ನವದೆಹಲಿ: ಆಸ್ತಿ ಖರೀದಿಸುವವರಿಗೆ ಕೇಂದ್ರ ಸರ್ಕಾರ ಸಿಹಿಸುದ್ದಿ ನೀಡಿದೆ.ದೀರ್ಘಕಾಲದಿಂದ ನನೆಗುದಿಗೆ ಬಿದ್ದಿದ್ದ ರಿಯಲ್ ಎಸ್ಟೇಟ್ ತಿದ್ದುಪಡಿ ವಿಧೇಯಕವನ್ನು ಕೇಂದ್ರ ಸಂಪುಟ ಮಂಗಳವಾರ ಅಂಗೀಕರಿಸಿದೆ. ಅದರಂತೆ, ಎಲ್ಲ ವಾಣಿಜ್ಯ ಮತ್ತು ಇತರೆ ರಿಯಲ್ ಎಸ್ಟೇಟ್ ಯೋಜನೆಗಳು, ಬ್ರೋಕರ್‍ಗಳು ಇದರಡಿ ಬರಲಿದೆ. ಈ ಮೂಲಕ ಗ್ರಾಹಕರ ಹಿತ ರಕ್ಷಿಸುವುದು ಸರ್ಕಾರದ ಉದ್ದೇಶ. ಬೇಜವಾಬ್ದಾರಿ ಬಿಲ್ಡರ್‍ಗಳಿಗೆ ಜೈಲು ಶಿಕ್ಷೆ, ದಂಡ ಸೇರಿದಂತೆ ಹಲವು ಕಠಿಣ ಕ್ರಮಗಳನ್ನು ಕೈಗೊಳ್ಳುವ ಪ್ರಸ್ತಾಪ ಈ ವಿಧೇಯಕದಲ್ಲಿದೆ. ಎಲ್ಲ ಬಿಲ್ಡರ್‍ಗಳೂ ಖರೀದಿದಾರರಿಂದ ಪಡೆಯುವ ಶೇ.50ರಷ್ಟು ಹಣವನ್ನು ಎಸ್ಕ್ರೋ ಖಾತೆಯಲ್ಲಿ ಇರಿಸಿ, ಆ ಹಣದಿಂದಲೇ ನಿರ್ಮಾಣ ವೆಚ್ಚವನ್ನು ಭರಿಸುವುದನ್ನು ಕಡ್ಡಾಯಗೊಳಿಸುವಂತಹ ತಿದ್ದುಪಡಿಯನ್ನೂ ತರಲಾಗಿದೆ. ಇದು ವಾಣಿಜ್ಯ ರಿಯಲ್ ಎಸ್ಟೇಟ್‍ಗೂ ಅನ್ವಯವಾಗಲಿದೆ. ಜತೆಗೆ, ಇನ್ನು ಮುಂದೆ ಪ್ರೋಮೋಟರ್‍ಗಳು ಕಟ್ಟಡದ ಯೋಜನೆ ಹಾಗೂ ರಚನೆಯ ವಿನ್ಯಾಸವನ್ನು ಬದಲಿಸಲು ಮೂರನೇ ಎರಡರಷ್ಟು ಗ್ರಾಹಕರ ಒಪ್ಪಿಗೆ ಪಡೆಯಲೇಬೇಕಾಗಿಲ್ಲ. ರಾಜ್ಯಗಳು ಇದಕ್ಕೆ ಸಂಬಂಧಿಸಿದ ನಿಯಮಾವಳಿಗಳನ್ನು ಒಂದು ವರ್ಷದೊಳಗಾಗಿ ಜಾರಿ ಮಾಡಬೇಕು ಎಂದು ವಿಧೇಯಕ ಹೇಳುತ್ತದೆ.
