೆ ಅಡ್ರೆಸ್ ಪ್ರೂಫ್, ಗುರುತಿನ ಪ್ರೂಫ್ ಅನ್ನು ಲಗತ್ತಿಸಬೇಕು. ಈ ಪ್ರೂಫ್‌ನಲ್ಲಿರುವ ಹೆಸರು ಪ್ಯಾನ್ ಅರ್ಜಿಯಲ್ಲಿದ್ದಂತೆಯೇ ಇರಬೇಕು. ಫಾರ್ಮ್ 49ಎ ಭರ್ತಿ ಮಾಡುವಾಗ ಇದನ್ನು ನೆನಪಿನಲ್ಲಿಟ್ಟುಕೊಳ್ಳಿ.
- ಸ್ವೀಕೃತಿ ಫಾರ್ಮ್‌ನಲ್ಲಿ ನಿಮ್ಮ 2 ಇತ್ತೀಚೆಗಿನ ಕಲರ್ ಫೋಟೋ ಅಂಟಿಸಿ. ಅಗತ್ಯ ಸ್ಥಳಗಳಲ್ಲಿ ಸಹಿ ಹಾಕಿ.
- ನಿಮ್ಮ ಸಂವಹನ ವಿಳಾಸ ಭಾರತದಲ್ಲಿಯೇ ಇದ್ದರೆ, ಪ್ಯಾನ್ ಅರ್ಜಿಯ ಜತೆ 96 ಪಾವತಿಸಬೇಕಾಗುತ್ತದೆ. ಚೆಕ್, ಡಿಡಿ, ಇಂಟರ್ನೆಟ್ ಬ್ಯಾಂಕಿಂಗ್, ಕ್ರೆಡಿಟ್/ಡೆಬಿಟ್ ಕಾರ್ಡ್ ಮೂಲಕ ಹಣ ಪಾವತಿ ಮಾಡಬಹುದು. ಸಂವಹನ ವಿಳಾಸ ಭಾರತದ ಹೊರಗಿದ್ದರೆ, ನೀವು ಪಾವತಿಸಬೇಕಾದ ಹಣ 962. ಅದೂ ಡಿಡಿ ಮೂಲಕವೇ. ಇಂಟರ್ನೆಟ್ ಬ್ಯಾಂಕಿಂಗ್/ಕ್ರೆಡಿಟ್/ಡೆಬಿಟ್ ಕಾರ್ಡ್ ಮೂಲಕ ಹಣ ಪಾವತಿಸುವುದಾದರೆ ಆನ್‌ಲೈನ್‌ನಲ್ಲಿ ಅರ್ಜಿ ಭರ್ತಿ ಮಾಡುವಾಗಲೇ ಪಾವತಿಸಿ. ಆಗ ಪಾವತಿಯ ಸ್ವೀಕೃತಿ ಪತ್ರ ದೊರೆಯುತ್ತದೆ. ಅದನ್ನು ಪ್ರಿಂಟ್‌ಔಟ್ ತೆಗೆದು ಸ್ವೀಕೃತಿ ಫಾರ್ಮ್ ಜತೆ ಲಗತ್ತಿಸಬೇಕು.
-ಸ್ವೀಕೃತಿ ಫಾರ್ಮ್ ಅನ್ನು ಆನ್‌ಲೈನ್ ಅರ್ಜಿ ಸಲ್ಲಿಸಿದ ದಿನಾಂಕದಿಂದ 15 ದಿನಗಳೊಳಗಾಗಿ ಪುಣೆಯಲ್ಲಿನ ಎನ್‌ಎಸ್‌ಡಿಎಲ್‌ಗೆ ಕಳುಹಿಸಿ. ಲಕೋಟೆಯಲ್ಲಿ "APPLICATION FOR PAN- ಅರ್ಜಿ ಸಂಖ್ಯೆ......' ಬರೆದಿರಬೇಕು.ಪಾವತಿ ರಿಸೀಪ್ಟ್ ದೊರೆತ ಬಳಿಕ ಎನ್‌ಎಸ್‌ಡಿಎಲ್‌ನಲ್ಲಿ ಅರ್ಜಿಗಳನ್ನು ಪ್ರೊಸೆಸ್ ಮಾಡಲಾಗುತ್ತದೆ.
- ಪ್ಯಾನ್ ಅರ್ಜಿ ಸಲ್ಲಿಸುವ ವೇಳೆ ವೆಬ್‌ಸೈಟ್‌ನಲ್ಲೇ ನಿಮಗೆ ಅದರ ಪ್ರಕ್ರಿಯೆಯನ್ನು ಸರಳವಾಗಿ ವಿವರಿಸಿರಲಾಗುತ್ತದೆ. ಆನ್‌ಲೈನ್‌ನಲ್ಲೇ ನಿಮ್ಮ ಅರ್ಜಿಯ ಸ್ಟೇಟಸ್ ಅನ್ನು ಪರಿಶೀಲಿಸಬಹುದು. ಎನ್‌ಎಸ್‌ಡಿಎಲ್‌ಗೆ ಪತ್ರ ಬರೆದು ಅಥವಾ SMS NSDLPANAcknowledgement No.ಬರೆದು 57575ಕ್ಕೆ ಎಸ್ಸೆಮ್ಮೆಸ್ ಕೂಡ ಕಳುಹಿಸಿ ಮಾಹಿತಿ ಪಡೆಯಬಹುದು.